སྲིད་སྐྱོང་མཆོག་གིས་ཨ་རིའི་ཇོར་ཇེ་ཡ་དང་ལོ་སི་ཨན་ཇི་ལི་སིའི་ནང་གནས་སྡོད་བོད་མི་དང་བོད་དོན་རྒྱབ་སྐྱོར་བ་རྣམས་ལ་བཀའ་ཤག་སྐབས་བཅུ་དྲུག་པའི་ཕྱག་ལས་དང་བོད་ནང་གི་ཛ་དྲག་གནས་སྟངས་སོགས་ཀྱི་ཐོག་གསུང་བཤད་གནང་འདུག
ཟླ་འདིའི་ཕྱི་ཚེས་ ༡༤ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་ཇོར་ཇེ་ཡ་མངའ་སྡེའི་རྒྱལ་ས་ཨེཊ་ལན་ཊ་ (Atlanta) རུ་གཞུང་འབྲེལ་ཕྱོགས་ཕེབས་གནང་སྟེ། ཉིན་དེའི་ཕྱི་དྲོར་སྲིད་སྐྱོང་མཆོག་གིས། ཨེཊ་ལན་ཊར་རྟེན་གཞི་བྱས་པའི་འབྲས་སྤུངས་བློ་གསལ་གླིང་ཆོས་ཚོགས་སུ་མཆོད་མཇལ་དང་ས་གནས་བོད་མི་རྣམས་ལ་སྐབས་ ༡༦ བཀའ་ཤག་གི་སྲིད་ཇུས་ལངས་ཕྱོགས་དང་། བོད་ནང་གི་ཛ་དྲག་གནས་སྟངས་ཇེ་ཆེར་འགྲོ་བཞིན་པ། བཙན་བྱོལ་བོད་མི་རྣམས་ཀྱིས་བོད་ཀྱི་ཆོས་རིག་འཛིན་སྐྱོང་སྤེལ་གསུམ་ཐོག་འབད་བརྩོན་བྱ་དགོས་གལ་ཆེ་སྐོར་སོགས་ཀྱི་ཐོག་ལ་གསུང་བཤད་གནང་འདུག
ཟླ་འདིའི་ཕྱི་ཚེས་ ༡༣ ཉིན་སྲིད་སྐྱོང་སྤེན་པ་ཚེ་རིང་མཆོག་ཨལ་བྷུ་ཀར་ཁིའི་ (Albuquerque) གནམ་ཐང་དུ་ཕེབས་འབྱོར་གནང་སྟེ། ཉིན་དེའི་ཕྱི་དྲོར་ས་གནས་མི་མང་ལ་བཀའ་སློབ་གསུང་བཤད་གནང་། ཕྱི་ཚེས་ ༡༢ ཉིན་སྲིད་སྐྱོང་སྤེན་པ་ཚེ་རིང་མཆོག་ལྷོ་ཁེ་ལི་ཕོར་ནི་ཡར་ཆེད་ཕེབས་ཀྱིས་ས་གནས་བོད་མི་རྣམས་ལ་བོད་དོན་འཐབ་རྩོད་དང་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སྐོར་གསུང་བཤད་གནང་ཡོད་འདུག
སྲིད་སྐྱོང་སྤེན་པ་ཚེ་རིང་མཆོག་གི་ལྷོ་དབུས་ཨ་མི་རི་ཀའི་གཞུང་འབྲེལ་འཚམས་གཟིགས་ལེགས་པར་གྲུབ་རྗེས། ཕྱི་ཚེས་ ༡༢ ཉིན་ཨ་རིའི་ལོ་སི་ཨན་ཇི་ལི་སི་ (Los