སྤྱི་འཐུས་རྒྱུན་ལས་རྣམས་རྡོ་རྗེ་གདན་དུ་ཕྱོགས་སྐྱོད་ལ་ཕེབས་རྒྱུ་རེད་འདུག

ཟླ་འདིའི་ཕྱི་ཚེས་ ༢༧ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་རྒྱུན་ལས་རྣམས་གནས་མཆོག་རྡོ་རྗེ་གདན་དུ་གཞུང་འབྲེལ་ཕྱོགས་ཕེབས་གནང་གཏན་ཁེལ་བའི་གསལ་བསྒྲགས་སྤེལ་འདུག

ཚོགས་དྲུང་ལས་ཁུངས་ཀྱི་གསལ་བསྒྲགས་ལྟར་ན། ༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་ཧོ་ཐོག་ཐུ་ནོ་མོན་ཧན་སྐུ་ཕྲེང་དང་པོ་མཁས་གྲུབ་རྗེའི་གཅུང་པོ་སྙན་བརྒྱུད་གདམས་པའི་བཀའ་བབ་དགའ་ལྡན་ཁྲི་ཆེན་བ་སོ་ཆོས་ཀྱི་རྒྱལ་མཚན་མཆོག་སྐུ་མྱ་ངན་ལས་འདས་ཏེ། མི་ལོ་ ༥༥༠ ཧྲིལ་པོ་འཁོར་བའི་རླབས་ཆེན་གྱི་མཛད་རྗེས་ལ་བཀའ་དྲིན་རྗེས་དྲན་གྱི་མཛད་སྒོ་ཞིག་གནས་མཆོག་རྡོ་རྗེ་གདན་དུ་ཚོགས་གཏན་ཁེལ་བའི་ཐོག་གདན་ཞུའི་མགྲོན་ཤོག་གནང་འབྱོར་ལྟར། སང་ཉིན་ཕྱི་ཚེས་ ༢༧ ཉིན་སྤྱི་འཐུས་རྒྱུན་ལས་རྣམས་ཕྱོགས་ཐོན་གནང་རྒྱུ་དང་། ཕྱི་ཚེས་ ༢༨ ཉིན་ཚོགས་གཙོ་སྦྲེལ་པོ་རྣམ་གཉིས་བཅས་གནས་མཆོག་རྡོ་རྗེ་གདན་དུ་ཕྱོགས་ཕེབས་གནང་གཏན་ཁེལ་འདུག

མཛད་རིམ་ལྟར་ན། ཐེངས་འདིར་སྤྱི་འཐུས་རྒྱུན་ལས་རྣམས་ནས་ཕྱི་ཚེས་ ༢༩ ནས་ ༣༡ བར་༧གོང་ས་རྒྱལ་བ་རིན་པོ་ཆེ་མཆོག་གི་གསུང་ཆོས་ཞུ་རྒྱུ་དང་། ཕྱི་ལོ་ ༢༠༢༤ ཟླ་ ༡ ཚེས་ ༡ ཉིན་༧གོང་ས་མཆོག་ལ་ཕུལ་གཏན་ཁེལ་བའི་བརྟན་བཞུགས་བཅས་ལ་བཅར་ཏེ།  ཕྱི་ལོ་ ༢༠༢༤ ལོའི་ཟླ་ ༡ ཚེས་ ༢ ཉིན་ཕྱིར་བཞུགས་སྒར་དྷ་རམ་ས་ལར་ཕེབས་ཐོན་གནང་རྒྱུ་ཡིན་འདུག

ད་ལྟ་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་རྒྱུན་ལས་བཅུ་ནི། ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཚོགས་གཞོན་སྒྲོལ་མ་ཚེ་རིང་མཆོག སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས་དང་། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས། སྤྱི་འཐུས་ཙ་ནེ་ཚང་དོན་འགྲུབ་བཀྲ་ཤིས་ལགས། སྤྱི་འཐུས་དགེ་བཤེས་རྔ་བ་གངས་རི་ལགས། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས། སྤྱི་འཐུས་ཚེ་རིང་དབྱངས་ཅན་ལགས། སྤྱི་འཐུས་བསྟན་འཛིན་འཇིགས་བྲལ་ལགས། སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས་བཅས་ཡིན་པ་རེད།

གསར་འགོད་པ། སྐལ་བཟང་སྦྱིན་པ།