ཆུ་རགས་གསར་རྒྱག་གི་ལས་གཞི་མཚམས་འཇོག་དགོས་པའི་དགོས་འདུན་ཆེད་བཏོན་གནང་འདུག

བོད་མི་མང་སྤྱི་འཐུས་ལྷན་ཚོགས་ནས་ཆུ་རགས་གསར་རྒྱག་གི་ལས་གཞི་འཕྲལ་དུ་མཚམས་འཇོག་དགོས་པའི་གསར་འགོད་གསལ་བསྒྲགས་ཤིག་སྤེལ་སོང་།

ཁ་སང་ཕྱི་ཚེས་ ༢༧ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་གསར་འགོད་གསལ་བསྒྲགས་ཤིག་སྤེལ་བའི་ནང་། རྒྱ་ནག་གཞུང་གིས་བོད་སྡེ་དགེ་ཁུལ་དུ་གནས་སྡོད་བོད་མི་རྣམས་ལ་དྲག་གནོན་ཤུགས་ཆེན་བྱེད་བཞིན་པར་སྐྱོན་འཛུགས་ནན་པོ་བྱེད་ཀྱི་ཡོད། དེ་ཡང་ཟླ་འདིའི་ཕྱི་ཚེས་ ༡༤ ཉིན་ནས་བཟུང་རྒྱ་ནག་གཞུང་གིས་ཆུ་རགས་གསར་རྒྱག་གི་ལས་གཞི་མཚམས་འཇོག་ཡོང་བར་དམིགས་ཏེ་བོད་ནང་གི་བོད་མི་མང་པོ་ཞིག་གིས་ཞི་བའི་ངོ་རྒོལ་གྱི་ལས་འགུལ་སྤེལ་བཞིན་ཡོད་པ་མ་ཟད། རྒྱ་གཞུང་གིས་འབྲི་ཆུའི་རྒྱུད་དུ་ཆུ་རགས་གསར་རྒྱག་གི་ལས་གཞིར་ཞི་བའི་ངོ་རྒོལ་བ་ ༡༠༠༠ ལྷག་འཛིན་བཟུང་བཀག་ཉར་བྱས་པ་ཤེས་རྟོགས་བྱུང་ཡོད་འདུག

རྒྱ་གཞུང་གིས་ཆུ་རགས་གསར་རྒྱག་གི་ལས་གཞི་དེའི་ཁྲོད་དབོན་སྟོད་དང་ཤིས་པ་གྲོང་ཚོ་གཉིས་ཀྱི་བོད་མི་ ༢༠༠༠ ལྷག་བཙན་གྱིས་གནས་སྤོ་དགོས་པ་དང་། འབྲི་ཆུའི་རྒྱུད་དུ་ཆགས་པའི་སྡེ་དགེ་རྫོང་ཁོངས་ཀྱི་ཡེ་ན་དགོན་པ་དང་། དབོན་སྟོད་དགོན་པ། མཁའ་མདོ་དགོན་པ། རབ་བསྟན་དགོན་པ། དགོན་སར་དགོན་པ། བཀྲ་ཤིས་དགོན་པ་བཅས་ལོ་རྒྱུས་ཡུན་རིང་ལྡན་པའི་དགོན་སྡེ་ཁག་དྲུག་ཙམ་གཏོར་བཤིག་གཏང་འཆར་ཡོད་འདུག དགོན་སྡེ་དེ་དག་གི་ནང་སྐུ་གདུང་རྩ་ཆེན་རིགས་མང་པོ་ཡོད་པ་མ་ཟད། དབོན་སྟོད་དགོན་གྱི་ལྡེབས་རིས་ནི་ཕྱི་ལོའི་དུས་རབས་ ༡༣ པའི་གནའ་ཤུལ་ཡིན་འདུག ཅེས་འཁོད་འདུག

ད་དུང་བོད་མི་མང་སྤྱི་འཐུས་ལྷན་ཚོགས་ནས་རྒྱ་ནག་གཞུང་གིས་འཛིན་བཟུང་བཀག་ཉར་བྱས་པའི་བོད་མི་ཞི་བའི་ངོ་རྒོལ་བ་རྣམས་གང་མགྱོགས་ཀློད་གྲོལ་གཏོང་དགོས་པ་དང་། ཆུ་རགས་གསར་རྒྱག་གི་ལས་གཞི་འཕྲལ་དུ་མཚམས་འཇོག་དགོས་པ། ས་གནས་ཁག་ཏུ་ལས་འགུལ་ཇི་འདྲ་ཞིག་སྤེལ་རུང་མང་ཚོགས་ཀྱི་འདོད་མོས་དང་རེ་བ་གཙོར་བཟུང་དགོས་པའི་ནན་བརྗོད་གནང་ཡོད་འདུག

གསར་འགོད་པ་བསྟན་འཛིན་ཕུར་བུ་ནས་བོད་མིའི་སྒྲིག་འཛུགས་ཀྱི་དྲ་རྒྱ་ལས་བཏུས།