ཨ་རིའི་ནེའུ་ཡོག་དང་དང་ནེའུ་ཇར་སི་ས་གནས་གཞོན་ནུ་ལྷན་ཚོགས་ཀྱིས་ཨ་རིའི་སྲིད་འཛིན་མཆོག་གི་མཚན་ཐོག་ཏུ་བོད་དོན་དང་འབྲེལ་བའི་དོན་ཚན་བདུན་ཅན་གྱི་སྙན་ཞུ་ཞིག་ཕུལ་ཏེ་ཞི་ཅིན་ཕིང་དང་མཉམ་དུ་བོད་དོན་གླེང་སློང་ཞུ་དགོས་པའི་འབོད་སྐུལ་ཞུས་ཡོད་འདུག
ཟླ་འདིའི་ཕྱི་ཚེས་ ༡༡ ནས་ ༡༧ བར་ཉིན་གྲངས་བདུན་རིང་ཨ་རིའི་སཱན་ཧྥི་རན་སི་སི་ཁོ་ (San Francisco) རུ། ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་དཔལ་འབྱོར་མཉམ་ལས་ཀྱི་ལྷན་ཚོགས་ཐེངས་ ༣༠ པ་འཚོག་བཞིན་ཡོད་ཅིང་། ཐེངས་འདིའི་ཚོགས་ཆེན་དུ་ཨ་རི་དང་། ཨོ་གླིང་། ཁེ་ན་ཌ། ཉི་ཧོང་། ཐའེ་ཝན། ལྷོ་ཀོ་རི་ཡ། རྒྱ་ནག་སོགས་རྒྱལ་ཁབ་ ༢༡ གི་མགོ་ཁྲིད་མཉམ་ཞུགས་གནང་སྟེ། ཨ་རི་དང་རྒྱ་ནག་གི་འབྲེལ་ལམ་དང་། འཛམ་གླིང་གནམ་གཤིས་འགྱུར་ལྡོག་གི་གནས་སྟངས། ཚོང་འབྲེལ་གྱི་དཀའ་ངལ། ཨི་ཛི་རེལ་གྱི་དམག་འཁྲུག་སོགས་རྒྱལ་སྤྱིའི་གནད་དོན་ཁག་ཅིག་ཐོག་གླེང་སློང་གནང་གི་ཡོད་འདུག་ལ། ཨ་རིའི་སྲིད་འཛིན་རྗོ་བྷའེ་ཌིན་མཆོག་དང་རྒྱ་ནག་གི་མགོ་ཁྲིད་ཞི་ཅིན་ཕིང་གཉིས་ཟུར་དུ་ཐུག་འཆར་ཡོད་འདུག
དེའི་ཐད་ཨ་རིའི་ནེའུ་ཡོག་དང་དང་ནེའུ་ཇར་སི་ས་གནས་གཞོན་ནུ་ལྷན་ཚོགས་ཀྱིས་ཨ་རིའི་སྲིད་འཛིན་མཆོག་གི་མཚན་ཐོག་ཏུ་བོད་དོན་དང་འབྲེལ་བའི་དོན་ཚན་བདུན་ཅན་གྱི་སྙན་ཞུ་ཞིག་ཕུལ་ཏེ། ཞི་ཅིན་ཕིང་དང་མཉམ་དུ་བོད་དོན་གླེང་སློང་ཞུ་དགོས་པའི་འབོད་སྐུལ་ཞུས་ཡོད་འདུག་ལ། ཁ་སང་ཨ་རིའི་ཕོ་བྲང་དཀར་པོའི་མདུན་ཐང་དུ་བོད་མི་མང་པོ་འཛོམས་ནས་སྐད་འབོད་ཤུགས་ཆེན་བྱས་འདུག་ལ། དེ་བཞིན་སཱན་ཧྥི་རན་སི་སི་ཁོ་ཁུལ་གྱི་ཐེངས་འདིའི་ཚོགས་ཆེན་ཚོགས་ཡུལ་གྱི་ཁང་རྩེག་ཏུ། བོད་རང་བཙན་སློབ་ཕྲུག་ཚོགས་པས་འཕྲེད་དར་དཔྱངས་ཏེ། སྲིད་དབང་སྒེར་སྤྱོད་པ་ཞི་ཅིན་ཕིང་གི་དུས་ཚོད་རྫོགས་པ་རེད་ཅེས་ངོ་རྒོལ་སྐད་འབོད་བྱས་ཡོད་འདུག
