རྒྱ་ནག་དངུལ་ཁང་གི་ལྐོག་ཟ་རུལ་སུངས་ཆེ་ཤོས་ཀྱི་གྱོད་གཞི་དང་འབྲེལ་ནས་ཡན་ལག་དངུལ་ཁང་ཞིག་གི་དངུལ་འབོར་ཆེན་ལྐོག་ཟ་བྱེད་མཁན་ཞུ་ཀོ་ཅུན་ལ་ཚེ་བཙོན་གྱི་ཁྲིམས་ཐག་བཅད་ཡོད་འདུག
དེ་འབྲེལ་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བའི་ནང་། རྒྱ་ནག་ཅང་མཱེན་གྲོང་ཁྱེར་ཁའེ་པིང་ས་ཁུལ་དུ་ཡོད་པའི་རྒྱ་ནག་དངུལ་ཁང་གི་ཡན་ལག་དངུལ་ཁང་གི་འགན་འཛིན་ཟུར་པ་ཞུ་ཀོ་ཅུན་དང་། ཁོའི་ལས་རོགས་གཙོ་བོ་ཡཱུ་ཀྲན་དྷོང་ (Yu Zhendong) དང་ཞུ་ཁྲའོ་ཧྥན་ (Xu Chaofan) བཅས་ཀྱིས་ལྐོག་ཟ་རུལ་སུངས་དང་། སྒེར་གྱི་ཁེ་ཕན་གྱི་ཆེད་དུ་དབང་ཆ་ལོག་སྤྱོད་བྱས་ཏེ་སྒེར་དོན་བསྒྲུབས་པ་སོགས་ཀྱི་ནག་ཉེས་འོག ཅང་མཱེན་འབྲིང་རིམ་མི་དམངས་ཁྲིམས་ཁང་གིས་ཞུ་ཀོ་ཅུན་གྱི་ཆབ་སྲིད་ཁེ་དབང་བཀག་སྡོམ་དང་། ཁྲིམས་འགལ་ཐོག་ཁེ་ཕན་ཐོབ་པའི་རྒྱུ་དངོས་ཕྱིར་སྤྲོད་བྱ་དགོས་པ། དེ་བཞིན་སྒེར་གྱི་མ་དངུལ་རྣམས་གཞུང་བཞེས་བཏང་སྟེ། ཚེ་བཙོན་གྱི་ཁྲིམས་ཐག་བཅད་ཡོད་འདུག་ལ། ཞུ་ཀོ་ཅུན་ (Xu Guojun) གྱིས་ཀྱང་ནག་ཉེས་ངོས་ལེན་བྱས་ཏེ། ཁྲིམས་ས་གོང་མར་བསྐྱར་ཞུ་བྱ་རྒྱུ་མིན་པའི་ཁས་ལེན་བྱས་ཡོད་སྐོར་སོགས་བརྗོད་འདུག
ཀང་ཏུང་ཞིང་ཆེན་དུ་ཡོད་པའི་ཅང་མཱེན་འབྲིང་རིམ་མི་དམངས་ཁྲིམས་ཁང་ (Jiangmen Intermediate People’s Court) གིས། ཕྱི་ལོ་ ༡༩༩༣ ནས་ ༢༠༠༡ བར་ཞུ་ཀོ་ཅུན་གྱིས་ལྐོག་རྔན་བླངས་པ་དང་། སྒེར་གྱི་ཁེ་ཕན་གྱི་ཆེད་དུ་དབང་ཆ་ལོག་སྤྱོད་བྱས་པ་མ་ཟད། གཞུང་གི་མ་དངུལ་སྒེར་དོན་དུ་སྤྱད་པའི་ནག་ཉེས་ར་སྤྲོད་བྱས་ཏེ། ཁ་སང་ཕྱི་ཚེས་ ༡༣ ཉིན་ས་གནས་དེའི་ཁྲིམས་ཁང་གིས། ཞུ་ཀོ་ཅུན་དངུལ་ཁང་གི་འགན་འཛིན་ཡིན་སྐབས། ཁོ་དང་ཁོའི་ལས་རོགས་ཁག་ཅིག་གིས་ཁྲིམས་འགལ་གྱི་ལས་དོན་ཆེད་རྒྱ་སྒོར་ (yuan) ཐེར་འབུམ་ ༡།༤ ཁྲིམས་འགལ་གྱིས་བུ་ལོན་ལ་གཡར་བ་དང་། སྒེར་དོན་སླད་དངུལ་གང་བྱུང་གཏོང་ལེན་སོགས་དབང་ཆ་ལོག་སྤྱོད་བྱས་ཏེ་ཁྱོན་རྒྱ་སྒོར་ (yuan) ས་ཡ་ ༩༠༠ ཙམ་ལྐོག་ཟ་བྱས་པའི་ནག་ཉེས་འོག ཚེ་བཙོན་གྱི་ཁྲིམས་ཐག་བཅད་ཡོད་ཅིང་། ཞུ་ཀོ་ཅུན་གྱི་བྱ་སྤྱོད་ཀྱིས། རྒྱལ་ཁབ་དང་མི་མང་གི་མངོན་འདོད་ལ་གཏོར་བརླག་བཏང་ཡོད་སྐོར་སོགས་བརྗོད་འདུག
