ནགས་ཚང་གཞོན་ནུའི་རང་མཚང་ཞེས་པའི་དཔེ་དེབ་གསར་པ་ཞིག་དབུ་འབྱེད་གནང་སོང་། 

དེ་རིང་ཉིན་རྒྱབ་ཆུ་ཚོད་ ༢ པའི་སྟེང་དྷ་སའི་ནོར་བུ་གསོལ་མགྲོན་ཁང་གི་ཞི་བདེའི་ཚོགས་ཁང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་གོ་སྒྲིག་འོག བོད་ནང་གི་རྩོམ་པ་པོ་ནགས་ཚང་ནུས་བློ་ལགས་ཀྱིས་བརྩམས་པའི་ནགས་ཚང་གཞོན་ནུའི་རང་མཚང་ཞེས་པའི་དཔེ་དེབ་དབུ་འབྱེད་གནང་བ་མ་ཟད། དབུ་འབྱེད་མཛད་སྒོའི་སྟེང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་དང་། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་ལགས་གཉིས་ཀྱིས་དཔེ་དེབ་གསར་པ་དེའི་སྐོར་གླེང་སློང་དང་། དྲི་བ་དྲིས་ལན་སོགས་གནང་སོང་།

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེའི་གཟེངས་རྟགས་ཐོབ་ནས་མི་ལོ་ ༣༤ འཁོར་བའི་དུས་ཆེན་དང་། འགྲོ་བ་མིའི་ཐོབ་ཐང་གི་དུས་སྟོན་ (Human Rights Festival) གྱི་ཉིན་གཉིས་པའི་སྟེང་། བོད་ནང་གི་རྩོམ་པ་པོ་ནགས་ཚང་ནུས་བློ་ལགས་ཀྱིས་བརྩམས་པའི་ནགས་ཚང་གཞོན་ནུའི་རང་མཚང་ཞེས་པའི་དཔེ་དེབ་གསར་དབུ་འབྱེད་གནང་བ་དང་འབྲེལ་ནས། བོད་ཀྱི་སྲིད་བྱུས་ཉམས་ཞིབ་ཁང་དང་མང་གཙོ་འཕེལ་རྒྱས་ལྟེ་གནས་ཁང་གིས་གསར་འགོད་བསྒྲགས་གཏམ་སྤེལ་བའི་ནང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ལ་སྙིང་སྟོབས་ཅན་གྱི་གཞིས་བཞུགས་རྩོམ་པ་པོ་ནགས་ཚང་ནུས་བློ་ལགས་ཀྱི་ལོ་རྒྱུས་དེབ་ཕྲེང་གཉིས་པ་ནགས་ཚང་གཞོན་ནུའི་རང་མཚང་ཞེས་པ་ཞུ་དག་དང་དཔར་འགྲེམས་ཞུ་རྒྱུའི་གོ་སྐབས་ཐོབ་པར་དགའ་སྤྲོ་ཆེན་པོ་བྱུང་ཡོད་སྐོར་དང་། ད་ལན་ཁོང་གི་ལོ་རྒྱུས་དེབ་ཕྲེང་གཉིས་པ་ནགས་ཚང་གཞོན་ནུའི་རང་མཚང་ཞེས་པ་འདི་ནི་དེབ་ཕྲེང་སྔ་མའི་མཇུག་འཕྲོ་ལྟ་བུ་ཞིག་ཡིན་སྐོར། དེ་བཞིན་ཁོང་གིས་དཔེ་དེབ་འདི་ཉིད་ནི་ནགས་ཚང་བུ་རབས་ཚ་རྒྱུད་རྣམས་ཀྱི་རང་མཚང་གསལ་བ་དང་། རང་ཚུགས་སྲུང་འཛིན་བྱ་དགོས་པའི་དྲན་སྐུལ་ཆེད་བྲིས་ཡིན་པར་འགྲེལ་བརྗོད་གནང་ཡོད་སྐོར་སོགས་འཁོད་འདུག

དཔེ་དེབ་གསར་པ་དེའི་ནང་ཤོག་གྲངས་ ༢༦༩ ཡོད་པ་མ་ཟད། དཔེ་དེབ་འདིར་ལེའུ་ཆེན་པོ་གསུམ་ཡོད་པ་དང་། དཔེ་དེབ་འདིའི་ནང་གཙོ་བོ་རྒྱ་བོད་གཞུང་ཞབས་མི་སྣ་མང་པོའི་བྱ་སྤྱོད་ལས་གསུམ་དང་། ལྷག་པར་དུ་རང་ཚུགས་ཅན་གྱི་བོད་མི་ལས་བྱེད་པ་ཞིག་ལ་མཚོན་ན། གུང་ཁྲན་ཏང་གི་འོག་ཏུ་ལས་ཀ་བྱེད་པར་གནོན་ཤུགས་དང་། འགོག་རྐྱེན་ཇི་ཙམ་ལ་གདོང་ལེན་བྱེད་དགོས་ཀྱི་ཡོད་མེད་སོགས་གནད་དོན་མང་དག་ཅིག་མྱོང་བ་དངོས་ཀྱི་སྒང་ནས་གསལ་བཤད་གནང་འདུག

