རིགས་སློབ་མ་ལག་གཉིས་ཀྱི་དུས་དྲན་སྐབས་ཞིང་གཤེགས་དམ་པ་རྗེ་བཙུན་བློ་བཟང་རྒྱ་མཚོ་མཆོག་གི་གསུང་འབུམ་དབུ་འབྱེད་དང་རིགས་ལམ་སློབ་ཟུར་བཞི་ལ་ཆེ་བསྟོད་འཁོར་ལོ་གསུམ་གྱི་གཟེངས་རྟགས་གནང་སོང་།
བཞུགས་སྒར་རིགས་ལམ་སློབ་གཉེར་ཁང་དབུ་བརྙེས་ནས་ལོ་ངོ་ ༥༠ དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་སྲུང་གཙི་མཛད་སྒོ་འཚོགས། པར་བོད་ཀྱི་དུས་བབ། ༢༠༢༣།༡༠།༢༦
དེ་རིང་སྔ་དྲོ་ཆུ་ཚོད་ ༡༠ ཐོག་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ཚོགས་ཁང་དུ། བཞུགས་སྒར་རིགས་ལམ་སློབ་གཉེར་ཁང་དབུ་བརྙེས་ནས་ལོ་ངོ་ ༥༠ དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་སྲུང་གཙིའི་མཛད་སྒོ་འཚོགས་སོང་བ་དང་། ཚོགས་ཐོག་ཏུ་སྐུ་མགྲོན་གཙོ་བོ་དགའ་ལྡན་ཁྲི་པ་རྗེ་བཙུན་བློ་བཟང་བསྟན་འཛིན་དཔལ་བཟང་བོ་མཆོག་དབུ་བཞུགས་ཐོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་གཞན། བོད་མི་མང་སྤྱི་འཐུས་ལས་ཐོག་ཁག་ཅིག གཞུང་ཞབས་འདེམས་བསྐོ་ལྷན་ཁང་གི་འགན་འཛིན་ལགས། དེ་བཞིན་གཞུང་ཁོངས་དང་གཞུང་ཁུངས་མིན་པའི་ཚོགས་སྡེ་ཁག་གི་སྐུ་ཚབ། ས་རཱ་མཐོ་སློབ་ཀྱི་སློབ་ཟུར་དང་དགེ་ལས་སློབ་གཉེར་བ་རྣམས་བཅས་འཛོམས་འདུག སྐབས་དེར་ཞིང་གཤེགས་དམ་པ་དབུ་དགེ་རྗེ་བཙུན་བློ་བཟང་རྒྱ་མཚོ་མཆོག་གི་གསུང་འབུམ་དབུ་འབྱེད་དང་། རིགས་ལམ་སློབ་གཉེར་ཁང་གི་སློབ་ཟུར་མཚམས་པ་དགེ་སློང་དོན་གྲུབ་ལགས་དང་། མཚན་ཉིད་གྲྭ་ཚང་གི་དཔེ་འཁྲིད་དགེ་རྒན་རྒྱ་མཚོ་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། ཨི་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བཟང་བསྟན་འཛིན་ནེ་གེ་ལགས་བཞི་ལ་ཆེ་བསྟོད་འཁོར་ལོ་གསུམ་གྱི་གཟེངས་རྟགས་གནང་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས་རིགས་སློབ་མ་ལག་གཉིས་ཀྱི་དུས་དྲན་མཛད་སྒོར་འཚམས་འཕྲིན་ཞིག་བསྩལ་ཡོད་པའི་ནང་དུ། བོད་གངས་ཅན་པའི་ཆོས་དང་རིག་གཞུང་སྐད་ཡིག་བཅས་པ་མ་ཉམས་རྒྱུད་འཛིན་ཆེད་རིགས་ལམ་སློབ་གཉེར་ཁང་བཙུགས་ནས་མི་ལོ་ ༥༠ དང་། དེའི་ཡན་ལག་ས་རཱ་བོད་ཀྱི་མཐོ་རིམ་སློབ་གཉེར་ཁང་བཙུགས་ནས་མི་ལོ་ ༢༥ འཁོར་བའི་དུས་དྲན་གཉིས་འཛོམས་ཀྱི་མཛད་སྒོར་ཞུགས་མཁན་དགེ་ལས་སློབ་མ་སློབ་ཟུར་ཕྱི་ནང་གི་སྐུ་མགྲོན་བཅས་ལ་འཚམས་འདྲི་བཀྲ་ཤིས་བདེ་ལེགས་ཡོད། འདས་པའི་ལོ་འདི་དག་གི་རིང་གདན་ས་ཁག་གི་གཞུང་ཆེན་སློབ་གཉེར་ལ་ཞུགས་མི་ཐུབ་པའི་བཙན་བྱོལ་སྤྱི་ཚོགས་ནང་རང་རིགས་དོན་གཉེར་ཅན་སེར་སྐྱ་ཁྱད་མེད་དང་། དེ་བཞིན་སོག་པོ་དང་། ཀོ་རི་ཡ། ཝི་ཏི་ནམ། ཐའེ་ཝན་སོགས་ཕྱི་རྒྱལ་མི་རིགས་དང་བཅས་པར་དཔལ་ནལེནྡྲའི་མཁས་པའི་བཞེད་གཞུང་དང་། བོད་བརྒྱུད་ནང་བསྟན་གྱི་ཆོས་དང་རིག་གཞུང་སྐད་ཡིག་དང་བཅས་པར་རང་རང་བློ་ཚོད་དང་བསྟུན་པའི་སློབ་གཉེར་བྱ་ཡུལ་གྱི་བསྟི་གནས་དམིགས་བསལ་ཅན་འདིས་གཙུག་ལག་རབ་འབྱམས་པ་དང་། མཐོ་སློབ་རིག་གནས་རབ་འབྱམས་པ། དགེ་རྒན། ལོ་ཙཱ་བ་སོགས་མཐོ་རིམ་ཤེས་ལྡན་གྱི་མི་སྣ་བརྒྱ་ཕྲག་མང་པོ་བསྐྱེད་སྲིང་གིས་བོད་ཀྱི་བསྟན་སྲིད་མི་རིགས་དང་བཅས་པར་ཞབས་འདེགས་བསྒྲུབས་དང་སྒྲུབ་བཞིན་ཡོད་པ་ནི་བླ་ན་མེད་པའི་བྱས་རྗེས་ཤིག་ཡིན་པས་ཡི་རང་བསྔགས་བརྗོད་དང་། འདས་གསོན་ཡོངས་ལ་རྗེས་འཛིན་སྨོན་ལམ་ཡོད་ཅེས་གསུངས་འདུག
རིགས་སློབ་མ་ལག་གཉིས་ཀྱི་སྤྱི་ཁྱབ་འགན་འཛིན་དགེ་བཤེས་བསམ་གཏན་རྒྱ་མཚོ་ལགས་ཀྱིས་གསུང་བཤད་གནང་། པར་བོད་ཀྱི་དུས་བབ། ༢༠༢༣།༡༠།༢༦
རིགས་སློབ་མ་ལག་གཉིས་ཀྱི་སྤྱི་ཁྱབ་འགན་འཛིན་དགེ་བཤེས་བསམ་གཏན་རྒྱ་མཚོ་ལགས་ཀྱིས། ན་ནིང་རིགས་ལམ་མ་ལག་གཉིས་ཀྱི་ངོས་ནས་ཐུགས་རྗེ་བཀའ་དྲིན་ཆེ་བཞེས་ཀྱི་ཆེད་བརྟན་བཞུགས་ཤིག་བསྟར་འབུལ་ཆོག་པར་ངག་ཐོག་ནས་སྙན་སེང་ཞུས་པ་ཡིན། ༧གོང་ས་རྒྱལ་བ་རིན་པོ་ཆེ་མཆོག་ནས་ཐུགས་དགྱེས་ཚོར་ཆེན་པོའི་ངང་ཞལ་བཞེས་གནང་བ་དང་། སྤྱིར་བརྟན་བཞུགས་ཟེར་བ་ནི་གཙོ་བོ་བླ་མའི་བཀའ་གསུང་ཅི་བསྒྲུབ་ཞུ་རྒྱུ་དེ་རེད། ཁྱེད་ཚོས་ད་ལྟ་བར་དུ་ཧུར་ཐག་འབད་ཐག་བྱེད་ཀྱི་འདུག ངོས་རང་དཔེ་དགའ་བོ་བྱུང་། ཞེས་གསུངས་སོང་། ང་རང་འདིར་ཡོང་ནས་ལོ་ལྔ་ཙམ་མ་གཏོགས་འགྲོ་ཡི་མེད་ཀྱང་། ཁྱེད་རྣམ་པའི་ལོ་ངོ་ ༥༠ ཡི་རིང་ཕྱག་ལས་གནང་བར་༧གོང་ས་མཆོག་ཐུགས་ཧ་ཅང་མཉེས་བོ་བྱུང་བའི་ཚོར་བ་བྱུང་། སྤྱིར་རིགས་ལམ་སློབ་གཉེར་ཁང་བཙུགས་པའི་ཉིན་མོ་ནི་ཕྱི་ལོ་ ༡༩༧༣ ལོའི་ཟླ་ ༧ ཚེས་ ༦ ཉིན་སྟེ་༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་ཉིན་རེད། ཕྱི་ཟླ་ ༧ བའི་ནང་ཆར་དུས་སྐབས་གནམ་གཤིས་ཡག་པོ་མེད་པས། ཕྱི་ཟླ་ ༡༠ ནང་དུ་དུས་དྲན་སྲུང་གཙི་བྱེད་དགོས་དོན་དེ་འདྲ་ཡིན། ཞེས་གསུངས་སོང་།
ཡང་ཁོང་གིས། ཕྱི་ལོ་ ༡༩༩༥ ལོར་ས་རཱ་བོད་ཀྱི་སློབ་གཉེར་ཁང་དུ་ཐོག་མར་སློབ་གཉེར་བྱེད་མགོ་ཚུགས་པ་ནས་བཟུང་སློབ་གཉེར་བའི་གྲངས་ ༥༠༠༠ ལྷག་སྐྱེད་སྲིང་བྱས་ཏེ། བོད་མིའི་སྒྲིག་འཛུགས་ཀྱི་ལས་ཁུངས་ཁག་ཏུ་ཞབས་ཕྱི་སྒྲུབ་བཞིན་ཡོད་པ་དང་། ད་ལྟའི་ཆར་སློབ་གཉེར་ཁང་འདི་རུ་དགེ་ལས་ ༥༠ དང་། སློབ་གཉེར་བ་ ༣༠༠ ལྷག་གིས་སློབ་སྦྱོང་བྱེད་བཞིན་ཡོད་ཅིང་། ༧གོང་ས་རྒྱལ་བ་རིན་པོ་ཆེ་མཆོག་དང་། རྒན་དམ་པ་བློ་བཟང་རྒྱ་མཚོ་ལགས་གཉིས་ཀྱི་བཀའ་དྲིན་གྱིས་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་སློབ་གཉེར་མཁན་ཞིག་ཡིན་ཚེ། ངེས་པར་དུ་སེམས་སུ་འཇོག་པ་ཞིག་ཡིན་ཞེས་བརྗོད་སོང་།རིགས་སློབ་མ་ལག་གཉིས་ཀྱི་སྤྱི་ཁྱབ་འགན་འཛིན་ཟུར་པ་དགེ་བཤེས་སྐལ་བཟང་དགྲ་འདུལ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གི་མདུན་དུ་ཞིང་གཤེགས་དབུ་དགེ་དམ་པ་རྗེ་བཙུན་བློ་བཟང་རྒྱ་མཆོག་གིས་དམ་བཅའ་གསུམ་ཕུལ་ཡོད་པ་རེད། དེ་ནི་སློབ་ཕྲུག་བཞིན་དུ་ཚོགས་ཀྱི་ཕྱི་རོལ་དུ་མི་འགྲོ་བ་དང་། ཁ་ལག་གཅིག་པ་བཟའ་བ། ཕོགས་གཅིག་པ་ལེན་པ་དེ་རེད། ཕོགས་ནི་ཟླ་གཅིག་ལ་སྒོར་མོ་ ༧༥ ཡིན་ཡང་། ང་ཚོར་སྒོར་མོ་ ༡༥ ལག་དངུལ་དུ་གནང་གི་ཡོད་པ་དང་། བཞུགས་སའི་ཁང་པ་གཅིག་ཡོད་ཅིང་། སྐབས་དེར་སྤྱི་བའི་གསང་སྤྱོད་འཁྲུས་ཁང་མ་གཏོགས་མེད། དེ་འདྲའི་སྐུ་ལས་བསྐྱོན་ཏེ་ང་ཚོ་གསོ་སྐྱོང་གནང་ཡོད་ཅེས་བརྗོད་སོང་།
