མེ་སི་ལ་ཧྥི་ཧྥ་ཡི་ཕུལ་བྱུང་རྩེད་འགྲན་པའི་གཟེངས་རྟགས་ཐེངས་གསུམ་པ་ཐོབ།

ཨར་ཇིན་ཊི་ན་རྒྱལ་ཁབ་ཀྱི་རུ་དཔོན་རྐང་སྤོལ་རྩེད་འགྲན་པ་གྲགས་ཅན་མེ་སི་ལ་སླར་ཡང་རྒྱལ་སྤྱིའི་སྐྱེས་པའི་ཕུལ་བྱུང་རྩེད་འགྲན་པའི་གཟེངས་རྟགས་ཐོབ་ཡོད་འདུག

ཁ་སང་ཕྱི་ཚེས་ ༡༥ ཉིན་གྱི་དགོང་མོར་དབྱིན་ཡུལ་གྱི་རྒྱལ་ས་ལོན་ཌོན་དུ། ཕྱི་ལོ་ ༢༠༢༣ ལོའི་ཧྥི་ཧྥ་རྐང་སྤོལ་གྱི་གཟེངས་རྟགས་(FIFA Football Awards 2023) སྤྲོད་པའི་མཛད་སྒོ་འཚོགས་ཡོད་ཅིང་། ལྷོ་ཨ་མེ་རི་ཁའི་ཨར་ཇིན་ཊི་ན་ (Argentina) རྒྱལ་ཁབ་ཀྱི་མདུན་རྒོལ་བ་ (forward) མེ་སི་ལ་སྐྱེས་པའི་ཕུལ་བྱུང་རྩེད་འགྲན་པ་དང་། ཡུ་རོབ་ཀྱི་སི་པེན་ (Spain) རྒྱལ་ཁབ་ནས་ཡིན་པའི་གདོང་ལེན་པ་ (striker) ཨ་ཊ་ནི་བྷོན་མཱ་ཊི་ (Aitana Bonmati ) ལ་བུད་མེད་ཀྱི་ཕུལ་བྱུང་རྩེད་འགྲན་པའི་གཟེངས་རྟགས་སྤྲད་ཡོད་འདུག ཡིན་ནའང་། མེ་སི་གཟེངས་རྟགས་སྤྲོད་པའི་མཛད་སྒོར་ཞུགས་ཐུབ་མེད་པ་རེད།

མེ་སི་ལ་ཕྱི་ལོ ༢༠༡༩ དང་༢༠༢༢ ལོ་ལའང་ཧྥི་ཧྥའི་ཕུལ་བྱུང་རྩེད་འགྲན་པའི་གཟེངས་རྟགས་དེ་ཐོབ་མྱོང་ཡོད་འདུག་ལ། ད་ལན་གཟེངས་རྟགས་དེ་ཐེངས་གསུམ་པ་ཐོབ་ཡོད་ནའང་། རྗེས་འབྲང་བ་མི་གྲངས་ས་ཡ་ ༤༩༧ ཡོད་པའི་ཁོང་གི་ཨིན་ས་ཊི་ར་གྷ་རམ་ (Instagram) སོགས་སུ་དེ་འབྲེལ་གྱི་གནས་ཚུལ་ཅི་ཡང་བཤད་མེད་སྟབས།  གནད་དོན་དེ་དང་འབྲེལ་ནས་རྐང་སྤོལ་ཆེད་མཁས་པ་རྣམས་ཀྱིས་དྲང་ལྡོག་གཉིས་ཀྱི་ཐོག་ནས་དཔྱད་བརྗོད་སྤེལ་གྱི་ཡོད་ཅིང་། འགའ་ཞིག་གིས། སྤྱིར་འདི་ལོའི་ཧྥི་ཧྥ་གཟེངས་རྟགས་དེ་མེ་སི་ལ་ཐོབ་པ་འོས་འཚམ་ཞིག་རེད་སེམས་ཀྱིན་མེད་ཀྱང་། ཁོང་ཚོས་མེ་སི་ལ་ཆེས་མཐའ་མཇུག་གི་བཀའ་དྲིན་ཆེ་ཟེར་ཆེད་སྤྲད་པ་རེད། ཅེས་དང་།  ད་ནི་ཧ་ལེན་ཌི་ (Haaland) དང་ཝེ་ནི་ཤི་སི་ (Vinicius Jr) མེམ་བྷ་པེ་ (Mbappe) སོགས་ཀྱི་གཟི་མདངས་འཚེར་བའི་དུས་སྐབས་ཡིན་པ་ལས། མི་སེ་དང་རོ་ནལ་ཌོ་གཉིས་ཀྱི་དུས་སྐབས་ནི་ཡལ་ཟིན་པ་ཡིན་སྐོར་སོགས་བརྗོད་ཡོད་འདུག