གསར་འགོད་བསྒྲགས་གཏམ་དེའི་ནང་གི་ལེའུ་དང་པོ་ནི་སྡུག་གི་ཁུར་པོ་མཉམ་ཁུར་དང་། སྐྱིད་ཀྱི་རྟ་ཕོ་མཉམ་བཞོན་བྱས། ཞེས་པ་ནང་གསེས་ལེ་ཚན་བཅུ་ཡོད་ཅིང་དེ་དག་གི་ནང་དུ་རྩོམ་པ་པོ་ཆུང་དུས་ཆུ་དམར་ལེབ་སློབ་གྲྭར་འདུག་སྐབས་ཀྱི་སྐྱིད་སྡུག་འདྲེས་མའི་སློབ་གྲྭའི་འཚོ་བའི་སྐོར་རྒྱས་བཤད་གནང་བ་དང་། ལེའུ་གཉིས་པའི་ནང་འཁོར་ངན་གྱིས་སྨྱོས་པའི་ལས་ངན། མི་ཟེར་བའི་རང་ཚུགས་ཤོར་འདུག ཅེས་པར་ལེ་ཚན་བཅུ་ཡོད་པ་དེ་དག་གི་ནང་དུ་ཁོང་ཉིད་ཆུ་དམར་རྫོང་སློབ་ཆུང་དུ་དགེ་རྒན་གནང་སྐབས་དངོས་སུ་མཐོང་ཐོས་མྱོང་གསུམ་བྱུང་བའི་རིག་གནས་གསར་བརྗེའི་རླུང་འཚུབ་ཁྲོད་ཀྱི་རྒྱ་སྨྱོ་བོད་སྨྱོ་ཡི་སྐྱོ་གར་སོགས་ཞིབ་མོར་བྲིས་ཡོད་འདུག་ལ། ལེའུ་གསུམ་པ་ནི་དཔོན་པོར་བསྡད་ན་དམངས་དོན་བསྒྲུབ་དགོས། དབང་ཆ་ཡོད་དུས་རང་ཐག་ཆོད་དགོས། ཞེས་པ་དེ་དག་གི་ནང་དུ་རྩོམ་པ་པོས་འབའ་དགོན་ཡུལ་ཚོའི་སྤྱི་བདེ་ཉེན་རྟོག་པ་དང་། ཆུ་དམར་ལེབ་རྫོང་གི་ཁྲིམས་དཔོན་གཞོན་པ་དང་། རྫོང་དཔོན་གཞོན་པ་སོགས་ཀྱི་ལས་འགན་བཞེས་པའི་སྐབས། མི་མང་གི་ཁེ་ཕན་དང་རེ་འདུན་འགྲུབ་སླད། འགོག་རྐྱེན་སྣ་མང་ལ་གདོང་ལེན་གནང་ཚུལ་དང་། ལས་འགན་སྒྲུབ་སྐབས་ཡིག་ཆ་དང་ཡུལ་དངོས་ལ་རྒྱུས་ལོན་བྱས་ནས་གལ་གནད་ཆེ་བའི་ལོ་རྒྱུས་ཀྱི་དངོས་ཡོད་གནད་དོན་མི་ཉུང་བ་ཞིག་ཤེས་རྟོགས་བྱུང་བའི་སྐོར་སོགས་བྲིས་ཡོད་སྐོར་སོགས་བཀོད་འདུག

རྩོམ་པ་པོ་ནགས་ཚང་ནུས་བློ་ལགས་ནི་རང་རེའི་གཉན་འཕྲང་ཆེ་བའི་དུས་སྐབས་འདིའི་སྔ་ཕྱི་བར་གསུམ་གྱི་གནས་ཚུལ་མང་དག་ཅིག་མཐོང་ཐོས་མྱོང་གསུམ་འབྱུང་མཁན་གྱི་བདེན་དཔང་མི་སྣ་གལ་ཆེན་ཞིག་ཡིན། ཁོང་གི་ལོ་རྒྱུས་དེབ་ཕྲེང་དང་པོ་ནགས་ཚང་ཞི་ལུའི་སྐྱིད་སྡུག་ལས་ཁོང་ཉིད་ཆུང་དུས། རྒྱའི་བཙན་འཛུལ་དང་བོད་མིའི་འགོག་རྒོལ་ཁྲོད་ཀྱི་དམག་འཁྲུག་གི་འཇིགས་པ་དང་། བཙོན་འཇུག་གི་མནར་གཅོད། མུ་གེའི་དཀའ་སྡུག་སོགས་ཀྱི་གནས་ཚུལ་ཞིབ་ཚགས་བཀོད་ཡོད་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།