དགའ་ལྡན་ཁྲི་རིན་པོ་ཆེ་མཆོག་མཛད་སྒོའི་ཐོག་ཆིབས་བསྒྱུར་བསྐྱངས་ཏེ་བླང་དོར་བཀའ་སློབ་བསྩལ། པར་བོད་ཀྱི་དུས་བབ། ༢༠༢༣།༡༠།༢༦
དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་གིས།་ཞིང་གཤེགས་དམ་པ་རྗེ་བཙུན་བློ་བཟང་རྒྱ་མཚོ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་གི་ལུང་བསྟན་བཀའ་སློབ་སྙིང་ལ་བཅངས་ཏེ། བཞུགས་སྒར་རིགས་ལམ་སློབ་གཉེེར་ཁང་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་གཉིས་བཙུགས་ཐུབ་པ་བྱུང་ཡོད་པ་དང་། མ་འོངས་པར་སློབ་གཉེར་ཁང་འདི་གཉིས་ནས་སློབ་དཔོན་དང་། དགེ་རྒན། ལས་བྱེད་སོགས་ཀྱི་བསླབ་པ་མཐར་ཕྱིན་ཏེ་ས་གནས་གང་དུ་ཕྱིན་ཡང་། གཙོ་ཆེ་ཤོས་ཤེས་ཡོན་གྱི་དམིགས་ཡུལ་མ་ནོར་བ་བྱ་རྒྱུ་གལ་ཆེན་པོ་རེད་ཅེས་གསུངས་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དེ་རིང་ནི་ཕུན་སུམ་ཚོགས་པའམ་སྐལ་བ་བཟང་བའི་དུས་ཚོད་ཅིག་ཆགས་ཡོད་ཅིང་། དེའང་མི་གཅིག་གི་མཛད་རྗེས་དང་འབྲེལ་བའི་ཐོག་ནས་ལོ་ངོ་ ༥༠ དང་། ལོ་ངོ་ ༢༥ ཡི་དུས་དྲན་སྲུང་གཙི་བྱེད་བཞིན་ཡོད་པ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིན་དང་འབྲེལ་ཞིང་གཤེགས་དམ་པ་རྗེ་བཙུན་བློ་བཟང་རྒྱ་མཆོག་གི་རྣམ་ཐར་དང་མཛད་རྗེས་སོགས་བཀའ་སློབ་ལམ་སྟོན་དགོངས་པར་འཇོག་དགོས་པ་གལ་ཆེན་ཡིན་པ་ཟད། རིགས་ལམ་སློབ་གཉེར་ཁང་གི་སློབ་ཟུར་རྣམ་པ་འཁོར་ལོ་གསུམ་གྱི་གཟེངས་རྟགས་སོགས་གནང་ཡོད་པར་དགའ་ཚོར་ཆེན་པོ་བྱུང་། ཞེས་སོགས་གསུངས་སོང་།
སྐྱབས་རྗེ་དགའ་ལྡན་ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན་ཞིང་གཤེགས་དམ་པ་མཆོག་གིས་སྐྱ་སེར་གཉིས་ལ་སློབ་གཉེར་བྱེད་ས་འདི་ཐོག་མར་འཛུགས་དུས་གང་ཡང་མེད་ཀྱང་། རྒན་དམ་པོ་མཆོག་གིས་སྐུ་ངལ་མང་པོ་བསྐྱོན་པ་ལ་བརྟེན་ནས་སློབ་གཉེར་བ་མང་པོ་ཞིག་བསླབ་པ་མཐར་སོན་པ་རེད་ལ། ཁོང་གི་དམིགས་ཡུལ་ནང་བཞིན་སློབ་གཉེར་བ་རྣམས་ཀྱིས་སློབ་སྦྱོང་བྱས་པའི་དོན་དག་འགྲུབ་དགོས་རྒྱུ་གལ་ཆེན་པོ་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
