དེ་རིང་ཕྱི་ཚེས་ ༢༠ ཉིན་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་མཁན་པོ་མཁྱེན་རབ་བསྟན་འཛིན་མཆོག་གི་སློབ་མ་དང་དད་ལྡན་པ་ཁག་ཅིག་ལ་མཇལ་ཁ་དང་བཀའ་སློབ་བསྩལ།
དེ་ཡང་༧གོང་ས་རྒྱལ་བ་རིན་པོ་ཆེ་མཆོག་གིས། མཁན་པོ་མཁྱེན་རབ་བསྟན་འཛིན་ལགས་ངོས་ལ་ཡི་གེ་སློབ་མཁན་རེད། ཞེ་དྲགས་བཀའ་དྲིན་ཆེན་པོ་ཡིན། ངོས་ལ་བསླབ་བྱ་ཞེ་དྲགས་རྒྱག་གི་རེད། ངོས་ཀྱིས་འཚུབ་པོ་བྱེད་དུས་ཞེ་དྲགས་འཚུབ་པོ་མ་བྱེད་གསུང་གི་རེད། མཁན་པོ་དམ་པ་དཔེ་བཀའ་དྲིན་ཆེན་པོ་རེད། ངོས་རང་ཆུང་དུས་ནས་འབྲེལ་བ་ཆགས་བསྡད་ཡོད་དུས། ཚེ་རབས་ནས་ཚེ་རབས་བར་དུ་འབྲེལ་བ་བྱེད་བསྡད་ཀྱི་རེད། མཁན་པོ་དམ་པའི་སྤུན་ཟླ་ཁྱོད་ཚོ་བློ་བདེ་བོ་བྱས་ནས་སྡོད། ང་ཚོ་ཚེ་རབས་ནས་ཚེ་རབས་ལས་བཟང་པོའི་འབྲེལ་བ་ཆགས་བསྡད་ཡོད་དུས། འབྲེལ་བ་ཚེ་རབས་ནས་ཚེ་རབས་བར་དུ་བསྡད་ཀྱི་རེད། ངོས་ཀྱིས་ནམ་རྒྱུན་ལྟར། ཇི་སྲིད་ནམ་མཁའ་གནས་པ་དང་།། འགྲོ་བ་ཇི་སྲིད་གནས་གྱུར་བ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག།། ཟེར་བའི་སྨོན་ལམ་རྒྱག་བཞིན་ཡོད་པ་རེད། སྐལ་བ་གྲངས་མེད་འདས་ཀྱང་ང་ཚོ་ངོ་ཤེས་བའི་འབྲེལ་བ་བསྡད་ཀྱི་རེད། ཁྱོད་ཚོ་བློ་བདེ་བོ་བྱས་ནས་སྡོད།
བོད་པ་གཞོན་སྐྱེས་ཚོ་ཆ་བཞག་ན། ང་ཚོ་བོད་མི་རིིགས་ཟེར་བ་དེ་ཆོས་དང་རིག་གཞུང་ཐོག་རྒྱ་ཆེན་པོ་དང་གཏིང་ཟབ་པོ་རེད། དེང་སང་ངོས་ལ་ཚན་རིག་པ་མང་པོ་ཐུག་གི་ཡོང་སྟེ་བསམ་བློའི་འགྲོ་སྟངས་སྐོར་ལ་འདྲི་མཁན་མང་པོ་ཡོང་གི་འདུག རྗེ་རིན་པོ་ཆེས། བསྟན་པ་རིན་ཆེན་མཆོག་གི་མ་ཁྱབ་པའམ། །ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག།།ཞེས་གསུངས་པ་ནང་བཞིན། ནུབ་ཕྱོགས་རྒྱལ་ཁབ་ཁག་ཏུ་བསྟན་པ་རིན་ཆེན་མཆོག་གིས་ཁྱབ་ཡོད་པ་མ་རེད། རྒྱ་བོད་ཧོར་གསུམ་དུ་སངས་རྒྱས་ཀྱི་ཆོས་ཁྱབ་ཡོད་ཀྱང་། བར་སྐབས་ཉམས་བསྡད་ཡོད་པ་རེད། དེང་སང་རྒྱ་ནག་ཏུ་ཆ་བཞག་ན་བོད་ཀྱི་ནང་ཆོས་ལ་དོ་སྣང་ཇེ་ཆེར་འགྲོ་བསྡད་ཀྱི་འདུག