བོད་སོག་ལས་ཁུངས་ཀྱི་ལས་བྱེད་སོགས་ནས་རྒྱ་ཕོགས་ཟ་ཡི་ཡོད་པའི་གནས་ཚུལ་ཐོན།

ཐའེ་ཝན་བོད་སོག་ལས་ཁུངས་ཀྱི་སྡེ་ཚན་འགན་འཛིན་ཞིག་གིས་བོད་རང་བཙན་དང་འབྲེལ་བོད་མི་རྣམས་ཀྱི་གནས་ཚུལ་རྒྱ་ནག་གཞུང་ལ་རྩིས་སྤྲོད་བྱེད་ཀྱི་ཡོད་པའི་གནས་ཚུལ་ཤེས་རྟོགས་བྱུང་ཡོད་འདུག

ཐའེ་ཝན་གྱི་རྒྱལ་ས་ཐའེ་པེའི་ས་གནས་རྟོག་ཞིབ་ཁང་གིས། ཐའེ་ཝན་དུ་ཡོད་པའི་བོད་སོག་ལས་ཁུངས་ཀྱི་འབྲེལ་ཡོད་འགན་འཛིན་ཞིག་དང་གཞན་རྒྱ་རིགས་ལྔ་ཡིས། བོད་རང་བཙན་དང་བོད་མི་རྣམས་ཀྱི་གནས་ཚུལ་རྒྱ་ནག་དམར་ཤོག་ཚོགས་པར་རྩིས་སྤྲོད་བྱེད་ཀྱི་ཡོད་པ་མ་ཟད། ཐའེ་ཝན་གྱི་ནང་སྲིད་ལའང་ལྐོག་ནས་སིམ་འཛུལ་བྱེད་བཞིན་ཡོད་སྟབས། ད་ལྟ་འབྲེལ་ཡོད་མི་དེ་དག་ཐའེ་ཝན་རྒྱལ་ཁབ་ཁ་བྲལ་གཏོང་མཁན་གྱི་ཉེས་ཅན་ཡིན་པ་དང་། ཁོ་ཚོའི་ནང་ནས་ཧྥང་ཤན་ཟེར་བ་ཞིག་འཛིན་བཟུང་བྱེད་ཆོག་པའི་བཀའ་རྒྱ་བཏང་ཡོད་འདུག

དེ་འབྲེལ་ཐའེ་ཝན་རྒྱལ་ཡོངས་སུ་གྲགས་པའི་དབུས་གསར་ཁང་ (CNA) གི་གནས་ཚུལ་ནང་། ཐའེ་ཝན་གྱི་རྒྱ་རིགས་ཧྥང་ཤཱང་ (方翔)དང་རེན་ཇོའུ་(冉菊)ཟེར་བའི་བཟའ་ཚང་གཉིས་ཀྱིས། རྒྱ་ནག་ནང་ཚོང་ལས་ཉར་བཞིན་པའི་སྟབས་དང་བསྟུན། ཐའེ་ཝན་ནང་གསང་བའི་ཚོགས་པ་རྩ་འཛུགས་བྱས་ཏེ། ཐའེ་ཝན་རང་བཙན་དང་འབྲེལ་ཐའེ་ཝན་གྱི་ནང་སྲིད་ལ་ཐེ་གཏོགས། དེ་བཞིན། བོད་རང་བཙན་དང་བོད་མི་རྣམས་ཀྱི་འགྲོ་འདུག་སྤྱོད་གསུམ་སོགས་ལ་གསང་ཉུལ་བྱེད་བཞིན་ཡོད་པ་དང་། གསང་བའི་ཚོགས་པ་དེའི་ཁོངས་སུ་ཧྥང་ཤཱང་ (方翔)དང་རེན་ཇོའུ་(冉菊) བཟའ་ཚང་གཉིས་ཀྱི་གཙོས་ཐའེ་ཝན་སྐམ་ས་ཆེན་པོ་དང་རིག་གཞུང་ལྷན་ཁང་གི་ཁྱབ་ཁོངས་སུ་ཡོད་པའི་བོད་སོག་ལས་ཁུངས་ཀྱི་སྡེ་ཚན་འགན་འཛིན་ཁྲན་ཏུ་མན་(陈德门) དང་དིན་ཀྲའོ་ཆའོ་(丁肇宠)།  ཐའོ་ཐེ་པོ་ (陶台宝) བཅས་ཡོད་འདུག

