བོད་གཞིས་ཀ་རྩེ་ནས་ཡིན་པའི་བོད་མི་བསམ་འཕེལ་ལགས་ས་གནས་ཉེན་རྟོག་ཁང་གིས་གཞིས་ཀ་རྩེ་ཉེན་རྟོག་ཁང་དུ་བཙན་འཁྲིད་བྱས་རྗེས་གནས་ཚུལ་གང་ཡང་ཤེས་རྟོགས་མ་ཐུབ་པར་ལྷག་འདུག
ཟླ་འདིའི་ཕྱི་ཚེས་ ༢༥ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥ པ་ཙམ་ལ། བོད་རང་སྐྱོང་ལྗོངས་གཞིས་ཀ་རྩེ་ས་སྐྱ་རྫོང་དགེ་སྡིངས་གྲོང་རྡལ་ནས་ཡིན་པའི་བོད་མི་བསམ་འཕེལ་ལགས་དགེ་སྡིངས་གྲོང་རྡལ་ཉེན་རྟོག་ཁང་དུ་འབོད་འགུག་བྱས་ཡོད་པ་དང་། བསམ་འཕེལ་ལགས་ལས་ཁུངས་སུ་བསླེབས་མ་ཐག་ལག་གི་ཁ་པར་འཕྲོག་སྟེ་སྔོག་བཤེར་བྱས་རྗེས། ཁ་པར་ནང་དུ་ནང་ཆོས་ཚོགས་པ་ཟེར་བ་དེ་འདྲ་ག་དུས་གསར་འཛུགས་བྱས་པ་ཡིན་ཞེས་འདྲི་བརྩད་མང་པོ་བྱས་རྗེས། གཞིས་ཀ་རྩེ་བཙན་འཁྲིད་བྱས་ཡོད་པའི་གནས་ཚུལ་གོ་ཐོས་བྱུང་ཡོད་འདུག
གནས་ཚུལ་མཁོ་སྤྲོད་པ་ཞིག་གིས་འདི་ག་བོད་ཀྱི་དུས་བབ་གསར་ཁང་ལ་བརྗོད་དོན། དེ་ནས་བཟུང་ཁོང་གི་གནས་ཚུལ་གང་ཡང་གོ་ཐོས་མེད་པར་གྱུར་ཡོད་པ་དང་། འབྲེལ་ཡོད་ལ་སྐད་ཆ་དྲིས་དུས་བསམ་འཕེལ་ལགས་ཀྱིས་ཁྲིམས་སྒྲིག་ནང་གསལ་ལྟར་ཚོགས་པ་ཐོ་འགོད་མ་བྱས་པར་གང་འདོད་དུ་ཚོགས་པ་གསར་འཛུགས་བྱས་པའི་ཉེས་མིང་གཡོགས་ཡོད་སྐོར་བརྗོད་བྱུང་། ཡིན་ནའང་། ནང་ཆོས་ཚོགས་པ་ཞེས་པ་དེ་བསམ་འཕེལ་ལགས་ཀྱིས་བཙུགས་པ་ཡིན་མིན་དང་ག་དུས་བཙུགས་པ་ཡིན་སོགས་གནས་ཚུལ་གསལ་པོ་ཤེས་རྟོགས་ཐུབ་ཀྱི་མི་འདུག
གནས་ཚུལ་མཁོ་སྤྲོད་པ་དེས་གསར་འགོད་པར། ནང་ཆོས་ཚོགས་པ་ཞེས་པ་ཞིག་སྔོན་མ་ནས་ཡོད་པ་དང་། ནམ་རྒྱུན་ཚེས་བཅོ་ལྔ་སོགས་ཚེས་ཆེན་ཁག་ལ་སེམས་ཅན་ཚེ་ཐར་དང་། བདག་མེད་ཁྱི་ལ་ལྟོ་སྤྲོད་པ་སོགས་སྦྱིན་པ་གཏོང་བ་དང་། ད་དུང་བླ་མ་བླ་ཆེན་རྣམ་པའི་གསུང་བཤད་དེ་འདྲ་ཚོགས་པའི་ནང་བསྐུར་གྱི་ཡོད་སྐོར་བརྗོད་བྱུང་།
བོད་མི་བསམ་འཕེལ་ལགས་ཀྱིས་དེ་སྔོན་ལོ་མང་རིང་ས་སྐྱ་མགོན་གྱི་ནང་གཙང་སྤྲ་བཟོས་ནས་བསྡད་ཡོད་པ་དང་། ཁོང་དང་བཟའ་ཟླ་གཉིས་ལ་བུ་ཕྲུག་གསུམ་ཡོད་འདུག
