སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་ཐུན་མོང་མ་ཡིན་པའི་ཆོས་རིག་གྲངས་མཛོད་དུ་བཅུག་སྟེ་འཇིག་རྟེན་འདི་མ་སྟོང་བར་དུ་སངས་རྒྱས་བསྟན་པ་དང་བཀའ་བསྟན་ཆ་ཚང་ཉར་ཚགས་བྱ་ཐུབ་རྒྱུར་དམིགས་ཡོད་སྐོར་གསུངས་སོང་།
དེ་རིང་དང་སང་ཉིན་ཉིན་གྲངས་གཉིས་རིང་དྷ་ས་ཨིམ་པེ་རེལ་གསོལ་མགྲོན་ཁང་ (Imperial Heights) དུ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག བོད་ཀྱི་གྲངས་འཛིན་དཔེ་མཛོད་ཀྱི་མཉམ་འདུས་ཚོགས་སྡེའི་ཚོགས་ཆེན་འཚོག་མགོ་བཙུགས་སོང་།
ཐེངས་འདིའི་ཚོགས་ཆེན་གྱི་དབུ་འབྱེད་མཛད་སྒོའི་སྟེང་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་ཨ་རིའི་རོགས་ཚོགས་ (USAID) ཀྱི་ལས་འཆར་འགན་འཛིན་ (Mission Director) ཝི་ན་རེ་ཌི་ (Venna Reddy) ལགས། ཆོས་རིག་དྲུང་འཕར་ཀུན་དགའ་རྒྱལ་མཚན་ལགས་སོགས་དང་། དགོན་སྡེ་ཁག་ ༥༤ དང་རིག་གཞུང་གི་ཚོགས་སྡེ་ཁག་ ༡༠ ཡི་སྐུ་ཚབ་སོགས་མཉམ་ཞུགས་གནང་ཡོད་འདུག
སྐབས་དེར་དམིགས་བསལ་སྐུ་མགྲོན་ཨ་རིའི་རོགས་ཚོགས་ཀྱི་ལས་འཆར་འགན་འཛིན་ཝི་ན་རེ་ཌི་ལགས་ཀྱིས། བོད་ཀྱི་ལོ་རྒྱུས་དང་བོད་མི་རྣམས་ཀྱིས་དཀའ་ངལ་ལ་གདོང་ལེན་བྱས་དང་བྱེད་བཞིན་པའི་གནད་དོན་ཐོག་ལ་རྒྱུས་ལོན་བྱས་ཐུབ་པའི་གོ་སྐབས་བྱུང་། བོད་མི་རྣམས་ཀྱི་སྙིང་སྟོབས་དང་ལ་རྒྱ་ལ་རྗེས་སུ་ཡི་རངས་ཞུ་རྒྱུ་དང་། ད་ལྟའི་ཆར་བོད་ཀྱི་ཆོས་དང་རིག་གཞུང་། སྐད་ཡིག་སོགས་རྩ་མེད་གཏོང་ཉེན་ཡོད་པར་བརྟེན། འཛམ་གླིང་མི་མང་ཡོངས་ལ་བོད་ཀྱི་ལོ་རྒྱུས་དང་བོད་དོན་དང་འབྲེལ་བའི་གནད་དོན་དེ་དག་གོ་རྟོགས་དང་ཁྱབ་སྤེལ་བྱ་དགོས་གལ་ཆེ་སྐོར་དང་། ལས་གཞི་འདི་བརྒྱུད་བོད་ཀྱི་རྩ་ཆེའི་ཡིག་ཆ་རྙིང་པ་རྣམས་དེང་དུས་དང་མཐུན་པའི་ཐོག་གྲངས་འཛིན་དུ་ཉར་ཚགས་བྱས་ཏེ། མི་རབས་རྗེས་མས་བེད་སྤྱོད་བྱེད་ཐུབ་པར་དམིགས་ཡོད་སྐོར་སོགས་གསུངས་སོང་།
ཆོས་རིག་དྲུང་འཕར་ཀུན་དགའ་རྒྱལ་མཚན་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་ཡིག་སྒྲོག་སྦྱངས་ཞུས་སོང་། དེ་རྗེས་སྐུ་མགྲོན་གཙོ་བོ་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས། དེ་རིང་ང་ཚོ་ཆོས་རིག་ལས་ཁུངས་ཀྱི་གོ་སྒྲིག་འོག་བོད་ཀྱི་གྲངས་འཛིན་དཔེ་མཛོད་ཀྱི་ལས་གཞིའི་ཐོག་ལ་འདུ་འཛོམས་གནང་ཡོད་པ་རེད། འདུ་འཛོམས་འདིའི་ཐོག་ལ་༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ཕེབས་པ་འདི་སྙན་སྒྲོན་ཞུས་ཟིན་པ་རེད། གསུང་འཕྲིན་ནང་གསལ་བ་ནང་བཞིན་ལོ་བརྒྱ་ཕྲག་མང་པོའི་རིང་ལ་བོད་ཀྱི་མཁས་པ་ཚོས་སྐུ་ལས་བསྐྱོན་ཏེ་སངས་རྒྱས་ཀྱི་བསྟན་པ་བཀའ་དང་བསྟན་བཅོས་གཙོ་བོར་གྱུར་པའི་བོད་ཀྱི་མཁས་པ་མང་པོ་ཞིག་གིས་བརྩམས་པའི་ཡིག་ཆ་མང་པོ་ཡོད། ང་ཚོ་བཙན་བྱོལ་དུ་སླེབས་སྐབས་བོད་མི་མང་པོ་ཞིག་གིས་སོ་སོའི་རྒྱུ་ནོར་འཁྱེར་རྒྱུའི་ཚབ་ལ་བོད་ནས་དཔེ་ཆ་རྒྱབ་ལ་འཁུར་བ་སོགས་གལ་ཆེན་པོར་རྩིས་ནས། བཙན་བྱོལ་ནང་དུ་སྔོན་མའི་མི་རབས་ཀྱི་སྐུ་ལས་བསྐྱོན་པ་མང་པོ་ཞིག་ད་ལྟ་མཇལ་རྒྱུ་དང་སློབ་སྦྱོང་བྱ་རྒྱུའི་གོ་སྐབས་ཡོད་པ་རེད། ལོ་ངོ་བརྒྱ་ཕྲག་རིང་ལ་བོད་ཀྱི་མཁས་པ་ཚོས་སྐུ་ལས་བསྐྱོན་པ་དང་། ལྷག་པར་དུ་ཆབ་སྲིད་ཀྱི་གནས་སྟངས་སྐྱོ་བོ་དེ་འདྲ་ཞིག་གི་སྐབས་སུ་གཙོ་བོ་བསྟན་པ་འཛིན་མཁན་གྱི་སྐྱེས་བུ་དམ་པ་རྣམ་པ་དང་མི་མང་ཚོའི་ངོས་ནས་ང་རང་ཚོའི་སྐད་ཡིག་དང་ནང་ཆོས་ལ་རྩ་ཆེན་པོ་བརྩི་བའི་ཐོག་ནས་ངོས་འཛིན་བྱས་ཐུབ་པ་དེ་དག་གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ཡོང་པར་བསྟུན། དེ་རིང་ཚོགས་འདུ་འདི་བརྒྱུད་ནས་དགའ་ལྡན་ཕོ་བྲང་ནས་༧རྒྱལ་བ་རིན་པོ་ཆེ་མཆོག་གི་གསུང་འཕྲིན་འདི་གསོལ་རས་བསྩལ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།
ཡང་ཁོང་གིས། གྲངས་མཛོད་ཀྱི་ལས་གཞི་འདི་དེང་དུས་དང་མཐུན་པ་ཞིག་ཡོང་རྒྱུའི་ཆེད་དུ་རེད། ལས་གཞི་འདིའི་དམིགས་ཡུལ་གཙོ་བོ་ནི་བོད་བརྒྱུད་ནང་བསྟན་དང། བོན་ཆོས་ནང་ཡོད་པའི་ང་ཚོ་བོད་ཀྱི་ཐུན་མོང་མ་ཡིན་པའི་ཆོས་འདི་དག་གྲངས་མཛོད་ནང་བཅུག་པའི་ཐོག་ནས་འཇིག་རྟེན་འདི་མ་སྟོང་བར་དུ་སངས་རྒྱས་བསྟན་པ་དང་བཀའ་བསྟན་ཆ་ཚང་ཉར་ཚགས་བྱ་ཐུབ་རྒྱུར་དམིགས་པ་ཞིག་རེད། ཅེས་དང་། དེ་རིང་འདིར་འཛོམས་པའི་དམིགས་ཡུལ་བྱེ་བྲག་པ་འདི། རྒྱ་ཆེ་ས་ནས་མ་འོངས་པར་འཛམ་གླིང་འདིའི་ནང་བོད་བརྒྱུད་ནང་བསྟན་དང་བོན་ཆོས་ཀྱི་དཔེ་ཆ་གང་ཡོད་པ་ཡོངས་རྫོགས་གཅིག་ཏུ་བསྡུས་ཏེ། བོད་པ་ཙམ་དུ་མིན་པར་འཛམ་གླིང་འདིའི་ནང་ལོགས་ལ་སློབ་སྦྱོང་བྱ་རྒྱུའི་འདོད་པ་ཡོད་ཚེ་ཁེ་ཕན་བླངས་ཐུབ་རྒྱུ་ཞིག་དང་། དེ་དག་གྲངས་མཛོད་ནང་བཅུག་ཟིན་ན་མ་འོངས་པར་འཇིག་རྟེན་མ་སྟོང་གི་བར་དུ་ཉར་ཚགས་བྱ་ཐུབ་རྒྱུའི་དམིགས་ཡུལ་ཡོད་སྐོར་དང་། ད་ལན་ཆོས་རིག་ལས་ཁུངས་ཀྱི་ལས་གཞི་འདི་ཚང་མས་མཉམ་རུབ་ཀྱི་ཐོག་ནས་ཚགས་ཚུད་པོ་ཡོང་ཐུབ་པ་ཡིན་ན། བོད་པ་གཅིག་པོ་མིན་པར་འཛམ་གླིང་ཡོངས་རྫོགས་ལ་ཕན་ཐོགས་ཀྱི་ཡོད་སྐོར་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ།
