སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས་བོད་ཀྱི་སྐད་ཡིག་ཐོག་དེང་རབས་ཤེས་ཡོན་གྱི་ནུས་པ་མཉམ་སྤུངས་བྱེད་ཕྱོགས་དང་མ་འོངས་པའི་ལོ་བཅུ་གྲངས་ནང་དུ་འཕྲུལ་རིག་ཐོག་ཡར་རྒྱས་གཏོང་རྒྱུ་གལ་ཆེན་ཡིན་སྐོར་གསུང་བཤད་གནང་།
སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས་བྱང་ཨ་རིའི་ནང་བོད་ཀྱི་ཆོས་དང་རིག་གཞུང་སྐད་ཡིག་བཅས་འཛིན་སྐྱོང་སྤེལ་གསུམ་བྱེད་པར་དེང་རབས་འཕྲུལ་ལས་ཅན་གྱི་འགྲོས་དང་བསྟུན་ནས་ཡར་རྒྱས་སུ་གཏོང་ཕྱོགས་ཀྱི་སྨོན་ལམ་རིག་ནུས་(Monlam AI)ལས་གཞི་ངོ་སྤྲོད་ཀྱི་སྐོར་སྐྱོད་གནང་བཞིན་ཡོད་པ་ལྟར། དེ་རིང་ཨ་རིའི་ཕྱི་ཚེས་ ༡༩ ཉིན་ནེའུ་ཡོག་བོད་རིགས་སྤྱི་མཐུན་ཚོགས་པའི་ཚོགས་ཁང་དུ། བྱང་ཨ་རིའི་བོད་ཀྱི་སྐུ་ཚབ་དོན་གཅོད་ཁང་དང་ཧི་མ་ལ་ཡ་རིག་གཞུང་ལྟེ་གནས་ཁང་གཉིས་ཀྱི་གོ་སྒྲིག་འོག སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས། བོད་ཀྱི་སྐད་ཡིག་ཐོག་དེང་རབས་ཤེས་ཡོན་ཆ་ཚང་བ་བཟོ་རྒྱུར་ནུས་པ་མཉམ་སྤུངས་བྱེད་ཕྱོགས་ཐད་གཏམ་བཤད་གནང་སྟེ་བགྲོ་གླེང་གནང་ཡོད་ཅིང་། སྐབས་དེར་ཧི་མ་ལ་ཡ་དཔེ་མཛོད་ཁང་གི་སྤྱི་ཁྱབ་འགན་འཛིན་གནས་ནང་བླ་མ་ཚེ་དབང་རིན་པོ་ཆེ་མཆོག་དང་། བྱང་ཨ་རིའི་བོད་ཀྱི་སྐུ་ཚབ་དོན་གཅོད་ཁང་གི་སྐུ་ཚབ་ཀུན་དགའ་བཀྲ་ཤིས་ལགས། དེ་བཞིན་ས་གནས་ཀྱི་མང་ཚོགས་བཅས་མཉམ་ཞུགས་གནང་ཡོད་པ་དང་། ཚོགས་ཐོག་ཏུ་ཧི་མ་ལ་ཡ་དཔེ་མཛོད་ཁང་གིས་དགེ་བཤེས་སྨོན་ལམ་ལགས་ལ་དེང་རབས་འཕྲུལ་རིག་གསར་གཏོད་ལ་བརྟེན་ནས་བོད་ཀྱི་ཆོས་དང་རིག་གཞུང་གོང་སྤེལ་ལ་རྨད་དུ་བྱུང་བའི་རླབས་ཆེན་གྱི་མཛད་རྗེས་བསྐྲུན་པར་ཐུགས་རྗེ་ཆེ་ཞུའི་གཟེངས་རྟགས་ཤིག་ཕུལ་ཡོད་འདུག
