རྒྱ་གར་གྱི་གློག་བརྙན་འཁྲབ་འཁྲིད་པ་གྲགས་ཅན་ཨ་བྷི་ཤེཀ་དྷུ་དྷེ་ཡཱ་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དང་༧ཀུན་གཟིགས་༧པཎ་ཆེན་རིན་པོ་ཆེ་མཆོག་རྣམ་གཉིས་ཀྱི་དབུས་བོད་སྐོར་གྱི་གློག་བརྙན་རིགས་གསུམ་བཟོ་འཆར་འདུག
དེ་རིང་ཞོགས་པའི་ཆུ་ཚོད་ ༧ པ་ཙམ་ལ་་བཞུགས་སྒར་རྒྱལ་བའི་ཕོ་བྲང་དུ། རྒྱ་གར་གྱི་གློག་བརྙན་འཁྲབ་ཁྲིད་པ་གྲགས་ཅན་ཨ་བྷི་ཤེཀ་དྷུ་དྷེ་ཡཱ་(Abhishek Dudhaiya)ལགས་དང་། གློག་བརྙན་བཟོ་སྐྲུན་པ་རྗེ་པ་ཊེལ་(Jay Patel) ལགས་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང་། སྐབས་དེར་ཁོང་གཉིས་ཀྱིས་མ་འོངས་པར་བོད་དང་འབྲེལ་བའི་གློག་བརྙན་གསུམ་བཟོ་འཆར་ཡོད་པའི་སྐོར་སྙན་སེང་ཞུས་ཡོད་འདུག
འདི་གའི་གསར་འགོད་པས་མཇལ་ཁའི་སྐོར་ལ་བཅར་འདྲི་བྱས་པར་གློག་བརྙན་འཁྲབ་ཁྲིད་པ་གྲགས་ཅན་ཨ་བྷི་ཤཱི་ཁི་བྷུ་བྷེ་ཡ་ལགས་ཀྱིས། དེ་རིང་ང་ཚོ་འདིར་ཡོང་དོན་ནི་རྒྱ་ནག་གཞུང་གིས་༧ཀུན་གཟིགས་༧པཎ་ཆེན་རིན་པོ་ཆེ་མཆོག་ཇི་ལྟར་བཙན་ཁྲིད་བྱས་པའི་སྐོར་གྱི་དངོས་བྱུང་གློག་བརྙན་ཞིག་དང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐོར་གྱི་མུ་འབྲེལ་གློག་བརྙན་(web series) ཞིག དེ་བཞིན་གཏམ་རྒྱུད་གློག་བརྙན་(Feature Film) ཞིག་བཅས་བཟོ་འཆར་ཡོད། དངོས་བྱུང་གློག་བརྙན་བོད་སྐད་ཐོག་ཡིན་པ་དང་། ལས་གཞི་ཐམས་ཅད་ལེགས་འགྲུབ་བྱུང་ཚེ་ཟླ་བ་གསུམ་ནས་བཞི་ནང་མཐོང་ཐུབ་ཀྱི་ཡོད། ཅེས་བརྗོད་བྱུང་།
བོད་དོན་སྐོར་གྱི་གློག་བརྙན་བཟོ་བའི་བསམ་བློ་ཇི་ལྟར་བྱུང་བའི་སྐོར་ལ་ཁོང་གི་མིག་མཐར་མཆི་མ་འཁོར་བཞིན་དུ། ངའི་པ་ལགས་པ་ཀི་སི་ཐན་ནས་རྒྱ་གར་དུ་ཡོང་བ་ཞིག་ཡིན་ཅིང་། ཁོང་གི་ཁྱིམ་མི་ཚང་མ་པ་ཀི་སི་ཐན་ནང་དུ་དམར་གསོད་བྱས་ཡོད་པའི་རྒྱུ་མཚན་ལ་བརྟེན་ནས། རྒྱ་ནག་གཞུང་གིས་བོད་ནང་དུ་བོད་མིར་གདུག་རྩུབ་མནར་གཅོད་གཏོང་བཞིན་པའི་ན་ཟུག་ཚོར་ཐུབ་པ་མ་ཟད། འཛམ་གླིང་མི་མང་ལ་བོད་མིའི་དཀའ་ངལ་སྟོན་འདོད་ཡོད། ཅེས་འགྲེལ་བརྗོད་གནང་བྱུང་།
