ཨ་རིས་འདི་ལོའི་མཉམ་འབྲེལ་རྒྱལ་ཚོགས་ཀྱི་རྒྱ་ནག་ནང་གི་འགྲོ་བ་མིའི་ཐོབ་ཐང་བསྐྱར་ཞིབ་སྐབས་བོད་ནང་གི་འགྲོ་བ་མིའི་ཐོབ་ཐང་གླེང་སློང་གནང་དགོས་པའི་རེ་སྐུལ་ཞུས་འདུག
ཨ་རིའི་ཕྱི་སྲིད་བློན་ཆེན་མཆོག་ལ་ཕུལ་བའི་བོད་དང་ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་སྙན་ཞུ། འཐུས་མི་རོ་བྷི་འོ་མཆོག་གི་་དྲ་བའི་ནང་གི་པར།
ཟླ་འདིའི་ཕྱི་ཚེས་ ༢༣ ཉིན་ནས་མཉམ་འབྲེལ་རྒྱལ་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་ཐད་བསྐྱར་ཞིབ་ཚོགས་འདུ་འཚོག་གཏན་འཁེལ་ཡོད་པ་ལྟར། ཟླ་འདིའི་ཕྱི་ཚེས ༡༦ ཉིན་ཨ་རིའི་གྲོས་ཚོགས་གོང་མའི་འཐུས་མི་མར་ཁོ་རོ་བྷི་འོ་ལགས་ (Marco Rubio) དང་། ཊིམ་ཀེན་(Tim Kaine) ལགས། ཇའེ་ཧྥི་མིར་ཀི་ལི་ (Jeff Merkley) ལགས། མར་ཤ་བྷི་ལག་བྷོན་ (Marsha Blackburn) ལགས་བཅས་ཀྱིས། ཨ་རིའི་ཕྱི་སྲིད་དྲུང་ཆེ་སྐུ་ཞབས་བྷི་ལི་ཀན་ (Antony Blinken) མཆོག་གི་མཚན་ཐོག་ལ་རེ་སྐུལ་སྙན་ཞུ་ཞིག་ཕུལ་ཏེ། ལྷན་ཚོགས་དེའི་ཐོག་ཨ་རིས་རྒྱ་ནག་གཞུང་གིས་བོད་དང་། ཡུ་གུར། ཧོང་ཀོང་། དེ་བཞིན་དམངས་གཅོ་དོན་གཉེར་བ་སོགས་ལ་དངོས་ཤུགས་བརྒྱུད་གསུམ་ནས་དྲག་གནོན་བྱེད་བཞིན་པ་གླེང་སློང་དང་། རྒྱ་ནག་གཞུང་གིས་ཉེས་མེད་འཛིན་བཟུང་བྱས་པ་དག་ཀློད་གྲོལ་གཏོང་ཐབས་དགོས་སྐོར་རེ་སྐུལ་ཞུས་འདུག
རེ་སྐུལ་སྙན་ཞུ་དེའི་ནང་། འདས་པའི་མི་ལོ་བཅུ་ཕྲག་ཁ་ཤས་རིང་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བ་དང་། དེ་བཞིན་བོད་མི་འདུས་སྡོད་ཀྱི་ས་གནས་ཁག་ཏུ་བོད་ཀྱི་ལོ་རྒྱུས་དང་ངོ་བོ་རྨེག་མེད་དུ་བཟོ་བའི་ལས་འགུལ་སྤེལ་མུས་ཡིན་པའི་མུར། རྒྱ་ནག་གཞུང་གིས་རིག་གཞུང་བཙན་གྱིས་བརྗེ་བསྒྱུར་གྱི་སྲིད་ཇུས་འོག་ནས་བོད་པའི་བྱིས་པ་ས་ཡ་གཅིག་ལྷག་རྒྱ་ནག་གཞུང་གི་བཅའ་སྡོད་སློབ་གྲྭ་ཁག་ཏུ་བཙན་གྱིས་བཅུག་ཡོད་པ་མ་ཟད། བོད་ (TIbet) དེ་ཤིས་ཙང་(Xizang) དུ་བཙན་སྒྱུར་བྱེད་ཀྱི་ཡོད། དེ་བཞིན་གངས་སྐྱེས་སྒྲུབ་པ་སྐྱབས་དང་། རོང་བོ་གངས་དཀར། ༧པཎ་ཆེན་རིན་པོ་ཆེ་ཚུད་པའི་བོད་ཀྱི་ཆོས་ལུགས་ཀྱི་དབུ་འཁྲིད་དང་ལས་འགུལ་བ་མང་དག་ཅིག་བཙན་འཁྲིད་བྱས་ཡོད། ཅེས་འཁོད་འདུག
