༧གོང་ས་རྒྱལ་བ་རིན་པོ་ཆེ་མཆོག་ནས་ཡུ་རོབ་ཀྱི་མགོ་ཁྲིད་ཁག་ཅིག་ལ་དམིགས་བསལ་མཇལ་ཁ་བསྩལ་ཏེ་འགྲོ་བ་མི་གཅིག་གྱུར་གྱི་འདུ་ཤེས་གོང་མཐོར་གཏང་རྒྱུ་ཧ་ཅང་གལ་ཆེན་པོ་ཡིན་སྐོར་བཀའ་སློབ་བསྩལ་འདུག
༧གོང་ས་རྒྱལ་བ་རིན་པོ་ཆེ་མཆོག་ནས་ཡུ་རོབ་ཀྱི་མགོ་ཁྲིད་ཁག་ཅིག་ལ་དམིགས་བསལ་མཇལ་ཁ་བསྩལ། དགའ་ལྡན་ཕོ་བྲང་གི་བརྙན་ནས་བླངས།
དེ་རིང་ཕྱི་ཚེས་ ༨ ཉིན་གྱི་སྔ་དྲོར་བཞུགས་སྒར་༧རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ནས་ཡུ་རོབ་ཀྱི་མགོ་ཁྲིད་ཁག་ཅིག་ལ་དམིགས་བསལ་མཇལ་ཁ་བསྩལ་ནས། འགྲོ་བ་གཅིག་གྱུར་གྱི་འདུ་ཤེས་བཟུང་ནས་ཕན་ཚུན་མཉམ་གནས་དང་རོགས་འདེགས་བྱ་རྒྱུ་དེ་ཧ་ཅང་གལ་ཆེན་པོ་ཡིན་པ་སོགས་ཀྱི་བཀའ་སློབ་ལམ་སྟོན་མཛད་སོང་།
མཇལ་ཁ་བསྩལ་སྐབས་༧གོང་ས་རྒྱལ་བ་རིན་པོ་མཆོག་ནས། ངོས་རང་གིས་བསམ་པར་འགྲོ་བ་མི་རྣམས་ཀྱིས་ཆབ་སྲིད་ཀྱི་གནད་དོན་དང་། ཆོས་ལུགས་ཀྱི་དད་མོས་སོགས་ཀྱི་ཐོག་ནས་ང་ཚོ་དང་ཁོང་ཚོ་ཞེས་ནན་བཤད་བྱེད་ཀྱི་འདུག རྒྱུ་མཚན་དེ་ལ་བརྟེན་ནས་འཇིག་རྟེན་འདིའི་སྟེང་གི་འགྲོ་བ་མི་རྣམས་ལ་གོ་མཚོན་གྱིས་དཀའ་སྡུག་མང་དག་ཅིག་སྤྲོད་ཀྱིན་ཡོད། འགྲོ་བ་མི་ཚང་མ་མ་ཡི་མངལ་ནས་སྐྱེས་པ་དང་། ཨ་མའི་བྱམས་དང་བརྩེ་བ་ལ་བརྟེན་ནས་འཚོ་བ་གཅིག་མཚུངས་ཡིན་པས། ཉམས་མྱོང་དེའི་ཐོག་ནས་ཐེར་འབུམ་བདུན་ནས་བརྒྱད་ལྷག་ཡོད་པའི་འགྲོ་བ་མི་རྣམས་ལ་གཅིག་གྱུར་གྱི་འདུ་ཤེས་གསར་པ་ཞིག་འཛིན་དགོས། ངོས་རང་ནང་པ་ཞིག་རེད། འོན་ཀྱང་། ངོས་རང་གིས་མི་གཞན་དང་ཐུག་འཕྲད་བྱེད་སྐབས། ངོས་རང་གིས་ང་ཚོ་ཚང་མ་འགྲོ་བ་མི་གཅིག་མཚུངས་ཤིག་མཐོང་གི་ཡོད་ལ། ང་ཚོ་ཚང་མ་མི་ཡིན་པ་གཅིག་མཚུངས་རེད། ཅེས་གསུངས་སོང་།
ཡང་༧གོང་ས་རྒྱལ་བ་རིན་པོ་ཆེ་མཆོག་ནས། སའི་གོ་ལ་ཆུང་ཆུང་འདི་ང་ཚོ་འགྲོ་བ་མི་རྣམས་ཀྱི་ཡིན་པས། ང་ཚོ་ཚང་མ་མཉམ་གཅིག་ཏུ་འཚོ་སྡོད་བྱས་ཏེ་ཕན་ཚུན་རོགས་འདེགས་བྱ་དགོས་པ་རེད། ངོས་རང་གིས་རྒྱུན་དུ་ནས་འགྲོ་བ་མི་གཅིག་གྱུར་གྱི་འདུ་ཤེས་གོང་མཐོ་གཏང་རྒྱུར་ནན་བརྗོད་བྱེད་ཀྱི་ཡོད། སྤྱིར་རྒྱལ་ཁབ་མི་འདྲ་བ་དང་། ཆོས་ལུགས་མི་འདྲ་བ། ཤ་མདོག་མི་འདྲ་བ་སོགས་ནི་རིམ་པ་གཉིས་པ་རེད། གཙོ་ཆེ་ཤོས་དེ་ང་ཚོ་ཨ་མའི་མངལ་ནས་སྐྱེས་པ་དང་། ཨ་མའི་འོ་མས་གསོས་པ། མཐའ་མ་འཆི་འགྲོ་བ་ནི་གཅིག་མཚུངས་ཡིན་པས། ང་ཚོ་འཚོ་བའི་རིང་ལ་འགྲོ་བ་མི་ཐེར་འབུམ་བདུན་བརྒྱད་ལྷག་ཡོད་པ་རྣམས་ཀྱིས་འགྲོ་བ་མི་གཅིག་གྱུར་གྱི་འདུ་ཤེས་བཟུང་ནས། མཉམ་དུ་འཚོ་གནས་བྱས་ཏེ་ཕན་ཚུན་རོགས་འདེགས་བྱ་རྒྱུའི་ཐོག་ངེས་པར་དུ་བསམ་བློ་གཏང་དགོས། འཛམ་གླིང་འདི་ནམ་ཞིག་སུས་ཀྱང་བཀག་འགོག་མི་ཐུག་པར་མེས་འཚིག་འགྲོ་བས། འགྲོ་བ་མི་རྣམས་འཚོ་བའི་རིང་ཕན་ཚུན་གཅེན་གཅུང་གི་འདུ་ཤེས་བཟུང་ནས་མཉམ་གནས་དང་རོགས་འདེགས་བྱ་རེས་བྱ་དགོས། ཞེས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། འདི་ལོའི་ཕྱི་ཟླ་ ༡༢ ཚེས་ ༢༩ ནས་ ༣༡ བར་གནས་མཆོག་རྡོ་རྗེ་གདན་ནས་ཆོས་འབྲེལ་མཛད་རྒྱུ་དང་། ཕྱི་ལོ་ ༢༠༢༤ ཟླ་ ༡ ཚེས་ ༡ ཉིན་གནས་མཆོག་རྡོ་རྗེ་གདན་དུ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་འབྲས་ལྗོངས་དང་རྒྱ་གར་ལྷོ་ཕྱོགས་ཁུལ་གྱི་མཛད་འཆར་རྣམས་གནས་སྐབས་རིང་ཕྱིར་འགྱངས་གནང་དགོས་བྱུང་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
