རྒྱ་ནག་གཞུང་གིས་བོད་དཀར་མཛེས་ཁུལ་ཁོངས་ཀྱི་སློབ་གྲྭ་ཆུང་འབྲིང་ཚང་མར་བོད་ཡིག་བསླབ་མཚམས་བཞག་སྟེ་རྒྱ་ཡིག་རྐྱང་པ་སློབ་ཁྲིད་བྱ་རྒྱུ་ཡིན་འདུག
འདི་ལོའི་ཟླ་ ༦ པའི་ནང་རྒྱ་ནག་གཞུང་གིས་བོད་དཀར་མཛེས་ཁུལ་དུ་བོད་ཡིག་སློབ་ཁྲིད་བྱེད་བཞིན་པའི་སློབ་གྲྭ་ཁག་ཏུ་བོད་ཡིག་སློབ་མཚམས་གཞག་དགོས་པའི་བརྡ་ཁྱབ་ཅིག་བཏང་ཡོད་པ་ལྟར། ཉེ་ལམ་ཕྱི་ཟླ་ ༩ ནང་སློབ་མགོ་གསར་པ་བཙུགས་པ་དང་བསྟུན། དཀར་མཛེས་ཁུལ་སློབ་གསོའི་ལས་ཁུངས་ཟེར་བས། དཀར་མཛེས་ཁུལ་ཁོངས་ཀྱི་སློབ་གྲྭ་སོ་སོར་བརྡ་སྦྱོར་བཏང་ནས། ཕྱི་ལོ་ ༢༠༢༤ ལོ་ནས་བཟུང་དཀར་མཛེས་བོད་རིགས་རང་སྐྱོང་ཁུལ་ཟེར་བའི་ཁོངས་ཀྱི་སློབ་གྲྭ་ཆུང་འབྲིང་ཚང་མར་བོད་ཡིག་གི་སློབ་ཁྲིད་དང་བསླབ་གཞི་ཚང་མ་མཚམས་བཞག་ནས་རྒྱ་ཡིག་རྐྱང་བ་སློབ་ཁྲིད་བྱ་དགོས་པའི་བཙན་བཀའ་བཏང་ཡོད་འདུག
འབྲེལ་ཡོད་གནས་ཚུལ་མཁོ་སྤྲོད་པས་འདི་གའི་གསར་འགོད་པར། འདི་ལོར་རྒྱ་ནག་གཞུང་གིས་དཀར་མཛེས་ཁུལ་ཁོངས་ཀྱི་སློབ་ཆུང་དང་། དམའ་འབྲིང་། མཐོ་འབྲིང་གི་བོད་ཡིག་སློབ་ཁྲིད་དང་བསླབ་གཞི། ཡིག་རྒྱུགས་ཚང་མ་མེད་པ་བཟོས་ཏེ། སློབ་གྲྭ་ཆུང་འབྲིང་ཚང་མར་རྒྱ་ཡིག་རྐྱང་པའི་སློབ་ཁྲིད་བྱ་དགོས་པའི་བརྡ་ཁྱབ་འབྱོར་ཡོད་སྐོར་དང་། དཀར་མཛེས་ཁུལ་གྱི་བོད་ཡིག་སློབ་གྲྭ་མང་པོར་བོད་ཡིག་སློབ་ཁྲིད་མེད་པར་བཟོས་རྗེས། རྒྱ་ཡིག་ཤེས་མཁན་གྱི་བོད་རིགས་དགེ་རྒན་ཚང་མ་རྒྱ་ཡིག་གི་འཛིན་གྲྭ་ཁག་ཏུ་ལས་བགོས་བྱས་ཡོད་ཅིང་། རྒྱ་ཡིག་ཆུ་ཚད་ཞན་པ་ཚོས། རྔ་བ་ཁུལ་ཁོངས་ཀྱི་སློབ་གྲྭ་ཁག་གི་བོད་ཡིག་ཚན་ཁག་ཏུ་ལས་ཀ་འཚོལ་ཐབས་བྱེད་མུས་ཡིན་སྐོར། དེ་བཞིན་དཀར་མཛེས་ཁུལ་ཁོངས་ཀྱི་མཐོ་རིམ་མཐར་ཕྱིན་སློབ་མས་ཕྱི་ལོ་༢༠༢༣ ལོའི་ལོ་མཇུག་གི་ཡིག་རྒྱུགས་དེ་རྔ་བ་ཁུལ་གྱི་མི་རིགས་མཐོ་རིམ་སློབ་འབྲིང་ནས་གཏང་དགོས་པ་ལས་དཀར་མཛེས་ཁུལ་ཁོངས་སུ་གཏང་ཆོག་གི་མེད་སྐོར་སོགས་འགྲེལ་བརྗོད་གནང་སོང་།
