བོད་དཀར་མཛེས་ཁུལ་གྱི་ཁུལ་དཔོན་ཀྲེང་ཐིན་ཆང་ཟེར་བས་ཁྲིམས་འགལ་ཐོག་ཁྲིམས་ཆད་ལག་བསྟར་གྱི་ལས་དོན་ལ་མཐུན་སྦྱོར་བྱས་པའི་ཉེས་མིང་འོག་ཆབ་སྲིད་ཀྱི་གོ་གནས་ནས་ཕབ་ཡོད་འདུག
སི་ཁྲོན་ཞིང་ཆེན་སྲིད་ཁྲིམས་ལྷན་ཁང་གིས་གནས་ཚུལ་སྤེལ་བའི་ནང་དུ། དཀར་མཛེས་ཁུལ་མི་མང་སྲིད་གཞུང་གི་དམར་ཤོག་ཚོགས་པའི་ཚོགས་མི་དང་། ཁུལ་དཔོན་གཞོན་པ་ཀྲེང་ཐིན་ཆང་གིས་གཞན་གྱི་ཆེད་དུ་བཙོན་ཁང་དང་འབྲེལ་བའི་ཁྲིམས་ཆད་ལག་བསྟར་གྱི་ལས་དོན་ལ་མཐུན་སྦྱོར་གྱིས་ཁྲིམས་འགལ་བྱས་ཡོད་པས། ལོ་གཉིས་རིང་ཞིབ་བཤེར་བྱས་ཏེ་ཆབ་སྲིད་ཀྱི་གོ་གནས་ནས་གནས་དབྱུང་བཏང་ཡོད་པ་མ་ཟད། ཁྲིམས་འཛིན་གྱི་གཏན་འབེབས་བྱས་པའི་དོན་ཚན་གསུམ་ལས་ཁྲིམས་འགལ་བྱས་པའི་གྱོད་གཞི་ ༥ ཡོད་ཚུལ་བསྒྲགས་འདུག
ཀྲེང་ཐིན་ཆང་(郑天强）ནི་ཕྱི་ལོ་ ༡༩༦༣ ལོའི་ཟླ་ ༡༡ པའི་ནང་དཀར་མཛེས་ཁུལ་བརྒྱད་ཟིལ་རྫོང་དུ་སྐྱེས་ཡོད་ཅིང་། ལྷོ་ནུབ་མི་རིགས་སློབ་གླིང་ཆབ་སྲིད་ལོ་རྒྱུས་ཚན་ཁག་གི་ལོ་རྒྱུས་ཆེད་ལས་ནས་སློབ་མཐར་ཕྱིན་རྗེས། དཀར་མཛེས་ཁུལ་ནོར་སྲིད་ཉོ་ཚོང་སློབ་གྲྭར་དགེ་རྒན་བྱས་པ་དང་། རྗེས་སུ་སློབ་གྲྭ་དེ་གའི་སློབ་སྤྱི་གཞོན་པ་སོགས་ཀྱི་ལས་ཀ་བྱས་འདུག ཕྱི་ལོ་ ༢༠༠༢ ལོ་ནས་བཟུང་དཀར་མཛེས་ཁུལ་སྡེ་རོང་རྫོང་དམར་ཤོག་དྲུང་ཡིག་གཞོན་པ་དང་། སྡེ་རོང་རྫོང་གི་རྫོང་དཔོན། དཀར་མཛེས་ཁུལ་རིམ་པའི་དཔོན་གནས་སོགས་འཁུར། ཕྱི་ལོ་ ༢༠༡༤ ལོར་དཀར་མཛེས་ཁུལ་ཆ་ཕྲེང་རྫོང་གི་དམར་ཤོག་དྲུང་ཡིག ཕྱི་ལོ་ ༢༠༡༦ ལོའི་ཟླ་ ༥ པར་དཀར་མཛེས་ཁུལ་གྱི་དྲུང་ཆེ་གཞོན་པར་ལས་སྒྱུར་བྱས་འདུག ཕྱི་ལོ་ ༢༠༡༧ ལོའི་ཟླ་དང་པོའི་ནང་དཀར་མཛེས་ཁུལ་གྱི་སྐབས་ ༡༢ པའི་མི་མང་འཐུས་མི་ཚོགས་ཆེན་གྱི་ཚོགས་འདུ་འཚོགས་ཡོད་ཅིང་། དཀར་མཛེས་ཁུལ་སྲིད་གཞུང་གི་མགོ་ཁྲིད་ཚོགས་ཆུང་གསར་བདམས་བྱུང་སྟེ། ཀྲེང་ཐིན་ཆང་དཀར་མཛེས་ཁུལ་གྱི་ཁུལ་དཔོན་གཞོན་པར་བདམས་ཐོན་བྱུང་ཡོད་འདུག
དེ་བཞིན་བོད་ལྗོངས་ཉིན་རེ་ཚགས་པར་ཁང་ཟེར་བས་གནས་ཚུལ་སྤེལ་བའི་ནང་དུ། ཕྱི་ལོ་ ༢༠༢༠ ལོ་ནས་བཟུང་བོད་རང་སྐྱོང་ལྗོངས་ཟེར་བའི་ནང་དུ་ཁྱོན་བསྡོམས་མགོ་ཁྲིད་གཙོ་བོ་གྲངས་ ༨༨༠ ལྷག་ཙམ་ལ་ཞིབ་བཤེར་བྱས་ཏེ་འབྲས་བུ་ཐོན་སྐོར་དང་། དེའི་ནང་དུ་བོད་རང་སྐྱོང་ལྗོངས་ཁྲོམ་ར་ལྟ་སྐུལ་དོ་དམ་ཚན་པའི་དྲུང་ཡིག་ཟུར་བ་སྒོར་སྒོར་དང་། བོད་རང་སྐྱོང་ལྗོངས་ཆུ་དོ་དམ་ཚན་པའི་དམར་ཤོག་དྲུང་ཡིག་ཟུར་བ་ཟླ་བ་བཀྲ་ཤིས། བོད་རང་སྐྱོང་ལྗོངས་དམངས་སྲིད་ཁང་གི་དམར་ཤོག་དྲུང་ཡིག་ཅི་ལི་ཀྲེན། བོད་རང་སྐྱོང་ལྗོངས་ལུས་རྩལ་ཁང་གི་དམར་ཤོག་དྲུང་ཡིག་ལིའུ་པོ་ཆིང་། འདམ་གཞུང་རྫོང་གི་དམར་ཤོག་དྲུང་ཡིག་ཡའོ་ཅུན་ལེའང་། ཆབ་མདོ་གྲོང་ཁྱེར་ཁ་རུབ་དམར་ཤོག་དྲུང་ཡིག་ཟུར་བ་རེན་ཧུའུ་མིང་སོགས་མགོ་ཁྲིད་གཙོ་བོ་ཁག་ཅིག་ལ་ཞིབ་བཤེར་ཤུགས་དྲག་བྱས་ཡོད་སྐོར་འཁོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
