རྒྱ་ནག་གཞུང་གིས་ཨ་རུ་ནཱ་ཅལ་ཁུལ་གྱི་ས་མིང་ ༣༠ བརྗེ་བསྒྱུར་བཏང་སྟེ་ས་ཁུལ་དེ་དག་བོད་ཀྱི་ས་ཁོངས་ཡིན་སྐོར་བསྒྲགས་པ་དང་། རྒྱ་གར་གྱི་གནད་ཡོད་མི་སྣ་ཁག་ཅིག་གིས་རྒྱ་ནག་ལ་རྒོལ་ལན་གྱི་ཚུལ་དུ་བོད་ཀྱི་ས་མིང་ ༦༠ བརྗེ་བསྒྱུར་བྱེད་པའི་དགོས་འདུན་བཏོན་འདུག
ཟླ་འདིའི་ཕྱི་ཚེས་ ༡༩ ཉིན་རྒྱ་གར་དབུས་གཞུང་གི་གོ་ལའི་ཚན་རིག་དང་བཟའ་ཆ་ལས་སྣོན་བློན་ཆེན་སྐུ་ཞབས་(Kiren Rijiju) ལགས་ཨ་རུ་ནཱ་ཅལ་མངའ་སྡེའི་ནུབ་ཕྱོགས་གྲོས་ཚོགས་འཐུས་མིར་བསྐྱར་དུ་བཞེངས་གཏན་ཁེལ་ཡོད་པ་དང་བསྟུན། ཁོང་གིས་རང་ཉིད་སྐྱེས་ཡུལ་ཏེ་ཨ་རུ་ན་ཅལ་མངའ་སྡེའི་ཁྱབ་ཁོངས་ས་གནས་ཁག་ཅིག་ལ་རྒྱ་ནག་གཞུང་གིས་ས་མིང་གསར་པ་བཏགས་པ་དེར་སྐྱོན་བརྗོད་གནང་བའི་ནང། རྒྱ་ནག་གཞུང་གིས་ཁུངས་ལུང་མེད་པའི་བདག་དབང་རྩོད་བཞིན་པ་རེད་དེ། དོན་དངོས་ཐོག་དེས་ཨ་རུ་ན་ཅལ་མངའ་སྡེ་དེ་ཁ་བྲལ་ཐབས་མེད་པའི་རྒྱ་གར་གྱི་ཆ་ཤས་ཡིན་པའི་བདེན་པར་འགྱུར་བ་གཏོང་ཐུབ་ཀྱི་མེད། ཅེས་ནན་བརྗོད་བྱས་འདུག
ཡང་ཟླ་འདིའི་ཕྱི་ཚེས་ ༣ ཉིན་རྒྱ་གར་ཨ་སམ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཧི་མན་ཌི་(Himanta Biswa Sarma ) ལགས་ཀྱིས་རྒྱ་ནག་གཞུང་གིས་བྱེད་འབབ་དེར་སྐྱོན་བརྗོད་དྲག་པོ་བྱས་པ་དང་བསྟུན། རྒྱ་གར་གྱིས་གཞུང་འབྲེལ་ཐོག་ནས་རྒྱ་ནག་གིས་རྒྱ་གར་ས་གནས་ཁག་ཏུ་དོན་མེད་མིང་གསར་པ་བཏགས་པར་ངེས་པར་དུ་རྒོལ་ལན་ཤུགས་ཆེན་སློག་དགོས། ང་ཚོས་རྒྱ་ནག་གི་ལྟ་རྟོག་འོག་ཡོད་པའི་བོད་ཀྱི་ས་ཚིགས་དྲུག་ཅུ་ལྷག་ལ་ས་བབ་ཆགས་ཚུལ་དང་འབྲེལ་ནས་མིང་འདོགས་དགོས་པའི་རེ་བ་ཞུ་ཡི་ཡོད། ཅེས་གསུངས་འདུག
དེ་བཞིན། ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། སྤོབས་པར་འོས་པའི་རྒྱ་གར་གྱི་མི་སེར་དང་ཨ་རུ་ན་ཅལ་གྱི་ས་གནས་ས་ཐོག་གི་མི་ཞིག་ཡིན་པའི་ངོས་ནས། རྒྱ་ནག་གིས་ཨུ་རུ་ན་ཅལ་གྱི་ས་མིང་བརྗེ་བསྒྱུར་བཏང་བར་ང་དང་ཨ་རུ་ན་ཅལ་མངའ་སྡེ་མི་མང་གིས་མཐའ་གཅིག་ཏུ་ངོ་རྒོལ་བྱེད་བཞིན་ཡོད་ཅེས་ལན་འདེབས་བྱས་འདུག
