མགོ་ལོག་དར་ལག་རྫོང་གི་བོད་མི་བརྒྱད་འཛིན་བཟུང་བྱས།

རྒྱ་ནག་གཞུང་གིས་ཆོས་ལུགས་བེད་ལོག་དང་རྒྱུ་ནོར་གཡོ་ལེན་བྱས་པའི་ཉེས་མིང་གཡོགས་ཏེ་བོད་མགོ་ལོག་དར་ལག་རྫོང་ཁོངས་ནས་བོད་མི་བརྒྱད་འཛིན་བཟུང་བྱས་ཏེ་བཀག་ཉར་འོག་བཞག་འདུག

ཟླ་འདིའི་ཕྱི་ཚེས་ ༢༠ ཉིན་མགོ་ལོག་ཁུལ་དར་ལག་རྫོང་ཉེན་རྟོག་ཁང་གིས་ཁུངས་སྣེ་འཚོལ་བསྡུ་བྱེད་པའི་སྐོར་གྱི་བརྡ་ཁྱབ་ཟེར་བ་ཞིག་བསྒྲགས་ཏེ། དར་ལག་རྫོང་གི་བོད་མི་མགོན་རྣམ་དང་། མགོན་ཚེ། འཇིགས་མེད་བསྟན་འཛིན། དཔལ་ལྡན། བློ་ཆོས་རྣམ་རྒྱལ། ནོར་སྡེས། སྐལ་བཟང་བཅས་ཀྱིས་ཆོས་ལུགས་དང་། རྒྱུ་ནོར་གཡོ་ལེན། ཚོ་ཤོག་དབང་ཤུགས་བེད་སྤྱོད་བཏང་ཡོད་ལུགས་བརྗོད་དེ་ཁོང་ཚོ་འཛིན་བཟུང་བྱས་ཡོད་པ་མ་ཟད། ཐེར་འདོན་བྱེད་མཁན་དང་གནས་ཚུལ་གྱི་ཁུངས་སྣེ་མཁོ་འདོན་བྱེད་མཁན་ཡོད་ན་མི་དེའི་སྐོར་གསང་བ་དམ་སྲུང་བྱ་རྒྱུ་ཡིན་ལུགས་བརྗོད་འདུག

འདི་གའི་གསར་འགོད་པར་དེ་འབྲེལ་ཡིག་ཆ་འབྱོར་བའི་ནང་། ཉེ་ཆར་དར་ལག་རྫོང་ཉེན་རྟོག་ལས་ཁུངས་ཀྱིས་མགོན་རྣམ་དང་མགོན་ཚེ་སོགས་ནས་ཟིང་སློང་དང་རྒྱུ་དངོས་གཡོ་ལེན་བྱས་པའི་གྱོད་དོན་ཞིག་རྩད་ཆོད་ཡོད་ཚུལ་དང་། མགོན་རྣམ་སོགས་ཀྱིས་ནམ་རྒྱུན་ཆོས་ལུགས་ཀྱི་མིང་ཐོག་ནས་ཆོས་ལུགས་བེད་སྤྱོད་གཏོང་གི་ཡོད་ལུགས་སོགས་བཤད་འདུག་ཀྱང་། ས་གནས་ཀྱི་འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར།  འདས་པའི་ལོ་ཤས་གོང་ནས་མགོ་ལོག་ཁུལ་དུ་ཆོས་ཕྱོགས་ཀྱི་ལས་དོན་གཉེར་བར་དམ་དྲག་ཧ་ཅང་ཆེན་པོ་བྱེད་ཀྱི་ཡོད་པ་མ་ཟད། སྐད་འཕྲིན་སོགས་སུ་མ་ཎི་དུང་སྒྲུབ་དང་ཆོས་ཕྱོགས་བྱེད་སྒོ་སྤེལ་བའི་སྐད་འཕྲིན་ཚོགས་པ་ཁག་ལའང་དམ་དྲག་ཆེན་པོ་བྱེད་ཀྱི་ཡོད་པས། སྤྱི་ཚོགས་དྲ་ལམ་ནས་ཆོས་ཕྱོགས་ཀྱི་ལས་ཀ་ག་རེ་བྱས་ནའང་ཁྲིམས་འགལ་དུ་བརྩི་ཡི་ཡོད་སྐོར་འགྲེལ་བརྗོད་བྱས་བྱུང་།

ཡང་འབྲེལ་ཡོད་བོད་མི་གཞན་ཞིག་གིས། དར་ལག་རྫོང་ནས་བོད་མི་དེ་དག་འཛིན་བཟུང་བྱས་ཡོད་པའི་ཡིག་ཆ་ཞིག་མཐོང་བྱུང་། མ་གཞི་དེང་སང་རྒྱ་ནག་གཞུང་གིས་མིག་ལམ་དུ་མི་མཛེས་པ་ཞིག་བྱས་པ་ཡིན་ན། དམག་མི་དང་ཉེན་རྟོག་པ་སོགས་ཀྱིས་ཅིག་ཅིག་འགྲིག་མི་འདུག  ཉིག་ཉིག་འགྲིག་མི་འདུག་ཟེར་ནས་གང་བྱུང་འདྲི་བརྩད་བྱེད་པ་དང་འཛིན་བཟུང་བཀག་ཉར་བྱེད་ཀྱི་འདུག ཅེས་འགྲེལ་བརྗོད་གནང་བྱུང་།

