དེ་རིང་བོད་མི་མང་སྤྱི་འཐུས་ལྷན་ཁང་གི་མདུན་དུ་ལྷ་བྲིས་ཚེ་དབང་རྡོ་རྗེ་ལགས་ཀྱིས། བོད་ཀྱི་རྒྱལ་དར་ལ་གུས་བརྩི་དང་། གང་བྱུང་བེད་སྤྱོད་གཏོང་མི་ཆོག་པའི་བགྲོ་གླེང་བཅའ་ཁྲིམས་ནང་དུ་འཁོད་ཐུབ་པ་གནང་བའི་འབོད་སྐུལ་གྱི་ལས་འགུལ་ཞིག་སྤེལ་བཞིན་འདུག
གསར་འགོད་པས་ལས་འགུལ་འདི་སྤེལ་བའི་དགོས་དམིགས་གཙོ་བོ་ག་རེ་ཡིན་སྐོར་དྲིས་པར། ཁོང་གིས། བོད་རྒྱལ་ཁབ་ཀྱི་རྒྱལ་དར་འདི་དུག་ལོག་དང་ཅ་ལག་ལ་བེད་སྤྱོད་མ་གཏོང་རོགས། བོད་ཀྱི་རྒྱལ་དར་གལ་ཆེན་པོ་བརྩིས་ནས་བཅའ་ཁྲིམས་ནང་ལ་འཇོག་རོགས་གནང་ཞུ་རྒྱུ་དང་། ཚོང་པ་དེ་ཚོས་སོ་སོའི་ཁེ་ཕན་ཆེད་དུག་ལོག་དང་ཅ་ལག་སོགས་སུ་རྒྱལ་དར་བེད་སྤྱོད་བྱེད་བཞིན་པ་མི་མང་པོ་ཞིག་གིས་བེད་སྤྱོད་བཏང་བར་བརྟེན། རྒྱ་གར་སློབ་སྦྱོང་ཡོད་མཁན་མང་པོ་ཞིག་གིས་ང་ཚོའི་རྒྱལ་དར་ལ་མཐོང་མི་འདུག་ཟེར་བའི་བསམ་འཆར་མང་པོ་ཡོང་གི་འདུག དེར་བརྟེན། ད་ལན་སྐབས་བཅུ་བདུན་པའི་བོད་མི་མང་སྤྱི་འཐུས་རྣམ་པ་བོད་ཀྱི་རྒྱལ་དར་གལ་ཆེན་དུ་བཟུང་ནས་བཅའ་ཁྲིམས་ནང་འཇོག་རྒྱུའི་འབོད་སྐུལ་ཞུ་ཡི་ཡོད། ཅེས་བརྗོད་བྱུང་།
ལས་འགུལ་དང་འབྲེལ་བའི་འབོད་སྐུལ་ཞུ་ཡིག་སྤེལ་བའི་ནང་། ཕྱི་ལོ་ ༢༠༡༠ ལོ་ནས་བཟུང་ད་བར་བོད་ཀྱི་རྩ་དོན་དང་འབྲེལ་བའི་རྒྱལ་ཁབ་ཀྱི་རྒྱལ་དར་དང་ཐུན་མོང་མ་ཡིན་པའི་བོད་ཆས་སྐོར་ལ་ཉམས་ཞིབ་ཀྱིས་དོ་སྣང་དང་། ཤེས་རིག་གི་གོ་སྒྲིག་འོག་དགེ་རྒན་ལྷན་འཛོམས་ལ་གཏམ་བཤད་དང་། གཞི་རིམ་བོད་མིའི་སློབ་གྲྭ་ཁག་ཏུ་བོད་ཀྱི་རྒྱལ་དར་སྐོར་ལ་ངོ་སྤྲོད་གཏམ་བཤད་དང་ཆེ་མཐོང་དགོས་པར་གསལ་བཤད་ལམ་སྟོན་ལན་མང་བྱེད་ཐུབ་པ་བྱུང་། ཕྱི་ལོ་ ༢༠༡༡ དང་ ༢༠༡༧ ལོར་བོད་ཀྱི་རྒྱལ་དར་དང་བོད་ཆས་སྐོར་ལ་ཉམས་ཆག་འགྲོ་ཡི་ཡོད་པའི་བསམ་འཆར་ཞིག་བཏང་ཡོད་པ་དང་། དེ་བཞིན་ཕྱི་ལོ་ ༢༠༢༡ ལོར་བོད་མི་མང་སྤྱི་འཐུས་སྐབས་ ༡༦ པའི་གྲོས་ཚོགས་ཀྱི་ལས་ཉིན་འགྲོ་བཞིན་པའི་སྐབས་སུ། སྤྱི་འཐུས་རེ་ཟུང་ནས་ཚུལ་མཐུན་མ་ཡིན་པའི་རྒྱལ་དར་གྱི་ཁ་རས་གྱོན་པ་སོགས་ལ་བརྟེན་ནས་མཇུག་འབྲས་སུ་བོད་མི་གནས་སྡོད་གང་སར་མི་མང་པོ་ཞིག་གིས་བེད་སྤྱོད་ལོག་པར་གཏོང་གི་འདུག་པས། བོད་ཀྱི་རྒྱལ་དར་ནང་དོན་མདོར་ཙམ་ཞུས་ན་དམ་པའི་ཆོས་དང༌། སྐུ། སྲུང་མ་དམར་ནག་བཅས་ཀྱི་མཚོན་དོན་ཡོད། གྲོས་ཚོགས་ཀྱི་ཚོགས་གཙོ་མཆོག་ལ་སྙན་འབུལ་ཞུས་པ་ཡིན། ཡིན་ནའང་ཕྲན་ལ་ད་དུང་བློ་ཁ་ཚིམས་པ་ཞིག་ཡོང་ཐུབ་པར་དཀའ་བ་དང་། ལྷག་པར་དུ་རང་རེའི་སྤྱི་ཚོགས་ནང་ཚོང་གཉེར་གྱི་འདོད་རྔམ་ལ་བརྟེན་ནས་བོད་ཀྱི་རྒྱལ་དར་ལ་མཐོང་ཆུང་གིས་ཚད་གཞི་དང་ཚོན་མདངས་འདྲ་མིན། དེ་བཞིན་འབྲེལ་མེད་དངོས་ཆས་དང༌། རས་གོས་སོགས་གང་བྱུང་ལ་བེད་སྤྱོད་བྱས་པའི་རྐྱེན་གྱིས་ཉམས་རྒུད་འགྲོ་བཞིན་པ་མངོན་པའི་ཐོག ཕྱི་མི་ནས་ཀྱང་བོད་ཀྱི་རྒྱལ་དར་ལ་བོད་མི་རྣམས་ཀྱིས་དོ་སྣང་དགོས་པའི་བསམ་འཆར་ཡང་ཡོང་བཞིན་འདུག ༧གོང་ས་རྒྱལ་བ་རིན་པོ་ཆེ་མཆོག་མཆོག་ནས་ཀྱང་གཙུག་ལག་ཁང་དུ་གཞུང་འབྲེལ་མཛད་སྒོ་ནམ་ཡིན་ལ་རྒྱལ་དར་སྒྲེང་འཛུགས་སྐབས་སྐུ་བཞེངས་ཀྱིས་གུས་ཞབས་གནང་བ་དང་། གནས་ཡུལ་རྒྱ་གར་རྒྱལ་ཁབ་ཀྱི་རྒྱལ་དར་ལ་ཆེ་མཐོང་དང་རྩ་ཆེན་འཛིན་གྱི་ཡོད་པ་ལྟར་བོད་ཀྱི་རྒྱལ་དར་ལའང་གུས་བརྩི་ལྡན་པ་ཡོང་རྒྱུ་དང་། ཚོགས་གཙོ་མཆོག་དང་རྒྱུན་ལས་ལྷན་རྒྱས་ཀྱིས་ད་ལན་བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་སྐབས་རྒྱལ་དར་དེ་གང་བྱུང་ལ་བེད་སྤྱོད་གཏོང་མི་ཆོག་པའི་བགྲོ་གླེང་ཐོག་བཅའ་ཁྲིམས་ཀྱི་དོན་ཚན་ནང་དུ་ཅི་ནས་ཀྱང་འཁོད་ཐུབ་པ་གནང་རྒྱུའི་འབོད་སྐུལ་ཞུ་ཡི་ཡོད། ཅེས་འཁོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