Angeles) རུ་ཕེབས་ཏེ། ས་གནས་བོད་མི་རྣམས་ལ་གསུང་བཤད་གནང་ཡོད་འདུག་ལ། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་སྒྲིག་འཛུགས་ཀྱི་ངོས་ནས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་གྲོས་ཆོད་དགོངས་དོན་ལྟར། དེ་སྔོན་དྭང་བླངས་དཔྱ་དངུལ་དུས་ཐོག་འབུལ་ཐུབ་མེད་པ་རྣམས་ལ་ཆག་ཡང་དང་། གསར་བཟོ་གནང་འདོད་ཡོད་རིགས་ལ་དེ་ལྟར་གསར་བཟོ་གནང་ཕྱོགས་སྟབས་བདེ་རུ་བཏང་ཡོད་སྐོར་དང་། སྲིད་སྐྱོང་སྤེན་པ་ཚེ་རིང་མཆོག་གིས་དབུ་མའི་ལམ་གྱི་སྲིད་ཇུས་གཞིར་བཞག་ཐོག་བཀའ་ཤག་སྐབས་བཅུ་དྲུག་པའི་ལངས་ཕྱོགས་དང་། བཀའ་ཤག་སྐབས་བཅུ་དྲུག་པའི་ངོས་ནས་དབུ་མའི་ལམ་གྱི་ཐབས་ཇུས་ལ་འགྱུར་བ་ཕྲན་བུ་བཏང་སྟེ་ལོ་རྒྱུས་ཐོག་བོད་དེ་རང་བཙན་ཡོད་པའི་རྒྱལ་ཁབ་ཅིག་ཡིན་པ་ནན་བརྗོད་གནང་བཞིན་པའི་སྐོར། དེ་བཞིན་མ་འོངས་ལས་འཆར་སོགས་ལག་བསྟར་སྟབས་བདེ་ཡོང་སླད་བཙན་བྱོལ་བོད་མིའི་གྲངས་ཐོ་ཚད་ལྡན་བཟོ་ཐབས་གནང་བཞིན་པ། བོད་མིའི་སྒྲིག་འཛུགས་ཀྱི་འཛིན་སྐྱོང་སྒྲོམ་གཞི་ཚད་ལྡན་བཟོ་སྒྲིག་གནང་བཞིན་པའི་སྐོར་འགྲེལ་བརྗོད་གནང་འདུག
ད་དུང་སྲིད་སྐྱོང་མཆོག་གིས། ཏོག་དབྱིབས་གཉན་རིམས་ཁྱབ་གདལ་དུ་ཕྱིན་པའི་རྗེས་སུ་བོད་མིའི་དགོས་མཁོ་རྟོག་ཞིབ་སླད་བོད་མི་གནས་སྡོད་གཞིས་ཆགས་དང་ས་གནས་ཁག་ཏུ་གཟིགས་སྐོར་དུ་ཕེབས་ཡོད་སྐོར་དང་། ཉིན་ཤས་སྔོན་དུ་ལྷོ་དབུས་ཨ་མེ་རི་ཀར་གཞུང་འབྲེལ་འཚམས་གཟིགས་བསྐྱངས་ཏེ་གྲོས་ཚོགས་འཐུས་མི་དང་། གནད་ཡོད་མི་སྣ་སོགས་དང་མཇལ་འཕྲད་ཀྱིས་བོད་དོན་རྒྱབ་སྐྱོར་སྲ་བརྟན་དང་ཞུ་གཏུག་གནང་ཡོད་སྐོར། རྒྱལ་སྤྱི་དང་རྒྱ་ནག་གི་ཆབ་སྲིད་ཀྱི་འགྱུར་ལྡོག་སྐོར་དང་དེའི་ཁྲོད་ནས་བོད་དོན་ཆེད་གོ་སྐབས་སྟངས་འཛིན་གནང་ཕྱོགས་སྐོར་གསུང་བཤད་གནང་ཡོད་འདུག
