རྒྱ་ནག་ཚན་རིག་སློབ་གླིང་རླུང་ཁམས་ཆེན་མོའི་དངོས་ཁམས་ཞིབ་འཇུག་ཁང་གིས་བོད་མཐོ་སྒང་གི་དཔྱིད་དུས་ཀྱི་རླུང་ཁམས་ཆེན་མོའི་ཚ་རླབས་འབྱུང་གནས་ཀྱིས་རྒྱ་ནག་བྱང་ཤར་ཁུལ་གྱི་ཆར་ཆུའི་འབབ་ཚད་ལ་ཐད་ཀར་ཤུགས་རྐྱེན་ཆེན་པོ་ཐེབས་ཀྱི་ཡོད་པའི་གྲུབ་དོན་བཏོན།
ཟླ་འདིའི་ཕྱི་ཚེས་ ༨ ཉིན་རྒྱ་ནག་ཚན་རིག་སློབ་གླིང་རླུང་ཁམས་ཆེན་མོའི་དངོས་ཁམས་ཞིབ་འཇུག་ཁང་ (中国科学院大气物理所) གིས། ཕྱི་ལོ་ ༡༩༦༡ ནས་ ༢༠༢༠ བར་བོད་མཐོ་སྒང་གི་དཔྱིད་དུས་ཀྱི་རླུང་ཁམས་ཆེན་མོའི་ཚ་རླབས་འབྱུང་གནས་ནི་ཨེ་ཤ་ཡ་གླིང་ཆེན་གྱི་དབྱར་དུས་ཀྱི་ལྷག་རླུང་དང་། དེ་བཞིན་རྒྱ་ནག་ལྷོ་ཕྱོགས་ཀྱི་དབྱར་དུས་ཀྱི་ཆར་ཆུ་ལེགས་སྒྲིག་གི་གནད་ཅིག་ཏུ་ངོས་འཛིན་བྱེད་ཀྱི་ཡོད་པ་དང་། དེ་བཞིན་བོད་མཐོ་སྒང་གི་དཔྱིད་དུས་ཀྱི་རླུང་ཁམས་ཆེན་མོའི་ཚ་རླབས་འབྱུང་གནས་ཀྱིས་རྒྱ་ནག་བྱང་ཤར་ཁུལ་གྱི་དབྱར་དུས་ཀྱི་ཆར་ཆུ་འབབ་ཚད་ལ་ཤུགས་རྐྱེན་ཐེབས་ཀྱི་ཡོད་མེད་ཐད་དུས་ཡུན་ལོ་ངོ་ ༥༩ རིང་ཆེད་ལས་མཁས་པས་ཞིབ་འཇུག་བྱས་པ་བརྒྱུད། བོད་ཀྱི་དཔྱིད་དུས་ཀྱི་ཚ་རླབས་འབྱུང་གནས་ག་ཚོད་ཤུགས་ཆེ་ན་དེ་ཚོད་ཀྱིས་རྒྱ་ནག་བྱང་ཤར་ཁུལ་ལ་ཆར་ཆུ་ཇེ་མང་དུ་འགྲོ་ཡི་ཡོད་པ་དང་། ལྷག་པར་དུ་བོད་ཀྱི་འབྲི་ཆུའི་བཞུར་རྒྱུན་དུ་གྱུར་བའི་རྒྱ་ནག་བྱང་ཁུལ་གྱི་ས་གཤིས་བརླན་གཤེར་གྱིས་གལ་གནད་ཆེ་བའི་ནུས་པ་ཐོན་གྱི་ཡོད་སྐོར་བརྗོད་འདུག
ཡང་ཞིབ་འཇུག་གྲུབ་དོན་ནང་། རྒྱ་ནག་བྱང་ཤར་ཁུལ་གྱི་ས་གཤིས་བརླན་གཤེར་བྱུང་བ་དེ་དབྱར་དཀྱིལ་ཙམ་བར་དུ་རྒྱུན་མཐུད་ཐུབ་པ་མ་ཟད། རྒྱ་ནག་ནང་དང་རྒྱ་མཚོའི་ཁུལ་བར་གྱི་ཚ་དྲོད་ཧེ་བག་ཆུང་དུ་བཏང་སྟེ། ཨེ་ཤ་ཡ་ཤར་མ་དང་ཞི་བདེ་རྒྱ་མཚོའི་ནུབ་ཁུལ་གྱི་ལྷོ་རླུང་ལྷོད་འཇགས་སུ་གཏོང་གི་ཡོད་པ་དང་། དེ་ནས་རྒྱ་ནག་ལྷོ་རྒྱ་མཚོ་དང་ནུབ་ཞི་བདེ་རྒྱ་མཚོའི་ཚ་ཁུལ་གྱི་ཚ་རླབས་ཆུང་དུ་གཏོང་གི་ཡོད་སྟབས། ཨེ་ཤ་ཡ་ཤར་མ་དང་ཞི་བདེ་རྒྱ་མཚོའི་ཁུལ་གྱི་རླུང་ཁམས་ཆེན་མོའི་ཁོར་ཡུག་ལ་འགྱུར་ལྡོག་བྱུང་སྟེ། རྒྱ་ནག་བྱང་ཤར་ཁུལ་གྱི་གནམ་གཤིས་ལ་ཐད་ཀར་ཤུགས་རྐྱེན་ཐེབས་ཀྱི་ཡོད་སྐོར་བཀོད་འདུག
རྒྱ་ནག་ཚན་རིག་སློབ་གླིང་རླུང་ཁམས་ཆེན་མོའི་དངོས་ཁམས་ཞིབ་འཇུག་ཁང་གི་བོད་མཐོ་སྒང་གི་ཞིབ་འཇུག་གྲུབ་དོན་དེའི་གཙོ་གཉེར་ཞིབ་འཇུག་པ་ཧན་ཡེ་ཀྲི་ (韩熠哲) ཡིས། ཐེངས་འདིའི་དུས་ཡུན་རིང་པོའི་ཞིབ་འཇུག་གི་གྲུབ་དོན་དེས་བོད་མཐོ་སྒང་གི་དཔྱིད་དུས་ཀྱི་རླུང་ཁམས་ཆེན་མོའི་ཚ་རླབས་འབྱུང་གནས་ཀྱིས་རྒྱ་ནག་བྱང་ཤར་གྱི་དབྱར་དུས་ཀྱི་ཆར་ཆུའི་འབབ་ཚད་ལ་ཤུགས་རྐྱེན་ག་འདྲ་ཐེབས་ཀྱི་ཡོད་མེད་གསལ་པོ་བྱུང་བ་ཙམ་མིན་པར་ཚན་རིག་གིས་བྱང་ཤར་དབྱར་དུས་ཀྱི་ཆར་ཆུའི་འབབ་ཚད་ལ་སྔོན་དཔག་བྱེད་པར་རོགས་འདེགས་ཆེན་པོ་བྱུང་ཡོད་སྐོར་བརྗོད་འདུག
ཞིབ་འཇུག་གྲུབ་དོན་དེ་རྒྱ་མཚོ་དང། རྒྱ་མཚོ་འཁྱག་རོམ་དང་སའི་གོ་ལ་ཕྱེད་བྱང་བའི་གནམ་གཤིས། ཀོ་ཡོང་ཆི་ཞིབ་འཇུག་པར་རྗེས་དྲན་གྱི་ཆེད་དེབ་ཅེས་པའི་ནང་འགོད་འཆར་ཡོད་པ་དང་། ཆེད་དེབ་དེ་ཕྱི་ལོ་ ༢༠༢༤ ལོ་མགོ་ཙམ་ལ་འདོན་འཆར་ཡོད་འདུག ཀོ་ཡོང་ཆི་ (郜永祺) ཞེས་པ་དེ་རྒྱ་ནག་གི་དངོས་ཁམས་རྒྱ་མཚོ་རིག་པའི་ཆེད་ལས་མཁས་པ་ཞིག་ཡིན་འདུག་ལ། རྒྱ་ནག་ཚན་རིག་ཞིབ་འཇུག་མཐུན་ཚོགས་ཀྱི་འགན་འཛིན་ཟུར་པ་དང་། རྒྱ་ནག་ཚན་རིག་སློབ་གླིང་རླུང་ཁམས་ཆེན་མོའི་དངོས་ཁམས་ཞིབ་འཇུག་ཁང་གི་ཞིབ་འཇུག་པ་སོགས་ཚན་རིག་ཐོག་གྲུབ་འབྲས་ཆེན་པོ་ཐོན་ཡོད་མཁན་ཞིག་ཡིན་འདུག་ལ། ཕྱི་ལོ་ ༢༠༢༡ ལོར་འདས་གྲོངས་སུ་ཕྱིན་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
