འདི་ལོའི་ཕྱི་ཟླ་ ༣ ནང་ཞི་ཅིན་ཕིན་གྱིས་བསྐོ་གཞག་བྱས་པའི་རྒྱ་ནག་གི་རྒྱལ་སྲུང་བློན་ཆེན་ལི་ཧྲན་ཧྥོའུ་ཟེར་བ་མཐོང་ཐོས་མེད་པར་གྱུར་ཏེ་བདུན་ཕྲག་གཉིས་ཕྱིན་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་སྤེལ་བའི་གནས་ཚུལ་ལྟར་ན། ད་ལྟའི་ཆར་རྒྱ་ནག་གི་རྒྱལ་སྲུང་བློན་ཆེན་ལི་ཧྲན་ཧྥོའུ་ (Li Shangfu) ཟེར་བ་གར་སོང་ཆ་མེད་དུ་གྱུར་ནས་བདུན་ཕྲག་གཉིས་ལྷག་འགྲོ་ཡི་ཡོད་ཅིང་། དེ་ནི་ཉེ་ལམ་ནས་རྒྱ་ནག་དམར་ཤོག་ཚོགས་པའི་དཔོན་རིགས་ནང་ཁུལ་གྱི་གོ་གནས་བརྗེ་བསྒྱུར་དང་འབྲེལ། རྒྱ་ནག་མི་དམངས་བཅིངས་གྲོལ་དམག་གི་མགོ་འཁྲིད་ཁག་ཅིག་ལ་ལྐོག་ཟ་རུལ་སུངས་ཀྱི་ཞིབ་དཔྱོད་བྱས་པའི་རྒྱུ་རྐྱེན་ལ་བརྟེན་ནས་བྱུང་བ་དབྱེ་ཞིབ་པས་རྗོད་ཀྱིན་འདུག
དེ་འབྲེལ་རྒྱ་གར་གྱི་ (wion) གསར་ཁང་གི་གནས་ཚུལ་ནང་། ཕྱི་ཟླ་ ༨ ཚེས་ ༢༩ ཉིན་རྒྱ་ནག་གི་རྒྱལ་ས་པེ་ཅིན་དུ་འཚོགས་པའི་རྒྱ་ནག་དང་ཨ་ཧྥི་རི་ཁའི་ཞི་བདེ་དང་བདེ་འཇགས་གླེང་སྟེགས་སྐབས་གསུམ་པའི་སྟེང་ལི་ཧྲན་ཧྥོའུ་ཟེར་བ་ཁོས་གླེང་སྟེགས་དེའི་གཏམ་བཤད་གཙོ་བོ་སྤེལ་ཡོད་ཀྱང་། དེའི་རྗེས་ནས་ལི་ཧྲན་ཧྥོའུ་རྒྱལ་སྲུང་དང་འབྲེལ་བའི་གཞུང་འབྲེལ་གྱི་ཚོགས་འདུ་སོགས་སྤྱི་དམངས་ཀྱི་མཐོང་ས་ནས་མེད་པར་གྱུར་ཡོད་པ་མ་ཟད། ཉེ་ལམ་རྒྱ་ནག་གི་དཔོན་རིགས་ཁག་ཅིག་གི་གོ་གནས་མེད་པར་བཟོས་པ་དང་གར་སོང་ཆ་མེད་དུ་གྱུར་བའི་གནད་དོན་དང་འབྲེལ་ནས། ལི་ཧྲན་ཧྥོའུ་ཡི་ད་ལྟའི་གནས་སྟངས་ཐད་ཚོད་དཔག་འདྲ་མིན་བཤད་ཀྱི་ཡོད་འདུག
ཕྱི་ཟླ་ ༨ ཚེས་ ༡ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས་བཅིངས་གྲོལ་དམག་གི་མེ་ཤུགས་འཕུར་མདའི་དམག་སྤྱི་ལི་ (Li Yuchao) དང་དམག་སྤྱི་གཞོན་པ་ཀྲང་ཀྲན་ཀྲོང་(Zhang Zhenzhong) དང་འབྲེལ་ཡོད་དཔོན་རིགས་ལིའུ་(Liu Guangbin) བཅས་ལ་ལྐོག་ས་རུལ་སུངས་ཀྱི་ཉེས་མིང་འོག་ནས་གོ་གནས་མེད་པར་བཟོས་ཏེ། ད་ལྟ་ད་དུང་ཡང་ཁོ་ཚོའི་གནས་སྟངས་གོ་མེད་ཚོར་མེད་དུ་གྱུར་ཡོད་པ་དང་། དབྱེ་ཞིབ་པ་ཁག་ཅིག་གིས་ལི་ཧྲན་ཧྥོའུ་མི་དམངས་ཀྱི་མདུན་སྔར་མི་མཐོང་བར་གྱུར་བའི་གནད་དོན་དེ། བཅིངས་གྲོལ་དམག་གི་དམག་སྤྱི་དེ་དག་དང་འབྲེལ་བ་ཡོད་སྐོར་བརྗོད་འདུག རྒྱུ་མཚན་ནི་ལི་ཧྲན་ཧྥོའུ་ཕྱི་ལོ་ ༢༠༡༧ ནས་ ༢༠༢༢ བར་བཅིངས་གྲོལ་དམག་གི་གོ་མཚོན་མ་ལག་གཏོང་ལེན་དང་ཉར་ཚགས་སྡེ་ཚན་གྱི་མགོ་འཁྲིད་ཡིན་པས་ཡིན་པ་རེད། འོན་ཀྱང་། བཅིངས་གྲོལ་དམག་གི་དྲ་ཐོག་ཏུ་ལི་ཧྲན་ཧྥོའུ་ཡིས་གོ་མཚོན་མ་ལག་དང་འབྲེལ་ནས་ནག་ཉེས་བསགས་པའི་གནས་ཚུལ་གང་ཡང་སྤེལ་མི་འདུག
