བལ་ཡུལ་གྱིས་རྒྱ་ནག་གིས་འཛུགས་སྐྲུན་བྱས་པའི་གནམ་ཐང་ཞིག་ལ་ཞིབ་འཇུག་བྱེད་བཞིན་འདུག

བལ་ཡུལ་གྱིས་རྒྱ་ནག་གཞུང་གིས་མ་དངུལ་བཏང་ཞིང་འཛུགས་སྐྲུན་བྱས་པའི་བལ་ཡུལ་སྤོག་རའི་རྒྱལ་སྤྱིའི་གནམ་ཐང་ཞིག་ལ་སྐྱོན་ཆ་ཆེ་བས་ཞིབ་འཇུག་བྱེད་བཞིན་ཡོད་འདུག

A June ceremony marking Pokhara International Airport’s first international flight, a charter plane from China.Credit…Rebecca Conway for The New York Times

ཨ་རིའི་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། བལ་ཡུལ་གྱི་ལྐོག་ཟ་རུལ་སུངས་རྟོག་དཔྱོད་ཁང་གིས། རྒྱ་ནག་གིས་བཟོས་པའི་བལ་ཡུལ་གྱི་གྲོང་ཁྱེར་ཆེ་ཤོས་གཉིས་པ་སྤོག་རའི་རྒྱལ་སྤྱིའི་གནམ་ཐང་ཞིག་གི་སྤུས་ཀ་ཞན་པོ་དང་། འཛུགས་སྐྲུན་གྱི་འགྲོ་གྲོན་ཆེ་དྲགས་པ། དེ་བཞིན། གནམ་གྲུ་འབབ་ཡུལ་གྱི་ས་ཆར་ཞིབ་འཇུག་བྱས་མེད་པ་སོགས་གནད་དོན་ ༢༠ དང་འབྲེལ་ནས། རྟོག་ཞིབ་བྱེད་མགོ་བཙུགས་ཡོད་པ་དང་། གནམ་ཐང་འཛུགས་སྐྲུན་གྱི་ལས་གཞི་དེ་དང་འབྲེལ་ནས་བལ་ཡུལ་རྒྱ་ནག་གི་བུ་ལོན་ནང་ལྷུང་ཡོད་སོགས་བརྗོད་འདུག

བལ་ཡུལ་གྱི་དབུས་ལྐོག་ཟ་རུལ་སུངས་རྟོག་དཔྱོད་ཁང་གི་མགྲིན་ཚབ་པ་བྷོ་ལ་ (Bhola Dahal) ལགས་ཀྱིས། ང་ཚོས་གནམ་ཐང་ལ་ཞིབ་འཇུག་བྱེད་མགོ་བཙུགས་ཟིན་པ་ཡིན། འོན་ཀྱང་། ད་ལྟ་ཞིབ་འཇུག་གི་བརྒྱུད་རིམ་ཐོག་མའི་གྲས་སུ་ཡོད། ཅེས་བརྗོད་ཡོད་པ་དང་། གནམ་ཐང་གི་འཛུགས་སྐྲུན་ཚད་ལྡན་མིན་པའི་གནད་དོན་མང་པོ་གླེང་སློང་བྱས་པ་དང་འབྲེལ། རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་འདི་ལོར་སྤོག་ར་ཁུལ་དུ་གནམ་གྲུ་བརྡབ་སྐྱོན་བྱུང་རྐྱེན་ཡང་གནམ་ཐང་གི་འཛུགས་སྐྲུན་དང་འབྲེལ་བ་ཡོད་སྐོར་སོགས་བརྗོད་འདུག

རྒྱ་ནག་ཕྱི་སྲིད་ལྷན་ཁང་གིས། སྤོག་རའི་གནམ་ཐང་འཛུགས་སྐྲུན་གྱི་ལས་གཞིར་ཞིབ་འཇུག་བྱེད་བཞིན་ཡོད་པ་ཤེས་རྟོགས་བྱུང་མེད་པ་དང་། ཕྱིའི་རྒྱལ་ཁབ་ཁག་ཏུ་འཛུགས་སྐྲུན་གྱི་ལས་གཞི་སྤེལ་མཁན་རྒྱའི་བཟོ་གྲྭ་དག་གིས་ས་གནས་ཀྱི་ཡུལ་ཁྲིམས་སྲུང་དགོས་པ་དང་། འཛུགས་སྐྲུན་གྱི་སྤུས་ཀ་ཚད་ལྡན་ཡིན་དགོས་སྐོར་ནན་བརྗོད་བྱས་ཡོད་ལུགས་བསྒྲགས་འདུག