ཕྱི་ལོ་ ༡༩༩༣ ནས་ ༢༠༠༡ བར་ཞུ་ཀོ་ཅུན་དང་། ཁོའི་ལས་རོགས་ཡཱུ་ཀྲན་དྷོང་། ཞུ་ཁྲའོ་ཧྥན་བཅས་ཀྱིས་དངུལ་འབོར་ཆེན་ལྐོག་ཟ་བྱས་རྗེས། ཧོང་ཀོང་བརྒྱུད་ཁེ་ན་ཌ་དང་དེ་ནས་ཨ་རི་སོགས་ཕྱིའི་རྒྱལ་ཁབ་ཁག་ཏུ་བྲོས་ཐར་བྱུང་ཡོད་ཀྱང་། རྒྱལ་སྤྱིའི་ཉེས་དོན་ཉེན་རྟོག་སྒྲིག་འཛུགས་ (Interpol) ཀྱི་གྲོས་མཐུན་འོག ཨ་རིས་ཁོ་ཚོ་གསུམ་རིམ་བཞིན་རྒྱ་ནག་ལ་ཕྱིར་རྩིས་སྤྲོད་བྱས་ཡོད་འདུག
དེ་ཡང་ཕྱི་ལོ་ ༢༠༠༤ ལོར་ཨ་རིས་ཡཱུ་ཀྲན་དྷོང་རྒྱ་ནག་ལ་རྩིས་སྤྲོད་བྱས་ཡོད་ཅིང་། ཕྱི་ལོ་ ༢༠༠༦ ལོར་ལོ་ ༡༢ ཀྱི་བཙོན་འཇུག་ཁྲིམས་ཐག་བཅད་པ་དང་། ཕྱི་ལོ་ ༢༠༡༨ ལོར་ཞུ་ཁྲའོ་ཧྥན་རྒྱ་ནག་ལ་རྩིས་སྤྲོད་བྱས་རྗེས། ཕྱི་ལོ་ ༢༠༢༡ ལོར་ལོ་ ༡༣ གྱི་བཙོན་འཇུག་ཁྲིམས་ཐག་བཅད་ཡོད་འདུག་ལ། ཁོ་གཉིས་ཀྱིས་རྒྱ་ནག་དངུལ་ཁང་ལ་རྒྱ་སྒོར་ཐེར་འབུམ་ ༢ ལྷག་ཕྱིར་རྩིས་སྤྲོད་བྱས་ཡོད་འདུག ཞུ་ཀོ་ཅུན་ཕྱི་ལོ་ ༢༠༢༡ ལོར་རྒྱལ་སྤྱིའི་ཉེས་དོན་ཉེན་རྟོག་སྒྲིག་འཛུགས་ཀྱིས་རྒྱ་ནག་ལ་རྩིས་སྤྲོད་བྱས་ཏེ། ད་སྔ་བར་ཁྲིམས་ཐག་མ་ཆོད་པར་ལྷག་ཡོད་འདུག
རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱི་གནས་ཚུལ་སྤེལ་བའི་ནང་། ཕྱི་ལོ་ ༢༠༠༢ ནས་བཟུང་ཞུ་ཀོ་ཅུན་དང་། ཡཱུ་ཀྲན་དྷོང་། ཞུ་ཁྲའོ་ཧྥན་དང་བཟའ་ཟླ་ཝན་ཧྥང་ (Kuang Wanfang)། ཞུ་ཀོ་ཅུན་གོང་གི་འགན་འཛིན་ཟུར་བ་ལའེ་མིང་མཱིན་ (Lai Mingmin) སོགས་ཀྱི་མིང་། རྒྱལ་སྤྱིའི་ཉེས་དོན་ཉེན་རྟོག་སྒྲིག་འཛུགས་ (Interpol) ཀྱི་ཐོ་གཞུང་དུ་ཡོད་པ་དང་། ཕྱི་ལོ་ ༢༠༡༥ ལོར་ཨ་རིའི་གཞུང་གིས་ཝན་ཧྥང་ (Kuang Wanfang) ཕྱིར་རྒྱ་ནག་ལ་རྩིས་སྤྲོད་བྱས་པ་དང་། ཕྱི་ལོ་ ༢༠༡༨ ལོར་ལའེ་མིང་མཱིན་ཨོ་གླིང་ནས་ཕྱིར་རྒྱ་ནག་ཏུ་ལོག་སྟེ། རང་ཉིད་ཀྱི་ནག་ཉེས་ངོས་ལེན་བྱས་པ་མ་ཟད། ཁོས་རྐུ་ཁྱེར་བྱས་པའི་དངུལ་ཚང་མ་ཕྱིར་སློག་ཡོད་སྐོར་སོགས་བརྗོད་འདུག
རྒྱ་ནག་ཅང་མཱེན་གྲོང་ཁྱེར་ཁའེ་པིང་ས་ཁུལ་དུ་ཡོད་པའི་རྒྱ་ནག་དངུལ་ཁང་ (Bank of China) གི་གྱོད་གཞི་དེ་ནི། ཕྱི་ལོ་ ༡༩༤༩ ནས་བཟུང་རྒྱ་ནག་གི་ལྐོག་ཟ་རུལ་སུངས་ཆེ་ཤོས་ཀྱི་གྲས་སུ་ངོས་འཛིན་བྱེད་བཞིན་ཡོད་པ་དང་། ད་ལྟ་ལྐོག་ཟ་རུལ་སུངས་ཀྱི་གྱོད་གཞི་དེའི་ཁྲོད་ནས་རྒྱ་སྒོར་ཐེར་འབུམ་ ༢ ལྷག་བསྐྱར་གསོ་ཐུབ་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
