བོད་མཚོ་སྔོན་ནས་ཡིན་པའི་བོད་མོ་གཡང་མོ་འཚོ་ལགས་སུ་ཕྱི་ལོ་ ༢༠༢༣ ལོའི་རྒྱ་ནག་རི་ལུང་ཐང་གསུམ་རྐང་འཁོར་མཉམ་འབྲེལ་འགྲན་སྡུར་གྱི་རྟིང་རྩོད་ཁྲོད་ཨང་རིམ་དང་པོ་ཐོབ་ཡོད་འདུག
བོད་ནང་གི་ན་གཞོན་ཆེད་ལས་པ་མང་པོ་ཞིག་གིས་རྒྱ་ནག་དང་རྒྱལ་སྤྱིའི་སྡིངས་ཆ་མང་པོར་མཉམ་ཞུགས་བྱས་ཏེ། གྲུབ་འབྲས་མི་དམན་པ་ཞིག་བླངས་དང་ལེན་མུས་ཡིན་པ་ལྟར། ཟླ་འདིའི་ཕྱི་ཚེས་ ༡༡ ནས་ཉིན་གཉིས་རིང་རྒྱ་ནག་ཡུན་ནན་ཞི་ཁྲོའུ་རུ་འཚོགས་པའི་ཕྱི་ལོ་ ༢༠༢༣ ལོའི་རྒྱ་ནག་རི་ལུང་ཐང་གསུམ་རྐང་འཁོར་མཉམ་འབྲེལ་འགྲན་སྡུར་གྱི་རྟིང་རྩོད་ཁྲོད་བོད་མཚོ་སྔོན་མདོ་ལ་རྫོང་ནས་ཡིན་པའི་བུ་མོ་གཡང་མོ་འཚོ་ལགས་ལ་ཨང་རིམ་དང་པོ་ཐོབ་ཡོད་འདུག
མཚོ་སྔོན་ཞིང་ཆེན་ལུས་རྩལ་རུ་ཁག་གི་གནས་ཚུལ་སྤེལ་བའི་ནང་། ཕྱི་ལོ ༢༠༢༣ ལོའི་རྒྱ་ནག་གི་རི་ཁུལ་རྐང་འཁོར་མཉམ་འབྲེལ་འགྲན་སྡུར་གྱི་རྟིང་རྩོད་འགྲན་རིམ་ལས། འགྲན་ཁུལ་ས་ཚིགས་ཡོངས་ཀྱི་སྐར་གྲངས་ཕྱོགས་བསྡོམས་བྱས་རྗེས། མཚོ་སྔོན་གྱི་ལུས་རྩལ་རུ་ཆེན་གཉིས་པའི་ལུས་རྩལ་པ་གཡང་མོ་འཚོ་ལགས་ལ་མཐའ་མའི་སྐར་གྲངས་ ༣༧༥ ཐོབ་སྟེ་ལོ་འཁོར་རྐང་འཁོར་འགྲན་རིམ་ཡོངས་ཀྱི་ཨང་དང་པོ་ཐོབ་འདུག ཐེངས་འདིའི་ཕུལ་བྱུང་བུད་མེད་ལུས་རྩལ་པའི་རི་ཁུལ་རྒྱང་བགྲོད་འགྲན་སྡུར་ནང་དུ་ཨང་རིམ་བཞི་པ་བཅས་ཐོབ་འདུག དེ་བཞིན་མཚོ་སྔོན་གྱི་ལུས་རྩལ་བ་ཀླུ་མགོན་རྒྱལ་ལགས་ལ་ཐེངས་འདིའི་རི་ཁུལ་རྒྱང་བགྲོད་རྐང་འཁོར་འགྲན་སྡུར་ཁྲོད་ཨང་དྲུག་པ་ཐོབ་ཡོད་འདུག
བོད་ཀྱི་ལུས་རྩལ་པ་གཡང་མོ་འཚོ་ལགས་ནི་ཕྱི་ལོ་ ༢༠༠༣ ལོར་བོད་མཚོ་སྔོན་ཞིང་ཆེན་མདོ་ལ་རྫོང་ནས་སྐྱེས་ཡོད་ཅིང་། ཕྱི་ལོ་ ༢༠༡༩ ལོར་རྒྱ་ནག་རྒྱལ་ཡོངས་རི་ལུང་ཐང་རྐང་འཁོར་མཉམ་འབྲེལ་འགྲན་སྡུར་ཁྲོད་ཁོང་མོའི་རུ་ཁག་ལ་ཨང་རིམ་བདུན་པ་ཐོབ་ཡོད་པ་དང་། ཕྱི་ལོ་ ༢༠༢༣ ལོའི་རྒྱ་ནག་རི་ལུང་ཐང་གསུམ་རྐང་འཁོར་མཉམ་འབྲེལ་འགྲན་སྡུར་ས་ཚིགས་དང་པོ་ལས། ཁོང་མོར་བུད་མེད་དར་མའི་རུ་ཁག་གཉིས་པའི་ནང་དུ་ཞུགས་ཆོག་པའི་གོ་སྐབས་ཐོབ་འདུག དེ་བཞིན་འདི་ལོའི་ཕྱི་ཟླ་ ༦ ཚེས་ ༡༧ ཉིན་རྒྱ་ནག་ཧྥུ་ཅིན་ཞིང་ཆེན་གྱི་མ་འོངས་བུམ་པ་རྟགས་མའི་རི་ལུང་ཐང་གསུམ་རྐང་འཁོར་མཉམ་འབྲེལ་འགྲན་སྡུར་ཁྲོད་ཨང་གསུམ་པ་ཐོབ་ཡོད་པ་མ་ཟད། ཕྱི་ཟླ་ ༧ པའི་ནང་རྒྱ་ནག་རྒྱལ་ཡོངས་ལུས་རྩལ་རུ་ཁག་ཏུ་བདམས་ཐོན་བྱུང་ཡོད་འདུག
གསར་འགོད་པ། བྱམས་པ་ཚ་ེརིང་། རྩོམ་སྒྲིག་པ། སྐལ་བཟང་སྦྱིན་པ།
