ཆབ་མདོ་ངག་ཕུན།
ལོ་གསར་པ་ཚེས་པ་དང་ངའི་སེམས་ནང་མི་བདེ་བ་ཞིག་བྱུང་བ་ནི་བོད་ནང་གི་གནས་སྟངས་སྐོར་ཡིན་ལ། དེ་ཡང་བོད་མི་རིགས་ཀྱི་བུ་རབས་ཚ་རྒྱུད་ནས་གནས་སྡོད་བྱེད་སའི་ཕ་གཞིས་དྲོད་མོ་རྒྱ་གཞུང་གིས་བཙན་ཤེད་ཀྱིས་གནས་སྤོ་བྱེད་དགོས་ཚུལ་བཙན་བཀའ་བཏང་བ་དང་། དེ་དག་ལ་བོད་ཁམས་སྡེ་དགེའི་སྡེ་དགོན་གཉིས་ཀྱི་སེར་སྐྱ་མང་ཚོགས་ཀྱིས་ལག་གཉིས་ཐལ་མོ་སྙིང་ཁར་སྦྱར་ནས་རྒྱ་དམར་གྱི་ལས་བྱེད་ཚོར་ཞི་བའི་ཐོག་ནས་གནས་སྤོ་མི་དགོས་པའི་རེ་སྐུལ་ཇི་ལྟར་ཞུས་ཀྱང་ཡ་ལན་ཙམ་ཡང་མི་བྱེད་པ། བཙན་པོ་དབང་ཡོད་ཀྱིས་འཛིན་བཟུང་བྱས་ཏེ་ད་ལྟའི་གནས་སྟངས་ཛ་དྲག་ཅན་དུ་འགྱུར་བཞིན་ཡོད་པ་རེད།
དེ་ཡང་བོད་ཀྱི་དུས་བབ་ལས། རྒྱ་ནག་གཞུང་གིས་སྐམ་ཐོག་ཆུ་གློག་ཁང་ཟེར་བ་འཛུགས་སྐྲུན་བྱེད་པར་ཁ་གཡར་ཏེ། སྡེ་དགེ་རྫོང་དབོན་པོ་སྟོད་ཀྱི་དབོན་སྟོད་དགོན་དང་ཡེ་ན་དགོན་སོགས་དགོན་པ་དྲུག་དང་གྲོང་ཚོ་གཉིས་ལྷག་གནས་སྤོར་དགོས་པའི་བཙན་བཀའ་གཏོང་གི་ཡོད་པ་ལྟར། ས་གནས་སེར་སྐྱ་མི་མང་གིས་ཕྱི་ཚེས་ ༢༡ དང་ ༢༢ ཉིན་ཞི་བའི་ཐོག་ནས་འབྲེལ་ཡོད་ལས་བྱེད་པར་རེ་སྐུལ་ངུ་འབོད་གནང་སྟེ་བཙན་བཀའ་ཟློག་ཐབས་གནང་ཡོད་སྟབས། གློ་བུར་དུ་ཉེན་རྟོག་པ་མང་པོ་བསླེབས་ནས་གང་བྱུང་གཅར་རྡུང་བཏང་སྟེ་མི་ཁག་ཅིག་སྡེ་དགེ་རྫོང་མི་མང་སྨན་ཁང་དུ་བསྐྱལ་ཡོད་པ་མ་ཟད། སེར་སྐྱ་མི་མང་མང་པོ་འཛིན་བཟུང་བཙན་འཁྲིད་བྱས་ཏེ། ས་གནས་མི་མང་གི་འགྲོ་འདུག་ལ་དམ་དྲག་ཤུགས་ཆེན་བྱེད་བཞིན་ཡོད་འདུག