ཁེ་ན་ཌ་གཞུང་གིས་ཡུལ་དེའི་མི་སེར་རྣམས་བོད་དང་ཤར་ཊུར་ཀི་སི་ཐན་སོགས་སུ་སྐྱོད་སྐབས་འགྲོ་མི་ཆོག་པའི་ས་ཆར་མི་འགྲོ་བ་དང་གང་བྱུང་འདྲ་པར་མི་ལེན་པ། ཁྲོམ་སྐོར་འདུ་འཛོམས་སོགས་ལ་མཉམ་ཞུགས་མི་བྱེད་པ་སོགས་རྒྱ་ནག་གཞུང་གི་བཙན་གནོན་ལས་རང་ཉིད་སྐྱོབ་ཐབས་དགོས་པའི་ལམ་སྟོན་གནང་འདུག
People take photographs of the musical fountain at Potala Palace Square in Lhasa, Tibet, on 27 June 2023. (CNS)
རྒྱ་ནག་གཞུང་གི་བཙན་གནོན་འོག་ཡོད་པའི་བོད་དང་ཤར་ཊུར་ཀི་སི་ཐན་སོགས་སུ་ཕྱི་མི་སྤྲོ་འཆམ་དུ་ཕྱིན་ན་དམ་དྲག་དང་རྟོག་ཞིབ་ནན་པོ་བྱས་ཏེ་རང་དབང་གཏན་ནས་མེད་པའི་དཀའ་ངལ་མང་དག་ཅིག་འཕྲད་མུས་ཡིན་པ་ལྟར། ཟླ་འདིའི་ཕྱི་ཚེས་ ༡༠ ཉིན་ཁེ་ན་ཌའི་གཞུང་འབྲེལ་འགྲིམ་འགྲུལ་སློབ་སྟོན་ལྷན་ཚོགས་(official travel advisory) ཀྱིས། རྒྱ་ནག་གཞུང་གིས་བཙན་བཟུང་བྱས་པའི་བོད་དང་། ཤར་ཊུར་ཀི་སི་ཐན་ཚུད་པའི་ཧྥ་རན་སི་དང་ཨ་རབ། ལེ་བྷེ་ནིན། ཊུར་ཀི ཊོ་ནི་ཞི་ཡ། རྒྱ་གར། མེག་སི་ཀོ དེ་བཞིན་དམག་འཁྲུག་དྲག་པོ་ལངས་བཞིན་པའི་ཨེ་ཛི་རེལ་བཅས་ཀྱི་ནང་འགྲོ་མཁན་ཁེ་ན་ཌའི་ཡུལ་མི་རྣམས་ལ་བདེ་འཇགས་དང་བདེ་སྲུང་(Safety and security)ཞེས་པའི་ལམ་སྟོན་གསལ་བསྒྲགས་ཤིག་གནང་བའི་ནང་། ཁེ་ན་ཌའི་ཡུལ་མི་གང་ཡང་རུང་བ་ཞིག་བོད་དང་ཤར་ཊུར་ཀི་སི་ཐན་སོགས་སུ་སྐྱོད་འདོད་ཡོད་ཚེ། ཐོག་མར་རྒྱ་ནག་གཞུང་ཚབ་ཁང་ནས་ཡིག་ཆ་རག་དགོས་པ་དང་། དེ་ནས་གཞུང་ཚབ་ཁང་སོགས་ཀྱིས་གོ་སྒྲིག་བྱས་པའི་འགྲིམ་འགྲུལ་ས་ཚིགས་ལས་ས་གནས་གཞན་དུ་རང་དགར་བསྐྱོད་མི་ཆོག་པ་མ་ཟད། གཞུང་གིས་བཀའ་འཁྲོལ་མེད་པའི་ས་གནས་ཁག་ཏུ་ཕྱིན་ཚེ། ཆད་པ་གཅོད་པ་དང་། འཛིན་བཟུང་། རྒྱང་ཕུད་སོགས་གཏོང་སྲིད་ལ། ལྷག་པར་དུ་བརྡ་ལན་གང་ཡང་མེད་པར་དམག་མི་འགྲེམས་འཇོག་བྱས་ཏེ་དམ་དྲག་ཀྱང་བྱ་སྲིད་པས། བོད་དང་ཤར་ཊུར་ཀི་སི་ཐན་གཙོས་རྒྱ་ནག་ཏུ་འགྲོ་སྐྱོད་བྱ་རྒྱུར་ཧ་ཅང་ཉེན་ཁ་ཡོད་སྐོར་སོགས་འཁོད་འདུག
ཡང་ལམ་སྟོན་བསྒྲགས་ཡིག་དེའི་ནང་བོད་དུ་སྐྱོད་སྐབས་ཡིད་འཇོག་བྱ་དགོས་པའི་སྐོར་ལ། ཡུལ་སྐོར་བ་ཚོ་རྒྱ་ནག་གཞུང་གིས་གོ་སྒྲིག་བྱས་པའི་ཡུལ་སྐོར་སྤྲོ་འཆམ་གྱི་ལས་གཞིའི་ཁོངས་སུ་ངེས་པར་དུ་ཞུགས་དགོས། སྐབས་རེར་རྒྱ་ནག་གཞུང་གིས་གནས་སྐབས་རིང་ཡིག་ཆ་ནར་འགྱངས་གཏོང་བ་དང་སི་ཁྲོན་དང་མཚོ་སྔོན་ཞིང་ཆེན་གྱི་ཁོངས་སུ་འགྲོ་བར་དམ་དྲག་