སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་སྐད་ཡིག་ཉར་ཚགས་དང་བཀོལ་སྤྱོད་ཚད་ལྡན་ཞིག་ཡོང་བར་ལོ་རྒྱུས་ཀྱི་ཁ་ཕྱོགས་གསར་བ་ཞིག་སྒོ་ཕྱེ་བའི་རེ་བ་བྱེད་བཞིན་ཡོད་སྐོར་སོགས་གསུངས་སོང་།
དེ་རིང་སྔ་དྲོ་ཆུ་ཚོད་ ༡༡།༣༠ ཐོག་བོད་མིའི་སྒྲིག་འཛུགས་ཀྱི་བཀའ་ཤག་ཚོགས་ཁང་དུ། ཆོས་རིག་ལས་ཁུངས་ཀྱི་གོ་སྒྲིག་འོག བོད་ཀྱི་རིག་གཞུང་སོར་ཆུད་དང་ནུས་པ་གོང་སྤེལ་གཏོང་ཕྱོགས་ཀྱི་ལས་གཞི་ཞིག་དབུ་འབྱེད་གནང་སོང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས། ཨ་རིའི་རོགས་ཚོགས་ཀྱི་ལས་འཆར་དོ་དམ་པ་རྒན་པ་པུ་ནམ་སི་མི་ཐི་ཤི་རིན་(Poonam smith Sreen) ལགས། ཆོས་རིག་དྲུང་ཆེ་འཆི་མེད་ཚེ་དབྱངས་ལགས། ཆོས་རིག་དྲུང་འཕར་ཀུན་དགའ་རྒྱལ་མཚན་ལགས། སྨོན་ལམ་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས། ཝཊ་ཊ་ན་མིས་བཟོས་རིག་ནུས་ཚོགས་པའི་ལས་བྱེད་བཅས་མཉམ་འཛོམས་གནང་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ཆོས་རིག་ལས་ཁུངས་དང་ཨ་རིའི་རོགས་ཚོགས་གཉིས་ཟུང་འབྲེལ་ཐོག་རིགས་རྫས་སྲུང་སྐྱོབ་ཀྱི་ལས་གཞི་གསར་བ་དབུ་འབྱེད་གནང་གི་ཡོད། དེ་རིང་ཞོགས་པར་ལས་གཞི་འདི་ལམ་ལྷོང་ཡོང་བར་༧གོང་ས་མཆོག་ལ་ཐུགས་སྨོན་ཞུ་བའི་གོ་སྐབས་བྱུང་། ལས་གཞི་འདི་ནི་རྒྱ་ཆེན་པོ་དང་གལ་ཆེན་པོ་ཞིག་ལ་ངོས་འཛིན་ཞུ་ཡི་ཡོད། ལས་གཞི་འདིའི་དངུལ་གྱི་འགྲོ་གྲོན་དེ་དག་ཨ་རིའི་རོགས་ཚོགས་ནས་ཡོང་གི་ཡོད་ཅིང་། ལོ་གསུམ་གྱི་ལས་གཞི་འདིའི་འགྲོ་གྲོན་དེ་ལོ་རེར་ཨ་སྒོར་ས་ཡ་གཉིས་རེ་གཏོང་གི་ཡོད། ལས་གཞི་འདིར་འཆར་གཞི་གཉིས་ཡོད་ལ། གཅིག་ནི་ཆོས་རིག་ལས་ཁུངས་ཀྱི་ཁྱབ་ཁོངས་སུ་གཏོགས་པའི་དཔེ་ཆ་རྙིང་པ་དང་། རྫས་རྙིང་པའི་བདག་དབང་ཡོད་པ་རྣམས་གྲངས་འཛིན་གྱི་ངོ་བོ་ཐོག་ཉར་ཚགས་བྱ་རྒྱུ་ཡིན་པ་མ་ཟད། རྒྱལ་སྤྱིའི་ཁྱོན་ཡོངས་ནས་བེད་སྤྱོད་ཚད་ལྡན་བྱེད་ཐབས་བྱ་རྒྱུ་ཡིན། ལྷག་པར་དུ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་གཞིར་བཞག་པའི་ཐོག་ཏུ། དེང་དུས་ཀྱི་འཕྲུལ་རིགས་ཡར་རྒྱས་དང་མཐུན་པར་མ་འོངས་བའི་ལོ་ཉི་ཤུ་ཙམ་གྱི་འགྱུར་བའི་རྗེས་སུ་ཟིན་ཐུབ་པའི་ལས་ཀ་བྱེད་སྟངས་ཤིག་རེད། ལས་གཞི་འདིའི་འགྲོ་གྲོན་ལོ་རེ་ཨ་སྒོར་ས་ཡ་གཉིས་གཏོང་གི་ཡོད་པ་དང་། དེའི་ནང་ནས་ས་ཡ་གཅིག་དང་ཕྱེད་ཀ་ཨ་རིའི་རོགས་ཚོགས་ཀྱིས་གསལ་བསྒྲགས་བྱས་ཏེ་ཐད་ཀར་གནང་བ་ཞིག་ཡིན་པས། དེའི་སྐོར་བོད་མིའི་སྒྲིག་འཛུགས་ལ་ཐེ་ཇུས་ཡོད་པ་མ་རེད། ལྷག་མའི་ལོ་རེའི་འགྲོ་གྲོན་ཨ་སྒོར་འབུམ་ལྔ་དེ་ཆོས་རིག་ལས་ཁུངས་འོག་གི་དཔེ་ཆ་རྙིང་པའི་བདག་དབང་ཡོད་པའི་དཔེ་མཛོད་ཁང་དང་། དགའ་ལྡན་ཕོ་བྲང་གི་ཡིག་ཆ་གལ་གནད་ཡོད་པ་སོགས་སྡིངས་ཆ་གཅིག་ཏུ་སྤུངས་ཐུབ་པ་དང་། མ་འོངས་བར་བཀོལ་སྤྱོད་ཚད་ལྡན་བྱེད་པར་དམིགས་ཀྱི་ཡོད། དེ་ཡང་ལོ་རྒྱུས་དང་ལྡན་པ་ཞིག་ཆགས་ཀྱི་རེད་ཟེར་དོན་ཡང་། ཨ་རིའི་རོགས་དངུལ་བརྒྱུད་དེ་དོ་དགོང་དགེ་བཤེས་སྨོན་ལམ་ལགས་ཀྱི་ལས་གཞི་ཞིག་དབུ་འབྱེད་གནང་གི་ཡོད། ལས་གཞི་དེའང་གལ་ཆེན་པོ་ཆགས་ཡོད། ལས་གཞི་གཉིས་ཀྱི་དུས་ཚོད་ཡག་པོ་ཞིག་ཏུ་འཁེལ་ཡོད། ལས་གཞི་གཉིས་ཀྱི་ཐུན་མོང་ཐོག་གཙོ་བོ་སངས་རྒྱས་ཀྱི་བསྟན་པ་གནས་ཐུབ་པ་དང་། ཡང་སྒོས་༧གོང་ས་མཆོག་གི་དབུས་བསྟན་བདག་བླ་ཆེན་རྣམ་པའི་ཆོས་ཕྱོགས་ཀྱི་མཛད་པ་རྣམས་མ་འོངས་བར་རིག་ནུས་ལྡན་པར་བེད་སྤྱོད་ཚད་ལྡན་ཞིག་ཡོང་བར་དམིགས་ཀྱི་ཡོད། བོད་མིའི་སྒྲིག་འཛུགས་ཀྱིས་དངོས་སུ་ལག་ལེན་བྱེད་པར་ཁག་པོ་ཆགས་བསྡད་ཡོད་པས། ལས་གཞི་འདི་