རྒྱ་རིགས་ནང་དུ་ངོས་ལ་དད་པ་བྱས་ཏེ། བོད་ཀྱི་ནང་ཆོས་ལ་དད་མོས་བྱེད་མཁན་ཇེ་མང་དུ་འགྲོ་བཞིན་ཡོད་པའི་དུས་ཚོད་ཞིག་ཏུ་སླེབས་བསྡད་ཡོད་པ་རེད། རྒྱ་གར་རང་དབང་ལུང་པའི་ནང་དུ་ངོས་རང་འཛམ་གླིང་གང་སར་ནས་ཡོང་མཁན་ལ་ཐུག་ཐུབ་ཀྱི་ཡོད་པ་རེད། ངོས་ཀྱི་པུས་མོ་ཏོག་ཙམ་མ་བདེ་བ་ཡོད། པུས་མོ་མ་བདེ་བ་དེ་སྐྱོན་གང་ཡང་མི་འདུག རྐུབ་བཀྱགས་སྟེང་དུ་བསྡད་ནས་ཁ་བདེ་ཆོད་ཡོད་པ་རེད། ང་ཚོ་བོད་པས་བསྲེགས་གཤག་མེ་འབར་ཟེར་གྱི་ཡོད། གོམ་པ་ཞེ་དྲགས་སྤོ་མ་ཐུབ་པར་ཁ་ནས་མེ་འབར་བཞིན་བཤད་བསྡད་ཀྱི་རེད། མཁན་པོ་དམ་པ་མཁྱེན་རབ་བསྟན་འཛིན་གྱིས་ངོས་ལ་བོད་ཡིག་བསླབ་པ་སོགས་ཀྱིས་གསོ་སྐྱོང་བྱས་པ་རེད། ད་ལྟ་བར་དུ་ངོས་ཀྱིས་མི་གོ་ཆོད་པར་བྱས་བསྡད་ཡོད་པ་མ་ཟད། ངོས་ཀྱིས་བོད་ཀྱི་ཆོས་དང་རིག་གཞུང་གི་ཚབ་བྱས་བསྡད་ཡོད་པ་རེད། འཛམ་བུ་གླིང་དུ་བོད་ཀྱི་ཆོས་ལ་དོ་སྣང་གསར་བ་ཞིག་སླེབས་ཏེ། ནུབ་ཕྱོགས་རྒྱལ་ཁབ་ནང་དུ་བོད་ཀྱི་ནང་ཆོས་དང་ལྟ་གྲུབ་སྐོར་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག ཅེས་གསུངས་སོང་།
ཡང་༧མགོན་པོ་གང་ཉིད་མཆོག་གིས། ངོས་རང་ལ་ཆ་བཞག་ན་མཁན་པོ་མཁྱེན་རབ་བསྟན་འཛིན་གྱིས་གསོ་སྐྱོང་བྱས་ནས་ཞེ་དྲགས་བཀའ་དྲིན་ཆེན་པོ་ཡིན། གཙོ་ཆེ་ཤོས་རྟ་བྲག་རིན་པོ་ཆེ་རེད། དེ་ནས་གླིང་རིན་པོ་ཆེ་རེད། ཞོགས་པ་དང་དགོང་མོའི་ཆུ་ཚོད་གཅིག་འཆར་ཅན་ལྟར་ངོས་ཀྱིས་དཔེ་ཆ་བློ་འཛིན་རྒྱུགས་སྤྲོད་བྱེད་པ་དང་། བསྐྱར་སྦྱོང་བྱེད་པར་ཞེ་དྲགས་བཀའ་དྲིན་ཆེན་པོ་ཡིན། སྐྱབས་རྗེ་ཁྲི་བྱང་རིན་པོ་ཆེའི་སྐུ་མདུན་དུ་ངོས་ཀྱིས་གསུང་ཆོས་མང་པོ་ཞུས་པ་རེད། ལམ་རིམ་དང་བློ་སྦྱོང་གི་སྐོར་ཤུགས་ཆེན་ཞུས་ཡོད། གཞན་ཡང་ཁུ་ནུ་བླ་མ་བསྟན་འཛིན་རྒྱལ་མཚན་གྱི་མཚོན་པའི་བླ་མ་བཅུ་ཕྲག་གཉིས་གསུམ་གྱི་དྲུང་ནས་གསུང་ཆོས་མང་པོ་ཞུས་པ་རེད། དེང་སང་ངོས་ཀྱིས་ནང་ཆོས་སྐོར་ལ་དོ་སྣང་ཡོད་མཁན་ཚོར་ལྟ་གྲུབ་ཐོག་བཤད་ཀྱང་གང་ལ་གང་འཚམ་བཤད་རྒྱུ་ཡོད་བསྡད་པ་ཞིག་རེད། ལྟ་གྲུབ་ཚུར་བསྡུས་ནས་སེམས་འདུལ་བའི་རིམ་པ་གཙོ་བོ་བྱས་ཏེ། ལམ་རིམ་དང་བློ་སྦྱོང་སྐོར་ཆ་བཞག་པ་ཡིན་ན་ངོས་རང་གིས་ཉམས་ལེན་བྱེད་བཞིན་ཡོད་ལ་བཤད་རྒྱུ་ཡོད་པ་ཞིག་ཀྱང་ཆགས་བསྡད་ཡོད། སངས་རྒྱས་ཀྱི་བསྟན་པ་ལ་ལུང་རྟོགས་ཀྱི་བདེན་པ་གཉིས་ཡོད། བདེན་པ་གཉིས་དེ་དཔྱད་པ་དང་སྒྲུབ་པ་སྒོམ་ནས་འཛིན་སྐྱོང་སྤེལ་གསུམ་བྱེད་ཀྱི་ཡོད་པ་རེད། ལུང་གི་བདེན་པ་ངོས་རང་གིས་སློབ་སྦྱོང་བྱས་པ་དང་གཞན་ལ་བཤད་ཀྱི་ཡོད། རྟོགས་པའི་བདེན་པ་ངོས་རང་གིས་ཉམས་ལེན་བྱས་ཏེ། ཉིན་རེ་བཞིན་གཙོ་ཆེ་ཤོས་བྱང་ཆུབ་ཀྱི་སེམས་དང་སྟོང་ཉིད་ལྟ་བ་བསམ་བློ་གཏོང་བཞིན་ཡོད་པ་རེད། ངོས་རང་གི་རྒྱུད་ལ་རྟོགས་པ་གང་ལ་གང་འཚམ་ཞིག་ཡོད་པ་ཆགས་བསྡད་ཡོད། བྱང་ཆུབ་ཀྱི་སེམས་ཤུགས་ཆེན་པོ་འདུག སྟོང་ཉིད་ཀྱི་ལྟ་བའང་ཤུགས་ཆེན་པོ་འདུག ངོས་རང་གིས་སྦྱོར་ལམ་ཐོབ་པར་རེ་བ་རྒྱག་བཞིན་ཡོད། མི་ཚེ་འདིའི་ནང་དུ་གོམ་པ་སྤོས་ཏེ། མཐོང་ལམ་དང་། ས་དང་པོ། གཉིས་པ། གསུམ་པ། བཞི་པ། སོགས་ས་ཆུ་རིམ་གྱིས་བགྲོད་ནས་རྣམ་རྒྱལ་རྒྱལ་བའི་གོ་འཕངས་ཐོབ་པར་ཕལ་ཆེར་ཡིད་ཆེས་ཡོད་ལ། ངོས་ཀྱིས་འབད་བརྩོན་དེ་ལྟར་བྱེད་བཞིན་ཡོད། ཚང་མས་ཀྱང་སྔོན་ལ་སློབ་གཉེར་བྱེད་དགོས་པ་དང་། སློབ་གཉེར་བྱས་པའི་དོན་དག་རྣམས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་འབྲེལ་ནས་ཉམས་ལེན་བྱ་རྒྱུ་གལ་ཆེན་པོ་རེད། ཅེས་གསུངས་སོང་།
༧མགོན་པོ་གང་ཉིད་མཆོག་གིས། ཁྱེད་ཚོ་གཞོན་སྐྱེས་རྣམས་ཀྱིས་ཟབ་མོ་སྟོང་པ་ཉིད་ཀྱི་ལྟ་བ་དང་། ཐར་བའི་གཞན་གཅེས་པའི་བྱང་ཆུབ་ཀྱི་སེམས་གང་ཐུབ་ཀྱིས་བསམ་བློ་གཏོང་རྒྱུ་གལ་ཆེན་པོ་རེད། སེམས་ལ་ཞི་བདེ་ཡོང་བའི་རྐྱེན་བྱས་ནས་གཟུགས་པོའི་འཕྲོད་བསྟེན་ལ་ཆ་བཞག་ཀྱང་། སེམས་འཁྲུག་པ་མེད་པར་ག་དུས་ཡིན་ཡང་སེམས་ཞི་ལྷོད་དུ་བསྡད་ཀྱི་ཡོད་པ་རེད། བྱང་ཆུབ་ཀྱི་སེམས་སྒོམ་རྒྱུ་ནི་ཚེ་སྒྲུབ་ཀྱི་མཆོག་ཀྱང་རེད་འདུག