ཕྱི་ལོ་ ༢༠༢༡ ཟླ་ ༦ ཚེས་ ༡༠ ཉིན་རྒྱ་ནག་ཉེན་རྟོག་པས་རྔ་བ་ཀིརྟི་དགོན་གྱི་ཚོགས་ཆེན་དབུ་མཛད་ཟུར་པ་བློ་བཟང་བཀྲ་ཤིས་ལགས་གློ་བུར་དུ་འཛིན་བཟུང་བཙན་འཁྲིད་བྱས་ཏེ་ཟླ་ཤས་འགོར་རྗེས། གསང་བའི་ཐོག་ནས་ལོ་གསུམ་གྱི་བཙོན་འཇུག་ཁྲིམས་ཐག་བཅད་དེ་དེང་སང་སི་ཁྲོན་མེན་ཡང་བཙོན་ཁང་དུ་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་ཅིག་ནས་གནས་ཚུལ་མཁོ་སྤྲོད་གནང་བ་ལྟར་ན། ཁོང་འཛིན་བཟུང་བཙོན་འཇུག་བྱས་པའི་རྒྱུ་མཚན་སྐོར་ལ་རྒྱ་ནག་གཞུང་གིས། ཏོག་དབྱིབས་ནད་ཡམས་ཀྱི་སྐབས་སུ་རྔ་བ་ཀིརྟི་དགོན་གྱི་རྒྱུན་ཚོགས་འཚོགས་མི་ཆོག་ཅེས་རྒྱ་གཞུང་གིས་བཀག་རྒྱ་བསྡམས་པ་ལ་མ་བརྩིས་པར་རྒྱུན་ཚོགས་མུ་མཐུད་འཚོགས་པ་སོགས་རྔ་བ་ཁུལ་གྱི་ལྟ་རྟོག་ལས་ཁུངས་ཟེར་བའི་བཀའ་ལ་མ་བརྩིས་པ་དང་མཉམ་འབྲེལ་མ་བྱས་པ། རྔ་བ་ཀིརྟི་དགོན་པའི་ནང་དུ་རྒྱ་ནག་གི་རྒྱལ་དར་ཕྱར་བར་འགོག་རྐྱེན་བཟོས་པ་སོགས་དང་། ༸གོང་ས་༸སྐྱབས་མགོན་རྒྱལ་བའི་དབང་པོ་མཆོག་དང་༸སྐྱབས་རྗེ་ཀིརྟི་རིན་པོ་ཆེ་རྣམ་གཉིས་ཀྱི་དྲུང་དུ་བསྔོ་རྟེན་ཕུལ་བ་སོགས་ཀྱི་ཉེས་མིང་གཡོགས་ཡོད་པ་ཙམ་ལས། ཞིབ་ཕྲའི་གནས་ཚུལ་ད་དུང་ཡང་ཤེས་རྟོགས་ཐུབ་མེད་པ་རེད།
དགུང་ལོ་ ༤༣ ཡིན་པའི་དགེ་འདུན་པ་བློ་བཟང་བཀྲ་ཤིས་ལགས་ནི། རྔ་བ་རྫོང་ཁོངས་ཕྱུགས་ལས་གོང་མའི་རུ་ཆུང་དྲུག་པའི་ཕ་འདས་པོ་ཤེས་རབ་ཚང་གི་བུ་ཕྲུག་མིང་སྲིང་བདུན་གྱི་ཆུང་ཤོས་གཉིས་པ་དེ་ཡིན་པ་དང་། ཆུང་དུས་ནས་རྔ་བ་ཀིརྟི་དགོན་གྱི་ཆོས་སྒོར་ཞུགས་ཏེ་ཕྱིས་སུ་ཚོགས་ཆེན་དབུ་མཛད་ཀྱི་མཛད་འགན་མཐར་ཕྱིན་པར་བཞེས་ཤིང་། དེའི་རྗེས་རྔ་བ་ཀིརྟི་དགོན་དང་། ཀིརྟིའི་མ་དགོན་བཀྲ་ཤིས་ལྷུན་གྲུབ་གླིང་། གདོང་རི་ཀིརྟིའི་དགོན་གསུམ་གྱི་དབྱངས་དཔོན་དང་། རྔ་བ་ཀིརྟི་དགོན་པའི་ཆོས་ལུགས་འཛིན་སྐྱོང་ཁང་གི་ལས་བྱེད་བཅས་ཀྱི་འགན་ཁུར་བཞེས་མུས་སྐབས་རྒྱ་གཞུང་གིས་འཛིན་བཟུང་བཙོན་འཇུག་བྱས་ཡོད་འདུག