དེ་བཞིན་དབྱིན་ཡུལ་གྱི་མེན་ཇེ་སི་ཊར་སི་ཊི་ (Manchester City) སྐྱེས་པའི་རྐང་སྤོལ་རུ་ཁག་གི་སྒོ་ར་བ་ཨེ་ཌིར་སོན་ (Ederson) དང་། མེན་ཇེ་སི་ཊར་ཡུ་ན་ཌི་ཁྲི་(Manchester United) ཡི་བུད་མེད་རྐང་སྤོལ་རུ་ཁག་གི་སྒོ་ར་བ་མེ་རི་ (Mary Earps) ལ་སྒོ་ར་བ་ཡག་ཤོས་ཀྱི་གཟེངས་རྟགས་དང་། མེན་ཇེ་སི་ཊར་སི་ཊི་ (Manchester City) སྐྱེས་པའི་རྐང་སྤོལ་རུ་ཁག་གི་སློབ་སྟོན་པ་ (coach) པེབ་གྷོ་རི་ཡོ་ལ་ (Pep Guardiola) དང་མེན་ཇེ་སི་ཊར་ཡུ་ན་ཌི་ཁྲི་ཡི་བུད་མེད་རྐང་སྤོལ་རུ་ཁག་གི་སློབ་སྟོན་པ་ས་རི་ན་ (Sarina Wiegman) གཉིས་ལ་སློབ་སྟོན་པ་ཡག་ཤོས་ཀྱི་གཟེངས་རྟགས་ཐོབ་ཡོད་འདུག

སྤྱིར་ལོ་ལྟར་ཧྥི་ཧྥ་ལྷན་ཚོགས་ཀྱི་གོ་སྒྲིག་འོག ཧྥི་ཧྥ་རྐང་སྤོལ་གྱི་ལོ་གཅིག་གི་ཕུལ་བྱུང་རྩེད་འགྲན་པའི་གཟེངས་རྟགས་དེ་སྤྲོད་སྲོལ་ཡོད་ཅིང་། ཕྱི་ལོ་ ༢༠༢༢ ལོའི་ཧྥི་ཧྥའི་སྐྱེས་པའི་ཕུལ་བྱུང་གཟེངས་རྟགས་མི་སེ་དང་། ཨར་ཇིན་ཊི་ན་(Argentina) རྒྱལ་ཁབ་ཀྱི་སྐྱེས་པའི་རུ་ཁག་གི་སྒོ་ར་བ་མ་ཊི་ནེ་སི་ (Emiliano Martínez) དང་སློབ་སྟོན་པ་ལི་ནལ་སི་ཀོ་ནི་ (Lionel Scaloni) གཉིས་སུ་སྒོ་ར་བ་ཡག་ཤོས་དང་སློབ་སྟོན་པ་ཡག་ཤོས་ཀྱི་གཟེངས་རྟགས་ཐོབ་ཡོད་པ་རེད།

གཞན་ཡང་། འདི་ལོའི་ཕྱི་ཟླ་ ༡ ཚེས་ ༡༢ ནས་ཟླ་ ༢ ཚེས ༡༠ བར་ཨེ་ཤ་ཡའི་སྐྱེས་པའི་རྐང་སྤོལ་འགྲན་ཚོགས་དེ་དཀྱིལ་ཤར་ཨེ་ཤ་ཡའི་ཁ་ཌར་རྒྱལ་ཁབ་ཏུ་བསྡུ་མུས་ཡིན་པ་དང་། དེ་བཞིན་ཨ་ཧྥེ་རི་ཁའི་རྒྱལ་ཁབ་ཁག་གི་ཕྱི་ལོ་ ༢༠༢༣ ལོའི་སྐྱེས་པའི་རྐང་སྤོལ་འགྲན་ཚོགས་དེའང་བསྡུ་མུས་ཡིན་པ་རེད། རྐང་སྤོལ་འགྲན་སྡུར་ཁག་གི་རྒྱལ་ཕམ་དབྱེ་ཞིབ་དང་ཚོད་དཔག་བྱེད་མཁན་(OPta Analyst) ཟེར་བས་ཞིབ་འཇུག་བྱས་པ་བརྒྱུད། ཨ་ཧྥེ་རི་ཁའི་སི་ནི་གྷལ་ (Senegal) རྒྱལ་ཁབ་ཀྱི་རུ་ཁག་ལ་སླར་ཡང་ཨ་ཧྥེ་རི་ཁའི་རྐང་སྤོལ་འགྲན་ཚོགས་ལས་རྣམ་པར་རྒྱལ་ཐུབ་པའི་ཚོད་དཔག་བྱས་འདུག་ལ། སི་ནི་གྷལ་རུ་ཁག་ལ་ཕྱི་ལོ་ ༢༠༢༡ ལོར་རྒྱལ་ཁ་དེ་ཐེངས་གཅིག་ཐོབ་ཚར་ཡོད་འདུག དེ་བཞིན་ཉི་ཧོང་དང་ལྷོ་ཀོ་རི་ཡ་གང་རུང་ཞིག་ལ་ཨེ་ཤ་ཡའི་རྩེད་འགྲན་ལས་རྒྱལ་ཐུབ་པའི་ཚོད་དཔག་བྱས་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།