རྒྱ་གཞུང་གིས་མཚོ་བོད་ལྕགས་ལམ་བཟོ་ལས་ཁང་ཟེར་བའི་སྤྱི་ཁྱབ་འགན་འཛིན་གཞོན་པ་ཟུར་པ་ཝང་ཀྲུང་ཡུས་ཀྱིས་རྒྱ་སྒོར་ཁྲི་ ༢༥༨༧ ལྷག་གི་ལྐོག་རྔན་བླངས་བའི་ནག་ཉེས་འོག་ལོ་ ༡༣ རིང་བཙོན་འཇུག་ཁྲིམས་ཐག་བཅད་ཡོད་འདུག
ཞི་ཅིན་ཕིན་གཞུང་གིས་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བའི་མིང་འོག་ནས་རྒྱ་ནག་དང་། རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག ཡུ་གུར་སོགས་ཀྱི་དཔོན་རིགས་མང་པོ་ཞིག་ལ་ལྐོག་ཟ་རུལ་སུངས་དང་ལྐོག་རྔན་བླངས་བ། དམར་ཤོག་གཞུང་ལ་བློ་སེམས་མི་དཀར་བ་སོགས་ཀྱི་ནག་ཉེས་འོག་ཁྲིམས་ཆད་ཕོག་གི་ཡོད་པ་ལྟར། ཟླ་འདིའི་ཕྱི་ཚེས་ ༡ ཉིན་ཀན་སུའུ་ཞིང་ཆེན་ཆིང་དབྱང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། མཚོ་བོད་ལྕགས་ལམ་བཟོ་ལས་ཁང་ཟེར་བའི་དམར་ཤོག་དྲུང་ཡིག་གཞོན་པ་དང་། སྤྱི་ཁྱབ་འགན་འཛིན་གཞོན་ཟུར་པ་ཝང་ཀྲུང་ཡུས་(王忠玉)ཀྱིས་ལྐོག་རྔན་རྒྱ་སྒོར་ཁྲི་ ༢༥༨༧ བླངས་བའི་ནག་ཉེས་བཙུགས་ཏེ་ལོ་ ༡༣ རིང་བཙོན་འཇུག་ཁྲིམས་ཆད་དང་། རྒྱ་སྒོར་ས་ཡ་ ༡ དང་འབུམ་ ༢ ཁྲིམས་ཆད། མི་སྒེར་གྱི་རྒྱུ་ནོར་གཞུང་བཞེས་བཏང་ཡོད་འདུག
དེའི་ཐད་ཀན་སུའུ་ཞིང་ཆེན་ཆིང་དབྱང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། ཝང་ཀྲུང་ཡིས་ཀྱིས་ཕྱི་ལོ་ ༡༩༩༡ ནས་ཕྱི་ལོ་ ༢༠༡༧ ལོའི་བར་དུ་མཚོ་བོད་ལྕགས་ལམ་བཟོ་ལས་ཁང་ཟེར་བའི་དམར་ཤོག་དྲུང་ཡིག་གཞོན་པ་དང་། སྤྱི་ཁྱབ་འགན་འཛིན་གྱི་གཞུང་འབྲེལ་གོ་གནས་བེད་སྤྱོད་ལོག་པར་བཏང་སྟེ། ལས་གནས་དང་མི་སྒེར་གྱི་ཁེ་ལས། ལས་གྲྭ་འགན་ལེན། གོ་གནས་སྤར་བ། གྱོད་གཞི་མཐུན་སྦྱོར་སོགས་བྱས་ཡོད་སྐོར་དང་། ཕྱི་ལོ་ ༢༠༡༧ ལོར་རྒན་ཡོལ་ཞུས་རྗེས་ཀྱང་སྔོན་མའི་གོ་གནས་བེད་སྤྱོད་བྱས་ཏེ་ལྐོག་རྔན་རྒྱ་སྒོར་ཁྲི་ ༥༥ ལྷག་བླངས་ཡོད་པ་སོགས་ཀྱི་ནག་ཉེས་བཙུགས་ཏེ་ལོ་ ༡༣ རིང་བཙོན་འཇུག་ཁྲིམས་ཆད་དང་། རྒྱ་སྒོར་ས་ཡ་ ༡ དང་འབུམ་ ༢ ཉེས་ཆད་བཅད་ཡོད་པ་མ་ཟད་རྒྱུ་ནོར་གཞུང་བཞེས་བཏང་ཡོད་འདུག
