ཁྲིམས་ཀྱི་དབང་བསྒྱུར་དུ་འཁྲིད་རིམ་སྙིང་བསྡུས་ཞེས་པའི་དཔེ་དེབ་འདི་མ་འོངས་བར་བཅའ་ཁྲིམས་ལ་སློབ་སྦྱོང་བྱེད་མཁན་དང་ཉམས་ཞིབ་བྱེད་མཁན་རྣམས་ལ་དཔྱད་གཞིའི་རྒྱུ་ཆར་ཕན་ཐོགས་ཡོད་སྐོར་སོགས་གསུངས་སོང་།
དེ་རིང་སྔ་དྲོ་ཆུ་ཚོད་ ༡༡ སྟེང་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། སྤྱི་ཟུར་བློ་བཟང་ཆོས་འབྱོར་ལགས་ཀྱིས་བརྩམས་པའི་༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོས་བོད་མི་རྣམས་༼ཁྲིམས་ཀྱི་དབང་བསྒྱུར་དུ་འཁྲིད་རིམ་སྙིང་བསྡུས༽ཞེས་པའི་དཔེ་དེབ་ཀྱི་དབུ་འབྱེད་མཛད་སྒོ་ཞིག་འཚོགས་ཡོད་ཅིང་། ཚོགས་ཐོག་ཏུ་བཀའ་ཟུར་འབྲོང་ཆུང་དངོས་གྲུབ་ལགས་དང་། བཀའ་ཟུར་ཐུབ་བསྟན་ལུང་རིགས་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། བོད་མི་མང་སྤྱི་འཐུས་ཁག་ཅིག་གཙོས། དྷ་ས་ཁུལ་གྱི་ཉམས་ཞིབ་པ་ཁག་ཅིག་བཅས་མཉམ་ཞུགས་གནང་འདུག
རྩོམ་པ་པོ་སྤྱི་ཟུར་བློ་བཟང་ཆོས་འབྱོར་ལགས་ཀྱིས། དེབ་འདིའི་ནང་དུ་གཙོ་ཆེ་ཤོས་༧གོང་ས་རྒྱལ་བ་རིན་པོ་ཆེ་མཆོག་གིས་བོད་མི་རིགས་ཀྱི་འཛིན་སྐྱོང་བྱེད་ཕྱོགས་ཐད་དམངས་གཙོའི་ལམ་ལུགས་དང་། སྲིད་འཛིན་ལམ་ལུགས། གྲོས་ཚོགས་ལམ་ལུགས་སོགས་ཁྲིམས་ཀྱི་ལམ་ལུགས་ཇི་ཙམ་ལ་འཆར་གཞི་བཀོད་ཡོད་མེད་དང་། ལྷག་པར་དུ་བཙན་བྱོལ་གྱི་བཅའ་ཁྲིམས་རིན་པོ་ཆེའི་ལྟ་གྲུབ་ཀྱི་རྒྱབ་ལྗོངས་དང་། མང་གཙོའི་ཀ་བ་གསུམ་སོ་སོའི་འགན་དབང་། ཕན་ཚུན་སྟངས་འཛིན་བྱེད་ཕྱོགས། ལོ་ཚིགས་འདྲ་མིན་སྐབས་ཀྱི་བཀའ་སློབ་ཁག་གི་རྒྱབ་རྟེན་དུ། སློབ་དཔོན་ཟམ་གདོང་རིན་པོ་ཆེ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་ཇི་མ་ཇི་བཞིན་གསེད་དཀྲོལ་གནང་ཡོད་པའི་སྐོེར་སོགས་གསལ་ཡོད། དེང་སང་ང་ཚོའི་སྤྱི་ཚོགས་ནང་དུ་༧གོང་ས་མཆོག་གིས་ཁྲིམས་དང་སྒྲིག་གཞིའི་རྒྱབ་ལྗོངས་ལ་བཀའ་སློབ་གང་དག་གནང་བའི་སྐོར་ལ་དོ་སྣང་བྱེད་མཁན་ཉུང་དུ་འགྲོ་བཞིན་འདུག