༧གོང་ས་རྒྱལ་བ་རིན་པོ་ཆེ་མཆོག་གིས་ལྷོ་ཨ་ཧྥི་རི་ཀའི་ཛུ་ལུ་ (Zulu) ཡི་རྒྱལ་སྲས་དང་གྲོས་ཚོགས་འཐུས་མི་ཟུར་པ་མང་གོ་སུ་ཐུ་ (Prince Mangosuthu Buthelezi) མཆོག་སྐུ་གྲོངས་པར་ཐུགས་གསོའི་གསུང་འཕྲིན་བསྩལ།
ཟླ་འདིའི་ཕྱི་ཚེས་ ༩ ཉིན་ལྷོ་ཨ་ཧྥི་རི་ཀའི་གྲོས་ཚོགས་འཐུས་མི་དང་རྒྱལ་སྲས་མང་གོ་སུ་ཐུ་མཆོག་སྙུང་གཞིའི་རྐྱེན་གྱིས་དགུང་ལོ་ ༩༥ ཐོག་སྐུ་གྲོངས་ཡོད་པ་དང་། ཁ་སང་ཕྱི་ཚེས་ ༡༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱལ་སྲས་ཁོང་གི་ནང་མི་རྣམས་ལ་ཐུགས་གསོའི་གསུང་འཕྲིན་སྩལ་བའི་ནང་། ངོས་རང་གིས་ཁོང་ཐེངས་ཁ་ཤས་མཇལ་རྒྱུ་བྱུང་བར་དགའ་པོ་བྱུང་། ཁོང་ནི་ངོས་རང་དང་བོད་མི་རྣམས་ཀྱི་གྲོགས་པོ་ཡག་ཤོས་ཤིག་ཡིན། ཁོང་གིས་ལོ་ངོ་ ༩༥ བར་མི་ཚེ་དོན་དང་ལྡན་པ་ཞིག་བསྐྱལ་ཡོད་པ་རེད། རྒྱལ་སྲས་ཁོང་གིས་ང་ཚོ་བོད་མི་རྣམས་ཀྱི་ཆེ་མཐོང་དང་རང་དབང་གི་དོན་དུ་ཐུགས་འཁུར་དང་རྒྱབ་སྐྱོར་གནང་བར་ཧ་ཅང་བཀའ་དྲིན་ཆེན་པོ་ཡིན། ཞེས་གསུངས་འདུག
ཕྱི་ལོ་ ༡༩༢༨ ཟླ་ ༨ ཚེས་ ༢༨ ཉིན་རྒྱལ་སྲས་མང་གོ་སུ་ཐུ་ (Mangosuthu Buthelezi) མཆོག་ལྷོ་ཨ་ཧྥི་རི་ཀའི་མ་ལ་བྷ་ཐི་ནི་ (Mahlabathini) གྲོང་སྡེ་རུ་སྐུ་འཁྲུངས་པ་དང་། ཁོང་ནི་ལྷོ་ཨ་ཧྥི་རི་ཀའི་ཆབ་སྲིད་པ་དང་ཛུ་ལུའི་རྒྱལ་སྲས་ཤིག་ཡིན་ལ། ལྷོ་ཨ་ཧྥི་རི་ཀའི་གྲོས་ཚོགས་འཐུས་མི་རྒན་ཤོས་ཤིག་ཀྱང་ཆགས་ཀྱི་ཡོད་པ་རེད། ཕྱི་ལོ་ ༡༩༩༤ ནས་ ༢༠༠༤ བར་དུ་ལྷོ་ཨ་ཧྥི་རི་ཀའི་ནང་སྲིད་ལྷན་ཁང་གི་བློན་ཆེན་གྱི་ཕྱག་ལས་གནང་ཡོད་པ་མ་ཟད། ཕྱི་ལོ་ ༡༩༥༤ ནས་ ༢༠༢༣ བར་དུ་ཛུ་ལུ་རྒྱལ་པོའི་ཁྱིམ་རྒྱུད་ཀྱི་སྲིད་བློན་གྱི་ཕྱག་ལས་གནང་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