ཐེངས་འདིའི་ཚོགས་ཆེན་དང་འབྲེལ་བའི་སྐོར་ལ་བོད་ཀྱི་ཆབ་སྲིད་བཙོན་ཟུར་གྲགས་ཅན་དོན་གྲུབ་དབང་ཆེན་ལགས་ཀྱིས། ལྷན་ཚོགས་དེའི་སྟེང་དུ་འཛམ་གླིང་སྟེང་གི་སྲིད་དབང་སྒེར་སྤྱོད་ཀྱི་དབང་ཆ་ཆེ་ཤོས་ཀྱི་མགོ་ཁྲིད་ཞི་ཅིན་ཕིང་ཡང་མཉམ་ཞུགས་བྱེད་ཀྱི་ཡོད་པ་ཚང་མས་ཤེས་ཀྱི་རེད། ལྷག་པར་དུ་ཁཱ་ལི་ཧྥོར་ནི་ཡ་མངའ་སྡེའི་ནང་དུ་ཡོད་པའི་བོད་རིགས་སྤུན་ཟླ་ཡོངས་ཀྱིས་ཉིན་གཅིག་རིང་གི་ཡོང་འབབ་དང་ཆུ་ཚོད་བློས་གཏོང་བྱས་ཏེ། མི་མང་གང་མང་མཉམ་ཞུགས་བྱེད་པར་གོ་སྐབས་གལ་ཆེན་ཞིག་ཏུ་ངོས་འཛིན་བྱེད་བཞིན་ཡོད། ཞི་ཅིན་ཕིང་གི་སྲིད་དབང་སྒེར་སྤྱོད་བྱས་པ་ནས་བཟུང་ལས་འཆར་སྣ་མང་ལ་ཁ་གཡར་ཏེ་བོད་ཀྱི་ཆོས་དང་རིག་གཞུང་། སྐད་ཡིག་དང་བཅས་པའི་བོད་མི་རིགས་རྩ་གཏོར་གཏོང་བཞིན་ཡོད་པས། འཛམ་གླིང་མི་མང་ལ་ཞི་ཅིན་ཕིང་ནག་ཉེས་ཅན་ཞིག་ཏུ་ངོས་འཛིན་བྱ་འཇུག་དགོས་པ་ང་ཚོའི་འགན་འཁུར་རེད། གཞིས་ལུས་བོད་རིགས་སྤུན་ཟླ་རྣམས་ཀྱིས་བཙོན་ཁང་དུ་དཀའ་སྡུག་མྱོང་བཞིན་ཡོད་པ་མཁྱེན་གསལ་ལྟར། ཕྱིའི་རྒྱལ་ཁབ་ཁག་ཏུ་ཡོད་པའི་བོད་པ་རྣམས་ཀྱིས་རྒྱལ་སྤྱིའི་སྟེང་དུ་ངོ་སྤྲོད་བྱ་རྒྱུ་འོས་འགན་རེད། ད་ལྟའི་ཆར་འཛམ་གླིང་མི་མང་གིས་རྒྱ་ནག་ལ་ལྟ་སྟངས་ཐད་འགྱུར་བ་འགྲོ་བཞིན་ཡོད་པའི་གོ་སྐབས་དམ་འཛིན་བྱས་ཏེ་ལས་འགུལ་ནང་མཉམ་ཞུགས་བྱ་རྒྱུ་གལ་ཆེན་པོ་རེད་ཅེས་བརྗོད་འདུག
དེ་བཞིན་བོད་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་པའི་ཚོགས་གཙོ་འཇིགས་མེད་ཨོ་རྒྱན་ལགས་ཀྱིས། ཕྱི་ཚེས་ ༡༥ ཉིན་ཨ་རིའི་སྲིད་འཛིན་རྗོ་བྷའེ་ཌིན་མཆོག་དང་རྒྱ་ནག་གི་མགོ་ཁྲིད་ཞི་ཅིན་ཕིང་སོགས་འཛམ་གླིང་གི་དཔོན་རིགས་མང་པོ་མཇལ་འཕྲད་གནང་འཆར་ཡོད་ཅིང་། ཐེངས་འདིའི་ཚོགས་ཆེན་སྐབས་རྒྱ་ནག་གི་མགོ་ཁྲིད་དང་པེ་ཅིན་གཞུང་ལ་ངོ་རྒོལ་བྱེད་པའི་གོ་སྐབས་ཡག་པོ་ཆགས་ཡོད་པ་མ་ཟད། ནམ་རྒྱུན་བོད་ནང་གི་གནས་ཚུལ་གོ་བ་ཙམ་མ་གཏོགས་ལས་ཀ་གཞན་བྱེད་ཐབས་མེད་པ་ཆགས་ཀྱི་ཡོད་ཀྱང་། འཛམ་གླིང་མི་མང་ལ་གོ་རྟོགས་སྤེལ་བའི་སྡིངས་ཆ་གལ་ཆེན་ཞིག་ཆགས་ཡོད། དེ་བཞིན་ཨ་རིའི་སྲིད་འཛིན་རྗོ་བྷའེ་ཌིན་མཆོག་ལ་བོད་ནང་གི་དཀའ་ངལ་དང་། ༧གོང་ས་རྒྱལ་བ་རིན་པོ་ཆེ་མཆོག་བོད་ལ་མྱུར་དུ་གདན་འདྲེན་ཞུ་དགོས་པའི་གནོན་ཤུགས་སྤྲོད་དགོས་ཡོད་སྟབས། བོད་རང་བཙན་སློབ་ཕྲུག་ཚོགས་པས་སཱན་ཧྥི་སི་སི་ཁོ་རུ་སྐད་འབོད་ཅིག་གོ་སྒྲིག་ཞུ་བཞིན་ཡོད་པར་བོད་མི་གང་མང་མཉམ་ཞུགས་གནང་དགོས་པའི་འབོད་སྐུལ་གནང་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