ཝང་ཀྲུང་ཡུས་ནི་ཕྱི་ལོ་ ༡༩༥༧ ལོར་རྒྱ་ནག་ཧྲན་ཞི་ཝན་ཧྲི་རུ་སྐྱེས་ཡོད་ཅིང་། ཕྱི་ལོ་ ༡༩༧༥ ལོའི་ཟླ་ ༤ པར་རྒྱ་ནག་དམར་ཤོག་ཚོགས་པའི་ནང་དུ་ཞུགས་འདུག ཕྱི་ལོ་ ༡༩༧༥ ནས་ ༢༠༠༦ བར་ཐའེ་ཡོན་ལྕགས་ལམ་དང་ཀོང་ཀྲུག་ལྕགས་ལམ་ལས་ཁུངས་ཀྱི་མགོ་ཁྲིད་བྱས་ཡོད་ཅིང་། ཕྱི་ལོ་ ༢༠༠༦ ནས་ ༢༠༠༩ བར་དུ་མཚོ་བོད་ལྕགས་ལམ་ལས་བཟོ་ཁང་ཟེར་བའི་སྤྱི་ཁྱབ་གཞོན་པ་དང་། བཟོ་ལས་ཁང་དེའི་དམར་ཤོག་ཚོགས་པའི་རྒྱུན་ལས་བྱས། ཕྱི་ལོ་ ༢༠༠༩ ནས་ ༢༠༡༣ བར་བཟོ་ལས་ཁང་དེའི་དམར་ཤོག་ཚོགས་པའི་དྲུང་ཡིག་དང་། ལྷ་ས་ནས་གཞིས་ཀ་རྩེ་བར་གྱི་ལྕགས་ལམ་འཛུགས་སྐྲུན་ཚན་ཁག་གི་སློབ་སྟོན་པ། མཚོ་བོད་ལྕགས་ལམ་འཛུགས་སྐྲུན་ལམ་སྟོན་ཚོགས་ཆུང་གི་འགན་འཛིན་གཞོན་པ། ལན་ཀྲུག་ལྕགས་ལམ་ཚན་པའི་དམར་ཤོག་དྲུང་ཡིག་བྱས། ཕྱི་ལོ་ ༢༠༡༣ ནས་ ༢༠༡༧ མཚོ་བོད་ལྕགས་ལམ་བཟོ་ལས་ཁང་གི་དམར་ཤོག་དྲུང་ཡིག་གཞོན་པ་དང་། སྤྱི་ཁྱབ་འགན་འཛིན་བཅས་བྱས་ཡོད་འདུག
མཚོ་བོད་ལྕགས་ལམ་ནི་ཕྱི་ལོ་ ༢༠༠༦ ལོ་ནས་བཟུང་རྒྱ་གཞུང་གིས་མཚོ་སྔོན་གྱི་ཟི་ལིང་ནས་རྒྱལ་ས་ལྷ་སའི་བར་ཤར་གཏོང་བྱེད་བཞིན་པའི་ལྕགས་ལམ་ཞིག་ཡིན་ཞིང་། ལྕགས་ལམ་ཡོངས་ཀྱི་རིང་ཚད་ལ་སྤྱི་ལེ་ ༡༩༧༡ ཡོད། འདས་ལོར་རྒྱ་གཞུང་གིས་ད་ཡོད་ཀྱི་མཚོ་བོད་ལྕགས་ལམ་དེ་གོར་མོ་ནས་ལྷ་སའི་བར་ལྕགས་ལམ་གློག་རླངས་ཅན་དུ་བསྒྱུར་རྒྱུ་དང་། ཁྲོན་བོད་ལྕགས་ལམ་ལྷ་ས་ནས་ཉིང་ཁྲིའི་བར་ཕྱོགས་གཉིས་ཅན་གྱི་ལམ་ཐིག་བཟོ་རྒྱུ། ལྷ་ས་ནས་གཞིས་རྩེའི་ལྕགས་ལམ་ལ་ཕྱོགས་གཉིས་ཅན་གྱི་ལམ་ཐིག་དང་གློག་རླངས་ཅན་བསྒྱུར་རྒྱུ་ཡིན་པ་སོགས་བསྒྲགས་འདུག
ཕྱི་ལོ་ ༢༠༣༥ ལོའི་བར་དུ་གཞིས་རྩེ་ནས་ལྷ་ས་དང་ལྷོ་ཁ། ཉིང་ཁྲི། ཆབ་མདོ། ཁྲེན་ཏུའུ་བར་དང་། མངའ་རིས་ནས་ནག་ཆུ་དང་ཆབ་མདོ་བར་དང་། ཧོ་ཐན་ནས་མངའ་རིས་དང་གཞིས་རྩེ། ལྷ་ས། ལྷོ་ཁ། ཉིང་ཁྲི། སེམས་ཀྱི་ཉི་ཟླ། ལི་ཅང་བར། ཟི་ལིང་ནས་གོར་མོ་དང་ནག་ཆུ། ལྷ་སའི་བར། ཟི་ལིང་ནས་ཡུལ་ཤུལ་དང་ཆབ་མདོ་བར་བཅས་ལ་ལྕགས་ལམ་གྱིས་མཐུད་ཀྱི་ཡོད་འདུག དེ་བཞིན་ཕྱི་ལོ་ ༢༠༣༥ ལོའི་ལོ་མཇུག་བར་དུ་ལྷ་ནས་མལ་གྲོ་གུང་དཀར་བར་གྱི་ལྕགས་ལམ་བསྐྲུན་ཚར་བ་བྱ་རྒྱུ་དང་། ས་དགའ་ནས་སྒེར་རྩེ་དང་། གཞིས་རྩེ་ནས་ཤན་རྩ་དང་དཔལ་མགོན་བར། མལ་གྲོ་གུང་དཀར་ནས་སྟེང་ཆེན་བར། སྣེ་གདོང་ནས་མཚོ་སྣ་བར། གཏིང་སྐྱེས་ནས་ཁང་དམར་བར། སྨན་གླིང་ནས་མེ་ཏོག་བར་དང་རྫ་ཡུལ་བར། ཆབ་མདོ་ནས་མཛོད་དགེ་བར་སོགས་སྤྱི་ལེ་ ༢༥༡༤ ཡོད་པའི་ལྕགས་ལམ་བསྐྲུན་རྒྱུར་ཞིབ་འཇུག་ལག་བསྟར་བྱ་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ་སྐལ་བཟང་སྦྱིན་པ།