ཕྱི་ཟླ ༣ ཚེས་ ༣༠ ཉིན་རྒྱ་ནག་དམངས་སྲིད་ལྷན་ཁང་(Ministry of Civil Affairs) གིས་བོད་ལྷོ་རྒྱུད་ཁུལ་གྱི་ས་ཁུལ་ཁག་ཅིག་ལ་མིང་གསར་པ་བཏགས་ནས་ཁ་གསབ་བྱས་ཡོད་ལུགས་ཀྱི་ཐོ་གཞུང་ཞིག་ཕྱིར་བསྒྲགས་བྱས་ཡོད་པའི་ནང་། རྒྱ་གར་ཨ་རུ་ནཱ་ཅལ་ཁུལ་གྱི་རི་ ༡༢ དང་། རྒྱུག་ཆུ་ ༤། མཚེའུ་ ༡། ལ་ཆུང་ ༡ དང་མི་མང་གནས་སྡོད་བྱ་ཡུལ་ ༡༡ བཅས་སུ་བོད་ཡིག་དང་རྒྱ་ཡིག་ཕིན་ཡེན་ཡོད་པའི་མིང་གསར་པ་བཏགས་ཏེ། ཁུལ་དེ་དག་བོད་ཀྱི་ལྷོ་མོན་ཏེ་རྒྱ་ནག་གཞུང་གིས་འཁྱོག་བརྗོད་བྱེད་ཀྱིན་ཡོད་པ་རེད།
རྒྱ་གཞུང་གིས་རྒྱ་གར་ཨ་རུ་ནཱ་ཅལ་མངའ་སྡེ་ནི་བོད་ཀྱི་ལྷོ་མོན་ས་ཁུལ་ཡིན་པས་རྒྱ་ནག་གི་མངའ་ཁུངས་ཡིན་ལུགས་ཀྱི་འཁྱོག་བརྗོད་ལན་མང་བྱས་ཡོད་པ་མ་ཟད། འདས་པའི་ལོ་ཤས་རིང་ཨ་རུ་ནཱ་ཅལ་གྱི་ས་གནས་མང་དག་ཅིག་ལ་མིང་གསར་པ་ཐེངས་བཞི་ལ་བཏགས་ནས། ཁུལ་དེའི་རི་ཆུ་ནགས་གསུམ་གྱི་མིང་བསྒྱུར་ཐབས་བྱས་ཡོད་ཅིང་། ད་ལན་ཧ་དོང་ལ་ཟེར་བ་དང་། ཁྲི་ལམ་ཚོ། འབེ་རྩེ་གླིང་། མཁར་མང་ཆུ། མག་སྒོ། རླི་ཚོ། འཁྱགས་བཏུམ་རི། འབྲས་སྤྲུངས་རི། མཐོ་ལྕོག་རི། བདེ་པོ་རི། ཅི་ལོ། མཐོ་པོ་ལ། ཨ་ཤིང་རྩེ་ལ། སྤྲིན་དཀར་ལ། སྤང་སྒོར། མོ་ཤིང་། ཀུན་རིན། རིན་རྐང་། རྟ་སྒ་ལ། གཡང་བཟང་ཆུ། ཉ་མོ་རི་ཆུ། ཆུ་སྒང་། རྡོ་རི། ལུང་འགོ་ཁ་ལ། སྤང་ཁུག་ཆུ་འཛོམས། སོ་ལྟ་མཚོ། ད་བུ་ཧོ་གོང་། ཟླ་བ་སྒང་། གཉའ་ཨ་ཤ་བི་ལ་ཆུ། སྟ་ཀ་ཤིང་ཟེར་བ་སོགས་ལ་མིང་གསར་པ་བཏགས་ཡོད་འདུག
འདས་ལོའི་ཕྱི་ཟླ ༤ ནང་རྒྱ་ནག་རྒྱལ་སྲིད་སྤྱི་ཁྱབ་ཁང་ས་མིང་དོ་དམ་ལྷན་ཁང་ཟེར་བས་བོད་ལྷོ་རྒྱུད་ཁུལ་གྱི་ས་ཁུལ་ཁག་ཅིག་ལ་མིང་བཏགས་ཡོད་ལུགས་ཀྱི་ཐོ་གཞུང་ཞིག་ཕྱིར་བསྒྲགས་བྱས་པའི་ནང་། རྒྱ་གར་བྱང་ཤར་ཁུལ་གྱི་ས་གནས་ ༢༦ ལྷག་བོད་མཚོ་སྣ་རྫོང་དང་ལྷུན་རྩེ་རྫོང་། རྫ་ཡུལ་རྫོང་། མེ་ཏོག་རྫོང་བཅས་ཀྱི་ཁོངས་སུ་བཅུག་ཡོད་ལ། དེ་བཞིན་ཕྱི་ལོ་ ༢༠༡༧ ཟླ་ ༤ ཚེས་ ༡༩ ཉིན་རྒྱ་ནག་གཞུང་གིས་ཨ་རུ་ནཱ་ཅལ་ཁུལ་གྱི་ཨོ་རྒྱན་གླིང་དང་མི་ལ་རི། མཆོད་རྟེན་དཀར་པོ་རི། སྨན་ཆུ་ཁ། པུས་མོའི་ལ། ནམ་མཁའ་ཕུབ་རི་བཅས་ཀྱང་རྒྱ་ནག་གི་མངའ་ཁོངས་ཡིན་ལུགས་ཀྱི་དྲིལ་བསྒྲགས་བྱས་ཡོད་པ་མ་ཟད། གྷོ་གྷུལ་ (Google) སོགས་སུའང་ནང་འཇུག་བྱས་འདུག
གསར་འགོད་པ་དང་རྩོམ་སྒྲིག་བྱེད་མཁན། སྐལ་བཟང་སྦྱིན་པ།
