༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་སྐབས་གྲྭ་བ་རྣམས་ཀྱིས་གསང་བདེ་འཇིགས་གསུམ་དང་དོན་སྒོ་བཅས་པར་ཚིག་ཙམ་མིན་པར་དོན་གྱིས་སློབ་སྦྱོང་བྱེད་དགོས་གལ་ཆེ་སྐོར་སོགས་གསུངས་སོང་།
བོད་རྒྱལ་ལོ་ ༢༡༥༡ རབ་གནས་ཤིང་འབྲུག་ལོའི་བོད་ཟླ་ ༡ ཚེས་ ༥ སྟེ་ཕྱི་ཟླ་ ༢ ཚེས་ ༡༤ སྐུའི་བླ་གཟའ་ཉིན་བཞུགས་སྒར་རྒྱལ་བའི་ཕོ་བྲང་དུ། སྐུ་བཅར་རྣམ་རྒྱལ་གྲྭ་ཚང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་འདུག སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་འདིར་བརྟན་བཞུགས་གནང་བར་ཐུགས་རྗེ་ཆེ་ཞུ་རྒྱུ་ཡིན། ངོས་རང་གིས་རྒྱུན་དུ་ཉམས་ལེན་བྱ་རྒྱུ་གཙོ་བོ་དེ། ཇི་སྲིད་ནམ་མཁའ་གནས་པ་དང༌། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག ། ཞེས་པ་འདི་སྨོན་ལམ་རྒྱག་གི་ཡོད་རེད། ངོས་རང་བོད་གངས་ཅན་གྱི་ཞིང་དུ་སྐྱེས་ཤིང་། བོད་ཀྱི་ཆོས་དང་རིག་གཞུང་དང་འབྲེལ་བ་ཡོད་པ་ཚང་མས་ངོས་རང་ལ་དད་པ་དང་མོས་པ་རྩེ་གཅིག་ཡོད་པར་བརྟེན། ཁ་ཡོད་ལག་ཡོད་ཀྱིས་མི་ལ་ཕན་ཐོགས་ཡོང་བསྡད་ཀྱི་འདུག ཅེས་གསུངས།
༧མགོན་པོ་གང་ཉིད་མཆོག་གིས། ངོས་རང་ལྷ་སར་ཡོད་དུས་ངོས་ནས་གསལ་པོ་ཞེ་དྲགས་དྲན་གྱི་འདུག ཁ་ཆེའི་གྲོགས་པོ་མང་པོ་ཞེ་དྲགས་ཡོད། ཆོས་ལུགས་ཁག་ཁག་རེད་དེ། ཚང་མས་ངོས་རང་ལ་དགའ་བོ་ཞེ་དྲགས་བྱེད་ཀྱི་རེད། དེ་བཞིན་དུ་རྒྱ་ནག་ལ་ཆ་བཞག་ནའང་། སྔོན་མ་ཏཱ་ལའི་ལོག་སྤྱོད་ཟེར་ནས་ཞེ་བོ་བཤད་བསྡད་པ་རེད་དེ། དེང་སང་འགྱུར་བ་ཕྱིན་ནས་ཏཱ་ལའི་བླ་མ་ལབ་ན་རྒྱ་ནག་ནང་དུའང་དགའ་མོས་བྱེད་མཁན་མང་པོ་འདུག འཛམ་གླིང་གི་ལྷོ་བྱང་དང་ཤར་ནུབ་སོགས་ཡུལ་ལུང་གང་སར་ཏཱ་ལའི་བླ་མར་དགའ་བོ་བྱེད་མཁན་ཇེ་མང་ནས་ཇེ་མང་དུ་འགྲོ་ཡི་འདུག དེ་དག་ལ་ག་ཚོད་ཐུབ་ཐུབ་ཀྱིས་ཕན་ཐོགས་བྱ་ཐུབ་རྒྱུ་དང་། མདོར་ན་ཆོས་མ་དར་སའི་ལུང་པའི་ནང་ལོགས་ལའང་ཏཱ་ལའི་བླ་མ་ཞེས་ལབ་དུས་དགའ་བོ་བྱེད་མཁན་ཇེ་མང་དུ་འགྲོ་ཡི་འདུག བསྟན་པ་རིན་ཆེན་མཆོག་གི་མ་ཁྱབ་པའམ། །ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག ། ཞེས་གསུངས་པ་ནང་བཞིན། ངོས་ནས་ལྷག་བསམ་བསྐྱེད་ནས་བསྡད་ཀྱི་ཡོད། ད་ལྟ་བར་དུ་ངོས་རང་ལ་འཛམ་བུ་གླིང་གི་ཞི་བདེ་གཟེངས་རྟགས་སོགས་ཐོབ་ཡོད་ལ། འཛམ་གླིང་ཤར་ནུབ་ལྷོ་བྱང་གི་མི་མང་མང་པོས་ཏཱ་ལའི་བླ་མ་ལ་དགའ་མོས་བྱེད་མཁན་ཇེ་མང་དུ་འགྲོ་ཡི་འདུག དེར་བརྟེན་ངོས་ནས་ཆ་བཞག་ནའང་། ངོས་རང་གི་རྨི་ལམ་དུ་ཡོང་བ་ནང་བཞིན་ལོ་བརྒྱ་དང་བཅུ་ལྷག་ཙམ་བསྡད་ཐུབ་རྒྱུའི་སྨོན་ལམ་རྒྱག་གི་ཡོད། ཅེས་གསུངས།
ཡང་༧མགོན་པོ་གང་ཉིད་ཀྱིས། མི་ཚེ་འདིར་ཏཱ་ལའི་བླ་མ་ཞེས་སེམས་ཐག་ཉེ་བོའི་ཐོག་ནས་དགའ་མོས་བྱེད་པ་དེས། ཚེ་རབས་ནས་ཚེ་རབས་བར་དུ་བག་ཆགས་བཞག་ཡོད་པ་གསལ་པོ་ཞེ་དྲགས་རེད། དེར་བརྟེན་ད་ལྟ་བར་དུ་ངོས་རང་གིས་འཛམ་གླིང་ཤར་ནུབ་ལྷོ་བྱང་གང་སར་ལ་དངོས་གནས་དྲང་གནས་ཀྱི་གྲོགས་པོའི་འདུ་ཤེས་དང་། མིའི་བརྩེ་བའི་ཐོག་ནས་དགའ་མོས་བྱེད་མཁན་མང་པོ་ཞེ་དྲགས་ཡོད། དེ་དག་ཚང་མར་ཕན་ཐོགས་ཡོང་ཐུབ་རྒྱུའི་བག་ཆགས་བཟང་པོ་བཞག་སྟེ། ང་ཚོ་ཚེ་རབས་ནས་ཚེ་རབས་ལས་ཀྱི་འབྲེལ་བ་ཡོད། གང་ལྟར་ངོས་རང་འཕགས་པ་སྤྱན་རས་གཟིགས་ཀྱི་བྱིན་རླབས་ཡོད་པའི་མི་ཞིག་ཆགས་ཡོད། དངོས་སུ་ངོས་རང་དང་འབྲེལ་བ་ཡོད་པ་དེ་དག་དོན་གྱི་འཕགས་པ་སྤྱན་རས་གཟིགས་དང་འབྲེལ་བ་ཡོད་བསྡད་པ་ཞིག་ཆགས་ཡོད། ངོས་རང་དང་འབྲེལ་བ་ཡོད་པའི་འཛམ་གླིང་ཡོངས་དང་། ངོས་རང་ལ་དགའ་མོས་ཡོད་པ་དེ་དག་ཚེ་རབས་ནས་ཚེ་རབས་འཕགས་པ་སྤྱན་རས་གཟིགས་ཀྱི་རྗེས་སུ་བཟུང་ནས་སྐྱེ་བ་བཟང་དུ་འགྲོ་རྒྱུ་དང་བདེ་སྐྱིད་ལྡན་པ་ཞིག་ཡོང་ཐུབ་རྒྱུ། དེ་བཞིན་སྐབས་སུ་བབ་པ་གཙོ་ཆེ་ཤོས་བོད་གངས་ཅན་ལྗོངས་ཀྱི་བོད་མི་ཚོ་དངོས་གནས་དྲང་གནས་ཀྱིས་དད་པ་དང་མོས་པ་རྩེ་གཅིག་ཡོད་པ་རེད། ཧི་མ་ལ་ཡའི་རི་རྒྱུད་ཀྱི་མི་མང་ཚོའང་དེ་བཞིན་དགའ་མོས་རྩེ་གཅིག་ཏུ་ཡོད། ང་ཚོས་མི་ཚེ་འདིར་བག་ཆགས་བཟང་པོ་ཞིག་བཞག་སྟེ། ཚེ་རབས་ནས་ཚེ་རབས་བརྒྱུད་བག་ཆགས་ཀྱི་འབྲས་བུ་སྨིན་ཡོང་དུས། ངོས་རང་གིས་རིམ་བཞིན་སངས་རྒྱས་ཀྱི་ས་རུ་བསླེབ་ཐུབ་པའི་སྨོན་ལམ་རྒྱག་གི་ཡིན་ལ། ཁྱེད་རང་ཚོ་ཚང་མས་ཀྱང་དེ་ལྟར་སྨོན་ལམ་རྒྱག་རོགས། ཞེས་གསུངས་སོང་།
ཡང་ཁོང་གིས། དེ་རིང་འདིར་གྲྭ་ཚང་གི་གྲྭ་བ་རྣམས་ཀྱིས་ཧུར་ཐག་བྱེད་ཀྱི་འདུག གྲྭ་ཚང་དུ་གསང་བདེ་འཇིགས་གསུམ་དང་། དོན་སྒོ་དང་བཅས་པ་དེ་དག་དམིགས་བསལ་ཞིག་ཡོད། དེའི་ཚིག་ཙམ་མིན་པར་དོན་དག་ལ་ཏོག་ཙམ་སློབ་སྦྱོང་བྱེད་དགོས། སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་ཡག་པོ་ཡོང་བར་མུ་མཐུད་དུ་ཚང་མས་ཧུར་ཐག་གནང་ཤོག བཀྲ་ཤིས་བདེ་ལེགས། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་།
