ཐའེ་ཝན་གྱི་རྒྱལ་ས་ཐའེ་པེ་རུ་འཚོག་བཞིན་པའི་འཛམ་གླིང་ནང་གི་རྒྱ་ནག་ཅེས་པའི་ལྷན་ཚོགས་ཐོག་བོད་ཀྱི་ན་གཞོན་བཞི་མཉམ་ཞུགས་གནང་སྟེ་བོད་ནང་གི་ཛ་དྲག་གནས་སྟངས་སོགས་ཀྱི་ཐོག་གཏམ་བཤད་གནང་འདུག
ཐའེ་ཝན་དུ་འཚོག་བཞིན་པའི་འཛམ་གླིང་ནང་གི་རྒྱ་ནག་ཅེས་པའི་ལྷན་ཚོགས་ཐོག་བོད་པའི་ཉམས་ཞིབ་པ་ཁག་ཅིག་མཉམ་ཞུགས་གནང་། འབྲེལ་ཡོད་ཀྱིས་པར་མཁོ་སྤྲོད་བྱས།
ཐའེ་ཝན་དུ་རྟེན་གཞི་བྱས་པའི་ (DOUBLETHINK LAB) ཞེས་པའི་གཞུང་ཁོངས་མ་ཡིན་པའི་ཚོགས་པའི་གོ་སྒྲིག་འོག ཐའེ་ཝན་གྱི་རྒྱལ་ས་ཐའེ་པེ་རུ་ཟླ་འདིའི་ཕྱི་ཚེས་ ༥ ནས་ཉིན་གྲངས་ ༣ རིང་འཛམ་གླིང་ནང་གི་རྒྱ་ནག་(China In the world ) ཅེས་པའི་རྒྱ་ནག་གཞུང་གིས་འཛམ་གླིང་ཁྱོན་ཡོངས་སུ་སྲིད་འབྱོར་རིག་གསུམ་གྱི་ཐོག་ནས་ཇི་ལྟར་བཀག་སྡོམ་དང་གནོན་ཤུགས་སྤྲོད་ཀྱི་ཡོད་མེད་སོགས་ཀྱི་ཐད་ལ་བགྲོ་གླེང་གི་ཚོགས་འདུ་ཞིག་འཚོག་མུས་ཡིན་ཞིང་། ཚོགས་ཆེན་དེའི་ཐོག་རྒྱལ་སྤྱིའི་བོད་དོན་འབྲེལ་མཐུད་ལས་ཁུངས་ཀྱི་ཉམས་ཞིབ་པ་འབུམ་རམས་པ་བློ་བཟང་དབྱངས་འཛོམས་ལགས་དང་། ཀི་ལོ་ཀ་ཏ་མཐོ་སློབ་ཀྱི་སློབ་དཔོན་འབུམ་རམས་པ་འཇིགས་མེད་ཡེ་ཤེས་ལགས། འབུམ་རམས་པ་ཨ་ཕ་ལྷ་མོ་ལགས་བཅས་མཉམ་ཞུགས་ཀྱིས་གཏམ་བཤད་གནང་ཡོད་འདུག
དེའི་ཐད་འབུམ་རམས་པ་བློ་བཟང་དབྱངས་མཚོ་ལགས་ཀྱིས། ད་ལན་གྱི་ལྷན་ཚོགས་ཐོག་འཛམ་གླིང་གི་ས་ཕྱོགས་གང་ས་ནས་རྒྱ་ནག་སྐོར་གྱི་ཉམས་ཞིབ་པ་དང་། གསར་འགོད་པ། ལས་འགུལ་བ་སོགས་མི་གྲངས་ ༢༥༠ ལྷག་འཛོམས་ནས་རྒྱ་ནག་གཞུང་གིས་ལས་འགུལ་བ་རྣམས་ལ་གནོན་ཤུགས་ཇི་ལྟར་སྤྲོད་ཀྱིན་ཡོད་མེད་སོགས་ཀྱི་ཐད་ལ་གྲོས་མོལ་དང་གླེང་སློང་། དེ་བཞིན་རྒྱ་ནག་གཞུང་གི་ཆབ་དཔལ་རིག་གསུམ་གྱི་གནས་བབ་མཚོན་པའི་བོད་དང་། ཡུ་གུར་སོགས་ལ་བཙན་གནོན་དང་སྡུག་སྦྱོང་གཏོང་མུས་ཡིན་པའི་སྐོར། རྒྱ་ནག་གཞུང་གིས་མཁའ་ལམ་སོགས་ནས་ཐའེ་ཝན་གཞུང་མང་གཉིས་ལ་འཇིགས་སྐུལ་ཡང་ཡང་བྱེད་མུས་ཡིན་པ་སོགས་ཀྱི་སྐོར་ནས་གླེང་སློང་གནང་གིན་ཡོད་སྐོར་འགྲེལ་བརྗོད་གནང་བྱུང་།
ཁ་སང་ཕྱི་ཚེས་ ༥ ཉིན་བོད་དང་འབྲེལ་བའི་གཏམ་བཤད་ཀྱི་ལས་རིམ་སྐབས། འབུམ་རམས་པ་བློ་བཟང་དབྱངས་མཚོ་ལགས་ཀྱིས་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་འཆར་གཞི་ལྡན་པའི་ཐོག་ནས་བོད་ནང་གི་རང་བྱུང་ཁོར་ཡུག་ཐོག་སྲིད་ཇུས་ག་རེ་འཛིན་གྱི་ཡོད་མེད་སྐོར་དང་། འབུམ་རམས་པ་འཇིགས་མེད་ཡེ་ཤེས་ལགས་ཀྱིས་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་སྲིད་དབང་སྒེར་བཟུང་གི་འོག་བོད་ནང་ཆོས་ལུགས་དང་འབྲེལ་བའི་སྲིད་ཇུས་ག་རེ་འཛིན་གྱི་ཡོད་མེད་ཀྱི་སྐོར། དེ་བཞིན་འབུམ་རམས་པ་ཨ་ཕ་ལྷ་མོ་ལགས་ཀྱིས་རྒྱ་ནག་གཞུང་གིས་བརྙན་མིག་སོགས་ཀྱི་ཐོག་ནས་བོད་ནང་གི་བོད་མི་ཚོའི་འགྲོ་འདུག་སྤྱོད་གསུམ་ལ་ཇི་ལྟར་ཚོད་འཛིན་དང་ཉུལ་ཞིབ་བྱེད་ཀྱིན་ཡོད་མེད་སོགས་ཀྱི་ཐད་ལ་གཏམ་བཤད་གནང་ཡོད་འདུག
དེ་རིང་ཕྱི་ཚེས ༦ ཉིན་གྱི་ཐའེ་ཝན་གྱི་ཆུ་ཚོད་ ༧ པའི་སྟེང་ཉམས་ཞིབ་པ་འབུམ་རམས་པ་བློ་བཟང་དབྱངས་མཚོ་ལགས་སོགས་ཀྱིས། ཐའེ་ཝན་དང་བོད་ཅེས་པའི་ཚོགས་པས་གོ་སྒྲིག་བྱས་པའི་བོད་དོན་ཐད་ཀྱི་གཏམ་བཤད་ཀྱི་ལས་རིམ་ཞིག་འཚོག་གི་ཡོད་པ་མ་ཟད། དེ་བཞིན་སང་ཉིན་ཕྱི་ཚེས ༧ གྱི་དགོང་མོར་ཆུ་ཚོད་ ༧ པའི་སྟེང་དུས་དེབ་སྔོན་པོ་གསར་པ་(New Blue magazine) ཡི་གོ་སྒྲིག་འོག་བོད་དོན་སྐོར་གྱི་གཏམ་བཤད་ཅིག་གནང་རྒྱུ་ཡིན་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