རྒྱ་གར་གྱི་གློག་བརྙན་བཟོ་སྐྲུན་པ་རྗེ་པ་ཊེལ་ལགས་ཀྱིས། ང་ཚོར་༧གོང་ས་རྒྱལ་བ་རིན་པོ་ཆེ་མཆོག་གི་བྱིན་རླབས་ཐོབ་པའི་གོ་སྐབས་ཡག་པོ་བྱུང་ཞིང་། ང་ཚོས་མཚམས་མ་ཆད་བར་འཛམ་བུ་གླིང་གི་ཆེད་དུ་ལས་གཞི་སྒྲུབ་བཞིན་ཡོད་། དེང་སྐབས་འཛམ་གླིང་གཉན་འཕྲང་ཅན་གྱི་དུས་སྐབས་ཤིག་ཏུ་ཆགས་ཡོད། འདི་ནི་འཛམ་གླིང་ཞི་བདེ་དང་འཆམ་མཐུན་ལམ་ཁ་སྐྲུན་པའི་དམིགས་བསལ་གྱི་ལས་དོན་ཞིག་རེད། རྒྱུ་མཚན་དེའི་དབང་གིས་ང་ཚོ་དེ་རིང་ཆེད་དུ་འདིར་བཅར་བ་ཡིན། ༧གོང་ས་རྒྱལ་བ་རིན་པོ་ཆེ་མཆོག་ནི་ང་ཚོའི་ཞི་བདེ་དང་འཆམ་མཐུན་གྱི་མིག་དཔེ་ཡིན། ང་ཚོས་མ་འོངས་པའི་ལས་དོན་བྱེད་ཕྱོགས་ཐད་སེམས་ཤུགས་རྒྱས་སོང་། ཞེས་བརྗོད་བྱུང་།
ཨ་བྷི་ཤེཀ་དྷུ་དྷེ་ཡཱ་(Abhishek Dudhaiya)་སམ་མུ་ཀེ་ཤེ་དྷུ་དྷེ་ཡཱ་ལགས་ནི་གློག་བརྙན་འཁྲབ་ཁྲིད་པ་དང་། འཁྲབ་གཞུང་རྩོམ་པ་པོ་བཅས་ཡིན་འདུག་ཅིང་། ད་ལྟ་བར་ཁོང་གིས་རྒྱ་གར་གྱི་མུ་འབྲེལ་གློག་བརྙན་ ༤༡ དང་། དེའི་ནང་དུ་ལེའུ་༥༥༢༣ ཙམ་བཟོས་འདུག ཕྱི་ལོ་༢༠༢༡ ལོར་ཁོང་གིས་བཟོ་སྐྲུན་བྱས་པའི་རྒྱ་གར་གྱི་སྤོབས་པ་(Bhuj/ The pride of India ) ་ཞེས་པ་དེ་རྒྱ་གར་གློག་བརྙན་ལྟ་གྲངས་མང་ཤོས་གྲས་སུ་ཚུད་ཡོད།
དེ་བཞིན་གློག་བརྙན་བཟོ་སྐྲུན་པ་རྗེ་པ་ཊེལ་(Jay Patel) ལགས་ནི་སྤྱི་ཚོགས་ཁྲོད་དུ་འབྱུང་བཞིན་པའི་དཀའ་ངལ་ཁག་སེལ་ཐབས་བྱེད་མཁན་གྱི་མི་སྣ་ཞིག་ཡིན་པ་མ་ཟད། ཁོང་གིས་དཔལ་འབྱོར་གྱི་ཁེ་བཟང་མེད་པའི་ཐོག་ཧོ་ལི་ཝི་ཌི་གློག་བརྙན་བཟོ་སྐྲུན་ཁང་དུ་ལྷ་ནི་ཡོད་ཚད་ཡིན་ཞེས་པ་ཞིག་བཟོས་ཡོད་ཅིང་། གློག་བརྙན་དེའི་ནང་དམག་འཁྲུག་ནང་དུ་བུད་མེད་དང་བྱིས་པར་དཀའ་ངལ་ཆེན་པོ་བྱུང་སྐོར་བརྗོད་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