གསར་འགྱུར་བརྒྱུད་ལམ་ཁག་ཅིག་གིས། ཉེ་ལམ་རྒྱལ་ཁབ་ཉི་ཤུའི་ཚོགས་ཆེན་སྟེང་ཞི་ཅིན་ཕིན་མཉམ་ཞུགས་མི་བྱེད་དོན་ནི། ད་ལྟ་ལི་ཧྲན་ཧྥོའི་མཐོང་ཐོས་མེད་པར་གྱུར་བའི་གནད་དོན་ལྟ་བུ་རྒྱ་ནག་གི་དཔོན་རིགས་ནང་ཁུལ་གྱི་ཆབ་སྲིད་ལ་རྙོག་དྲ་ཆེ་ཁར། རྒྱ་ནག་གི་དཔལ་འབྱོར་ཉམས་རྒུད་དང་གཞོན་སྐྱེས་ཚོར་ལས་ཀའི་གོ་སྐབས་རག་གི་མེད་པ་སོགས་རྒྱུ་རྐྱེན་འདྲ་མིན་ཞིག་གི་རྐྱེན་ཡིན་སྐོར་བརྗོད་འདུག
ལི་ཧྲན་ཧྥོའི་མཐོང་ཐོས་མེད་པར་གྱུར་བའི་གནད་དོན་དེ་ཐོག་མར་ཉི་ཧོང་དུ་ཡོད་པའི་ཨ་རིའི་གཞུང་ཚབ་པ་རཱམ་ཨེ་མཱ་ནོལ་ (Rahm Emanuel) གྱིས་ཊུ་ཝེ་དྲ་ཚིགས་སྟེང་སྤེལ་ཞིང་། ཁོས་ད་ལྟ་ཞི་ཅིན་ཕིན་གྱི་འཛིན་སྐྱོང་བློན་ཆེན་འཁོར་ཚོགས་ནང་ཐོག་མར་ཕྱི་སྲིད་བློན་ཆེན་ཆིན་གཱང་ནས་མགོ་བརྩམས་ཏེ། མེ་ཤུགས་འཕུར་མདའི་དམག་སྤྱི་ཆེན་མོ་གཉིས་དང་འབྲེལ་ཡོད་དཔོན་རིགས་གཅིག་དང་། ད་ལྟ་རྒྱལ་སྲུང་བློན་ཆེན་ལི་ཧྲན་ཧྥོའུ་བཅས་རིམ་བཞིན་གོ་མེད་ཚོར་མེད་དང་མཐོང་ཐོས་མེད་པར་འགྱུར་བཞིན་ཡོད་སྐོར་བརྗོད་འདུག་ལ། ཕྱི་སྲིད་བློན་ཆེན་ཟུར་པ་ཆིན་གཱང་དང་མེ་ཤུགས་འཕུར་མདའི་དམག་སྤྱི་ཆེན་མོ་ལི་ (Li Yuchao) དང་དམག་སྤྱི་གཞོན་པ་ཀྲང་ཀྲན་ཀྲོང་(Zhang Zhenzhong) བཅས་ནི་ཐད་ཀར་ཞི་ཅིན་ཕིན་གྱིས་བསྐོ་གཞག་བྱས་ཡོད་པ་དང་། ཉེ་ལམ་ལྐོག་ཟ་རུལ་སུངས་ཀྱི་ཉེས་མིང་འོག་ནས་གོ་གནས་མེད་པར་བཟོས་རྗེས་གར་སོང་ཆ་མེད་དུ་གྱུར་ཡོད།
ད་ལྟ་མཐོང་ཐོས་མེད་པར་གྱུར་ཏེ་བདུན་ཕྲག་གཉིས་ཙམ་འགྲོ་བཞིན་པའི་ལི་ཧྲན་ཧྥོའུ་ནི་ད་ལྟ་རང་ལོ་ ༦༤ ཡིན་ཞིང་། རྒྱ་ནག་སི་ཁྲོན་ཞིང་ཆེན་ཁྲི་ཏུའུ་ནས་ཡིན། འདི་ལོའི་ཕྱི་ཟླ་ ༣ ནང་རྒྱ་ནག་གི་རྒྱལ་སྲུང་བློན་ཆེན་དུ་བསྐོ་གཞག་བྱས་ཡོད། ཁོས་འདས་པའི་ལོ་ངོ་ ༣༡ རིང་རྒྱ་ནག་གི་འཁོར་སྐར་ཞིབ་འཇུག་ལྟེ་གནས་ཁང་དུ་དང་གཞན་ཡང་དབུས་དམག་སྲིད་ལྷན་ཁང་། དེ་བཞིན་མི་དམངས་བཅིངས་གྲོལ་དམག་ཁོངས་སོགས་སུ་ལས་ཀ་བྱས་མྱོང་འདུག
གསར་འགོད་པ། སྐལ་བཟང་སྦྱིན་པ།
རྩོམ་སྒྲིག་པ། སྐལ་བཟང་སྦྱིན་པ།