སྲིད་སྐྱོང་སྤེན་པ་ཚེ་རིང་མཆོག་གིས་ལྷོ་ཨ་རིའི་ཁུལ་དུ་གཞུང་འབྲེལ་ཕྱོགས་ཕེབས་གནང་མགོ་འཛུགས་ཏེ། བ་རཱ་ཛིལ་ནང་གི་སའོ་པོ་ལོ་གཙུག་ལག་སླེབ་གཉེར་ཁང་དང་། ཀོ་ལམ་བྷི་ཡ་རྒྱལ་ཡོངས་གཙུག་ལག་སློབ་གཉེར་ཁང་། འཕྲུལ་རིག་གི་གཙུག་ལག་སློབ་གཉེར་ཁང་སོགས་སྙན་གྲགས་ཆེ་བའི་གཙུག་ལག་སློབ་གཉེར་ཁང་ ༨ ཀྱི་ནང་གསུང་བཤད་གནང་ཡོད་པ་དང་། བ་རཱ་ཛིལ་སའོ་པོ་ལོའི་མངའ་སྡེའི་གྲོས་ཚོགས་ཀྱི་ཚོགས་གཙོ་དང་ཚོགས་གཞོན། གྲོས་ཚོགས་འཐུས་མི། དེ་བཞིན་བ་རཱ་ཛིལ་བོད་ཁང་གི་འགན་འཛིན་ལྷན་ཚོགས་ཀྱི་ཚོགས་མི་རྣམས་དང་། བོད་དོན་རྒྱབ་སྐྱོར་བ་སོགས་ལ་མཇལ་འཕྲད་གནང་སྟེ་བོད་ནང་གི་ཛ་དྲག་གནས་སྟངས་སོགས་ངོ་སྤྲོད་གནང་འདུག གཞན་ཡང་། བ་རཱ་ཛིལ་གྱི་ས་ཧུ་པ་ཧུ་ལ་མངའ་སྡེའི་གྲོས་ཚོགས་ཀྱི་ཚོགས་གཙོ་དང་། ཚོགས་གཞོན། གྲོས་ཚོགས་འཐུས་མི། གྲོས་ཚོགས་ཀྱི་རྒྱལ་སྤྱིའི་འབྲེལ་ལམ་ཚོགས་ཆུང་གི་ཚོགས་མི་སོགས་ལ་མཇལ་འཕྲད་གནང་སྟེ། བོད་ཀྱི་ཆོས་དང་རིག་གཞུང་གི་དོན་སྙིང་ངོ་སྤྲོད་དང་། བོད་ནི་ཆབ་སྲིད་ཁོ་ན་མ་ཡིན་པར་འཛམ་བུ་གླིང་གི་ཁོར་ཡུག་ལ་གལ་གནད་ཆེན་པོ་ཆགས་ཀྱི་ཡོད་སྐོར་སོགས་འགྲེལ་བརྗོད་གནང་འདུག
ད་དུང་སྲིད་སྐྱོང་སྤེན་པ་ཚེ་རིང་མཆོག་གིས་ཀོ་ལམ་བྷི་ཡའི་བསམ་མཛོད་བསྟི་གནས་ཁང་དང་། ས་གནས་ཀྱི་གྲོས་ཚོགས་འཐུས་མི། བོད་དོན་རྒྱབ་སྐྱོར་བ་སོགས་ལ་མཇལ་འཕྲད་ཀྱིས། བོད་དོན་དྲིལ་བསྒྲགས་གནང་བ་མ་ཟད། བ་རཱ་ཛིལ་དང་མེཀ་སི་ཀོ། དེ་བཞིན་ཀོ་ལམ་བྷི་ཡའི་ས་གནས་བོད་མི་རྣམས་ལ་མཇལ་འཕྲད་ཀྱིས་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སོགས་ངོ་སྤྲོད་གནང་འདུག་ལ། ཀོ་ལམ་བྷི་ཡའི་ས་གནས་ཀྱི་གསར་ཁང་ (Caracol Radio La W) དང་། (El Spectador)། བ་རཱ་ཛིལ་ནང་གི་གསར་ཁང་ (Indian Eye) སོགས་ཀྱི་བཅར་འདྲིར་དང་ལེན་གནང་སྟེ། བོད་མཐོ་སྒང་གི་གལ་གནད་སྐོར་འགྲེལ་བརྗོད་ཞིབ་ནན་གནང་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
