༧གོང་ས་རྒྱལ་བ་རིན་པོ་ཆེ་མཆོག་ནས་འབྲས་ལྗོངས་མི་མང་ལ་ཐུགས་གསོའི་གསུང་འཕྲིན་བསྩལ་ནས་ཆུ་ལོག་ཁྲོད་རྐྱེན་འདས་སུ་འགྱུར་མཁན་རྣམས་ལ་ཐུགས་སྨོན་དང་ཁོང་ཚོའི་ནང་མི་འབྲེལ་ཡོད་རྣམས་ལ་ཐུགས་གསོའི་གསུང་འཕྲིན་བསྩལ་འདུག
འབྲས་ལྗོངས་ཀྱི་སྤྱི་ཁྱབ་བློན་ཆེན་པི་རམ་སིང་རྟ་མང་སོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ ཞུས། ༢༠༢༣། ༩། ༢༡ དགའ་ལྡན་ཕོ་བྲང་གི་པར།
རྒྱ་གར་བྱང་ཤར་འབྲས་ལྗོངས་སུ་གློ་བུར་ཆུ་ལོག་གི་གནོད་སྐྱོན་བྱུང་སྟེ་མི་རྒྱུ་གཉིས་ལ་དཀའ་ངལ་ཆེན་པོ་བྱུང་དང་འབྱུང་མུས་ཡིན་པ་ལྟར། ཁ་སང་༧གོང་ས་རྒྱལ་བ་རིན་པོ་ཆེ་མཆོག་ནས་འབྲས་ལྗོངས་ཀྱི་སྤྱི་ཁྱབ་བློན་ཆེན་པི་རམ་སིང་རྟ་མང་(Prem Singh Tamang) མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་ཏེ་ཐུགས་སྨོན་སྐྱབས་འཇུག་གནང་ཡོད་པ་མ་ཟད། གནོད་ཐེབས་མི་མང་ལ་མཐུན་འགྱུར་རོགས་རམ་གནང་བཞིན་པར་བསྔགས་བརྗོད་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ནང་། ངོས་ནས་ཆུ་ལོག་གི་ཁྲོད་རྐྱེན་འདས་སུ་འགྱུར་མཁན་གྱི་ཉེ་འབྲེལ་རྣམས་དང་གནོད་འཚེ་ཐེབས་མཁན་ཡོངས་ལ་གདུང་སེམས་མཉམ་སྐྱེད་དང་། ཁོང་ཅག་ལ་སྐྱབས་འཇུག་ཞུ་ཡི་ཡོད། ཅེས་དང་། ངོས་རང་གིས་མངའ་སྡེའི་གཞུང་དང་ཚོགས་སྡེ་ཚོས་སེམས་ཁུར་ཆེན་པོས་རང་བྱུང་གོད་ཆག་གིས་གནོད་འཚེ་ཐེབས་པའི་མི་རྣམས་ལ་མཐུན་འགྱུར་གནང་མུས་ཡིན་པར་བསྔགས་བརྗོད་ཡོད་ལ། ངོས་རང་གིས་འབྲས་ལྗོངས་མི་མང་ལ་གདུང་སེམས་མཉམ་སྐྱེད་མཚོན་སླད། མི་མང་ལ་ངལ་སེལ་དང་མྱུར་སྐྱོབ་སླད་དགའ་ལྡན་ཕོ་བྲང་གི་ཐེབས་རྩ་ནས་ཞལ་འདེབས་ཤིག་དབུལ་རྒྱུ་མངགས་ཡོད། ཅེས་གསུངས་འདུག
ཟླ་འདིའི་ཕྱི་ཚེས་ ༣ ཉིན་གྱི་མཚན་གུང་དུ་རྒྱ་གར་བྱང་ཤར་འབྲས་ལྗོངས་ཀྱི་ལ་ཆེན་(Lachen valley) ལུང་གཤོངས་སུ་སྤྲིན་པ་བརྡོལ་བ་དང་ཊེ་སི་ཊ་(Teesta River) གཙང་པོ་རྒྱས་ནས་གློ་བུར་དུ་ཆུ་ལོག་རྒྱུག་སྟེ། ད་བར་ཉུང་མཐར་མི་གྲངས་ ༡༤ རྐྱེན་འདས་དང་། རྒྱ་གར་གྱི་དམག་མི་ ༢༢ ཚུད་པའི་མི་གྲངས་བརྒྱ་ལྷག་བོར་བརླག་ཏུ་གྱུར་ཡོད་འདུག་ལ། དེ་བཞིན་མི་གྲངས་ ༢༦ ལ་རྨས་སྐྱོན་ཐེབས་ནས་ད་ལྟ་སྨན་བཅོས་བྱེད་མུས་ཡིན་འདུག གཞན་ཡང་ཆུ་ལོག་དེས་འབྲས་ལྗོངས་བྱང་རྒྱུད་ཀྱི་གཞུང་ལམ་དང་། ནུབ་བྷེང་གྷལ་ནས་འབྲས་ལྗོངས་མཐུད་པའི་གཞུང་ལམ་དང་ཟམ་པ་མང་པོར་གཏོར་སྐྱོན་བཏང་ཡོད་འདུག
གཞན་ཡང་། སྤྱིར༧གོང་ས་རྒྱལ་བ་རིན་པོ་ཆེ་མཆོག་ནས་ཟླ་འདིའི་ཕྱི་ཚེས་ ༡༡ ནས་ཉིན་གཉིས་རིང་རྒྱ་གར་བྱང་ཤར་འབྲས་ལྗོངས་མངའ་སྡེའི་དཔལ་འབྱོར་རྩེད་ཐང་དུ། སློབ་དཔོན་ཐོགས་མེད་ཀྱི་རྒྱལ་སྲས་ལག་ལེན་སོ་བདུན་མ་དང་། སློབ་དཔོན་པདྨ་འབྱུང་གནས་ཀྱི་ཐུགས་སྒྲུབ་ཡང་སྙིང་ཀུན་འདུས་བཅས་ཀྱི་བཀའ་ཆོས་བསྩལ་རྒྱུ་དང་ཕྱི་ཚེས་ ༡༥ ཉིན་ནུབ་བྷང་གྷལ་མངའ་སྡེའི་སཱ་ལུ་གྷ་རཱ་སྲད་རྒྱུད་མ་དགོན་གྲྭ་ཚང་དུ། སེམས་བསྐྱེད་ཀྱི་བཀའ་ཆོས་གནང་གཏན་འཁེལ་ཡོད་ཀྱང་། ༧མགོན་པོ་གང་གི་མཛད་འཆར་ལ་འགྱུར་བ་ཅུང་ཙམ་ཐེབས་ནས། ཟླ་འདིའི་ཚེས་ ༡༧ ཉིན་གྱི་སྔ་དྲོར་སྒང་ཏོག་གི་དཔལ་འབྱོར་རྩེད་ཐང་དུ་བཀའ་ཆོས་དང་ཚེས་ ༡༨ ཉིན་གྱི་སྔ་དྲོར་བཀའ་དབང་བཀའ་དྲིན་བསྐྱང་རྒྱུ། ཕྱི་ཚེས་ ༢༡ ཉིན་གསང་ཆེན་དཔལ་ལྡན་སྲད་རྒྱད་གྲྭ་ཚང་དུ་སེམས་བསྐྱེད་ཀྱི་བཀའ་ཆོས་བསྩལ་གཏན་འཁེལ་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