ཁྱེད་ཚོ་གཞོན་སྐྱེས་ཚོ་སེམས་བཟང་པོ་བྱོས་དང་ཚེ་རིང་པོར་གནས་ཀྱི་རེད། གལ་ཆེན་པོ་རེད་དེ་ལྟར་བྱོས། མཁན་རིན་པོ་ཆེ་མཁྱེན་རབ་བསྟན་འཛིན་ཞེ་དྲགས་བཀའ་དྲིན་ཆེན་པོ་ཡིན། བོད་ཀྱི་ཆོས་དང་རིག་གཞུང་ཟེར་བ་དེ་འཛམ་བུ་གླིང་དུ་ཕན་ཐོགས་དང་དགོས་མཁོ་ཆེན་པོ་ཞིག་ཆགས་བསྡད་ཡོད་པ་རེད། དེང་སང་རྒྱ་ནག་ནང་དུ་ཤུགས་ཆེ་རུ་འགྲོ་བཞིན་འདུག་ལ། ནང་ཆོས་དང་འབྲེལ་མེད་པའི་ནུབ་ཕྱོགས་རྒྱལ་ཁབ་ཁག་ཏུའང་གཞི་ནས་དོ་སྣང་གསར་བ་སླེབས་བཞིན་འདུག ཕྱོགས་གཅིག་ནས་བསམ་བློ་བཏང་ན་ང་ཚོ་རང་གི་ལུང་པ་བྲལ་ཏེ་རྒྱ་གར་དུ་སྐྱབས་བཅོལ་བ་ཆགས་ཀྱང་། བསྟན་པ་སྤྱི་ལ་ཞབས་འདེགས་ཞུ་བའི་གོ་སྐབས་བཟང་དུ་ཕྱིན་འདུག ངོས་རང་ལ་མཚོན་ན་ལོ་ ༨༨ སླེབས་ཡོད་པ་རེད། ད་དུང་གཟུགས་པོ་བདེ་ཐག་ཆོད་ཡོད། ངོས་ཀྱི་རྨི་ལམ་བལྟས་པ་ཡིན་ན་ཕལ་ཆེར་ལོ་བརྒྱ་དང་བཅུ་གྲངས་ཤིག་བསྡད་རྒྱུ་ཡིན་པ་ཡོང་གི་འདུག ངོས་ཀྱི་མི་ཚེ་ནང་དུ་འཛམ་བུ་གླིང་སྟེང་དུ་དངོས་གནས་དྲང་གནས་བོད་ཀྱི་ཆོས་དང་རིག་གཞུང་ངོ་སྤྲོད་བྱེད་རྒྱུ་དང་ཆབས་ཅིག མི་མང་པོའི་སེམས་རྒྱུད་ལྷོད་ལྷོད་ཆགས་པར་ཞབས་འདེགས་བསྒྲུབ་བསམ་པ་ཡོད། ཁྱེད་ཚོས་ཀྱང་བློ་བདེ་བོ་དང་སེམས་སྐྱིད་པོ་བྱས་ནས་སྡོད། ཅེས་གསུངས་སོང་།
དེ་བཞིན་༧གོང་ས་མཆོག་གིས། བོད་པའི་གཞོན་སྐྱེས་ཚོར་རྒྱ་གཞུང་གིས་བོད་པའི་ཆོས་དང་རིག་གཞུང་ལ་རྨོངས་དད་ཟེར་གྱི་ཡོད་པ་རེད། ང་ཚོའི་ཆོས་དེ་འདྲ་རེད་མི་འདུག བོད་ཀྱི་སངས་རྒྱས་ཆོས་དེ་ཀླུ་སྒྲུབ་ཡབ་སྲས་སོགས་རིག་པའི་ལམ་ནས་གཏན་ལ་ཕབ་པ་ཞིག་རེད། དེང་སང་ཚན་རིག་པའི་ནང་དུ་དོ་སྣང་སླེབས་ཏེ་ངོས་རང་ལ་སྐད་ཆ་འདྲི་མཁན་མང་པོ་ཡོང་གི་འདུག