ཡང་སྙན་ཞུའི་ནང་། རྒྱ་ནག་དམར་ཤོག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་བཏང་སྟེ། འཆར་གཞི་ལྡན་པའི་ཐོག་ནས་ཡུ་གུར་མི་རིགས་རྩ་མེད་གཏོང་མུས་ཡིན་པ་མ་ཟད། ཡུ་གུར་རང་སྐྱོང་ཁུལ་ཟེར་བའི་ནང་གི་ཁ་ཆེ་གྲངས་ཉུང་མི་རིགས་རྣམས་ལ་ཚད་ལས་འདས་པའི་དྲག་གནོན་དང་། དྲག་སྤྱོད་པ་ཡིན་ལུགས་བསྙད་ནས་བྲན་གཡོག་དང་། ངལ་རྩོལ་བསྒྱུར་བཀོད་ཁང་སོགས་སུ་བཅུག་གི་ཡོད། ཅེས་དང་། རྒྱ་ནག་གཞུང་གིས་ཧོང་ཀོང་དུ་དྲག་གནོན་དང་། ལྷག་པར་ཇིམ་མེ་ལའེ་(Jimmy Lai) དང་ཇོ་ཞོ་ཝོང་(Joshua Wong)། ཆའོ་ཧང་ཐུང་(Chow Hang-tung) ཚུད་པའི་དམངས་གཙོ་དོན་གཉེར་བ་དང་། གསར་འགོད་པ། ལས་འགུལ་བ་སོགས་བཙན་ཁྲིད་བཀག་ཉར་བྱེད་ཀྱི་ཡོད། ཅེས་འཁོད་འདུག
རྒྱ་ནག་གཞུང་གིས་ཨ་རིའི་ཉེས་མེད་མི་སེར་འཛིན་བཟུང་དང་། ཨ་རིའི་ཚོང་དོན་གཉེར་མཁན་ལས་ཁུངས་ ༡༢ ཙམ་བཀག་སྡོམ་བྱས་ཡོད་སྐོར་དང་། ཨ་རིའི་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་ལ་བརྩི་འཇོག་གི་ཐོག་ནས། ཁྲིམས་ཐོག་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ཐད་ལ་འགན་དབང་ཁུར་བཅུག་དགོས་སྐོར་གྱི་རེ་སྐུལ་ཞུས་འདུག
ཨ་རིའི་རང་དབང་ཁང་ (Freedom House) པའི་ཕྱི་ལོ་ ༢༠༢༣ ལོའི་འཛམ་གླིང་གི་རང་དབང་ (Freedom in the world 2023) ཞེས་པའི་ལོ་འཁོར་སྙན་ཐོ་བཏོན་པའི་ནང་། བོད་ནང་གི་ཆབ་སྲིད་ཀྱི་ཐོབ་ཐང་དེ་གོར་ཐིག་འོག་གི་ ༢ ལ་ཟགས་ནས་འཛམ་གླིང་གི་རང་དབང་ཆེས་སྡུག་ཤོས་ཀྱི་ས་ཁུལ་དུ་གྱུར་ཡོད་པའི་སྙན་ཐོ་བཏོན་ཡོད་པ་མ་ཟད། ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་གི་ཕྱི་ལོ་ ༢༠༢༣ ལོའི་རྒྱལ་སྤྱིའི་ཆོས་དད་རང་དབང་གི་གནས་སྟངས་སྐོར་གྱི་སྙན་ཐོའི་ནང་དུའང་རྒྱ་ནག་དེ་འཛམ་གླིང་གི་ཆོས་དད་རང་དབང་སྡུག་ཤོས་ཀྱི་རྒྱལ་ཁབ་ཏུ་ངོས་འཛིན་བྱས་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
