ད་ལྟའི་ཆར་རྒྱ་གར་གྱི་དཔལ་འབྱོར་ནི་འཛམ་གླིང་གི་དཔལ་འབྱོར་ཆེ་ཤོས་ཨང་ལྔ་པར་གྱུར་ཡོད་པ་དང་། འབྱུང་འགྱུར་ཕྱི་ལོ་ ༢༠༣༠ ལོའི་བར་དུ་ཉི་ཧོང་ལས་བརྒལ་ནས་འཛམ་གླིང་གི་དཔལ་འབྱོར་ཆེ་ཤོས་ཨང་གསུམ་པར་འགྱུར་རྒྱུ་ཡིན་པའི་ཚོད་དཔག་བྱེད་བཞིན་འདུག
ཉེ་ལམ་རྒྱལ་སྤྱིའི་དངུལ་སྒོར་ཐེབས་རྩ་ (International Monetary Fund) ཡིས་འཛམ་གླིང་གི་དཔལ་འབྱོར་སྤྱིའི་བཀོད་པ་ (World Economic Outlook) དང་འབྲེལ་བའི་སྙན་ཐོ་ཞིག་བཏོན་པའི་ནང་། ཉེ་བའི་ལོ་ཤས་ནང་རྒྱ་གར་གྱི་ཚོང་ཟོག་དང་དཔལ་འབྱོར་གྱི་གནས་སྟངས་ཧ་ཅང་ཡར་རྒྱས་ཕྱིན་པ་ལ་བརྟེན་ནས། རྒྱ་གར་གྱི་རྒྱལ་ཡོངས་ཐོན་སྐྱེད་སྤྱི་འབོར་ (GDP) བརྒྱ་ཆ་ ༦།༡ ནས་བརྒྱ་ཆ་ ༦།༣ ལ་འཕར་ཡོད་སྟབས། ཕྱི་ལོ་ ༢༠༢༣ དང་ ༢༠༢༤ ལོའི་ནང་རྒྱ་གར་ནི་འཛམ་གླིང་ནང་གི་དཔལ་འབྱོར་ཡར་རྒྱས་མགྱོགས་ཤོས་འགྲོ་མཁན་ཞིག་ཡིན་པ་མ་ཟད། ཕྱི་ལོ་ ༢༠༢༤ ལོའི་ནང་དུའང་མུ་མཐུད་ཡར་རྒྱས་གང་མགྱོགས་འགྲོ་རྒྱུ་ཡིན་པའི་ངོས་འཛིན་བྱས་འདུག
ཟླ་འདིའི་ཕྱི་ཚེས་ ༢༣ ཉིན་རྒྱ་གར་གྱི་དཔལ་འབྱོར་ལྷན་ཁང་གིས། རྒྱ་གར་གྱི་གཞི་རྩའི་དངོས་ཟོག་གི་རིན་གོང་འཕར་ཆ་མེད་པར་བརྟན་པོ་ཡོད་པའི་རྐྱེན་གྱིས། རྒྱ་གར་དེ་ཕྱི་ལོ་ ༢༠༢༣ དང་ ༢༠༢༤ ནང་འཛམ་གླིང་ནང་གི་དཔལ་འབྱོར་གོང་འཕེལ་མགྱོགས་ཤོས་འགྲོ་མཁན་དུ་གནས་ཀྱི་རེད། ཅེས་བརྗོད་འདུག
ཟླ་འདིའི་ཕྱི་ཚེས་ ༢༠ ཉིན་ཨ་རིའི་རྒྱལ་ས་ནེའུ་ཡོག་ཏུ་རྟེན་གཞི་བྱས་པའི་གོ་ལ་སྤྱི་ཡོངས་ཀྱི་ཐོན་ཟོག་དཔྱད་ཞིབ་ཁང་ (S & P Global) གིས་དེ་འབྲེལ་བསམ་ཚུལ་རྩོམ་ཡིག་ཅིག་སྤེལ་བའི་ནང་། ཕྱི་ལོ་ ༢༠༢༡ དང་ ༢༠༢༢ ནང་རྒྱ་གར་གྱི་དཔལ་འབྱོར་ཡར་རྒྱས་ཕྱིན་ཡོད་པ་དང་། འདི་ལོར་རྒྱ་གར་གྱི་དཔལ་འབྱོར་ནི་འཛམ་གླིང་གི་དཔལ་འབྱོར་ཆེ་ཤོས་ཨང་རིམ་ལྔ་པར་མུ་མཐུད་དུ་རྒྱུན་གནས་ཐུབ་པ་མ་ཟད། འདས་ལོར་རྒྱ་གར་རྒྱལ་ཡོངས་ཐོན་སྐྱེད་སྤྱི་འབོར་ཨ་སྒོར་ཁྲག་ཁྲིག་ཆེན་མོ་ (trillion) ༣།༥ ཡིན་པ་དང་། འབྱུང་འགྱུར་ཕྱི་ལོ་ ༢༠༣༠ ལོའི་བར་དུ་ཨ་སྒོར་ཁྲག་ཁྲིག་ཆེན་མོ་ ༣།༥ ནས་ཨ་སྒོར་ཁྲག་ཁྲིག་ཆེན་མོ་ (trillion) ༧།༣ ལ་འཕར་རྒྱུ་ཡིན་པ་སོགས་རིམ་གྱིས་རྒྱ་གར་གྱི་དཔལ་འབྱོར་གནས་སྟངས་ལ་ཡར་རྒྱས་ཤུགས་ཆེན་ཕྱིན་ཏེ། ཉི་ཧོང་དང་འཇར་མན་ལས་ཀྱང་བརྒལ་ཏེ་ཨེ་ཤ་ཡ་ཞི་བདེ་རྒྱ་མཚོའི་ཁུལ་གྱི་དཔལ་འབྱོར་ཆེ་ཤོས་ཨང་གཉིས་པ་དང་། འཛམ་གླིང་གི་དཔལ་འབྱོར་ཆེ་ཤོས་ཨང་གསུམ་པར་འགྱུར་རྒྱུ་ཡིན་པའི་ཚོད་དཔག་བྱེད་བཞིན་འདུག
ཕྱི་ལོ་ ༡༩༩༠ ནང་ཙམ་ནས་རྒྱ་གར་གྱིས་དཔལ་འབྱོར་གྱི་སྒྲོམ་གཞིར་ལེགས་བཅོས་བྱས་ཏེ། བཟོ་གྲྭ་ཁག་ལ་གཞུང་གི་སྟངས་འཛིན་ཉུང་དུ་བཏང་བ་དང་། རྒྱ་གར་ནང་རྒྱལ་ཁབ་གཞན་གྱི་ཚོང་ལས་དང་མ་འཛུགས་ཐོག་སྲིད་བྱུས་གུ་ཡངས་སུ་བཏང་བ། གཞུང་གཉེར་ཚོང་ལས་ཁག་སྒེར་གཉེར་ཚོང་ལས་སུ་བསྒྱུར་ཡོད་པར་བརྟེན། རྒྱ་གར་ནི་འཛམ་གླིང་ནང་གི་དཔལ་འབྱོར་ཡར་རྒྱས་མགྱོགས་ཤོས་གྲས་ཀྱི་རྒྱལ་ཁབ་ཅིག་ཏུ་གྱུར་ཡོད་འདུག
རྒྱལ་སྤྱིའི་དངུལ་སྒོར་ཐེབས་རྩའི་སྙན་ཐོ་ལྟར་ན། འཛམ་གླིང་གི་དཔལ་འབྱོར་ཆེ་ཤོས་ཀྱི་རྒྱལ་ཁབ་དང་པོ་ནི་ཨ་རི་དང་དེའི་རྒྱལ་ཡོངས་ཐོན་སྐྱེད་སྤྱི་འབོར་ཨ་སྒོར་ཁྲག་ཁྲིག་ཆེན་མོ་ ༢༥།༠༣༥ དང་། གཉིས་པ་རྒྱ་ནག་ལ་ཨ་སྒོར་ཁྲག་ཁྲིག་ཆེན་མོ་ ༡༨།༣༢༡ ། གསུམ་པ་ཉི་ཧོང་ལ་ཨ་སྒོར་ཁྲག་ཁྲིག་ཆེན་མོ་ ༤།༣༠༡། བཞི་པ་འཇར་མན་ལ་ཨ་སྒོར་ཁྲག་ཁྲིག་ཆེན་མོ་ ༤།༠༣༡། ལྔ་པ་རྒྱ་གར་ལ་ཨ་སྒོར་ཁྲག་ཁྲིག་ཆེན་མོ་ ༣།༤༦༩ དྲུག་པ་དབྱིན་ཡུལ་ལ་ཨ་སྒོར་ཁྲག་ཁྲིག་ཆེན་མོ་ ༣།༡༩༩། བདུན་པ་ཧྥ་རན་སི་ལ་ཨ་སྒོར་ཁྲག་ཁྲིག་ཆེན་མོ་ ༢།༧༧༨ བརྒྱད་པ་ཁེ་ན་ཌ་ལ་ཨ་སྒོར་ཁྲག་ཁྲག་ཆེན་མོ་ ༢།༢ དགུ་པ་ཨུ་རུ་སུ་ལ་ཨ་སྒོར་ཁྲག་ཁྲིག་ཆེན་མོ་ ༢།༡༡༣ བཅུ་པ་ཨི་ཊ་ལི་ལ་ཨ་སྒོར་ཁྲག་ཁྲིག་ཆེན་མོ་ ༡།༩༩ བཅས་ཡིན་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
