བོད་མི་ཞིག་ལ་གསང་བའི་ཁྲིམས་ཐག་ལོ་གསུམ་བཅད་འདུག

རྒྱ་ནག་གཞུང་གིས་བོད་མངའ་རིས་ས་ཁུལ་མཚོ་ཆེན་རྫོང་ནས་ཡིན་པའི་བོད་མི་བསམ་གཏན་ལགས་ལ་གསང་བའི་ཐོག་ནས་ལོ་གསུམ་བཙོན་འཇུག་ཁྲིམས་ཐག་བཅད་པ་དང་ཁོང་གི་གཅུང་མོར་གཅར་རྡུང་བཏང་སྟེ་མཚོ་ཆེན་རྫོང་སྨན་ཁང་དུ་བསྐྱལ་འདུག

ཟླ་འདིའི་ཕྱི་ཚེས་ ༢ ཉིན་བོད་མངའ་རིས་ས་ཁུལ་མཚོ་ཆེན་རྫོང་ནས་ཡིན་པའི་བོད་མི་བསམ་གཏན་ཞུ་བ་ཞིག་ལ་རྒྱ་ནག་གཞུང་གིས་གསང་བའི་ཁྲིམས་ཐག་བཅད་ཡོད་འདུག དེའི་སྐོར་ལ་འབྲེལ་ཡོད་བོད་མི་ཞིག་གིས་འདི་ག་བོད་ཀྱི་དུས་བབ་གསར་འགོད་པར་གནས་ཚུལ་མཁོ་སྤྲོད་གནང་བ་ལྟར་ན། བསམ་གཏན་ལགས་ལ་ཁྲིམས་ཐག་བཅད་དགོས་དོན་ག་རེ་ཡིན་མིན་གསལ་ཁ་གང་ཡང་མེད་ལ།  ཁོང་འཛིན་བཟུང་བྱས་ནས་ཟླ་གསུམ་ལྷག་ཕྱིན་རྗེས་གཞི་ནས་ཁྲིམས་ཐག་བཅད་ཟིན་པ་ཤེས་རྟོགས་བྱུང་ཡོད་འདུག ཡིན་ནའང་། ད་ལྟའི་ཆར་ཁོང་གང་དུ་བཙོན་འཇུག་བྱས་ཡོད་མེད་དང་། གཟུགས་གཞིའི་གནས་སྟངས་སོགས་ཤེས་རྟོགས་མ་ཐུབ་པར་ལྷག་ཡོད་འདུག

ཡང་གནས་ཚུལ་མཁོ་སྤྲོད་པ་དེས། བསམ་གཏན་ལགས་སུ་གསང་བའི་ཁྲིམས་ཐག་བཅད་རྗེས། ཁོང་གི་གཅུང་མོ་དཔལ་སྒྲོན་ལགས་མཚོ་ཆེན་རྫོང་ཉེན་རྟོག་ཁང་དུ་ཕྱིན་ནས་ཁོང་འཛིན་བཟུང་བྱས་པ་དང་གསང་བའི་ཁྲིམས་ཐག་གཅོད་དགོས་དོན་ག་རེ་ཡིན་མིན་གསལ་པོ་བཟོ་དགོས་ཞེས་རེ་སྐུལ་བྱེད་སྐབས། ཉེེན་རྟོག་པ་དང་ཁ་རྩོད་ཤོར་ཏེ་ཁོང་མོར་གཅར་རྡུང་ཚབས་ཆེན་བཏང་བར་བརྟེན། མཚོ་ཆེན་རྫོང་གི་སྨན་ཁང་དུ་བསྐྱལ་ནས་སྨན་བཅོས་བྱེད་བཞིན་ཡོད་སྐོར་འགྲེལ་བརྗོད་གནང་བྱུང་།

ད་ལྟ་རང་ལོ ༣༦ ཡིན་པའི་བོད་མི་བསམ་གཏན་ལགས་ནི་བོད་མངའ་རིས་ས་ཁུལ་མཚོ་ཆེན་རྫོང་ཆུ་ལྷོ་གྲོང་ཚོ་ནས་ཡིན་ཞིང་། ཕ་མིང་ལ་རྡོ་རྗེ་ཟེར་གྱི་ཡོད་འདུག

རྩོམ་སྒྲིག་པ། པདྨ་མཚོ།