ཅེས་བཀོད་དོན་ལྟར། བོད་རིགས་རྒྱ་ཆེའི་མང་ཚོགས་ཀྱིས་ཞི་བའི་ཐོག་ནས་ཞུ་འབོད་ལ། རྒྱ་དམར་སྲིད་ཀྱིས་གང་བྱུང་གཅར་རྡུང་གཏོང་གི་ཡོད་པ་རེད། དེས་ག་རེ་མཚོན་གྱི་ཡོད་དམ་ཞེ་ན། བོད་མི་རྣམས་དགྲ་ཞིག་ཏུ་ངོས་འཛིན་པ་ལས། སྤུན་ཟླ་ལ་ངོས་འཛིན་གྱི་མེད། རྒྱ་གཞུང་གི་ལས་བྱེད་ཚོས་ག་དུས་ཡིན་ན་བོད་མི་རིགས་ལ་ང་ཚོའི་སྤུན་ཟླ་ཞེས་བརྗོད་ཀྱི་ཡོད་མོད། དོན་དག་ཡང་སྙིང་རྒྱ་གཞུང་གིས་བོད་མི་རིགས་སྤུན་ཟླའི་འདུ་ཤེས་ཤིག་འཛིན་གྱི་མེད་པ་འདས་ཟིན་པའི་ལོ་རྒྱུས་ཁག་ལས་ཀྱང་གསལ་པོ་རྟོགས་ཐུབ་པ་ཞིག་རེད། དེ་བཞིན་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ནས་ཆུ་རགས་གསར་རྒྱག་གི་ལས་གཞི་འཕྲལ་དུ་མཚམས་འཇོག་དགོས་པའི་གསར་འགོད་གསལ་བསྒྲགས་ལས། །རྒྱ་གཞུང་གིས་ཆུ་རགས་གསར་རྒྱག་གི་ལས་གཞི་དེའི་ཁྲོད་དབོན་སྟོད་དང་ཤིས་པ་གྲོང་ཚོ་གཉིས་ཀྱི་བོད་མི་ ༢༠༠༠ ལྷག་བཙན་གྱིས་གནས་སྤོ་དགོས་པ་དང་། འབྲི་ཆུའི་རྒྱུད་དུ་ཆགས་པའི་སྡེ་དགེ་རྫོང་ཁོངས་ཀྱི་ཡེ་ན་དགོན་པ་དང་། དབོན་སྟོད་དགོན་པ། མཁའ་མདོ་དགོན་པ། རབ་བསྟན་དགོན་པ། དགོན་སར་དགོན་པ། བཀྲ་ཤིས་དགོན་པ་བཅས་ལོ་རྒྱུས་ཡུན་རིང་ལྡན་པའི་དགོན་སྡེ་ཁག་དྲུག་ཙམ་གཏོར་བཤིག་གཏང་འཆར་ཡོད་འདུག དགོན་སྡེ་དེ་དག་གི་ནང་སྐུ་གདུང་རྩ་ཆེན་རིགས་མང་པོ་ཡོད་པ་མ་ཟད། དབོན་སྟོད་དགོན་གྱི་ལྡེབས་རིས་ནི་ཕྱི་ལོའི་དུས་རབས་ ༡༣ པའི་གནའ་ཤུལ་ཡིན་འདུག །ཅེས་བཀོད་དོན་ལྟར་དེ་འདྲ་རིག་དངོས་རྩ་ཆེའི་གནའ་ཤུལ་དེ་དག་ག་འདྲ་གནས་སྤོ་བྱ་དགོས་རེད་དམ། ངེས་པར་དུ་རྒྱ་གཞུང་གིས་དགོངས་པ་བཞེས་པ་དགོས་པ་ཞིག་རེད།
ད་ནི་རང་དབང་དང་། ཞི་བདེ་ལ་དགའ་བའི་སྲིད་གཞུང་རྣམ་པས་རྒྱ་གཞུང་གི་སྲིད་ཇུས་ངན་པ་དེ་དག་འཕྲལ་དུ་མཚམས་འཇོག་ཡོང་བར་རྒྱ་གཞུང་ལ་གནོན་ཤུགས་སྤྲོད་དགོས་པ་དང་། དེ་བཞིན་རང་རེའི་རང་དབང་ལུང་པར་ཡོད་པའི་མང་ཚོགས་རྣམ་པས་སོ་སོའི་གནས་སྡོད་བྱ་སའི་སྲིད་གཞུང་