ཤིན་ཅང་དུ་ཚད་རིམ་ ༧།༡ ཅན་གྱི་ས་ཡོམ་བརྒྱབ་ཡོད་འདུག 

ཤིན་ཅང་དུ་ཚད་རིམ ༧། ༡ ཅན་གྱི་ས་ཡོམ་བརྒྱབ་ནས་ཡུལ་མིའི་འཚོ་གནས་ལ་དོ་ཕོག་ཆེན་པོ་བཟོས་ཡོད་འདུག

དེ་རིང་ཕྱི་ཚེས་ ༢༣ གྱི་སྔ་དྲོའི་ཆུ་ཚོད་ ༢ དང་སྐར་མ་ ༢།༠༩ ཐོག་རྒྱ་ནག་གཞུང་གིས་དབྱེ་བགོས་བྱས་པའི་ཡུ་གུར་གྱི་ཨཀ་སི་ཞིང་ཆེན་(Aksu prefecture) གྱི་ཝུ་ཤི་(Wushi) རྫོང་ཁུལ་དུ་ཚད་རིམ་ ༧།༡ ཅན་གྱི་ས་ཡོམ་བརྒྱབ་ནས། ད་བར་རྐྱེན་འདས་སུ་གྱུར་བའི་མི་གྲངས་ཁ་གསལ་མེད་ནའང་། མི་གྲངས་ ༦ ལ་གནོད་འཚེ་དང་། སྡོད་ཁང་ ༤༧ ལྷག་ལ་གཏོར་སྐྱོན་ཚབས་ཆེན་ཐེབས་ཡོད་ཅིང་། ད་ལྟ་ཁུལ་དེར་གློག་མེད་པ་དང་འགྲོ་སྐྱོད་སོགས་དཀའ་ངལ་ཅན་དུ་གྱུར་ཡོད་པའི་གནས་ཚུལ་ཐོན་འདུག

ད་ལྟ་རྒྱ་ནག་གི་ཛ་དྲག་དོ་དམ་བློན་ཆེན་ལས་ཁུངས་(Ministry of Emergency Management) ཀྱིས་ཁུལ་དེའི་གནོད་འཚེ་ཐེབས་མཁན་རྣམས་ལ་གང་མགྱོགས་རོགས་འདེགས་མྱུར་སྐྱོར་དང་། ཛ་དྲག་གི་ས་གནས་ནས་བསྐྱབས་ཟིན་པའི་མི་རྣམས་ལ་སྡོད་གུར་གྲངས་ ༡༠༠༠ དང་། སྟོད་ལྭ་ ༥༠༠༠། མལ་ཆས་ ༥༠༠༠། དེ་བཞིན་མལ་གདན་ ༥༠༠༠ དང་། ཐབ་ཆས་ ༡༠༠༠ སྤྲད་ནས་ཛ་དྲག་གི་མྱུར་སྐྱོབ་རིམ་པ་གསུམ་པའི་ངོ་བོའི་ཐོག་ནས་རོགས་འདེགས་བྱེད་ཀྱི་ཡོད་ལུགས་བསྒྲགས་འདུག

ས་ཡོམ་དེའི་ཟབ་ཚད་ལ་སྤྱི་ལེ་ ༢༢ ཡོད་ཅིང་། བྱུང་ཡུལ་གྱི་ལྟེ་བ་ནི་སའི་གོ་ལའི་བྱང་ཐིག་ ༤༡།༢༦  དང་ཤར་ཐིག་ ༧༨།༦༣  མཚམས་སུ་ཡོད་པའི་ཤིན་ཅང་གི་ཝུ་ཤི་རྫོང་ཁོངས་སུ་ཁེལ་ཡོད་འདུག་ལ། དེ་ནི་དཀྱིལ་ཤར་ཨེ་ཤ་ཡའི་ཀར་ཛི་ཀི་སི་ཐན་དང་ཤིན་ཅང་གཉིས་ཀྱི་མཐའ་མཚམས་ཀྱི་ཉེ་འགྲམ་དུ་ཆགས་ཡོད་པ་རེད།