བྱ་ངེས་ཡིན་པ་མ་ཟད། བོད་རང་སྐྱོང་ལྗོངས་ཟེར་བའི་ནང་དུ་སྐྱོད་སྐབས་ཡུལ་སྐོར་བའི་ལམ་གླ་སོགས་ཆ་ཚང་སྤྲད་དགོས་པའི་ཁར། ཡུལ་ཁྲིམས་སོགས་དང་མི་མཐུན་པའི་ལས་ཀ་བྱས་ཚེ། ཉེན་རྟོག་པ་དང་ལྟ་སྲུང་བ་སོགས་ཀྱིས་གང་བྱུང་དམ་དྲག་དང་ཞིབ་བཤེར་ཡང་བྱ་སྲིད་པས་ངེས་པར་དུ་ཡིད་གཟབ་དགོས་སྐོར་སོགས་འཁོད་འདུག
ལམ་སྟོན་ནང་བོད་དུ་བྱེད་མི་ཆོག་པའི་གནད་དོན་ཁག་ཅིག་གསལ་སྟོན་བྱས་ཡོད་པའི་ཁྲོད། བོད་ནང་དུ་ཟིང་འཁྲུག་དང་མི་མང་འདུ་འཛོམས་སོགས་ཀྱི་ནང་མཉམ་ཞུགས་དང་། པར་སོགས་ལེན་མི་ཆོག་པ་དང་། རྒྱ་ནག་གཞུང་གི་ཆབ་སྲིད་ཀྱི་ལངས་ཕྱོགས་སོགས་དང་མི་མཐུན་པའི་ལས་ཀ་གང་བྱུང་བྱ་མི་ཆོག་པ། རྒྱ་ནག་བདེ་སྲུང་མི་སྣ་ཟེར་བའི་ལམ་སྟོན་ཐོག་ཡུལ་སྐོར་གྱི་ས་གནས་གཅིག་པུར་སྐྱོད་པ་ལས་གཞན་དུ་འགྲོ་སྐྱོད་མི་ཆོག་པ། ཡུལ་མི་སོགས་དང་གསང་བའི་ཐོག་ནས་ཐུག་འཕྲད་སོགས་བྱ་མི་ཆོག གལ་ཏེ་རྒྱ་ནག་གཞུང་གི་བདེ་འཇགས་ཟེར་བ་དང་འགལ་ནས་འཛིན་བཟུང་བྱས་ཚེ། རྒྱ་ནག་ཏུ་ཡོད་པའི་ཁེ་ན་ཌའི་གཞུང་ཚབ་ཁང་ལ་གང་མགྱོགས་བརྡ་ལན་དང་རོགས་རམ་དགོས་པའི་རེ་བ་ཞུ་དགོས་སྐོར་སོགས་གསལ་འདུག
རྒྱ་ནག་གི་འཕྲུལ་རིག་ཚན་རྩལ་བཟོ་ཚོང་ཁང་ཆེ་ཤོས་ཧྭ་ཝེ་(Huawei)ཡིས་རྒྱལ་སྤྱིའི་ཐོག་ནས་ཨི་རན་ལ་བཀལ་བའི་དཔལ་འབྱོར་ཉེས་ཆད་ཀྱི་ཁྲིམས་སྒྲིག་ལ་རྩིས་མེད་རྡོག་རོལ་གཏོང་གི་ཡོད་པའི་ནག་ཉེས་འོག ཕྱི་ལོ་ ༢༠༡༨ ཟླ་ ༡༢ ཚེས་ ༡ ཉིན། ཁེ་ན་ཌ་གཞུང་གིས་གསང་བའི་ཐོག་ནས་བཟོ་ཚོང་ཁང་དེའི་ནོར་དོན་སྤྱི་གཉེར་བ་མིན་ཝན་ཀྲུའུ་(Meng Wanzhou)ཞེས་པ་འཛིན་བཟུང་བྱས་རྗེས། ཁེ་ན་ཌ་དང་རྒྱ་ནག་བར་གྱི་འགལ་ཟླ་ཆེ་རུ་ཕྱིན་ཏེ། རྒྱ་ནག་གིས་འཁོན་ལན་སློག་ཆེད་རྒྱ་ནག་ནང་དུ་ཡོད་པའི་ཁེ་ན་ཌའི་སྐུ་ཚབ་ཟུར་པ་མེ་ཁལ་ཀོབ་རིག་ (Michael kovrig) དང་། མེ་ཁལ་སི་པེ་ཝར་གཉིས་གསང་མྱུལ་བ་ཡིན་པའི་ཉེས་མིང་འོག་འཛིན་བཟུང་བྱས། ཨ་རིའི་གཞུང་ནས་མིན་ཝན་ཀྲུའུ་ཁོང་ཚོར་རྩིས་སྤྲོད་དགོས་པའི་རེ་བ་བཏོན་ཡོད་ཀྱང་། ཕྱི་ལོ་ ༢༠༢༡ ཟླ་ ༩ པའི་ནང་ཁེ་ན་ཌ་གཞུང་གིས་མིན་ཝན་ཀྲུའུ་ཀློད་གྲོལ་བཏང་སྟེ་རྒྱ་ནག་ཏུ་ཕྱིར་ལོག་བཏང་ཡོད་པ་དང་། རྒྱ་ནག་གཞུང་གིས་ཀྱང་ཁེ་ན་ཌའི་མི་སེར་གཉིས་དེ་ཀློད་གྲོལ་བཏང་ཡོད་པ་སོགས་ཕན་ཚུན་གྱི་མི་སེར་འཛིན་བཟུང་དང་བཙོན་འཇུག་བྱས་པའི་གནད་དོན་ཛ་དྲག་ཅན་དེ་འདྲ་བྱུང་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
