དེ་རིང་ཕྱི་ཚེས་ ༡༣ ནས་ ༡༥ བར་ཉིན་གྲངས་གསུམ་རིང་ཕྱི་དྲིལ་ལས་ཁུངས་ཀྱི་གོ་སྒྲིག་འོག་དྷ་ས་འཛིན་སྐྱོང་སྦྱོང་བརྡར་ཁང་དུ་རྒྱ་གར་ནང་དང་བླངས་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཐབས་བྱུས་ཚོགས་འདུ་དང་ཟབ་སྦྱོང་ཞིག་འཚོག་བཞིན་འདུག
ཚོགས་འདུ་དབུ་འབྱེད་ཀྱི་མཛད་སྒོའི་སྟེང་སྐུ་མགྲོན་གཙོ་བོ་བཀའ་བློན་ཁྲི་ཟུར་༧སྐྱབས་རྗེ་ཟམ་གདོང་རིན་པོ་ཆེ་མཆོག་དང་རྒྱ་གར་གྱི་གྲོས་ཚོགས་འོག་མའི་ (Lok Sabha) འཐུས་མི་ཀི་ཤན་ཀ་པུར་ (Kishan Kapoor) ལགས། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས། དེ་བཞིན་རྒྱ་གར་གྱི་ས་གནས་མི་འདྲ་བ་ ༩ ནང་སློབ་གཉེར་བྱེད་བཞིན་པའི་གཞོན་སྐྱེས་མི་གྲངས་ ༣༣ མཉམ་ཞུགས་གནང་འདུག་ལ། ཚོགས་འདུའི་ཐོག་མ་འོངས་པར་ལས་དོན་གནང་ཕྱོགས་དང་བོད་དོན་ཞུ་གཏུག་གནང་སྟངས་ཀྱི་ཐོག་ལ་ལམ་སྟོན་དང་གོ་བསྡུར་གནང་གི་འདུག
ཐོག་མར་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་ཚོགས་འདུ་དང་འབྲེལ་བའི་ངོ་སྤྲོད་གསུང་བཤད་གནང་རྗེས། རྒྱ་གར་གྱི་གྲོས་ཚོགས་འོག་མའི་འཐུས་མི་ཀི་ཤན་ཀ་པུར་ལགས་ཀྱིས། ཁོང་ན་ཡི་ཡོད་ནའང་བོད་དོན་ལ་རྒྱབ་སྐྱོར་དང་མི་རབས་གསར་པ་དང་མཉམ་དུ་འབྲེལ་བ་བཟང་པོ་ཡོང་སླད། ཚོགས་འདུ་འདི་གལ་ཆེན་དུ་རྩིས་ཏེ་ཆེད་མངགས་ཀྱིས་བཅར་ཡིན་སྐོར་དང་། རྒྱ་ནག་གིས་བོད་ནང་དུ་དྲག་གནོན་ཤུགས་ཆེན་བྱས་ཏེ་དཀའ་ངལ་མང་པོ་འཕྲད་བཞིན་ཡོད་པ་མ་ཟད། ད་ལྟའི་ཆར་རྒྱ་གར་གྱིས་རྒྱ་ནག་ལ་ཐབས་ལམ་མི་འདྲ་བའི་ཐོག་ནས་གནོན་ཤུགས་སྤྲད་དེ་རྒྱ་ནག་ནང་དུའང་འགྱུར་བ་ཤུགས་ཆེན་འགྲོ་མུས་ཡིན་སྐོར་དང་། འདས་པའི་ལོ་ངོ་བཅུ་ཕྲག་བདུན་རིང་བོད་ཀྱི་རང་དབང་འཐབ་རྩོད་ཀྱི་དོན་དུ་བོད་མི་རྣམས་ཀྱིས