ལ་བོད་ནང་གི་ད་ལྟའི་གནས་སྟངས་ཛ་དྲག་སྐོར་ཞུ་འབོད་གནང་དགོས་པའི་གནད་དོན་གལ་ཆེན་ཞིག་རེད་སྙམ། བོད་ནང་གི་དངོས་ཡོད་ཀྱི་གནས་ཚུལ་དེ་དག་འཛམ་གླིང་མི་མང་གི་མདུན་དུ་ཁྱབ་བསྒྲགས་མང་ཙམ་སྤེལ་དགོས་པ་མཐོང་ཞིང་། བརྒྱུད་ལམ་སྣ་ཚོགས་ཤིག་གི་གོ་སྐབས་འཛིན་དགོས་པ་རེད། དེ་ནི་བྱེས་ལ་ཡོད་པའི་བོད་མི་རྣམས་ཀྱི་ལས་འགན་ཆེ་ཤོས་དེ་རེད། ང་ཚོར་དཔལ་འབྱོལ་དང་སྟོབས་ཤུགས་མེད་རུང་། ང་ཚོ་ལ་བདེན་པའི་སྟོབས་ཤུགས་ཡོད་པ་ཡིན་དུས་ངེས་པར་དུ་བདེན་པའི་དར་ཆེན་འཕྱར་ནས་འཛམ་གླིང་མི་མང་གི་མདུན་དུ་ཐོན་ནས་བོད་ནང་གི་དངོས་ཡོད་གནས་སྟངས་དེ་དག་སྔར་ལས་ནུས་ཤུགས་ཆེ་བ་སྒྲོག་དགོས་པའི་དུས་ལ་བབ་འདུག་སྙམ། གལ་སྲིད་རྒྱ་གཞུང་གི་བཀོད་ཁྱབ་ལྟར་གནས་སྤོ་གནང་བའི་དབང་དུ་བཏང་ནའང་དེ་སྔོན་སྡོད་ས་ནང་བཞིན་ཁང་པ་དང་། ས་ཞིང་སྤྲད་ཀྱི་རེད་དམ་ཟེར་ན་གཏན་ནས་སྤྲད་ཀྱི་མ་རེད། དངུལ་ཕྲན་བུ་སྤྲད་སྲིད་པ་ལས་གོང་བརྗོད་ལྟར་ཁང་པ་དང་། ས་ཞིང་སྤྲད་སྲིད་ཀྱི་མ་རེད་ལ། གལ་སྲིད་སྤྲད་པ་ཡིན་ནའང་ཕན་ཐོགས་མེད་པ་ཞིག་སྤྲད་ཀྱི་རེད། དེ་མ་སྤྲད་པ་ཡིན་ན་ཞིང་པ་རྒྱ་ཆེ་མང་ཚོགས་ཀྱིས་འཚོ་བ་ག་འདྲ་རོལ་དགོས་ཀྱི་རེད། ཞིང་པ་ནི་ས་ཞིང་ལ་བསྟེན་ནས་འཚོ་བ་རོལ་དགོས་པ་ཡིན་དུས་ཞིང་པ་ལ་ས་ཞིང་མེད་པར་གྱུར་བའི་ཉིན་མོ་དེ་ནས་ཚེ་སྲོག་བརླག་པ་དང་གཅིག་མཚུངས་རེད། དགོན་པ་ཆགས་ས་ནི་གནས་རྩ་ཆེན་པོ་ཞིག་གི་ཐོག་ཏུ་བཞེངས་སྐྲུན་གནང་བ་ཞིག་ཡིན་པ་ལས་རང་ག་བཞེངས་སྐྲུན་གནང་བ་ཞིག་གཏན་ནས་མ་རེད་ལ། ལོ་རྒྱུས་ཡུན་རིང་ལྡན་པའི་གནའ་ཤུལ་བྱིན་ཅན་ཡིན་དུས་སྐུ་གསུང་ཐུགས་རྟེན་ཡོད་པ་རེད་ལ། གནའ་དུས་བཞེངས་སྐྲུན་གནང་བའི་ལྡེབས་རིས་བྱིན་ཅན་ཡོད་རབས་བཤད་ཅིང་ཕྱི་ལོའི་དུས་རབས་ ༡༣ པའི་གནའ་ཤུལ་གྲགས་ཅན་དེ་དག་ག་འདྲ་སེ་གནས་སྤོ་དགོས་ཀྱི་རེད་དམ། དངོས་གནས་སེམས་ནང་དུ་བཤད་མི་ཤེས་པའི་གནད་དོན་ཞིག་རེད། རྫོང་གི་བོད་རིགས་ལས་བྱེད་དེ་དག་གིས་ངེས་པར་དུ་དགོངས་པ་བཞེས་དགོས། ཁོང་རྣམ་པ་གཞན་དབང་འོག་ཏུ་གནས་དགོས་པའི་ཐུགས་ཁག་གཏན་ནས་མེད་པ་དང་། རང་དབང་སྤུ་ཙམ་མེད་པ་ཤེས་ཀྱི་ཡོད་མོད། གནད་དོན་དེ་འདྲའི་སྐབས་སུ་ཁ་བཙུམ་ནས་མ་བཞུགས་པར་བོད་རིགས་རྒྱ་ཆེ་མང་ཚོགས་ཀྱི་དགོས་འདུན་དེ་དག་གོང་རིམ་ལ་ངེས་པ་དུ་ཞུ་གཏུག་གིས་འགོག་ཐབས་གནང་དགོས་པ་ཞིག་རེད། ངས་དེ་འདྲ་བཤད་དུས་གཅིག་བྱས་ན་ང་རང་ཧམ་པ་ཆེ་དྲག་པ་ཡིན་སྲིད། གང་ལྟར་རྒྱ་ཆེ་མང་ཚོགས་ཀྱི་བདེ་སྡུག་སེལ་ཐབས་གནང་དགོས་པ་དེ་རེད། འགོ་ཁྲིད་ཟེར་བ་ནི་མི་མང་གི་འགོ་ཁྲིད་ཡིན་པ་ལས་མི་མང་ལ་གཉའ་མནོན་དང་། བཤུ་གཞོག་གཏོང་མཁན་གྱི་འགོ་ཁྲིད་ཅིག་ཏུ་མ་གྱུར་བ་གནང་དགོས་པ་གལ་ཆེ་རེད་སྙམ། ད་རེས་ཀྱི་གནད་དོན་དེ་དག་ནི་ཕུགས་འདུན་ལ་དགོངས་པ་བཞེས་དགོས་པ་ལས་གནས་སྐབས་ཀྱི་ཁེ་ཕན་བློས་བཏང་དགོས་པའི་དུས་སྐབས་ཤིག་རེད།
ལྷག་དོན་རྒྱ་དམར་སྲིད་གཞུང་གིས་བོད་ཁམས་ཡོངས་རྫོགས་བཙན་འཕྲོག་བྱས་ནས་བཟུང་སྟེ་གཞིས་ལུས་རྒྱ་ཆེ་མི་མང་ལ་ཉིན་གཅིག་ལའང་སེམས་ནང་བདེ་བ་བྱུང་མྱོང་མེད། རྒྱ་གཞུང་གི་ལས་བྱེད་ཚོས་ག་དུས་བཙན་པོ་དབང་ཡོད་བཤད་ཡོང་ན་བསམ་སྟེ་སྡོད་དགོས་ཐུག་གི་ཡོད་ལ། བོད་རིགས་མི་མང་རྣམས་ནི་དམྱལ་བའི་ནང་ལྷུང་བ་ནང་བཞིན་དཀའ་སྡུག་མྱངས་དང་མྱོང་བཞིན་ཡོད། བོད་ལ་རྒྱ་དམར་གྱིས་བཙན་འཛུལ་བྱས་པ་བཟུང་སྟེ་བོད་ཀྱི་གདོད་མའི་རང་བྱུང་ཁོར་ཡུག་ལ་གནོད་སྐྱོན་ཆེན་པོ་བཏང་དང་གཏོང་བཞིན་ཡོད། དེང་སྐབས་འཛམ་གླིང་གི་མི་ཚོས་བོད་ལ་གོ་ལའི་སྣེ་གསུམ་པ་དང་། ཨེ་ཤ་ཡའི་ཆུ་མཛོད་ཅེས་བརྗོད་ཀྱི་ཡོད། བོད་མཐོ་སྒང་ལ་འཁྱགས་རོམ་བཞི་ཁྲི་དྲུག་སྟོང་ལྷག་ཡོད་རབས་བཤད་ཀྱི་ཡོད་ལ། རྒྱ་དམར་གྱིས་བོད་ལ་འཛུགས་སྐྲུན་བྱེད་ཀྱི་ཡོད་ཚུལ་བརྗོད་ནས་གཏེར་ཁ་གང་བྱུང་བསྔོག་འདོན་དང་། ཆུ་མཛོད་དང་ཆུ་རག་གང་བྱུང་གསར་རྒྱག་བྱས་པ་སོགས་ལ་བརྟེན་ནས་རང་བྱུང་གི་ཁོར་ཡུག་ལ་གནོད་སྐྱོན་ཚད་ལས་འདས་པ་བཏང་དང་གཏོང་བཞིན་ཡོད། དེང་སྐབས་བོད་ཀྱི་སྲིད་པ་ཆགས་པའི་གངས་རི་རྣམས་ཀྱང་རིམ་གྱིས་བཞུའགྲོ་ཡི་ཡོད་ལ། ཨེ་ཤ་ཡའི་གླིང་ཕྲན་ལ་ཆུ་ལོག་ལ་སོགས་འབྱུང་བའི་གནོད་འཚེ་ཡོང་དང་ཡོང་བཞིན་པའི་དཀའ་ངལ་མང་དག་ཅིག་འཕྲད་བཞིན་ཡོད།
ལྷག་པར་ཕྱི་ལོ་ ༢༠༡༨ སྔོན་ལ་ས་རུད་བརྒྱབ་ནས་སྡེ་དགེའི་འབྲི་ཆུ་འགག་ནས་དེའི་རྒྱུད་དུ་གནས་པའི་མི་མང་པོའི་འཚོ་གོས་ལ་དཀའ་ངལ་འཕྲད་དགོས་པ་བཟོས་ཡོད། དེ་ཡང་དགེ་སྡེ་དྲ་བ་ལས། སྤྱིར་བཏང་འབྲི་ཆུ་དང་རྩམ་ཆུ་གཉིས་པོ་འབྲི་རྩམ་སུམ་མདོ་ནས་འདྲེས་ཏེ་འབབ་བཞིན་ཡོད་པ་དང་། འབྲི་རྩམ་སུམ་མདོའི་མར་ཙམ་ནས་འབྲི་ཆུའི་(དཔལ་ཡུལ)ཤར་(འཇོ་མདའ)ནུབ་ཀྱི་རི་བོ་ཕན་ཚུན་ཉིལ་ཏེ་འབྲི་ཆུའི་འབབ་མཚམས་བཅད་ཡོད་པས་མ་ཚད། རི་བོ་ཉིལ་བའི་ས་རོ་རྡོ་རོའི་མཐོ་ཚད་ལ་ཐོག་བརྩེགས་ ༥༠ ཡན་མན་ཡོད་ཚུལ་བཤད་ཡོད། ད་བར་མི་དང་འཕྲུལ་འཁོར་གྱིས་དེ་དག་གཤོང་ཐབས་བྱེད་བཞིན་ཡོད་མོད། ད་དུང་མུ་མཐུད་འབད་བརྩོན་བྱས་ཀྱང་ཆུ་ཚོད་ ༣༠ ཡན་མན་འགོར་སྲིད་པའི་གནས་ཚུལ་འབྱོར་ཡོད། ཅེས་འཁོད་དོན་ལྟར་སྐབས་དེ་དུས་མང་ཚོགས་ལ་དཀའ་ངལ་ཆེན་པོ་འཕྲད་ཡོད། དེ་དག་ལ་བསམ་ཤེས་མེད་པར་ད་དུང་ཆུ་མཛོད་རྒྱག་ཚེ་མ་འོངས་པར་རི་བོ་ཕན་ཚུལ་ཉིལ་ཏེ་དེའི་རྒྱུད་དུ་གནས་པའི་མི་རྒྱུ་གཉིས་ལ་དཀའ་ངལ་མང་དག་འཕྲད་རྒྱུ་ཡིན་པ་ནི་འབྲེལ་བརྗོད་མ་དགོས།
