རྒྱ་ནག་གི་དངུལ་ཁང་གི་སྔར་གྱི་ལས་འཛིན་དཔོན་ལིའུ་ལེན་ཀི་ (Liu Liange)ཟེར་བ་དེས་ལྐོག་ཟ་རུལ་སུངས་དང་ཁྲིམས་འགལ་བུ་ལོན་གཡར་བའི་དོགས་གཞིའི་འོག་འཛིན་བཟུང་བྱས་ཏེ་ཞིབ་བཤེར་བྱེད་བཞིན་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༦ ཉིན། རྒྱ་ནག་གི་དངུལ་ཁང་ (Bank of China) གི་སྔར་གྱི་ལས་འཛིན་དཔོན་ལིའུ་ལེན་ཀི་ (Liu Liange) ཡིས་ལྐོག་རྔན་བླངས་པ་དང་། ཁྲིམས་འགལ་གྱི་བུ་ལོན་གཡར་བའི་དོགས་གཞིའི་འོག་འཛིན་བཟུང་བྱས་ཏེ་ཞིབ་བཤེར་བྱེད་བཞིན་ཡོད་འདུག་ལ། འདས་པའི་ལོ་ལྔ་ཙམ་ནང་རྒྱ་ནག་དངུལ་ཁང་གི་འགན་འཛིན་དང་ལས་འཛིན་དཔོན་མང་པོ་འཕོ་འགྱུར་བཏང་སྟེ་འཛིན་སྐྱོང་དོ་དམ་ཐོག་གཡོ་སྐྱོམ་མང་པོ་བྱུང་ཡོད་འདུག
རྒྱ་ནག་གི་དངུལ་ཁང་ནི་འདས་པའི་མི་ལོ་ ༡༠ ལྷག་ནང་རྒྱུད་གཅིག་ལམ་གཅིག་གི་ཕྱི་འབྲེལ་ཐབས་ཇུས་ཁྲོད་འཛམ་གླིང་རྒྱལ་ཁབ་དང་ས་ཁུལ་ ༦༣ ནང་འཛུགས་སྐྲུན་མ་འཇོག་དང་དངུལ་གཏོང་ལེན་བྱེད་མཁན་དང་ལག་བསྟར་བ། ཁེ་ཕན་ལེན་མཁན་བཅས་ཆགས་བསྡད་ཡོད་པ་རེད། དེ་དང་ཆབས་ཅིག་འདས་པའི་ལོ་ཤས་ནང་རྒྱ་ནག་
འདས་པའི་ལོ་ཤས་ནང་རྒྱ་ནག་ནང་དངུལ་ཁང་དང་འབྲེལ་བའི་ལྐོག་ཟ་རུལ་སུངས་ཀྱི་གནད་དོན་ཁག་ཅིག་ནི། འདི་ལོའི་ཕྱི་ཟླ་ ༦ པའི་ནང་རྒྱ་ནག་མི་དམངས་དངུལ་ཁང་གི་འགན་འཛིན་གཞོན་པ་ཧྥན་ཡི་ཧྥེ་ཡིས་ལྐོག་རྔན་བླངས་བའི་དོགས་གཞིའི་འོག་ལས་གནས་དང་དམར་ཤོག་ཚོགས་པ་ནས་ཕྱིར་ཕུད་བཏང་ཡོད་པ་དང་། དེ་བཞིན་འདས་ལོའི་ཕྱི་ཟླ་ ༡ ནང་རྒྱ་ནག་མི་སྲོག་འགན་ལེན་ཚད་ཡོད་ཚོང་གཉེར་ཁང་ (China Life Insurance Company Limited) གི་འགན་འཛིན་ཝང་བྷིན་ (Wang Bin) ཟེར་བ་ཞིག་གིས་ཨ་སྒོར་ས་ཡ་ ༤༥ ལྷག་ལྐོག་ཟ་དང་ཨ་སྒོར་ས་ཡ་ ༧ སྦེད་སྐུང་བྱས་པའི་ཉེས་མིང་འོག་ཚེ་བཙོན་གྱི་ཁྲིམས་ཐག་བཅད་ཡོད་པ་རེད།
ལིའུ་ལིན་ཀི་ནི་རྒྱ་ནག་བྱང་ཤར་ཁུལ་གྱི་མངའ་སྡེ་ཅི་ལིན་ (Jilin) ནས་ཡིན་ཞིང་། ཕྱི་ལོ་ ༡༩༨༥ ལོར་ཅི་ལིན་དངུལ་རྩིས་དང་ཚོང་ལས་ཀྱི་མཐོ་སློབ་ (Jilin Finance and Trade College) ནས་དངུལ་རྩིས་ཐོག་ལ་སློབ་མཐར་ཕྱིན། ཕྱི་ལོ་ ༡༩༨༧ ལོར་དཔལ་འབྱོར་རིག་པའི་གཙུག་ལག་རབ་འབྱམས་པའི་སློབ་མཐར་ཕྱིན་རྗེས། རྒྱ་ནག་མི་དམངས་དངུལ་ཁང་ (People’s Bank of China) དུ་ལོ་ངོ་ ༢༠ རིང་འགན་འཛིན་དང་། འགན་འཛིན་གཞོན་པ། ལས་འཛིན་དཔོན་སོགས་ལས་གནས་མི་འདྲ་བ་མང་པོ་གཉེར་ཡོད་འདུག ཕྱི་ལོ་ ༢༠༡༨ ལོར་རྒྱ་ནག་གི་དངུལ་ཁང་གི་འགན་འཛིན་གཞོན་པ་བྱས། དེ་ནས་ཕྱི་ལོ་ ༢༠༡༩ ནས་ ༢༠༢༣ བར་རྒྱ་ནག་དངུལ་ཁང་གི་ལས་འཛིན་དཔོན་གྱི་འགན་ཁུར་ཡོད་ཀྱང་། འདི་ལོའི་ཕྱི་ཟླ་ ༣ པའི་ནང་ལས་གནས་ནས་རྩ་དགོངས་ཞུ་དགོས་བྱུང་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
![Chinese President Xi Jinping formally removed Defense Minister Li Shangfu [left] and former Foreign Minister Qin Gang [right] from the State Council.](https://tibettimes.net/wp-content/uploads/2024/01/Qingang-and-Ling-Shangfu--360x180.jpg)