འཕྲུལ་རིགས་དང་འབྲེལ་བ་ཡོད་པའི་ཝཊ་ཝ་ན་ཚོགས་པར་སྤྲད་ཡོད། ཆོས་རིག་ལས་ཁུངས་ཀྱི་སྟངས་འཛིན་འོག་ལས་གཞི་བང་རིམ་སྒྲིག་སྐབས། ཝཊ་ཝ་ནའི་རོགས་དངུལ་གྱི་ནང་ནས་མེད་ཐབས་མེད་པའི་ལས་ཀ་ཞིག་དགེ་བཤེས་སྨོན་ལམ་ལགས་ལ་སྤྲད་ཡོད་ལ། ཁོང་གཉིས་ཀྱི་མཉམ་རུབ་ལས་ཀ་ནུས་པ་ལྡན་པ་ཞིག་ཡོང་བར་རེ་བ་ཆེན་པོ་རྒྱག་བཞིན་ཡོད། ལས་གཞི་གཉིས་ཀྱི་ལས་ཀ་བྱེད་མཁན་མི་འདྲ་བ་མ་གཏོགས། མཐའ་མའི་གྲུབ་འབྲས་གཅིག་ཆགས་ཀྱི་ཡོད། ཅེས་གསུངས་སོང་།
ཡང་སྲིད་སྐྱོང་མཆོག་གིས། ཨ་རིའི་རོགས་དངུལ་ཨ་སྒོར་ས་ཡ་གཉིས་དེ་འདས་ལོའི་ཕྱི་ཟླ་བཅུ་གཉིས་བའི་ནང་དུ། ཨ་རིའི་གཞུང་གི་དངུལ་འཛིན་ནང་དུ་བཀའ་འཁྲོལ་ཐོབ་པ་རེད། ཆོས་རིག་ལས་ཁུངས་ཀྱིས་ལས་བྱེད་བཞི་གསར་འཇུག་བྱས་ཏེ་ལས་གཞི་ཐོག་ཏུ་ལས་ཀ་བྱ་དགོས་པ་རེད། ཆོས་རིག་ལས་ཁུངས་ཀྱིས་ཝཊ་ཝ་ན་ཚོགས་པ་དང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་གཉིས་ལ་འབྲེལ་བ་བྱས་ཏེ། ཡིག་ཆ་ཁག་བཤེར་འབབ་ཏུ་ཕབ་དགོས་པ་དང་། ཡིག་ཚགས་ཁག་ཡག་པོ་ཉར་དགོས་ཚེ་རྒྱུན་ལྡན་བཤེར་འབབ་གཅིག་པོའི་འགྲིག་གི་མི་འདུག་པས། ཡིག་ཚགས་ལམ་ལུགས་ཚད་ལྡན་ཡོང་བར་ཨ་རིའི་བྷོ་སི་ཌོན་ན་ཡོད་པའི་ནང་བསྟན་གྲངས་འཛིན་དཔེ་ཚོགས་ལྟེ་གནས་ལའང་རེ་བ་བྱེད་ཀྱི་ཡོད། བསྟན་བདག་བླ་ཆེན་རྣམ་པའི་ལམ་སྟོན་དང་མཐུན་འགྱུར་འོག ཆོས་བརྒྱུད་རིས་མེད་ཐོག་ཡིག་ཚགས་ཁག་མཉམ་དུ་སྤུངས་ཏེ་འཇིག་རྟེན་མ་སྟོང་བར་དུ།ནང་བསྟན་གཙོས་བོད་ཀྱི་སྐད་ཡིག་ཉར་ཚགས་བྱེད་ཐུབ་པ་མ་ཟད། བཀོལ་སྤྱོད་ཚད་ལྡན་ཞིག་ཡོང་བར་ལོ་རྒྱུས་ཀྱི་ཁ་ཕྱོགས་གསར་བ་ཞིག་སྒོ་ཕྱེ་བའི་རེ་བ་བྱེད་བཞིན་ཡོད། དེའི་ཐོག་ཏུ་ཚང་མས་མཉམ་རུབ་གནང་རོགས། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