ཉེ་ལམ་མགོ་ལོག་དར་ལག་ཉེན་རྟོག་པས་འཛིན་བཟུང་བྱས་པའི་བོད་མི་དེ་དག་ནི་མགོ་ལོག་དར་ལག་རྫོང་རྒྱུ་སྨད་ཡུལ་ཚོ་ནས་ཡིན་ཞིང་། རྒྱ་ནག་གཞུང་གིས་ཁོང་ཅག་འཛིན་བཟུང་བཀག་ཉར་བྱས་ཡོད་པ་ཙམ་ལས། ད་ལྟ་ཁོང་རྣམས་གང་དུ་ཡོད་མེད་དང་། སྐུ་གཟུགས་ཀྱི་གནས་སྟངས་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་མི་འདུག  

སྤྱིར་འདས་པའི་ལོ་ཤས་གོང་ནས་རྒྱ་ནག་གཞུང་གིས་མཚོ་སྔོན་ཞིང་ཆེན་ཁོངས་ཀྱི་མགོ་ལོག་ཁུལ་གྱི་ས་ཆ་རུ་རྒྱལ་ཁབ་ཀྱི་སློབ་གསོའི་ཤུགས་རྐྱེན་ཟེར་བ་ཡག་པོ་ཐེབས་མེད་ལུགས་བརྗོད་དེ། ཆོས་ཕྱོགས་དང་སྐད་ཡིག་སོགས་ཀྱི་ཐད་ནས་དམ་དྲག་ཤུགས་ཆེན་པོ་བྱེེད་ཀྱི་ཡོད་མ་ཟད། མགོ་ལོག་ཁུལ་དར་ལག་རྫོང་ཁོངས་ཀྱི་སེང་འབྲུག་སྟག་རྩེའི་བཅའ་སྡོད་སློབ་གྲྭ་དང་། རྨ་ཆེན་རྫོང་ཁོངས་ཀྱི་སློབ་གྲྭ་གསུམ།  དགའ་བདེ་རྫོང་ཁོངས་ཀྱི་སློབ་གྲྭ་གཅིག དེ་བཞིན་གཅིག་སྒྲིལ་རྫོང་ཁོངས་ཀྱི་སློབ་གྲྭ་གཉིས་བཅས་སྒེར་གཉེར་སློབ་གྲྭ་ཁག་བདུན་སྒོ་བརྒྱབ་བཅུག་ནས། བོད་ཀྱི་སྐད་ཡིག་བཀོལ་སྤྱོད་དང་ཆོས་ལུགས་སོགས་ཀྱི་ཐད་ནས་དམ་དྲག་ཆེན་པོ་བྱེད་མུས་ཡིན་པ་རེད། 

ཕྱི་ལོ་ ༢༠༢༢ ལོའི་ཟླ་ ༣ ཚེས་ ༡ ཉིན་ནས་བཟུང་རྒྱ་ནག་གཞུང་གིས་དྲ་ལམ་གྱི་ཆོས་ལུགས་ཆ་འཕྲིན་ཞབས་ཞུ་སྟངས་འཛིན་བྱེད་ཕྱོགས་ཟེར་བའི་ནང་འཕྲིན་སྟེགས་དང་ཟིན་བྲིས། སྐད་འཕྲིན་སོགས་སྤྱི་ཚོགས་དྲ་གནས་སོགས་སུ་ཐད་གཏོང་དང་སྒྲ་སྒམ། པར་དང་ཡི་གེ། བརྙན་སོགས་ཀྱི་ཐབས་ལམ་བརྒྱུད་དེ་སྤྱི་ཚོགས་ཁྲོད་ཆོས་ལུགས་རིག་གནས་དང་ཆོས་ལུགས་བྱེད་སྒོའི་རིགས་སོགས་སྤེལ་དགོས་ན་ངེས་པར་དུ་དྲ་ལམ་ཆོས་ལུགས་ཆ་འཕྲིན་ཞབས་ཞུ་ཁང་ནས་ཆོག་མཆན་དགོས་པ་མ་ཟད། ཆོས་ལུགས་བྱེད་སྒོ་སྤེལ་མཁན་གྱི་སྐུ་ཚབ་བམ་ཡང་ན་གཙོ་གཉེར་བ་རྒྱ་ནག་ནང་ལོགས་སུ་གནས་སྡོད་བྱེད་མཁན་དང་ཐོབ་ཐང་ལག་ཁྱེར་ཡོད་པ། ཆོས་ལུགས་ཁྲིམས་ཡིག་ཁག་ལ་རྒྱུས་མངའ་ཡོད་པ། ཉུང་མཐར་འདས་པའི་ལོ་ ༣ ནང་ཁྲིམས་འགལ་གྱི་ནག་ཉེས་མེད་པ་དང་། ཆོས་ལུགས་ཁྲིམས་སྒྲིག་ལ་འགལ་བ་མ་ཡིན་པ་སོགས་དགོས་པའི་ཆ་རྐྱེན་བཏོན་ཡོད་པ་རེད། དེ་བཞིན་ཆོག་མཆན་ཡི་གེ་དེ་ལོ་གསུམ་རེ་ནས་བསྐྱར་ཞིབ་བརྒྱུད་གསར་བཟོ་དགོས་པ་དང་། ཆོག་མཆན་ཐོབ་ཐང་བེད་སྤྱོད་དེ་དངུལ་དངོས་བསྡུ་མི་ཆོག་པ་དང་། ཆོས་ལུགས་ཀྱི་སློབ་གླིང་དང་ཆོས་ལུགས་ཚོགས་པ། ཆོས་ལུགས་ཀྱི་བྱེད་སྒོའི་རིགས་སྤེལ་མི་ཆོག་པ་བཅས་དོན་ཚན་ཆེན་པོ་ལྔ་ཡོད་པའི་བཀག་སྡོམ་ཁྲིམས་ཡིག་ཅིག་དངོས་སུ་ལག་བསྟར་བྱས་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།