ཡང་གནས་ཚུལ་ནང་། ཕྱི་ལོ་ ༢༠༡༧ ལོའི་ཟླ་ ༤ ནང་ཧྥང་ཤཱང་གིས་བོད་སོག་ལས་ཁུངས་ཀྱི་སྡེ་ཚན་གྱི་འགན་འཛིན་ཁྲན་ཏུ་མན་(陈德门) ཟེར་བར་འགྲོ་གྲོན་ཆ་ཚང་བཏང་ནས་རྒྱ་ནག་ཧེ་ནཱན་ཞིང་ཆེན་དུ་འབོད་འགུག་གིས། ཧེ་ནཱན་ཞིང་ཆེན་གྱི་རྒྱལ་སྲུང་བློན་ཆེན་ལས་ཁུངས་ཀྱི་འགན་འཛིན་ཧའོ་ཀྲིན་ (侯政) དང་ཐུག་འཕྲད་བྱེད་དུ་བཅུག་ཡོད་ཅིང་། སྐབས་དེར་ཧྥང་ཤཱང་གིས་ཁྲན་ཏུ་མན་ལ་སྒྲ་འཇུག་འཕྲུལ་ཆས་ཤིག་སྤྲད་དེ། རྗེས་ཕྱོགས་བོད་རང་བཙན་དང་བོད་སོག་ལས་ཁུངས་དང་འབྲེལ། བོད་མི་ཐའེ་ཝན་དུ་ཡོང་བཞིན་པ་རྣམས་ཀྱི་གནས་ཚུལ་ཚང་མ་སྒྲ་འཇུག་བྱས་ཏེ་ཧྥང་ཤཱང་རང་ཉིད་ལ་སྤྲོད་དགོས་པའི་བཀོད་མངགས་བྱས་ཡོད་སྐོར་བརྗོད་འདུག

ལོ་དེའི་ཕྱི་ཟླ་ ༡༢ ནང་ཧྥང་ཤཱན་གྱི་བཀོད་མངགས་ལྟར། ཁྲན་ཏུ་མན་གྱིས་ཐའེ་ཝན་བོད་སོག་ལས་ཁུངས་ཀྱི་འབྲེལ་ཡོད་སློབ་སྟོན་མི་སྣར་ཐའེ་ཝན་བོད་སོག་ལས་ཁུངས་དང་འབྲེལ། ཐའེ་ཝན་ནང་ཡོང་བཞིན་པའི་བོད་མི་རྣམས་དང་བོད་རང་བཙན་དང་འབྲེལ་བའི་སྐོར་ལ་སྐད་ཆ་དྲིས་ཡོད་པ་མ་ཟད། ཁྲན་ཏུ་མན་གྱིས་སྐད་འཕྲིན་བརྒྱུད་སྐབས་དེའི་གནས་ཚུལ་རྣམས་རྒྱ་ནག་ཏུ་ཡོད་པའི་ཚོང་པ་ཧྥང་ཤཱན་ལ་བསྐུར་ཡོད་འདུག

ཐའེ་པེ་གྲོང་ཁྱེར་གྱི་ས་གནས་རྟོག་ཞིབ་ཁང་གིས་ཤེས་རྟོགས་བྱུང་བའི་གནས་ཚུལ་ལྟར་ན། ཧྥང་ཤཱང་དང་རེན་ཇོའུ་བཟའ་ཚང་གཉིས་ནས། ཕྱི་ལོ་ ༢༠༡༧ ལོར་རྒྱ་ནག་ཧེ་ནཱན་ཞིང་ཆེན་གྱི་རྒྱལ་སྲུང་བློན་ཆེན་ལས་ཁུངས་ཀྱི་འགན་འཛིན་ཧའོ་ཀྲིན་ (侯政) དང་ཐུག་འཕྲད་བྱས་ཏེ། ཧྥང་ཤཱང་གིས་ཧའོ་ཀྲིན་གྱི་གསང་ཉུལ་ལས་ཚབ་བྱ་རྒྱུ་ཁས་ལེན་བྱས་པ་མ་ཟད། དིན་ཀྲའོ་ཆའོ་(丁肇宠) ཟེར་བ་ཞིག་ཀྱང་ཧའོ་ཀྲིན་ལ་ངོ་སྤྲོད་བྱས་རྗེས། ཧྥང་ཤཱང་དང་དིན་ཀྲའོ་ཆའོ་གཉིས་ཕྱིར་ཐའེ་ཝན་དུ་ལོག་སྟེ་གསང་བའི་ལས་མི་གཞན་འཚོལ་བསྡུ་བྱས་ཡོད་པ་རེད།

ཐའེ་ཝན་རང་བཙན་དང་ནང་སྲིད་དང་འབྲེལ་ནས། ཧྥང་ཤཱང་དང་དིན་ཀྲའོ་ཆའོ་གཉིས་ཀྱིས། ཐའེ་ཝན་རང་བཙན་གྱི་རྒྱབ་ལྗོངས་ལྡན་པའི་ཀོ་ནན་(高男) ཟེར་བའི་མི་ཞིག་དང་འབྲེལ་ལམ་བཙུགས་ཏེ། ཀོ་ནན་རྒྱ་ནག་ཏུ་འཁྲིད་ནས་ཧེ་ནཱན་ཞིང་ཆེན་གྱི་རྒྱལ་སྲུང་བློན་ཆེན་ལས་ཁུངས་ཀྱི་འགན་འཛིན་ཧའོ་ཀྲིན་དང་ཐུག་ཏུ་བཅུག་ཡོད་པ་མ་ཟད། ཧའོ་ཀྲིན་གྱིས་ཀོ་ནན་ལ་ཐའེ་ཝན་གྱི་ཐའེ་ནན་གྲོང་ཁྱེར་སྤྱི་ཁྱབ་དང་ཁྲིམས་བཟོ་བའི་ལས་དོན་སྐོར་ལ་དྲི་བ་དྲིས་ཡོད་པ་དང་། སྐབས་དེར་ཧའོ་ཀྲིན་གྱིས་ཀོ་ནན་ལ་ཨ་སྒོར་ ༢༠༠༠ སྤྲད་ཡོད་པ་མ་ཟད། ཧྥང་ཤཱང་གིས་ཀོ་ནན་ནས་ཐའེ་ཝན་ནང་ལས་ཁུངས་ཤིག་འཛུགས་པར་མ་དངུལ་གྱི་རོགས་སྐྱོར་བྱ་རྒྱུའི་ཁར། ཐའེ་ཝན་གྱི་མཉམ་འབྲེལ་མཐུན་ཚོགས་ (扁联会) གྱི་སློབ་སྟོན་མི་སྣའི་འོས་ཁོངས་སུ་ཞུགས་པའི་སྐུལ་མ་བཏོན་ཡོད་ཅིང་། དེ་དང་འབྲེལ་ནས་ཀོ་ནན་ནས་ཐའེ་ཝན་རང་བཙན་གྱི་ལས་འགུལ་སྐོར་རྒྱུས་ལོན་བྱ་རྒྱུ་དང་མ་འོངས་པར་ཨ་སྒོར་སྟོང་ཕྲག་མང་པོ་སྤྲོད་རྒྱུའི་གོ་སྒྲིག་ཡོད་སྐོར་སོགས་བརྗོད་ཡོད་འདུག

བོད་སོག་ལས་ཁུངས་སྒོ་རྒྱག་དགོས་པའི་བསམ་ཚུལ་དེ་ཕྱི་ལོ་ ༢༠༡༠ ལོར་ཐའེ་ཝན་གྲོས་ཚོགས་ནང་གླེང་སློང་བྱས་ཏེ། ཕྱི་ལོ་ ༢༠༡༢ ལོར་དངོས་སུ་སྒོ་བརྒྱག་རྒྱུའི་གཏན་འཁེལ་བྱུང་ཡོད་ཀྱང་། བོད་སོག་ལས་ཁུངས་སྒོ་རྒྱག་པར་ཕྱི་ལོ་ ༡༩༢༧ ལོར་གཏན་འབེབས་བྱས་པའི་ཐའེ་ཝན་གྱི་རྩ་ཁྲིམས་ལ་འགྱུར་བ་གཏོང་དགོས་འཁེལ་གྱི་ཡོད་པ་དང་། ཐའེ་ཝན་གྱི་རྩ་ཁྲིམས་ལ་འགྱུར་བ་གཏོང་ཁག་པོ་ཆགས་ཡོད་སྟབས། བོད་སོག་ལས་ཁུངས་སྒོ་རྒྱག་མ་ཐུབ་པར་ལྷག་ཡོད་འདུག ད་ལྟ་ཐའེ་ཝན་དུ་ཡོད་པའི་བོད་སོག་ལས་ཁུངས་དེ་ཐའེ་ཝན་གྱི་རྩ་ཁྲིམས་ནང་དུ་གསལ་ཡོད་ནའང་། ཕྱི་ལོ་ ༢༠༡༧ ལོར་དོན་དངོས་ཀྱི་ཐོག་ནས་དངོས་སུ་སྒོ་བརྒྱབ་ཡོད་པ་དང་། ད་ལྟ་བོད་སོག་ལས་ཁུངས་དེ་ཐའེ་ཝན་གྱི་རིག་གཞུང་བློན་ཆེན་ལས་ཁུངས་དང་རྒྱ་ནག་ཐོག་སྲིད་ཇུས་གཏན་འབེབས་ལག་བསྟར་བྱེད་མཁན་གྱི་སྐམ་ས་ཆེན་པོའི་ལས་ཁུངས་ཟེར་བ་གཉིས་ཀྱི་འོག་ཏུ་ཡོད་ཅིང་། བོད་སོག་ལས་ཁུངས་སུ་ཁྱོན་ལས་བྱེད་ ༥༣ ཡོད་པ་ཚང་མ་ལྷན་ཁང་དེ་གཉིས་ཀྱི་ནང་དུ་ཟླ་སྒྲིལ་བཏང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།