གང་ལྟར་ང་ཚོ་བོད་ཀྱི་ནང་ཆོས་དེ་རྒྱ་མིའི་སྐད་དུ་བཤད་པའི་རྨོངས་དད་རྩ་བ་ཉིད་ནས་མ་རེད། སོ་སོས་སྦྱངས་ནས་མ་ཤེས་ན་གནས་ཚུལ་ཁ་ཁ་རེད་མ་གཏོགས། བོད་ཀྱི་ནང་ཆོས་རིག་པ་གཏིང་ཟབ་ཡོད་བསྡད་པའི་སློབ་སྦྱོང་ཞིག་རེད། ངོས་ཀྱིས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད་ཀྱང་། རྒྱུ་མཚན་གྱི་ཐོག་ནས་འགྲེལ་བཤད་རྒྱག་རྒྱུ་ཡོད་པ་བོད་ཀྱི་ནང་ཆོས་ཆགས་འདུག ཁྱེད་ཚོ་གཞོན་སྐྱེས་ཚོས་དེ་སེམས་ལ་ཉར་བ་བྱས། བོད་ཀྱི་ནང་ཆོས་ཀྱི་ལྟ་གྲུབ་ཐོག་སློབ་སྦྱོང་བྱེད་ཐུབ་ན་ཡག་པོ་རེད། སྔོན་མ་ངོས་རང་མ་སུ་རི་ལ་ཡོད་སྐབས་ཆོས་དགེ་ཟེར་བ་དེ་འགྱུར་བ་བཏང་ནས་ལྟ་གྲུབ་ཀྱི་དགེ་རྒན་བཏགས་པ་ཡིན། ལྟ་གྲུབ་ཀྱི་དགེ་རྒན་ཟེར་དུས་དཔེ་ཆ་ལྟ་མཁན་གྱི་དགེ་རྒན་སླེབས་ཀྱི་ཡོད་པ་རེད། བོད་ཀྱི་ནང་ཆོས་དེ་ལྟ་གྲུབ་ཀྱི་ཐོག་ནས་འགྲེལ་བཤད་རྒྱག་རྒྱུ་ཡོད་པ་གལ་ཆེན་ཞེ་དྲགས་རེད།
ཁྱེད་ཚོས་ཀྱང་སངས་རྒྱས་ཀྱི་ཆོས་ཟེར་དུས་སྐྱབས་འགྲོ་གཅིག་པོ་སྐྱོར་རྒྱུ་དེ་མ་རེད། བསམ་བློ་འགྱུར་བ་གཏོང་བ་དེ་སྐྱབས་སུ་མཆིའི་ཐོག་ནས་རེ་བ་རྒྱག་མི་དགོས་པར། རིག་པ་ཡང་དག་གི་ཐོག་ནས་བསམ་བློ་བཏང་དུས་སེམས་ལ་འགྱུར་བ་ཐེབས་པ་རེད། ངོས་ཀྱིས་ཉིན་རེ་བཞིན་བསམ་བློ་གཏོང་དུས་སྐྱབས་སུ་མཆི་ཟེར་གྱི་མེད། དེ་ངོས་ཀྱི་ཉམས་མྱོང་ཡིན། དངོས་ཡོད་གནས་ཚུལ་དང་རྒྱུ་མཚན་ལ་བསམ་བློ་གཏོང་དུས་གཞི་ནས་སངས་རྒྱས་ཀྱི་ཆོས་ལ་དད་པ་ཐོབ་པ་ཞིག་ཡོང་བསྡད་ཀྱི་འདུག ཁྱེད་ཚོ་གཞོན་སྐྱེས་ཚོ་སློབ་སྦྱོང་བྱེད་རྒྱུ་དཔེ་གལ་ཆེན་པོ་རེད། ངོས་རང་ཆུང་དུས་སྐབས་སུ་མཁས་པ་དམ་པས་སློབ་ཁྲིད་ཏོག་ཙམ་གནང་བ་དང་། འཚུབ་པོ་ཏོག་ཙམ་བྱེད་དུས་སློབ་གསོ་ཡང་བསྐྱོན་པ་རེད། གང་ལྟར་ལོ་གཞོན་དུས་ནས་ནང་ཆོས་ཀྱི་ལྟ་གྲུབ་ཐོག་ལ་སློབ་སྦྱོང་བྱེད་ཐུབ་ན་ཕན་ཐོགས་ཡོང་གི་རེད། ཅེས་བཀའ་སློབ་བསྩལ་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
