སེར་སྨད་མཁན་པོ་བཀྲ་ཤིས་ཚེ་རིང་མཆོག་༧གོང་ས་ཏཱ་ལའི་བླ་མ་བོད་དང་རྒྱ་གར་གྱི་གནའ་བོའི་རིག་གཞུང་ལྟེ་གནས་ཁང་གི་སྤྱི་ཁྱབ་ཤེས་ཡོན་འགན་འཛིན་དུ་བསྐོ་གཞག་གནང་འདུག
ཉེ་སྔོན་དགའ་ལྡན་ཕོ་བྲང་ཡིག་ཚང་ནས་དེ་འབྲེལ་གསལ་བསྒྲགས་ཤིག་གནང་བའི་ནང་། བཀའ་བློན་ཁྲི་ཟུར་ཟམ་གདོང་རིན་པོ་ཆེ་དབུ་བཞུགས་འོག་ལས་གཞིའི་འགན་འཛིན་བཀའ་ཟུར་བསྟན་པ་ཚེ་རིང་མཆོག་དང་། དགའ་ལྡན་ཕོ་བྲང་གི་དྲུང་ཆེ་ཐུན་མོང་ནས་རྒྱུན་རིང་གོ་བསྡུར་དང་མྱང་ཞིབ་ཞུས་འབྲས། ཉེ་ཆར་ཕྱི་ལོ་ ༢༠༢༣ ཟླ་ ༡༢ ཚེས་ ༦ ཉིན་འོས་གཞི་བརྒྱད་འཆར་འབུལ་ཞུས་པར་སྐུ་ཉིད་ལ་ཕྱག་རྟགས་གསོལ་སྩལ་བྱུང་བ་བཞིན། གང་མྱུར་ལས་འཁུར་འགན་བཞེས་ཡོང་བ་ཞུ་རྒྱུ་དེ་དོན་དགོངས་འཇགས་ཞུ། ཞེས་གསལ་འདུག
སེར་སྨད་མཁན་པོ་བཀྲ་ཤིས་ཚེ་རིང་མཆོག་ནི། ཕྱི་ལོ་ ༡༩༥༨ ལོར་བོད་སྟོད་ཕྱོགས་ཀྱི་སྤུ་ཧྲེང་རྫོང་ཁོངས་སུ་འཁྲུངས་ཤིང་། བོད་ནས་རྒྱ་གར་དུ་བཙན་བྱོལ་ལ་ཕེབས་རྗེས། རྒྱ་གར་ལྷོ་ཕྱོགས་སེར་སྨད་གྲྭ་ཚང་ཀོང་པོ་ཁང་ཚན་དུ་ཆོས་ཞུགས་དང་འབྲེལ་གཞུང་ཆེན་ཀ་པོད་ལྔར་གསན་བསམ་སློབ་གཉེར་མཐར་ཕྱིན་པ་གནང་སྟེ། ཕྱི་ལོ་ ༡༩༩༠ ལོར་དགེ་བཤེས་ལྷ་རམས་པའི་མཚན་གནས་བཞེས། ཕྱི་ལོ་ ༡༩༩༡ ལོ་ནས་བཟུང་ཡུ་རོབ་དང་། བྱང་ཨ་མེ་རི་ཀ དེ་བཞིན་ཨེ་ཤ་ཡའི་རྒྱལ་ཁབ་ཁག་ཅིག་ཏུ་ནང་ཆོས་འཆད་འཁྲིད་གནང་ཡོད་འདུག
ཕྱི་ལོ་ ༢༠༡༧ ལོར་ལོན་ཌོན་གཙུག་ལག་སློབ་གཉེར་ཁང་དུ་སློབ་གཉེར་གནང་ཡོད་པ་མ་ཟད། ནང་པའི་ལྟ་གྲུབ་ཀྱི་རྨང་གཞི་(The Foundation of Buddhist Thought) ཞེས་པའི་དེབ་ཕྲེང་ ༧ ཅན་ཞིག་ལྗགས་རྩོམ་གནང་ཡོད་འདུག ཕྱི་ལོ་ ༢༠༡༨ ཟླ་ ༦ ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་སེར་སྨད་ཐོས་བསམ་ནོར་གླིང་གྲྭ་ཚང་གི་མཁན་ཐོག་ ༩༡ པར་བསྐོ་གཞག་མཛད། ཕྱི་ལོ་༢༠༡༩ ལོར་ཁོང་ཉིད་ལ་དབྱིན་ཇི་གོང་མའི་ཆེ་བསྟོད་གཟེངས་རྟགས་གནང་ཡོད་འདུག
ཕྱི་ལོ་ ༢༠༢༣ ཟླ་ ༡ ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་རྨང་རྡོ་འཇོག་གནང་མཛད་ཡོད་པ་ལྟར། འདས་པའི་ཟླ་བཞི་ལྷག་རིང་འཛུགས་སྐྲུན་གནང་མུས་ཡིན་པ་མ་ཟད། གནའ་བོའི་རིག་གཞུང་ལྟེ་གནས་ཁང་དེ་ནས་བོད་དང་རྒྱ་གར་གྱི་གནའ་བོའི་རིག་གཞུང་ཡོད་དོ་ཅོག་ལ་སློབ་གཉེར་དང་། ཉམས་ཞིབ། དཔར་སྐྲུན། ཉམས་ལེན་སོགས་བྱེད་པར་མཐུན་རྐྱེན་སྦྱོར་སྤྲོད་གནང་རྒྱུ་ཡིན་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