བལ་ཡུལ་གྱི་གྲོང་ཁྱེར་ཆེ་ཤོས་གཉིས་པ་སྤོག་རའི་རྒྱལ་སྤྱིའི་གནམ་ཐང་དེ། འདི་ལོའི་ཕྱི་ཟླ་དང་པོའི་ནང་འཛུགས་སྐྲུན་གྲུབ་སྟེ་ཤར་གཏོང་བྱེད་མགོ་བརྩམས་ཡོད་ཅིང་། བལ་ཡུལ་གྱིས་གནམ་ཐང་དེ་བརྒྱུད་ནས་རྒྱལ་ཁབ་ཀྱི་དཔལ་འབྱོར་འཕེལ་རྒྱས་སུ་འགྲོ་བའི་རེ་བརྒྱབ་ཡོད་ཀྱང་། གནམ་ཐང་དེ་ཤར་གཏོང་བྱེད་མགོ་བརྩམས་པ་ནས་ཡུལ་སྐོར་དུ་ཡོང་མཁན་ཉུང་ཉུང་མ་གཏོགས་མེད་པ་དང་། བལ་ཡུལ་གཞུང་གིས་རྒྱ་ནག་ལ་གནམ་ཐང་འཛུགས་སྐྲུན་གྱི་འགྲོ་གྲོན་དེ་རོགས་དངུལ་གྱི་ཚུར་དུ་སྤྲོད་པའི་རེ་འདུན་བཏོན་ཡོད་ཀྱང་། རྒྱ་ནག་གཞུང་གིས་ངོས་ལེན་བྱས་མེད་པ་རེད།

ཞི་ཅིན་ཕིན་གྱི་སྣེ་འཁྲིད་འོག རྒྱ་ནག་གི་ཕུགས་རྒྱང་རིང་པོའི་ཚོང་འབྲེལ་སྲིད་ཇུས་ཏེ། རྒྱུད་གཅིག་ལམ་གཅིག་གི་ལས་གཞིའི་ཁོངས་ནས་འཛམ་གླིང་རྒྱལ་ཁབ་མི་ཉུང་བ་ཞིག་འཛུགས་སྐྲུན་དང་འབྲེལ་ནས་བུ་ལོན་ནང་ལྷུང་བ་སོགས་ཀྱི་དཀའ་ངལ་མང་པོ་འཕྲད་མྱོང་ཡོད་ཅིང་། བལ་ཡུལ་ནི་རྒྱ་ནག་གི་འཛུགས་སྐྲུན་དང་འབྲེལ་ནས་བུ་ལོན་ནང་ལྷུང་མཁན་གསར་ཤོས་ཤིག་ཆགས་ཡོད་པ་དང་། ད་ལྟ་བལ་ཡུལ་གཞུང་གིས་སྤོག་རའི་གནམ་ཐང་འཛུགས་སྐྲུན་གཅིག་པོའི་ཆེད་དུ་རྒྱ་ནག་ལ་ཨ་སྒོར་ས་ཡ་ ༢༡༦ སྤྲོད་དགོས་ཀྱི་འདུག

སྤོག་རའི་གནམ་ཐང་འཛུགས་སྐྲུན་གྱི་ལས་གཞི་དེ་ཐོག་མར་རྒྱ་ནག་གི་རྒྱུ་གཅིག་ལམ་གཅིག་གི་ལས་གཞིའི་ཁོངས་ནས་འཛུགས་སྐྲུན་བྱས་ཡོད་ཀྱང་། བལ་ཡུལ་གྱིས་རྒྱ་གར་གྱི་ཕྱི་སྲིད་ལ་བསྟུན་མཁས་བྱས་ནས་གནམ་ཐང་དེ་རྒྱུ་གཅིག་ལམ་གཅིག་གི་ཁོངས་སུ་བཅུག་མེད་སྐོར་བརྗོད་ཡོད་པ་རེད་ལ། ད་ལྟ་སྤོག་རའི་གནམ་ཐང་གི་གནད་དོན་དང་འབྲེལ་ནས། རྒྱ་ནག་དང་བལ་ཡུལ་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་མུས་ཡིན་འདུག

གསར་འགོད་པ། སྐལ་བཟང་སྦྱིན་པ།