རྒྱ་གར་གྱི་གློག་བརྙན་འཁྲབ་སྟོན་པ་ཀང་གྷ་ནཱ་ཡིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་རྗེས་མོའི་མི་ཚེའི་ནང་ཆེས་ཁྱད་པར་ཅན་གྱི་ཉིན་མོ་ཞིག་ཡིན་སྐོར་བརྗོད་འདུག
དེ་རིང་རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ཀང་གྷ་ནཱ་ (Kangana Ranaut) དང་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་རྗེ་རམ་ (Jai Ram Thakur) མཆོག་རྣམ་གཉིས་བཞུགས་སྒར་རྒྱལ་བའི་ཕོ་བྲང་དུ་ཆེད་བཅར་གྱིས། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་འདུག
མཇལ་ཁ་གྲུབ་རྗེས་རྒྱ་གར་གྱི་གློག་བརྙན་འཁྲབ་སྟོན་པ་ཀང་གྷ་ནཱའི་སྒེར་གྱི་ཨིན་སི་ཌ་ར་གྷ་རམ་ (Instagram) སྟེང་། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ལ་དངོས་སུ་མཇལ་བཅར་ཞུ་རྒྱུ་བྱུང་བར་དགའ་ཚོར་ཆེན་པོ་བྱུང་ལ། ངའི་མི་ཚེ་ནང་ཆེས་ཁྱད་པར་ཅན་གྱི་དུས་ཚེས་ཤིག་ཡིན། ཞེས་བཀོད་འདུག
འདས་ལོར་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་ཕྲུ་གུ་ཆུང་ཆུང་ཞིག་ལ་ཐུགས་བརྩེ་ཆེན་པོས་ཞལ་རྩེད་གནང་བའི་གནས་ཚུལ་དེ་དང་འབྲེལ་ཏེ།གློག་བརྙན་འཁྲབ་སྟོན་མ་ཀང་གྷ་ནཱ་ཡིས་ཟུར་ཟའི་རྣམ་པ་དང་འབྲེལ་ནས་བསམ་ཚུལ་ཐུང་ཐུང་ཞིག་བྲིས་པའི་རྐྱེན་གྱིས་རྒྱ་གར་གཙོ་བོར་གྱུར་བའི་འཛམ་གླིང་གི་དད་ལྡན་དོན་གཉེར་ཅན་ས་ཡ་མང་པོར་ཕོག་ཐུག་ཆེན་པོ་བྱུང་བར་བརྟེན། ཁོང་མོས་ཡོངས་གྲགས་སུ་དགོངས་དག་ཞུས་པ་མ་ཟད། མོ་རང་ནང་པ་སངས་རྒྱས་ཀྱི་ཆོས་ལ་ཡིད་ཆེས་ཡོད་པ་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཚེ་ཧྲིལ་པོར་འགྲོ་བ་མིའི་བདེ་དོན་སླད་མཛད་འཁུར་བཞེས་ཡོད་སྐོར་སོགས་བཤད་ཡོད་པ་རེད།
ཀང་གྷ་ནཱ་ནི་རྒྱ་གར་གྱི་བུད་མེད་གློག་བརྙན་འཁྲབ་སྟོན་པ་གྲགས་ཅན་ཞིག་ཡིན་པ་མ་ཟད། ཟླ་འདིའི་ཕྱི་ཚེས་ ༡༩ ཉིན་རྒྱ་གར་རྒྱལ་ཡོངས་འོས་བསྡུ་ཆེན་མོའི་ནང་ཧི་མ་ཅལ་མངའ་སྡེའི་མན་ཌི་ (Mandi) ས་ཁུལ་ནས་བྷི་ཇེ་པི་ (BJP) ཆབ་སྲིད་ཚོགས་པའི་གྲོས་ཚོགས་འོག་མའི་འཐུས་མིར་ལངས་རྒྱུ་ཡིན་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
རྒྱ་གར་གྱི་ཧིན་རྡུ་རིང་ལུགས་པ་ཚོས་༧གོང་ས་མཆོག་ཆབ་སྲིད་ཀྱི་ལག་ཆ་བྱེད་པ་མཐོང་དུས་ངོ་མ་ཞེ་སྣང་རེད།