འབར་མའི་ནང་ཁུལ་དུ་དམག་འཁྲུག་བྱུང་སྟེ་རྒྱ་ནག་ལ་ཕོག་སྡུག་བཟོས་པར་བརྟེན། རྒྱ་ནག་གཞུང་གིས་འབར་མའི་གཞུང་ལ་སྐྱོན་བརྗོད་ཤུགས་ཆེན་བྱས་འདུག
ཟླ་འདིའི་ཕྱི་ཚེས་ ༣ ཉིན་གྱི་ཉིན་རྒྱབ་ཆུ་ཚོད་ ༢ པ་ཙམ་ལ་འབར་མ་གཞུང་གི་དམག་མི་དང་འབར་མའི་བྱང་ཁུལ་དུ་ཡོད་པའི་གྲངས་ཉུང་མི་རིགས་ཀྱི་སྒྲིག་འཛུགས་གཉིས་བར་དམག་འཁྲུག་བྱུང་སྟེ། ཕན་ཚུན་འབར་རྫས་འཕེན་རེས་བྱེད་སྐབས་རྒྱ་ནག་ཡུན་ནན་ཞིང་ཆེན་གྱི་ཀྲིན་ཁང་རྫོང་ནན་སན་གྲོང་བརྡལ་གྱི་མཐའ་མཚམས་ཁུལ་དུ་ལྷུང་ནས་མི་ཁག་ཅིག་ལ་རྨས་སྐྱོན་ཕོག་ཡོད་པར་བརྟེན། རྒྱ་གཞུང་ནས་འབར་མའི་གཞུང་ལ་སྐྱོན་བརྗོད་ཤུགས་ཆེན་བྱས་ཡོད་འདུག
ཧྥ་རན་སིའི་རྒྱལ་སྤྱིའི་ཨེ་ཧྥ་པི་ (AFP) གསར་ཁང་གིས་གནས་ཚུལ་སྤེལ་ཡོད་པའི་ནང་དུ། འབར་མའི་བྱང་ཕྱོགས་ཀྱི་གྲངས་ཉུང་མི་རིགས་མཉམ་འབྲེལ་ས་ཁུལ་དེ་ནི་འབར་མ་གཞུང་གི་དམག་ཤུགས་ལ་ཁེ་ཕན་ཆེན་པོ་ཡོད་པ་མ་ཟད། དེ་གའི་སྡེ་བ་དང་གྲོང་གསེབ་ཁག་ཅིག་རྒྱ་ནག་དང་ཚོང་འབྲེལ་ཐད་ཧ་ཅང་གལ་ཆེན་ཆགས་ཡོད། ཕྱི་ལོ་ ༢༠༢༡ ལོ་ནས་འབར་མ་གཞུང་གི་དམག་མིས་ས་ཆ་དེར་དམག་ཤུགས་བསྐྱེད་པའི་ནུས་པ་ཆེས་ཆེར་འདོན་བཞིན་ཡོད་སྐོར་འཁོད་འདུག
དེའི་སྐོར་ལ་རྒྱ་ནག་གི་ཕྱི་འབྲེལ་མགྲིན་ཚབ་པ་ཝང་ཝིན་པིན་གྱིས། རྒྱ་ནག་གིས་འབར་མའི་བྱང་ཁུལ་གྱི་རྩོད་རྙོག་སྐོར་ལ་བློ་འཚབ་བྱེད་བཞིན་ཡོད་པ་མ་ཟད། ཐེངས་འདིའི་དམག་འཁྲུག་གི་དོན་རྐྱེན་གྱིས་རྒྱ་ནག་ལ་ཕོག་ཐུག་ཆེན་པོ་བཟོས་ཡོད་པ་དང་། འབྲེལ་ཡོད་ནས་གཟབ་ནན་གྱིས་ཐག་གཅོད་བྱ་དགོས་སྐོར་བརྗོད་པ་དང་འབྲེལ། རྒྱ་ནག་གཞུང་ནས་འབར་མའི་བྱང་ཁུལ་དུ་ཡོད་པའི་ཚོགས་པ་ཁག་ལ་མཐའ་མཚམས་སུ་རྩོད་རྙོག་བསྐྱར་དུ་མི་བཟོ་བའི་འབོད་སྐུལ་དང་། རྒྱ་ནག་གཞུང་ནས་མི་མང་གི་བདེ་འཇགས་དང་རྒྱུ་དངོས་ལ་སྲུང་སྐྱོབ་བྱ་ངེས་ཡིན་སྐོར་བརྗོད་འདུག
ཕྱི་ལོ་ ༢༠༢༡ ཟླ་ ༢ པའི་ནང་འབར་མའི་དྲག་དམག་ཕྱོགས་ཀྱིས་ཡུལ་དེའི་འོས་བསྡུའི་གྲུབ་འབྲས་རྩིས་མེད་བཏང་སྟེ། ལྕམ་ཨང་སན་སུའུ་སྐྱིད་ལགས་ཀྱིས་སྣེ་འཁྲིད་པའི་དམངས་གཙོའི་སྲིད་གཞུང་མགོ་རྟིང་བསློགས་ཡོད་པ་མ་ཟད། ལྕམ་ཨང་སན་སུའུ་སྐྱིད་ལགས་རྒྱལ་ཁབ་ཀྱི་སློབ་སྟོན་པའི་གོ་གནས་ནས་གནས་དབྱུང་བཏང་སྟེ་རང་ཁྱིམ་ལ་བཟང་བཙོན་དུ་བཅུག་ཡོད་པ་དང་། མི་མང་གིས་དྲག་དམག་གི་བཙན་བཟུང་ལ་ངོ་རྒོལ་ལས་འགུལ་སྣ་མང་སྤེལ་བཞིན་ཡོད་པ་རེད།
ཕྱི་ལོ་ ༢༠༢༢ ཟླ་ ༧ ཚེས་ ༢༥ ཉིན་འབར་མ་དྲག་དམག་སྲིད་གཞུང་གིས་དམངས་གཙོའི་ལས་འགུལ་བ་གཙོ་བོ་བཞི་སྟེ། དམངས་གཙོ་ཚོགས་པའི་གྲོས་ཚོགས་འཐུས་མི་ཟུར་པ་ཛེ་ཡ་ཐཱོ་ (Phyo Zeya Thaw) དང་། དམངས་གཙོའི་ལས་འགུལ་བ་མིཎ་ཡུ་ (Kyaw Min Yu)། ལས་འགུལ་བ་མཱ་ཡོ་ཨང་ (Hla Myo Aung )། ཨང་ཐུ་རཱ་( Aung Thura Zaw ) བཅས་ལ་སྲོག་ཁྲིམས་བཅད་ཡོད། མདོར་ན་ད་ལྟའི་བར་དུ་འབར་མ་དྲག་དམག་གཞུང་གིས་ཉུང་མཐར་མི་གྲངས་ ༢༥,༧༣༠ ལྷག་འཛིན་བཟུང་དང་། ཉུང་མཐར་མི་མང་ ༡༩,༩༣༠ ལྷག་བཀག་ཉར། ཕྱི་ལོ་ ༢༠༢༢ ལོའི་ནང་ཉུང་མཐར་མི་གྲངས་ ༢༡༡༤ ཙམ་གྱིས་ཚེ་སྲོག་ཤོར་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