ད་ལྟ་མི་གྲངས་ ༦ ལ་རྨས་སྐྱོན་ཐེབས་ཡོད་པའི་ཁྲོད། མི་གཉིས་ལ་གནོད་འཚེ་ཚབས་ཆེན་ཐེབས་ཡོད་པ་དང་། སྡོད་ཁང་ ༤༧ བརྡིབས་སྐྱོན་བྱུང་ཡོད་པ་མ་ཟད། སྡོད་ཁང་ ༧༨ ཚུད་པའི་ཞིང་ས་ལའང་གཏོར་སྐྱོན་ཐེབས་ཡོད་པས། མྱུར་སྐྱོབ་པ་མི་གྲངས་ ༨༠༠ དང་། ཁྱི་ ༣༢། མྱུར་སྐྱོབ་རླངས་ ༡༨༢ བཅས་ས་ཡོམ་བརྒྱབ་བའི་ཡུལ་དངོས་སུ་ཕྱིན་ནས། ཡུལ་དངོས་ཀྱི་ཁང་ཆག་སོགས་སུ་ཞིབ་འཇུག་དང་མྱུར་སྐྱོབ་ཀྱི་ལས་ཀ་བྱེད་ཀྱི་ཡོད་འདུག

ས་ཡོམ་དེའི་དབང་གིས་ཤིན་ཅང་གི་རྒྱལ་ས་ཨུམ་ཆི་(Urumqi) ནས་ས་གནས་གཞན་དང་གཞན་དུ་བགྲོད་པའི་མེ་འཁོར་ལྕགས་ལམ་ཁག་ལ་གནོད་འཚེ་སྟེ། མེ་འཁོར་ ༢༧ དུས་ཐོག་ཏུ་བསྐྱོད་མི་ཐུབ་པར་རེ་ཞིག་མཚམས་འཇོག་བྱ་དགོས་བྱུང་འདུག དེ་བཞིན་ཁུལ་དེར་ས་འགུལ་གྱི་དབང་གིས་གློག་དང་གྲོང་ཁྱེར་ཁག་ཏུ་བགྲོད་ལམ་འགགས་ནས་འགྲོ་སྐྱོད་ལ་དཀའ་ངལ་ཆེ་ཆེར་འཕྲད་མུས་ཡིན་འདུག

ཤིན་ཅང་གི་ཝུ་ཤི་རྫོང་ཁུལ་དུ་ཚད་རིམ་ ༧།༡ ཅན་གྱི་ས་ཡོམ་བརྒྱབ་པ་དེའི་རླབས་དེ་དཀྱིལ་ཤར་ཨེ་ཤ་ཡའི་ཀར་ཛ་ཀི་སི་སན་(Kazakhstan ) དང་ཨུ་བྷེ་ཀི་སི་ཐན་(Uzbekistan) ། དེ་བཞིན་རྒྱ་གར་གྱི་རྒྱལ་ས་ལྡི་ལི་ཁུལ་དུའང་འགུལ་ཡོད་ཀྱང་། རྒྱལ་ཁབ་དེ་དག་གི་ནང་གཏོར་སྐྱོན་གང་ཡང་བྱུང་མེད་པ་རེད། སྤྱིར་ཕྱི་ལོ་ ༢༠༡༧ ལོར་ཤིན་ཅང་གི་ཇིན་ཇིག་རྫོང་(Jinghe) དང་ཕྱི་ལོ་ ༢༠༢༠ ལོར་ཀ་ཤི་གྷར་(Kashgar ) གཉིས་སུའང་ས་ཡོལ་འགུལ་ཐེབས་ཡོད་ཅིང། འདི་ལོའི་ས་ཡོལ་ནི་ཤིན་ཅང་ནང་འགུལ་བའི་ས་ཡོམ་གྱི་ཚད་རིམ་མཐོ་ཤོས་ཀྱི་གྲས་ཤིག་ཆགས་ཡོད་འདུག

ཤིན་ཅང་གི་ནུབ་རྒྱུད་དུ་ཆགས་པའི་ཝུ་སི་རྫོང་ནི་ཀར་ཛི་ཀི་སི་ཐན་གྱི་མཐའ་མཚམས་ཁུལ་དུ་ཆགས་ཡོད་ཅིང་།  ཡུལ་དེར་འབྲས་དང་། གྲོ སྲིན་བལ། ལ་ཕུག་སོགས་ཀྱི་ཐོན་སྐྱེད་བཟང་བའི་ཁར། རྒྱ་ཁྱོན་ལ་རྨི་གྲུ་བཞི་མ་ ༩༠༡༢ ཙམ་དང་། རྒྱ་ནག་གཞུང་གི་ཕྱི་ལོ་ ༢༠༢༠ ལོའི་མི་འབོར་ཞིབ་བཤེར་ལྟར་ན། ཁུལ་དེར་མི་གྲངས་འབུམ་  ༢། ༠༥ ལྷག་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། སྐལ་བཟང་སྦྱིན་པ།