ཡང་ཁོང་གིས། དཀར་མཛེས་ཁུལ་དུ་བོད་ཡིག་མེད་པར་བཟོས་རྗེས། བོད་པའི་དགེ་རྒན་ཁ་ཤས་རྒྱ་ཡིག་སྡེ་ཁག་ཏུ་འཛུལ་ཞུགས་བྱས་ཏེ་ལས་ཀ་གཉེར་བ་དང་བོད་ཡིག་དགེ་རྒན་མང་ཆེ་བས་ཚོང་ལས་ཙག་ཙིག་རེ་གཉེར་ཐབས་བྱེད་མུས་ཡིན་སྐོར་སོགས་འགྲེལ་བརྗོད་གནང་སོང་།
རྒྱལ་སྤྱིའི་བོད་དོན་ལས་འགུལ་བསྟི་གནས་ཁང་གི་སྙན་ཐོ་ལྟར་ན། རྒྱ་ནག་གཞུང་གིས་བོད་པའི་སློབ་ཕྲུག་བརྒྱ་ཆ་བདུན་ཅུ་ལྷག་དང་། བོད་པའི་སློབ་མ་བཞིའི་ནང་གི་སློབ་མ་གསུམ་བཙན་གྱིས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་འཇུག་གི་ཡོད་ཅིང་། ད་སྔ་བར་ལོ་ ༦ ནས་ ༡༨ བར་ཡིན་པའི་བོད་པའི་སློབ་མ་ཁྱོན་འབུམ་ ༨ ནས་ ༩ བར་དབང་སྒྱུར་ལམ་ལུགས་ཀྱི་བཅའ་སྡོད་སློབ་གྲྭའི་ནང་གཏན་སྡོད་བྱེད་མུས་ཡིན་པ་དང་། བྱིས་པ་ལོ་བཞི་དང་ལྔ་ཅན་ཡང་སློབ་གྲྭ་དེ་དག་གི་ནང་བཙན་གྱིས་འཇུག་གི་ཡོད་སྐོར་སོགས་གསལ་ཡོད་འདུག
གཞན་ཡང་། ཕྱི་ལོ་ ༢༠༢༡ ཟླ་ ༧ ཚེས་ ༨ ཉིན་རྒྱ་ནག་གཞུང་གིས་མགོ་ལོག་དར་ལག་ནས་སེང་འབྲུག་སྟག་རྩེའི་བཅའ་སྡོད་སློབ་གྲྭ་གཙོས་མགོ་ལོག་རྨ་ཆེན་རྫོང་ནས་སློབ་གྲྭ་གསུམ་དང་། དགའ་བདེ་ནས་སློབ་གྲྭ་གཅིག གཅིག་སྒྲིལ་གྱི་སློབ་གྲྭ་གཉིས་བཅས་ཁྱོན་བོད་མི་རང་གི་སྒེར་གཉེར་སློབ་གྲྭ་ ༧ སྒོ་བརྒྱབ་བཅུག་ཡོད་ཅིང་། འདས་པའི་ལོ་ཤས་རིང་རྒྱ་ནག་གཞུང་གིས་བོད་ཀྱི་སྐད་ཡིག་སློབ་སྦྱོང་བྱེད་སའི་སློབ་གྲྭ་དང་དགོན་སྡེ་ཁག་བཙན་གྱིས་སྒོ་བརྒྱབ་འཇུག་གི་ཡོད་པ་མ་ཟད། བོད་ནང་གི་རྩོམ་པ་པོ་དང་མཁས་དབང་མང་པོ་ཞིག་ལ་ནག་ཉེས་སྣ་ཚོགས་གཡོགས་ནས་འབུར་འཇོམས་གཏོང་གིན་ཡོད་འདུག
གསར་འགོད་པ། དཔལ་ལྡན།
