དེ་རིང་སྔ་དྲོར་༧གོང་ས་མཆོག་གིས་རྒྱ་གར་ཆེས་མཐོའི་ཁྲིམས་ཁང་གི་ཁྲིམས་དཔོན་ཞིག་ཚུད་པའི་སོག་པོའི་དགེ་བཤེས་ལྷ་རམས་པ་དང་བཀའ་བཅུ་པ་རྣམས་ལ་མཇལ་ཁ་དང་བཀའ་སློབ་བསྩལ།
དེ་རིང་ཕྱི་ཚེས་༡༧ ཉིན་གྱི་ཞོགས་པར་བཞུགས་སྒར་རྒྱལ་བའི་ཕོ་བྲང་དུ། རྒྱ་གར་ཆེས་མཐོའི་ཁྲིམས་ཁང་གི་ཁྲིམས་དཔོན་སན་ཇེ་ཀ་རོལ་(Sanjay karol)མཆོག་དང་། དེ་བཞིན་རྒྱ་གར་ལྷོ་ཕྱོགས་ཀྱི་གདན་ས་འབྲས་སྤུངས་དང་སེ་ར། དགའ་ལྡན་བཅས་གདན་ས་གསུམ་གྱི་དགེ་བཤེས་ལྷ་རམས་པ་ ༧༠ ལྷག་དང་། ཇོ་ནང་མཁན་ཆེན་རིན་པོ་ཆེ་མཆོག་གིས་དབུ་འཁྲིད་པའི་སོག་ཡུལ་གྱི་དད་ལྡན་སེར་སྐྱ་ ༧༠ ལྷག་བཅས་ལ་མཇལ་ཁ་དང་བཀའ་སློབ་སྩལ་གནང་ཡོད་པ་རེད།
སྐབས་དེར་༸གོང་ས་རྒྱལ་བ་རིན་པོ་ཆེ་མཆོག་གིས། དཔེ་ཆ་བསླབ་དགོས་རེད་གདའ། དཔེ་ཆ་བལྟ་རྒྱུ་དེ་དཔེ་གལ་ཆེན་པོ་རེད། དགེ་རྒན་དངོས་གྲུབ་ཚོགས་ཉིད་སོག་པོ་རེད་གདའ། དཔེ་བཀའ་དྲིན་ཆེན་པོ་ཡིན། ནོར་བུ་གླིང་ག་ནས་ངོས་རང་འབྲོ་རྒྱུ་གཏན་ཁེལ་རྗེས། ངའི་རྒན་དངོས་གྲུབ་ཚོགས་ཉིད་ལ་ལན་སྤྲད་པ་ཡིན། ངོས་རང་གིས་ངོས་རང་འབྲོ་རྒྱུ་ཡིན། སེ་རར་ཡར་ཕེབས་ཞུས་པ་ཡིན། དེ་སོ་སོའི་ལས་རེད་པ། ཁོང་ནོར་བུ་གླིང་གར་ལུས་པ་རེད། དགེན་དངོས་གྲུབ་ཚོགས་ཉིད་དཔེ་བཀའ་དྲིན་ཆེན་པོ་ཡིན། ཞེས་གསུངས་སོང་།
དགའ་ལྡན་ཕོ་བྲང་གི་མཛད་འཆར་ལྟར་ན། ཕྱི་ཟླ་ ༡༢ ཚེས་ ༢༩ ནས་ཉིན་གསུམ་རིང་རྒྱ་གར་རྡོ་རྗེ་གདན་དུས་འཁོར་གསུང་ཆོས་ར་བའི་ནང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་སློབ་དཔོན་ཀླུ་སྒྲུབ་ཀྱི་ཆོས་དབྱིངས་བསྟོད་པ་དང་། འཇམ་དཔལ་དབྱངས་རྗེས་གནང་གི་བཀའ་ཆོས་བསྩལ་རྒྱུ་ཡིན་འདུག ཕྱི་ལོ་ ༢༠༢༤ ཟླ་ ༡ ཚེས་ ༡ ཉིན་རྒྱ་གར་རྡོ་རྗེ་གདན་དུས་འཁོར་གསུང་ཆོས་ར་བའི་ནང་དུ། ༧གོང་ས་རྒྱལ་བ་རིན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་བཅས་ཡིན་འདུག
རྩོམ་སྒྲིག་པ། སྐལ་བཟང་སྦྱིན་པ།