ཧི་མ་ལ་ཡ་དཔེ་མཛོད་ཁང་གི་སྤྱི་ཁྱབ་འགན་འཛིན་གནས་ནང་བླ་མ་ཚེ་དབང་རིན་པོ་ཆེ་མཆོག་གིས། དགེ་བཤེས་བློ་བཟང་སྨོན་ལམ་ལགས་ཀྱིས་བརྡ་འཕྲིན་རིག་པའི་ཆེད་ལས་ཐོག་ནས་བོད་ཀྱི་རིག་གཞུང་སྲུང་སྐྱོབ་བྱེད་པའི་འཆར་གཞི་དང་སྤོབས་པ་ཧ་ལས་པ་ཞིག་རེད། དེང་སྐབས་འཛམ་བུ་གླིང་ཡར་རྒྱས་འགྲོ་བཞིན་ཡོད་པ་ལྟར། ང་ཚོའང་འཛམ་བུ་གླིང་གི་སྤྱི་ཚོགས་དང་མཉམ་དུ་འགྲོ་དགོས་ཀྱི་ཡོད་ཅིང་། བོད་ཀྱི་རིག་གཞུང་འཛིན་སྐྱོང་སྤེལ་གསུམ་བྱེད་པའི་ལས་གཞི་རྒྱ་བསྐྱེད་གནང་བར་ནུས་པ་མཉམ་སྤུངས་བྱ་རྒྱུ་གལ་ཆེན་པོ་རེད་ཅེས་གསུངས་འདུག
འཕྲུལ་རིག་གལ་གནད་ཀྱི་སྐོར་ལ་དགེ་བཤེས་བློ་བཟང་སྨོན་ལམ་ལགས་ཀྱིས། དེང་སང་འཕྲུལ་ལས་ཀྱི་འགྱུར་བ་མགྱོགས་ཤིང་ནུས་པ་ཧ་ཅང་ཆེན་པོ་རེད། བོད་ཀྱི་སྐད་ཡིག་རིག་གཞུང་དང་བཅས་པ་དེང་དུས་ཀྱི་མགྱོགས་ཚད་དང་ཆ་སྙོམས་པོ་མ་བྱུང་ཚེ་རྗེས་སུ་ལྷག་རྒྱུ་ཡིན་པའང་གསལ་བོ་རེད། འཕྲུལ་རིག་གིས་མི་ལ་སློབ་སྦྱོང་སྤྲོད་པའི་དུས་སྐབས་ཤིག་མགྱོགས་པོ་འཆར་རྒྱུ་ཡིན་པ་ལྟར། ང་ཚོའི་ཆོས་དང་རིག་གཞུང་སོགས་ལའང་དུས་ཚོད་དང་མཐུན་པའི་འཕྲུལ་རིག་ཞིག་མ་བྱུང་ཚེ་དཀའ་ངལ་ཞིག་གི་གནས་སུ་ལྷུང་རྒྱུ་ཡིན་པ་དང་། དེ་ཡང་ཡར་རྒྱས་སུ་གཏོང་བར་གཙོ་བོ་མགྱོགས་ཚད་དང་སྤུས་ཚད་ཡག་པོ་ཞིག་ལ་ཐུག་འདུག ཅེས་གསུངས་འདུག
སྨོན་ལམ་མིས་བཟོས་རིག་ནུས་ཀྱི་བྱུང་རིམ་སྐོར་ལ་ཁོང་གིས། ཕྱི་ལོ་ ༢༠༡༩ ལོ་ནས་བཟུང་མིས་བཟོས་རིག་ནུས་ཐོག་དོ་སྣང་བྱུང་སྟེ། ཏོག་དབྱིབས་གཉན་རིམས་ཀྱི་སྐབས་སུ་དེའི་སྐོར་ལ་སློབ་སྦྱོང་དང་སློབ་སྟོན་སོགས་ཞུས་ཡོད་ཅིང་། ཕྱི་ལོ་ ༢༠༢༢ ལོའི་རྒྱལ་སྤྱིའི་བོད་རིག་པའི་ཚོགས་ཆེན་སྐབས་དང་བསྟུན། འབྲེལ་ཡོད་གཙུག་ལག་སློབ་གཉེར་ཁང་ཁག་དང་མཉམ་འཛོམས་ཀྱིས་གྲོས་བསྡུར་བྱས་ཏེ། ཁམ་བྷི་རི་ཅི་གཙུག་ལག་སློབ་གཉེར་ཁང་སོགས་གཙུག་ལག་སློབ་གཉེར་ཁང་གསུམ་གྱིས་མཉམ་འབྲེལ་བྱ་རྒྱུ་ངོས་ལེན་བྱས་པ་རེད། དེའི་རྗེས་ཚོད