དམངས་གཙོ་ཟེར་དུས་ཨ་རི་དང་རྒྱ་གར་སོགས་ཕྱི་རྒྱལ་གྱི་ལུང་པར་ལད་མོ་བྱས་ནས་འགྲོ་བཞིན་ཡོད་པ་ལས། ང་ཚོར་སྒྲིག་གཞི་ཐུན་མོང་མ་ཡིན་པ་ཞིག་ཡོད་པའི་གལ་གནད་ཤེས་རྟོགས་འབྱུང་མཁན་ཉུང་དུ་འགྲོ་བཞིན་ཡོད་པའི་སེམས་འཚབ་ཅིག་འདུག བཅའ་ཁྲིམས་ལ་སློབ་སྦྱོང་བྱེད་མཁན་ཞིག་ཡིན་ན། ད་ལྟའི་བར་དུ་བཅའ་ཁྲིམས་ལ་ཡིག་ཚང་ཞིག་ཡོད་པ་མ་རེད། ང་རང་སྤྱི་འཐུས་ཤིག་བྱས་ཏེ་དེའི་ཐོག་ནས་དཀའ་ངལ་འཕྲད་མྱོང་ཡོད་དུས། གདན་ཐོག་གཅིག་ནས་སྤྱི་ཚོགས་ནང་དུ་བཅའ་ཁྲིམས་ལ་སློབ་སྦྱོང་བྱེད་པའི་གཞི་རྩ་ཞིག་ཆགས་པའི་དགོས་དམིགས་གཙོ་འདོན་བྱས་ཡོད། ཅེས་གསུངས་བྱུང་།
བཀའ་ཟུར་ཐུབ་བསྟན་ལུང་རིགས་ལགས་ཀྱིས། དེབ་འདིའི་ནང་དུ་༧གོང་ས་རྒྱལ་བ་རིན་པོ་ཆེ་མཆོག་ནས་ཐོག་མར་ང་ཚོར་དམངས་གཙོའི་གསོལ་རས་གནང་བའི་དགོངས་པ་འཁྲུངས་སྟངས་དང་། བཅའ་ཁྲིམས་དང་རྩ་ཁྲིམས་ཐོག་ལམ་སྟོན་གནང་སྟངས། དེའི་ཐོག་མཛད་དཀའ་གང་དག་འཕྲད་པའི་སྐོར། དེང་རབས་དང་མཐུན་པའི་དམངས་གཙོ་ལམ་ལུགས་སུ་སླེབས་སྟངས་ཐོག་ཡིག་ཆ་རྣམས་བསྡུ་རུབ་བྱས་ཏེ་དཀའ་ལས་མང་པོ་བརྒྱབ་འདུག ང་ཚོས་སྒྲིག་འཛུགས་ནང་དུ་རྒྱུན་རིང་ལས་ཀ་བྱས་མྱོང་ཡོད་ཀྱང་། རྩོམ་པ་པོས་སྔོན་མ་མཐོང་མ་མྱོང་བའི་ཡིག་ཆ་མང་པོ་མཁོ་སྒྲུབ་བྱས་ཡོད་པ་མ་ཟད། ཡིག་ཆ་རྣམས་ཞིབ་ཚགས་ཀྱིས་གོང་བསྒྲིགས་ཏེ་ཡིག་ཆའི་ཐོག་ནས་ནང་དོན་གསལ་འདོན་བྱས་ཡོད་པས། མ་འོངས་བར་བཅའ་ཁྲིམས་ལ་སློབ་སྦྱོང་བྱེད་མཁན་དང་། ཉམས་ཞིབ་བྱེད་མཁན་རྣམས་ལ་ཡིག་ཆའི་རྒྱུ་ཆ་ཕན་ཐོགས་ཡོད་པ་ཞིག་ཆགས་འདུག ཅེས་གསུངས་བྱུང་།
བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། རྩོམ་པ་པོས་༧གོང་ས་རྒྱལ་བ་རིན་པོ་ཆེ་མཆོག་གིས་ལོ་མང་པོའི་རིང་བོད་ཀྱི་སྤྱི་ཚོགས་ནང་དུ་ཁྲིམས་དང་སྒྲིག་གཞི་ལྡན་པའི་སྐུ་ལས་གནང་སྟངས་ཐོག་ཉམས་ཞིབ་ཆ་ཚང་བ་བྱས་པར་ལེགས་གསོལ་བསྔགས་བརྗོད་ཞུ་རུང་བ་ཞིག་རེད། དེང་སང་གི་སྤྱི་ཚོགས་ནང་དུ་མི་མང་ལ་དེབ་ཀློག་པའི་དོ་སྣང་ཡོད་མེད་མི་ཤེས་ལ། དོ་སྣང་ཡོད་ཀྱང་ཕལ་ཆེར་ཟ་ཕྱོགས་འཐུང་ཕྱོགས་ཙམ་ལ་འགྲོ་བཞིན་པ་རེད། དེབ་འདི་ལས་དཀའ་ཚགས་མང་པོ་བརྒྱུད་མི་དགོས་པར་༧གོང་ས་རྒྱལ་བ་རིན་པོ་ཆེ་མཆོག་གིས་ཁྲིམས་སྒྲིག་གཞི་ཐོག་ལ་ཕྱག་ལས་ཇི་ཙམ་གནང་བའི་སྐོར་ལྟ་བདེ་བོ་ཆགས་ཡོད་པས། འདི་ནི་བྱ་བ་ཆེན་པོ་ཞིག་བསྒྲུབས་པ་རེད། ཅེས་གསུངས་སོང་།
བཀའ་ཟུར་འབྲོང་ཆུང་དངོས་གྲུབ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་ན་ཆུང་དུས་སུ། དེང་རབས་ཀྱི་སྤྱི་ཚོགས་འགྲོ་སྟངས་བཞིན་སློབ་སྦྱོང་གནང་མེད་དེ། དེའི་སྐབས་ཀྱི་བོད་པའི་སྤྱི་ཚོགས་ཀྱི་འགྲོ་ལུགས་ལ་བསྒྱུར་བཅོས་གཏང་དགོས་པར་དགོངས་ཀྱང། ཕྱི་ནང་གི་འགོག་རྐྱེན་མང་པོ་ཞིག་གིས་ལམ་ལྷོང་མ་བྱུང་བ་རེད། རྐྱེན་ངན་གྲོགས་ཤར་གྱིས་༧གོང་ས་མཆོག་རང་དབང་གི་ཁོར་ཡུག་ཡོད་པའི་རྒྱ་གར་ཏུ་བཙན་བྱོལ་དུ་འབྱོར་ཡང་། བསྒྱུར་བཅོས་གཏོང་བའི་དགོངས་གཞིའི་འགོག་རྐྱེན་ཆེ་ཤོས་ནི་མི་མང་གི་བསམ་བློའི་ཆུ་ཚད་དང་གནས་བབ་དེའི་ཐོག་ཏུ་མ་སླེབས་པ་དེ་ཡིན། ང་ཚོས་གངས་ཅན་སྐྱིད་གཤོངས་སུ་མི་ཚེ་བསྐྱལ་བསྡད་ཀྱང་། ཕྱི་ལོ་ ༡༩༦༠ རེ་གྲངས་ནང་གི་༧གོང་ས་མཆོག་གིས་བཀའ་སློབ་གནང་ཡོད་པ་མཇལ་ཐུབ་མེད། རྩོམ་པ་པོས་དཀའ་ལས་མང་པོ་བརྒྱབ་ཏེ་ཡོངས་སུ་ཕྱོགས་སྒྲིག་བྱས་འདུག འདི་ལ་དགེ་མཚན་ཆེན་པོ་འདུག ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། དཔལ་ལྡན།
