པ་ཀི་སི་ཐན་དང་ཨི་རན་གྱིས་མེ་ཤུགས་འཕུར་མདའ་འཕེན་རེས་བྱས།

ཨི་རན་དང་པ་ཀི་སི་ཐན་གཉིས་བར་མེ་ཤུགས་འཕུར་མདའ་འཕེན་རེས་བྱས་ཏེ་འཐབ་འཁྲུག་ཤོར་བ་ལ་བརྟེན་ནས་ཕྱོགས་གཉིས་ཀྱི་མི་མང་ཁག་ཅིག་རྐྱེན་འདས་སུ་བཏང་ཡོད་འདུག

དེ་རིང་རྒྱལ་སྤྱིའི་གསར་ཁང་བྷི་བྷི་སི་སོགས་ཀྱིས་གནས་ཚུལ་སྤེལ་བ་ལྟར་ན། དེ་རིང་པ་ཀི་སི་ཐན་གྱིས་ཁྱིམ་མཚེས་རྒྱལ་ཁབ་ཨི་རན་གྱི་ས་ཁུལ་འགའ་ཤས་ནང་མེ་ཤུགས་འཕུར་མདའ་འཕངས་ཏེ་ཨི་རན་ལ་ཕར་རྒོལ་བྱས་པ་ཡོངས་བསྒྲགས་བྱས་འདུག་པ་དང་། ཨི་རན་གྱིས་པ་ཀི་སི་ཐན་གྱི་དྲག་རྒོལ་ཁྲོད་བུད་མེད་ ༣ དང་བྱིས་པ་ ༤ བཅས་རྐྱེན་འདས་སུ་བཏང་ཡོད་པའི་གསལ་འདེབས་བྱས་འདུག

གནས་ཚུལ་དེ་དང་འབྲེལ་ནས། དེ་རིང་པ་ཀི་སི་ཐན་གྱི་ཕྱི་སྲིད་ལྷན་ཁང་གིས་བསྒྲགས་གཏམ་ཞིག་སྤེལ་ཏེ། ང་ཚོས་ཨི་རན་ནང་ཕར་རྒོལ་བྱས་ཏེ་འཇིགས་སྐུལ་དྲག་སྤྱོད་པ་མི་ཉུང་བ་ཞིག་གྲོངས་ཡོད། དྲག་རྒོལ་དེ་ནི་པ་ཀི་སི་ཐན་གྱི་བདེ་འཇགས་དང་མངོན་འདོད་སྲུང་སྐྱོབ་བྱས་པ་ཙམ་ཡིན་པ་ལས། ཨི་རན་གྱི་ས་ཁོངས་བདག་དབང་ལ་བརྩི་སྲུང་བྱེད་བཞིན་ཡོད། ཅེས་བརྗོད་ཡོད་པ་དང་། པ་ཀི་སི་ཐན་གྱི་ཕར་རྒོལ་ལས་འགུལ་དེ་ནི་ཉིན་གཉིས་ཀྱི་གོང་དུ་ཨི་རན་གཞུང་གིས་པ་ཀི་སི་ཐན་ནང་དྲག་རྒོལ་བྱས་པར་རྒོལ་ལན་བསློགས་པ་ཞིག་ཆགས་ཀྱི་ཡོད་འདུག

ཟླ་འདིའི་ཕྱི་ཚེས་ ༡༦ ཉིན་ཨི་རན་གྱིས་པ་ཀི་སི་ཐན་གྱི་མངའ་སྡེ་ (Balochistan) ནང་རིམ་པ་མི་འདྲ་བའི་མེ་ཤུགས་འཕུར་མདའ་འཕངས་ཏེ་འཇབ་རྒོལ་བྱས་ཡོད་པ་དང་། ཨི་རན་གྱི་ཕྱི་སྲིད་ལྷན་ཁང་གིས། འཇབ་རྒོལ་དེ་ནི་ཆེད་དུ་ད་ལྟ་པ་ཀི་སི་ཐན་གྱི་མངའ་སྡེ་བྷལ་ཆི་སི་ཐན་ནང་རྟེན་གཞི་བྱས་པའི་(Jaish al-Adli) ཟེར་བའི་ཨི་རན་གྱི་གྱེན་ལོག་དྲག་སྤྱོད་པར་དམིགས་ཡོད་པའི་གསལ་བཤད་བྱས་ཡོད་ལ། པ་ཀི་སི་ཐན་གྱིས་ཨི་རན་གྱི་འཇབ་རྒོལ་དེའི་ཁྲོད་བྱིས་པ་གཉིས་རྐྱེན་འདས་སུ་བཏང་བ་དང་མི་གསུམ་ལ་རྨས་སྐྱོན་བཟོས་ཡོད་པ་མ་ཟད། ཨི་རན་གྱི་འཇབ་རྒོལ་དེ་ནི་ཁྲིམས་འགལ་ཡིན་པ་དང་མཇུག་འབྲས་ངན་པ་འབྱུང་སྲིད་པའི་ཉེན་བརྡ་བཏང་ཡོད་པ་རེད།