་བཙན་བྱོལ་ནས་ལས་འགུལ་སྤེལ་མུས་ཡིན་པ་དང་། འདས་པའི་ལོ་རྒྱུས་ནང་གཞོན་སྐྱེས་རྣམས་ཀྱིས་དྭང་དུ་བླངས་ཏེ་བོད་དོན་ལས་འགུལ་སྤེལ་ཚེ་གྲུབ་འབྲས་ལེགས་པོ་སོན་ངེས་ཡིན་པ་ལྟར། བོད་ཀྱི་གཞོན་སྐྱེས་རྣམས་ནས་ཀྱང་དེ་ལྟར་ལས་འགུལ་ལ་མཉམ་ཞུགས་ཀྱིས་འཐབ་རྩོད་བྱས་ཚེ། བོད་ཀྱི་བདེན་མཐའ་མྱུར་དུ་གསལ་རྒྱུའི་ཡིད་ཆེས་དང་རེ་བ་ཡོད་སྐོར་སོགས་གསུངས་སོང་།
སྐུ་མགྲོན་གཙོ་བོ་ཁྲི་ཟུར་ཟམ་གདོང་རིན་པོ་ཆེ་མཆོག་གིས། དེ་རིང་གི་བརྗོད་གཞི་གཙོ་བོ་དེ་བོད་དོན་ཞུ་གཏུག་ལས་འགུལ་གྱི་ཆེད་དུ་ཐབས་བྱུས་འཚོལ་རྒྱུ་དང་དེའི་ཆེད་དུ་ཟབ་སྦྱོང་གནང་རྒྱུར་དམིགས་པ་ཞིག་རེད། ང་རང་ཚོའི་བོད་དོན་ཞུ་གཏུག་འདི་ལས་བགོས་གནང་རྒྱུ་སྟབས་བདེ་པོ་ཞིག་རེད་བསམ་གྱི་འདུག རྒྱུ་མཚན་ནི། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་ཀྱི་གནད་དོན་གང་ཡིན་པ་གསལ་པོ་བཟོས་གནང་ཡོད་པར་བརྟེན། ལམ་སྟོན་དེའི་ཐོག་ལ་ཤར་བསྐྱོད་བྱ་རྒྱུ་མ་གཏོགས་ང་ཚོས་ཐབས་ལམ་གསར་པ་འཚོལ་རྒྱུ་དང་གནས་ཚུལ་གསར་པ་བསྒྲུབ་དགོས་པའི་གནས་སྟངས་རྩ་བ་ནས་མེད་པ་རེད། སྤྱིར་བཏང་བོད་ཀྱི་དཀའ་རྙོག་ཅེས་པ་དེ་ངོ་འཕྲོད་པ་བྱ་རྒྱུ་གལ་ཆེན་པོ་རེད། རྒྱལ་སྤྱིའི་ནང་ལ་དཀའ་རྙོག་མང་པོ་ཡོང་གི་ཡོད་པ་ཚང་མ་འཐབ་རྩོད་ཀྱི་ངོ་བོ་ཤ་སྟག་ཅིག་རེད། ང་ཚོ་ཐོག་མར་སྐྱབས་བཅོལ་དུ་འབྱོར་ཚུལ་གྱི་ཐོག་ལ་ནུབ་ཕྱོགས་པ་མང་པོ་ཞིག་གིས་ཞིབ་འཇུག་བྱས་ཏེ་བོད་པའི་འཐབ་རྩོད་འདི་ག་རེ་རེད་ཅེས་འདྲི་ཡི་ཡོད་པ་རེད། མི་རིགས་གཉིས་འཆམ་མཐུན་མི་ཡོང་བའི་འཐབ་རྩོད་ཅིག་རེད་དམ། ཡང་ན་སྲིད་དོན་གྱི་ལྟ་གྲུབ་མི་མཐུན་པའི་འཐབ་རྩོད་ཅིག་རེད་དམ། ས་མཚམས་ཀྱི་འཐབ་རྩོད་ཅིག་རེད་དམ། ཆབ་སྲིད་དབང་ཆའི་འཐབ་རྩོད་ཅིག་རེད་དམ། དེང་སང་གི་འཐབ་རྩོད་མང་ཆེ་བ་དེའི་ཁོངས་སུ་བསྡུ་ཡི་ཡོད་པར་བརྟེན། བོད་པའི་གནད་དོན་ཡང་དེ་ལྟ་བུ་ཞིག་རེད་དྲན་གྱི་ཡོད་པ་རེད། ང་ཚོ་བོད་མི་རིགས་དང་རྒྱ་མི་རིགས་གཉིས་ཀྱི་བར་ལ་འགལ་ཟླ་གང་ཡང་མེད། ཅེས་སོགས་གསུངས།
ཡང་༧སྐྱབས་རྗེ་ཟམ་གདོང་རིན་པོ་ཆེ་མཆོག་གིས། ༧གོང་ས་མཆོག་ནས་བོད་ཀྱི་གནད་དོན་འདི་ཞི་འགྲིག་ཡོང་ཐབས་སུ་བདེན་པ་དང་འཚེ་བ་མེད་པ་གཉིས་པོ་དེ་ཞི་བདེའི་སྒང་ནས་གསུངས་པ་རེད། བདེན་པར་གནས་པ་ཡིན་ན་འཚེ་བ་ཡོང་ཐབས་མེད་པ་དང་། འཚེ་བ་མེད་པར་གནས་པ་ཡིན་ན་བདེན་པ་ལས་གཞན་པའི་འཐབ་རྩོད་གང་ཡང་བྱ་རྒྱུ་ཡོད་པ་མ་རེད། དེར་བརྟེན་བདེན་པ་དང་འཚེ་བ་མེད་པ་གཉིས་པོ་དེ་ང་ཚོས་གནས་ཚུལ་ཡག་པོ་བྱས་ནས་ཤེས་པ་ཡིན་ན། འདིའི་ཐོག་ལ་འཐབ་རྩོད་གཞན་འཚོལ་དགོས་པ་ཧ་ལམ་མེད་པ་ལྟ་བུ་ཞིག་རེད། ཡིན་ནའང་། བདེན་པ་འདི་ག་རེ་ཡིན་པ་དེ་ཚང་མས་མཁྱེན་དགོས་རྒྱུ་གལ་ཆེན་པོ་རེད། ཡང་དག་པ་མ་ཡིན་པ་དང་དྲང་བདེན་མ་ཡིན་པའི་གནས་ཚུལ་ག་རེ་འབྱུང་གི་ཡོད་པ་དེ་མཁྱེན་དགོས་པ་ཞིག་རེད། ང་རང་ཚོའི་མ་འོངས་པའི་འཐབ་རྩོད་དེ་ག་དུས་ཡིན་རུང་བདེན་པ་དང་འཚེ་བ་མེད་པར་གཞི་བཅོལ་དགོས་པ་ཞིག་དང་། ང་ཚོའི་ཕུགས་ཀྱི་དམིགས་ཡུལ་དེ་༧གོང་ས་རྒྱལ་བ་རིན་པོ་ཆེ་མཆོག་གི་ལམ་སྟོན་གཞིར་བཟུང་། བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་ཀྱི་ཐོག་ནས་གཏན་ལ་ཕབ་པའི་དབུ་མའི་ལམ་དེ་རེད། དབུ་མའི་ལམ་གྱི་སྲིད་ཇུས་དེ་ལ་གཉིས་སྨན་ལབ་དགོས་དོན་ནི། ཕན་ཚུན་གཉིས་ཀ་ལ་ཕན་པ་ཞིག་མ་གཏོགས་གཅིག་རྒྱལ། གཅིག་ཕམ་པ་ཟེར་བ་དང་། གཅིག་ལ་ཕན། གཅིག་ལ་གནོད་ཟེར་བ་དེ་མེད་པ་ངེས་པར་དུ་ཐུགས་ལ་མཁྱེན་དགོས་པ་ཞིག་རེད། ཅེས་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