་ལྟའི་བརྒྱུད་རིམ་ནས་མགོ་བཙུགས་གནང་བ་ཞིག་ཡིན། གཙོ་བོ་ཡིག་སྒྱུར་རིག་ནུས་དང་། ཀློག་འདོན་རིག་ནུས། སྒྲ་འཛིན་རིག་ནུས། ཡིག་འཛིན་རིག་ནུས་བཅས་ཀྱི་ཐོག་ཤུགས་རྒྱག་བཞིན་ཡོད་པ་དང་། ལོ་གཅིག་རིང་གི་གྲུབ་འབྲས་བསམ་ཡུལ་ལས་འདས་བ་བྱུང་། ཞེས་གསུངས་འདུག
ཡང་ཁོང་གིས། ད་ལྟའི་བར་དུ་རྒྱ་ནག་གི་སྐམ་ས་ཆེན་པོའི་ནང་དུ་ཀུ་ཤུ་ཁ་པར་ནང་དུ་སྨོན་ལམ་ཚིག་མཛོད་ཕབ་ལེན་བྱས་པའི་གྲངས་ཁྱོན་ས་ཡ་བདུན་ལྷག་བྱུང་ཡོད་པ་རེད། དེ་ནི་བསམ་བློའི་ནང་དུ་མི་ཤོངས་བ་ཞིག་རེད། དེའི་ཐོག་ནས་བོད་ནང་དུ་སྨོན་ལམ་ཚིག་མཛོད་བེད་སྤྱོད་བྱེད་མཁན་མང་པོ་ཡོད་པ་གསལ་བོ་ཡོད་ཀྱང་། ཉེ་ཆར་ནས་བཟུང་རྒྱ་གཞུང་གིས་བོད་ཀྱི་རིག་གཞུང་དང་འབྲེལ་བའི་མཉེན་ཆས་ཆ་ཚང་བཀག་པའི་དཀའ་ངལ་ཞིག་བྱུང་ཡོད། མ་འོངས་པའི་ལོ་བཅུ་གྲངས་ཀྱི་ནང་དུ་འཕྲུལ་རིག་དང་འབྲེལ་བའི་རིགས་ཡར་རྒྱས་གཏང་རྒྱུ་གལ་ཆེན་པོ་རེད། ཅེས་གསུངས་སོང་།
སང་ཉིན་ཨ་རིའི་ནེའུ་ཡོག་ཁུལ་གྱི་ས་གནས་བོད་མི་དང་མིས་བཟོས་རིག་ནུས་ཀྱི་མ་འོངས་པ་དང་། སྨོན་ལམ་མིས་བཟོས་རིག་ནུས་ངོ་སྤྲོད། བོད་ཀྱི་སྐད་ཡིག་ཐད་ལ་སྤྱི་ཚོགས་ཀྱི་ལྟ་སྟངས་དང་ལམ་ལུགས། ཤེས་ཡོན་དང་སྐད་ཡིག་འཛིན་སྐྱོང་ཐད་ཀྱི་འགྱུར་བ། བོད་མི་ཚོས་མ་འོངས་ལོ་བཅུའི་ནང་སྐད་ཡིག་རིག་གཞུང་འཛིན་སྐྱོང་ཇི་ལྟར་བྱེད་པའི་ཐད་གཏམ་བཤད་གནང་རྒྱུ་ཡིན་འདུག དེ་བཞིན་ཨ་རིའི་རྒྱལ་སྤྱིའི་ཡར་རྒྱས་ལྷན་ཁང་གི་ཨེ་ཤ་ཡ་ཚན་པས་མགྲོན་འབོད་གནང་བ་ལྟར། བོད་ཀྱི་ཆོས་རིག་འཕྲུལ་རིག་ལམ་ནས་ཡར་རྒྱས་གཏོང་ཕྱོགས་སྐོར་གྱི་ཚོགས་འདུར་མཉམ་ཞུགས་གནང་ཡོད་པ་མ་ཟད། བྱང་ཨ་རིའི་ས་གནས་བོད་རིགས་ཚོགས་སྡེ་ཁག་ཏུ་བོད་ཀྱི་བརྡ་འཕྲིན་རིག་པའི་སྐོར་ངོ་སྤྲོད་ཀྱི་སྐོར་བསྐྱོད་གནང་བཞིན་ཡོད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