ཨི་རན་དང་པ་ཀི་སི་ཐན་གཉིས་བར་འཐབ་འཁྲུག་ཤོར་བ་ལ་བརྟེན་ནས། པ་ཀི་སི་ཐན་གྱིས་ཨི་རན་དུ་ཡོད་པའི་གཞུང་ཚབ་མི་སྣ་ཕྱིར་འཐེན་བྱས་ཤིང་། པ་ཀི་སི་ཐན་དུ་ཡོད་པའི་ཨི་རན་གྱི་གཞུང་ཚབ་མི་སྣ་ཕྱིར་ལོག་བྱེད་དུ་མ་བཅུག་པར་བཀག་ཉར་བྱས་ཡོད་པ་མ་ཟད། ཨི་རན་དང་འབྲེལ་བའི་ཆེས་མཐོའི་དཔོན་རིགས་ཐུག་འཕྲད་སོགས་ཀྱི་འབྲེལ་ལམ་ཡོངས་མཚམས་འཇོག་བྱས་ཡོད་པ་དང་། པ་ཀི་སི་ཐན་དང་ཨི་རན་བར་མེ་ཤུགས་འཕུར་མདའ་འཕེན་རེས་བྱས་ཏེ་རྒོལ་འཛིང་བྱེད་བཞིན་པ་འདི་ནི་དཀྱིལ་ཤར་ཡུལ་གྲུ་ཁག་ཏུ་འཐབ་འཁྲུག་གི་ལེའུ་གསར་པ་ཞིག་རྒྱ་སྐྱེད་གཏོང་གི་ཡོད་པ་སི་ཨན་ཨན་གསར་ཁང་གིས་བརྗོད་འདུག

ཡང་ཨི་རན་དང་པ་ཀི་སི་ཐན་གྱི་འཐབ་འཁྲུག་དང་འབྲེལ། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་མའོ་ནེན་ཟེར་བས། ཨི་རན་དང་པ་ཀི་སི་ཐན་གཉིས་ནི་ཁྱིམ་མཚེས་དང་ཁ་ཆེའི་རྒྱལ་ཁབ་ཆེ་གྲས་ཡིན་སྟབས། རྒྱ་ནག་གིས་ཨི་རན་དང་པ་ཀི་སི་ཐན་གཉིས་ནས་འཐབ་འཁྲུག་མཚམས་འཇོག་བྱས་ཏེ་རྒྱལ་ཁབ་གཉིས་བར་མངའ་ཁུལ་ཞི་བདེ་དང་བདེ་འཇགས་ཡོང་ཐབས་བྱེད་དགོས་པའི་སྐུལ་མ་བཏང་འདུག

ད་ལྟ་རྒྱལ་ཁབ་གཉིས་བར་འཐབ་འཁྲུག་ཤོར་རྐྱེན་ནི། ཨི་རན་གྱིས་ཕྱོགས་གཉིས་བར་ས་འབྲེལ་ཡིན་པའི་པ་ཀི་སི་ཐན་གྱི་མངའ་སྡེ་བྷལ་ཆི་སི་ཐན་(Balochistan) ནང་རྟེན་གཞི་བྱས་པའི་ཁ་ཆེ་ཆོས་ལུགས་ཀྱི་ནང་ཚན་སོ་ནེ་ཐལ་སྤྱོད་(Jaish al-Adli) འཇིགས་སྐུལ་དྲག་སྤྱོད་པར་ཚར་གཅོད་བྱེད་སླད་འཇབ་རྒོལ་བྱེད་བཞིན་ཡོད་པ་དང་། པ་ཀི་སི་ཐན་གྱིས་ཨི་རན་གྱི་འཇབ་རྒོལ་ལ་རྒོལ་ལན་བསློགས་པ་དང་འབྲེལ་ནས། ཨི་རན་གྱི་(Asli Baluchestan) མངའ་སྡེའི་ནང་རྟེན་གཞི་བྱས་ཤིང་པ་ཀི་སི་ཐན་གྱི་རྒྱལ་སྲུང་བདེ་འཇགས་ལ་ཉེན་ཁ་བསྐྲུན་མཁན་གྱི་ (Sarmachars) འཇིགས་སྐུལ་དྲག་སྤྱོད་པ་རྩ་མེད་བཟོ་ཐབས་ཆེད་མེ་ཤུགས་འཕུར་མདའ་འཕངས་པ་ཡིན་འདུག

ད་ལྟ་པ་ཀི་སི་ཐན་དང་ཨི་རན་གཉིས་ཀྱི་བར་ས་འབྲེལ་ཡིན་ཞིང་བདེ་འཇགས་ཀྱི་གནད་དོན་ཆེ་སའི་ས་ཁྱོན་ཀེ་ལོ་མི་ཊར་ ༩༠༠ ཡོད་ཅིང་། ཉེ་བའི་ལོ་མང་རིང་རྒྱལ་ཁབ་གཉིས་ནས་ས་མཚམས་ཁག་ཏུ་འཇིགས་སྐུལ་དྲག་སྤྱོད་པའི་སྡེ་ཁག་ཡོད་སྐོར་ལ་སྐྱོན་བརྗོད་བྱེད་རེས་བྱས་ཡོད་པ་དང་། ཕྱོགས་གཉིས་ཀྱི་ས་མཚམས་ཁག་ཏུ་ཁེལ་བའི་མི་མང་གི་གཞི་རྩའི་འཚོ་བར་དཀལ་ངལ་དང་དབྱེ་འབྱེད། དྲག་སྤྱོད་སོགས་ཀྱི་དཀའ་ངལ་འཕྲད་བཞིན་ཡོད་པ་བདེ་འཇགས་ཉམས་ཞིབ་པ་ཁན་ (Zaigham Khan) ལགས་ཀྱིས་བརྗོད་འདུག

གསར་འགོད་པ། སྐལ་བཟང་སྦྱིན་པ།