རྒྱ་དམར་སྲིད་གཞུང་གིས་ག་དུས་ཡིན་ནའང་བོད་མི་རིགས་ཀྱི་བདེ་དོན་སྒྲུབ་ཀྱི་ཡོད་རབས་བཤད་ཀྱི་ཡོད་མོད། དོན་དག་ཡང་སྙིང་བོད་མི་རིགས་ལ་གནོད་པའི་ལས་དོན་འབའ་ཞིག་བྱེད་ཀྱི་འདུག་ན་དེ་བྱེད་པར་དགའ་བཞིན་བྱེད་ཀྱི་ཡོད། བོད་ནང་དུ་དེ་སྔོན་དང་མི་འདྲ་བའི་གཞུང་ལམ་སོགས་བཟོ་སྐྲུན་བྱས་ཡོད་མོད། དེ་དག་ནི་བོད་རིགས་ལ་ཕན་ཐོགས་ཡོང་ན་བསམ་པའི་ཐོག་ནས་འཛུགས་སྐྲུན་བྱས་པ་ཞིག་མ་རེད། དེ་དག་ནི་བོད་ནས་གཏེར་ཁ་བསྔོག་འདོན་བྱེད་ཆེད་དུ་གཞུང་ལམ་དེ་དག་བཟོ་སྐྲུན་བྱས་པ་ཞིག་ཡིན་པ་ད་སྐབས་རིམ་གྱིས་གསལ་པོ་རྟོགས་ཐུབ་པ་ཞིག་རེད།
སྔོན་དུས་ཡིན་ན་བོད་ལ་ཕྱི་དངོས་པོ་ཡར་རྒྱས་མེད་ནའང་ནང་སེམས་ནང་དུ་ཞི་བདེ་བག་ཕེབས་ཀྱི་འཚོ་བར་རོལ་གྱི་ཡོད། དེང་སྐབས་བོད་ནང་ཕྱི་དངོས་པོའི་ཁྲ་ཁྲ་ཟང་ཟིང་གི་རྣམ་པ་ཞིག་མཐོང་རྒྱུ་ཡོད་མོད། བོད་མི་རྣམས་ཀྱི་སེམས་ནང་དུ་རྒྱ་དམར་སྲིད་གཞུང་གིས་ག་དུས་དྲག་གནོན་བྱེད་ཡོང་ན། ག་དུས་གནས་ཡུལ་ནས་ཡར་རྒྱས་ལ་ཁ་བཏགས་ནས་རྒྱང་འབུད་གཏོང་ཡོང་ན་བསམ་ནས་ཉིན་མཚན་དུས་དྲུག་ཏུ་སེམས་སྡུག་དང་དངངས་སྐྲག་གི་འོག་ཏུ་འཚོ་བ་རོལ་དགོས་ཐུག་གི་ཡོད། རྒྱ་དམར་སྲིད་གཞུང་གི་འགོ་ཁྲིད་ཚོས་ཞིང་བྲན་ཁྲི་ཚོ་བརྒྱར་ཚེ་སྲོག་གསར་པ་ཐོབ་ཡོད་ཚུལ་འུར་སྒྲོག་བྱེད་བཞིན་ཡོད་ལ། མིང་མང་གི་འདོད་དོན་སྒྲུབ་བཞིན་ཡོད་ཚུལ་བཤད་ཀྱི་ཡོད་མོད། དོན་དག་ཡང་སྙིང་དེ་ལས་ལྡོག་སྟེ་གཞིས་ལུས་སྤུན་ཟླ་རྣམས་ཀྱི་ཞི་བའི་ཐོག་ནས་ཞུ་སྐུལ་ལ་དྲག་གནོན་བྱེད་ཀྱི་ཡོད། མི་མང་གི་འདོད་དོན་སྒྲུབ་ཀྱི་མེད་པ་མ་ཟད། ཉེས་མེད་རྡུང་རྡེག་གཏོང་བ་སོགས་ཀྱི་ཉིན་མཚན་མི་འཁྱོང་བའི་སྡུག་བསྔལ་མྱངས་དང་མྱོང་