ཕྱི་ལོ་ ༢༠༢༤ ལོར་རོ་ཝལ་བོད་ཀྱི་ཐེབས་རྩའི་མ་དངུལ་ཐོབ་པའི་བོད་མིའི་ལས་གཞི་བདུན་འདུག
རོ་ཝལ་བོད་ཀྱི་ཐེབས་རྩས་ཕྱི་ལོ་ ༢༠༢༤ ལོའི་རོགས་སྐྱོར་མ་དངུལ་དང་འབྲེལ་བའི་གསལ་བསྒྲགས་སྤེལ་བའི་ཁྲོད། ཕྱི་ལོ་ ༢༠༢༤ ལོར་རོ་ཝལ་བོད་ཀྱི་ཐེབས་རྩའི་རོགས་དངུལ་ཐོབ་པའི་བོད་མིའི་ལས་གཞི་བདུན་བྱུང་ཡོད་འདུག དེ་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གི་དྲ་ཐོག་ཏུ། འདི་ལོ་ནི་རོ་ཝལ་བོད་ཀྱི་ཐེབས་རྩ་དབུ་ཚུགས་ཏེ་ལོ་ངོ་ ༢༠ འཁོར་གྱི་ཡོད་པ་དང་། འདི་ལོར་རོ་ཝལ་གྱི་རོགས་སྐྱོར་མ་དངུལ་ཞུ་མཁན་སྙན་ཞུ་གྲངས་ ༥༩ འབྱོར་ཡོད་ཅིང་། དེའི་ཁྲོད་ཀྱི་བོད་མིའི་སྤྱི་ཚོགས་དང་འབྲེལ་ནས་རྩོམ་རིག་དང་གསར་འགོད་ལས་རིགས། བུད་མེད་ཀྱི་ནུས་སྟོབས་གོང་སྤེལ། སྒྱུ་རྩལ་དང་བཟོ་བཀོད། འཆར་སྣང་སོགས་ཀྱི་ཐོག་ནས་རིག་གཞུང་སྲུང་སྐྱོབ་བྱེད་པའི་ལས་གཞི་བདུན་ལ་མ་དངུལ་ཨ་སྒོར་ ༢༠༠༠ ནས་ ༥༧༧༥ བར་གྱི་རོགས་སྐྱོར་བྱེད་གཏན་ཁེལ་ཡོད་སྐོར་བརྗོད་འདུག
ཕྱི་ལོ་ ༢༠༢༤ ལོའི་རོ་ཝལ་བོད་ཀྱི་ཐེབས་རྩའི་མ་དངུལ་ཐོབ་མཁན་གྱི་ཁྲོད་དུ། འཇམ་དབྱངས་ལྷ་མོ་ལགས་སུ་ཁྲིམས་ལུགས་ཆེད་སྦྱོང་དང་འབྲེལ་བུད་མེད་ཀྱི་ནུས་སྟོབས་གོང་སྤེལ་ལས་གཞི་དང་། བསྟན་འཛིན་ལགས་ཀྱི་༧གོང་ས་མཆོག་གི་ཡང་སྲིད་དང་འབྲེལ་བའི་བོད་མིའི་རེ་བ་དང་སེམས་ངལ་སྐོར་གྱི་རྩོམ་ཡིག བསྟན་འཛིན་ཟླ་གསལ་ལགས་ཀྱི་དྷ་རམ་ས་ལ་ཞེས་པའི་གློག་བརྙན་ལས་གཞི། སྨན་པ་དཀོན་མཆོག་སྒྲོལ་མ་ལགས་ཀྱི་བོད་མིའི་སྤྱི་ཚོགས་ནང་བུད་མེད་ཀྱི་འཕྲོད་བསྟེན་བདེ་ཐང་གོ་རྟོགས་དང་ལག་ལེན་གྱི་ལས་གཞི། འཇམ་དཔལ་དོན་འགྲུབ་ལགས་ཀྱི་བོད་ཀྱི་སྲོལ་རྒྱུན་བཟོ་བཀོད་དང་འཛུགས་སྐྲུན་སྐོར་གྱི་ཞིབ་འཇུག་ལས་གཞི། ཀུན་བཟང་སྒྲོལ་མ་ལགས་ཀྱི་བཙན་བྱོལ་ནང་གི་བུད་མེད་རྩོམ་པ་པོ་སྐོར། བཀྲ་ཤིས་ཉི་མ་ལགས་ཀྱི་བཙན་བྱོལ་ནང་གི་སྒྱུ་རྩལ་བ་ཉི་ཤུའི་སྒྱུ་རྩལ་བརྩམས་ཆོས་སྐོར་བཅས་འདུག
རོ་ཝལ་བོད་ཀྱི་ཐེབས་རྩ་ནི་སྐུ་གཤེགས་སྒེ་ལེན་ (Galen) དང་སྦར་སྦ་ར་རོ་ཝེལ་ (Barbara Rowell) རྣམ་གཉིས་ཀྱི་དྲན་གསོ་ཆེད་བཙུགས་པ་ཞིག་ཡིན་པ་དང་། ཁོང་རྣམ་གཉིས་ནི་བོད་ཀྱི་བློས་ཐུབ་གྲོགས་པོ་ཡིན། ༧གོང་ས་རྒྱལ་བ་རིན་པོ་ཆེ་མཆོག་གི་༼ངའི་བོད།༽ཅེས་པའི་དཔེ་དེབ་དེ་ཡང་ཁོང་གཉིས་དང་མཉམ་འབྲེལ་གནང་ནས་པར་སྐྲུན་བྱས་ཡོད་ཅིང་། ཁོང་གཉིས་ཀྱིས་པར་དང་རྩོམ་བརྒྱུད་ནས་བོད་ཀྱི་མཛེས་སྡུག་དང་ཡ་ང་བའི་ཁོར་ཡུག་གནས་སྟངས་དང་རིག་གཞུང་སོགས་འཛམ་གླིང་གི་མི་མང་མང་པོར་ངོ་སྤྲོད་གནང་ཡོད་འདུག ཁོང་གཉིས་འདས་གྲོངས་སོང་རྗེས་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་དང་། ཁོང་གཉིས་ཀྱི་ནང་མི་མཛའ་གྲོགས་རྣམས་ནས་ཁོང་གཉིས་ཀྱི་དམིགས་འདུན་མཐའ་འཁྱོངས་བ་དང་དྲན་གསོའི་ཆེད་རོ་ཝལ་ཐེབས་རྩ་འདི་བཙུགས་པ་ཞིག་རེད་འདུག
