ཕྱི་ཟླ་ ༡༢ ཚེས ༡༢ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་སྒང་ཐོག་དཔལ་འབྱོར་རྩེད་ཐང་དུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་སྩལ་རྒྱུ་ཡིན་འདུག
བོད་ཀྱི་དུས་བབ་གསར་ཁང་གི་སྐུ་པར།
དེ་རིང་ཕྱི་ཚེས་ ༢༡ ཉིན་དགའ་ལྡན་ཕོ་བྲང་གིས་སྤེལ་བའི་གསལ་བསྒྲགས་ནང་། འདི་ལོའི་ཕྱི་ཟླ་ ༡༢ ཚེས་ ༡༢ ཉིན་འབྲས་ལྗོངས་མི་མང་གིས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་ཉིན་གྲངས་གཅིག་རིང་སྒང་ཐོག་དཔལ་འབྱོར་རྩེད་ཐང་དུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་བཀའ་དྲིན་སྩལ་རྒྱུ་ཡིན་སྐོར་གསལ་འདུག
༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། འདི་ལོའི་ཕྱི་ཟླ་ ༡༢ ཚེས་ ༡༤ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་གིས་ནུབ་བྷང་གྷལ་ས་ལུ་སྒར་དུ་ཡོད་པའི་སྲད་རྒྱུད་གྲྭ་ཚང་དུ་སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་རྒྱུ་དང་། འདི་ལོའི་ཕྱི་ཟླ་ ༡༢ ཚེས ༢༩ ནས་ཚེས་ ༣༡ བར་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བར་ཆོས་འབྲེལ་སྩལ་རྒྱུ་ཡིན་ཞིང་། ཕྱི་ཚེས་ ༢༩ དང་ ༣༠ ཉིན་གཉིས་ཀྱི་སྔ་དྲོ་མགོན་པོ་ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པའི་ཆོས་འབྲེལ་དང་། ཕྱི་ཚེས་ ༣༡ གི་སྔ་དྲོ་རྗེ་བཙུན་འཇམ་པའི་དབྱངས་ཀྱི་རྗེས་གནང་བཀའ་དྲིན་སྩལ་རྒྱུ་ཡིན་འདུག་ལ། ཕྱི་ལོ་ ༢༠༢༤ ལོའི་ཟླ་ ༡ ཚེས་ ༡ ཉིན་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གསུང་ཆོས་ར་བར་༧གོང་ས་རྒྱལ་བ་རིན་པོ་ཆེ་མཆོག་ལ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
དེ་བཞིན་ཁ་སང་ཕྱི་ཚེས་ ༢༠ ཉིན་བདེ་སྲུང་ལས་ཁུངས་ཀྱིས་འདི་ལོའི་གནས་མཆོག་རྡོ་རྗེ་གདན་གྱི་གསུང་ཆོས་ལག་ཁྱེར་བཟོ་ཕྱོགས་དང་འབྲེལ་བའི་གསལ་བསྒྲགས་ཤིག་སྤེལ་བའི་ནང་། ཕྱི་ཟླ་ ༡༢ ཚེས་ ༢༩ དང་ ༣༠ ཉིན་གཉིས་ཀྱི་སྔ་དྲོ་མགོན་པོ་ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པའི་ཆོས་འབྲེལ་ལ་ཕེབས་མཁན་གྱི་བོད་རིགས་དང་ཧི་མ་ལ་ཡའི་ཆོས་ཞུ་བར་གསུང་ཆོས་ལག་ཁྱེར་མི་དགོས་ནའང་། གྲྭ་བཙུན་དང་། རང་ལོ་ ༧༠ ཡན། དབང་པོ་སྐྱོན་ཅན། རྒྱ་གར་བ། ཕྱི་རྒྱལ་བ་བཅས་ལ་གསུང་ཆོས་ལག་ཁྱེར་གནང་རྒྱུ་ཡིན་འདུག་པས། (www.dalailamateaching.com)ཞེས་པའི་དྲ་ཐག་འདི་བརྒྱུད་དྲ་ལམ་ནས་ཐོ་འགོད་དང་ལག་ཁྱེར་བཟོ་ཐུབ་ཀྱི་ཡོད་ཡོད་སྐོར་དང་། དྲ་ལམ་ནས་ཐོ་འགོད་སོགས་ཀྱི་སྐབས་མི་སྒེར་གྱི་ལག་ཁྱེར་(Passport/Aadhaar card/Voter ID/Green Book/RC) སོགས་བཀང་ཚེ། གནས་མཆོག་རྡོར་གདན་ནས་ལག་ཁྱེར་ཐད་ཀར་གནང་རྒྱུ་དང་། དེ་མིན་ཕྱི་ཟླ་ ༡༢ ཚེས་ ༡༤ ནས་རྡོ་རྗེ་གདན་ནས་གསུང་ཆོས་ལག་ཁྱེར་བཟོ་མགོ་འཛུགས་རྒྱུ་ཡིན་སྐོར་སོགས་གསལ་འདུག
འདི་ལོའི་ཕྱི་ཟླ་ ༩ ཚེས་ ༢༢ ཉིན་དགའ་ལྡན་ཕོ་བྲང་ཡིག་ཚང་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་གཟུགས་ལ་བརྡབ་གསིག་དང་འདུ་འཛོམས་ཆེ་སར་ཆམ་རིམས་སོགས་ཀྱི་ཉེན་ཁའང་ཆེ་རྐྱེན། གནས་ཆུང་ཆོས་རྒྱལ་ཆེན་པོའི་བཀའ་ལུང་དང་། སྐུའི་བླ་སྨན་པ་རྣམས་ཀྱིས་སྐུ་ངལ་གསོ་གལ་ཆེ་བའི་དགོངས་འཆར་བཏོན་པ་གཞི་བཟུང་། ཕྱི་ཟླ་ ༡༡ ནང་༧གོང་ས་མཆོག་འབྲས་ལྗོངས་སུ་ཆིབས་བསྒྱུར་བསྐྱང་རྒྱུ་དང་། ཕྱི་ཟླ་ ༡༡ ཟླ་དཀྱིལ་ནས་དང་ ༡༢ ཟླ་དཀྱིལ་བར་གྱི་རྒྱ་གར་ལྷོ་ཕྱོགས་ཀཱར་ནཱ་ཊ་ཀཱ་མངའ་སྡེའི་སྦེལ་ཀོབ་བོད་མིའི་གཞིས་ཆགས་དང་། བཀྲ་ཤིས་ལྷུན་པོ་དགོན། ཧོན་སུར་རྒྱུད་སྨད་གྲྭ་ཚང་སོགས་སུ་བཀའ་དབང་སྩལ་རྒྱུའི་མཛད་འཆར་ཁག་བཅས་ཕྱིར་འཐེན་བྱས་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། སྐལ་བཟང་སྦྱིན་པ།