བཞིན་ཡོད་པ་དེ་རེད། དེ་ཡང་བསྲེགས་ཀྱང་མི་འཚིགས་པའི་བོད་ཅེས་པ་ལས། དགྲ་བོ་བཙན་རྒྱལ་རྒྱ་དམར་གྱིས་ང་ཚོའི་སྤུན་ཟླ་མང་པོ་ག་ཚོད་དང་ག་ཚོད་དམར་གསོད་བཏང་ཡོད་པ་མ་རེད། དེ་ནང་བཞིན་བཙོན་དུ་བཅུག་པ་དང་། གར་སོང་ཆ་མེད་བཟོས་པ། འཐབ་འཛིང་བཏང་བ་སོགས་གྲངས་ཀ་མི་ཐེབས་པ་ཞིག་རེད། མནར་གཅོད་འདི་ཚོ་བཟོད་ཐབས་བྲལ་ཏེ་བོད་མི་མང་པོ་ཆུར་མཆོངས་བ་དང་། རང་སྐེ་རང་བསྡམས་ཀྱིས་ཤི་བ་ཡང་བྱུང་ཡོད། འདི་དང་འདི་འདྲ་བ་བོད་རྒྱ་ཆེའི་མི་མང་ལ་མི་ཚེར་བརྗོད་མ་ཚར་བའི་སྡུག་བསྔལ་ཤོད་རྒྱུ་ཡོད། ཅེས་གསལ་དོན་ལྟར།
ལྷག་དོན་རང་རེའི་རང་དབང་ལུང་པའི་ནང་དུ་ཡོད་མཁན་གཞུང་འབྲེལ་དང་གཞུང་འབྲེལ་མ་ཡིན་པ་ཚོགས་སྡེ་ཚང་མ་བློ་རྩེ་གཅིག་མཐུན་གྱིས་ད་རེས་གནས་ཚུལ་ཛ་དྲག་ཅན་དེ་དག་རྒྱ་ནག་དམར་པོའི་གཞུང་གིས་བཙན་ཤེད་ཀྱིས་སྡེ་དགེ་རྫོང་གི་གྲོང་སྡེ་དང་དགོན་པ་ཁག་ཅིག་གནས་སྤོ་མཚམས་འཇོག་དགོས་པའི་ངོ་རྒོལ་གྱི་ལས་འགུལ་དང་། དཀའ་སྡུག་མྱོང་བཞིན་པའི་བོད་མི་ཚོ་ལ་གདུང་སེམས་མཉམ་བསྐྱེད་ཆེད་ལས་འགུལ་མང་དག་སྤེལ་དགོས་ལ། དེང་སྐབས་ས་གནས་གང་སར་གཞུང་འབྲེལ་མ་ཡིན་པའི་ཚོགས་སྡེ་ཁག་གིས་ལས་འགུལ་སྤེལ་དང་སྤེལ་བཞིན་པ་རེད་འདུག་ཅིང་དེ་དག་ལ་རྗེས་སུ་ཡི་རངས་དང་། ད་ངུང་ཡིན་ནའང་གཞུང་མང་གཉིས་ནས་ནུས་ཤུགས་ཆེ་ཙམ་ལས་འགུལ་སྤེལ་དགོས་པ་མཐོང་། དོན་དག་ཡང་སྙིང་ངེས་པར་དུ་རྒྱ་གཞུང་གིས་ཆུ་རགས་གསར་རྒྱག་ལས་གཞི་དེ་དག་འཕྲལ་དུ་མཚམས་འཇོག་ཡོང་བར་ནུས་ཤུགས་ལྡན་པའི་ལས་འགུལ་སྤེལ་དགོས་པར་མཐོང་ངོ་།། འདི་ནི་མདོ་ཁམས་སྡེ་དགེའི་སྡེ་དགོན་གཉིས་ལ་གདུང་སེམས་མཉམ་སྐྱེད་མཚོན་ཆེད་དུ་བྲིས་པ་ཞིག་ཡིན་ནོ།།
ཕྱི་ལོ་ ༢༠༢༤ ཟླ་ ༣ ཚེས་ ༡ ཉིན་མོར་བྲིས།
