ཨ་རིར་གནས་སྡོད་རྒྱ་ནག་གཞུང་ཚབ་པ་ཧ་ཝར་ཌི་སློབ་ཆེན་དུ་འགྲོ་རྒྱུར་ངོས་ལེན་མེད་པའི་བསྒྲགས་གཏམ་སྤེལ་བ་དང་སྦྲགས་སློབ་གྲྭའི་ནང་ངོ་རྒོལ་ལས་འགུལ་སྤེལ་རྒྱུ་ཡིན་འདུག
དེ་རིང་ཨ་རིའི་ཧ་ཝར་ཌི་གཙུག་ལག་སློབ་ཆེན་དུ་ཨ་རིར་ཡོད་པའི་རྒྱ་ནག་གཞུང་ཚབ་པ་ཞའེ་ཧྥང་ (Xie Feng) ཟེར་བ་ཡོང་ནས་གཏམ་བཤད་སྤེལ་རྩིས་ཡོད་པར། ཧ་ཝར་ཌིའི་བོད་རིགས་སློབ་མ་དང་ས་གནས་བོད་རིགས་ཚོགས་པ། ཐའེ་ཝན་དང་ཡུ་གུར་སོགས་ཀྱི་ལས་འགུལ་བ་དང་སློབ་མ་རྣམས་ནས་ངོ་རྒོལ་ལས་འགུལ་སྤེལ་རྒྱུ་ཡིན་པ་མ་ཟད། ཁོ་ཚོས་ཞོ་ཧྥན་ཟེར་བར་ངོ་རྒོལ་བསྒྲགས་གཏམ་ཞིག་ཀྱང་སྤེལ་གནང་འདུག
དེ་འབྲེལ་ངོ་རྒོལ་བསྒྲགས་གཏམ་ནང་། བོད་མི་དང་ཐའེ་ཝན། ཡུ་གུར་བཅས་ཀྱི་ཧ་ཝར་ཌི་སློབ་ཆེན་གྱི་སློབ་མ་རྣམས་དང་ས་གནས་བོད་རིགས་ཚོགས་པ་སོགས་ཀྱིས། རྒྱ་ནག་གི་གཞུང་ཚབ་ཞའེ་ཧྥང་ཟེར་བ་ཧ་ཝར་ཌིར་ཡོང་བར་ངོས་ལེན་མེད་པའི་ངོ་རྒོལ་ལས་འགུལ་སྤེལ་རྒྱུ་ཡིན། ཞི་ཅིན་ཕིན་གྱི་སྣེ་ཁྲིད་པའི་དམར་ཤོག་ཚོགས་པའི་དྲག་གནོན་དབང་སྒྱུར་འོག ཞོ་ཧྥང་འགྲོ་བ་མིའི་ཐོབ་ཐང་རྡོག་རོལ་བཏང་བའི་གནད་དོན་མང་པོའི་ནང་ཚུད་ཅིང་། ཞའེ་ཧྥང་ཨ་རིའི་ནང་སྐོར་སྐྱོད་བྱེད་བཞིན་པ་དེས་བོད་དང་ཤར་ཊུ་ཀི་སི་ཐན་ལ་བཙན་འཛུལ་བྱས་ཏེ་མི་རིགས་སྡེབ་གསོད་གཏོང་བ་དང་། ཐའེ་ཝན་དྲག་པོའི་དམག་ཤུགས་ཐོག་ནས་བཙན་འཛུལ་བྱ་རྒྱུ་སོགས་ཀྱི་གནས་ཚུལ་བརྒྱུད་བསྒྲགས་བྱེད་བཞིན་ཡོད།
ཧ་ཝར་ཌི་ཀེ་ནེ་ཌི་སློབ་གྲྭ་ཆེན་མོས་རང་གི་སློབ་མ་རྣམས་ལ་དབང་བའི་སློབ་གྲྭའི་ཁོར་ཡུག་ཏུ། སྤྱི་ཚོགས་གཞན་ལ་དྲག་གནོན་དང་བཙན་འཛུལ་བྱེད་མཁན་གྱི་དྲིལ་བསྒྲགས་བྱེད་པའི་སྡིངས་ཆ་བསྐྲུན་རྒྱུ་མེད། ཕྱི་ལོ་ ༢༠༡༩ ལོར་ཞོ་ཧྥང་ཧོང་ཀོང་ནང་བསྐོ་གཞག་བྱས་པའི་རྒྱ་ནག་ཕྱི་སྲིད་ལྷན་ཁང་གི་སྐུ་ཚབ་ཡིན་དུས། ཁོས་ཧོང་ཀོང་མི་མང་ས་ཡ་ ༢ ལྷག་ནས་ཉེས་ཅན་རྩིས་སྤྲོད་ཀྱི་ཁྲིམས་འཆར་ལ་ཞི་རྒོལ་ལས་འགུལ་སྤེལ་སྐབས། ལས་འགུལ་བའི་ཐོག་དྲག་གནོན་ཚབས་ཆེན་བྱས་ཏེ་ཧོང་ཀོང་གི་གཞི་རྩའི་རང་དབང་ལ་འཇིགས་སྐུལ་དང་རྡོག་རོལ་བཏང་ཡོད།
ཕྱི་ལོ་ ༢༠༢༣ ལོར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་དམིགས་བསལ་ལས་དོན་ཚོགས་ཆུང་ནས་བོད་མི་ལོ་ན་བཞི་ནས་བཅོ་བརྒྱད་བར་གྱི་བྱིས་པ་བརྒྱ་ཆ་བརྒྱད་བཅུ་བཙན་ཤེད་ཀྱིས་ཕ་མ་དང་ཁ་བྲལ་དུ་བཏང་སྟེ་རྒྱ་ཡིག་སློབ་ཁྲིད་བྱེད་སའི་བཅའ་སྡོད་སློབ་གྲྭར་བཅུག་པ་དང་། བཙན་ཤེད་ཀྱི་ཐབས་ལམ་དེ་རིགས་ཀྱིས་བོད་པའི་བྱིས་པ་རྣམས་རྒྱ་ནག་གི་རིག་གཞུང་དང་མཉམ་བསྲེས་བྱེད་ཐབས་དང་། རྒྱ་ནག་དམར་ཤོག་ཚོགས་པར་བློ་དཀར་སེམས་དཀར་བཟོ་ཐབས་བྱེད་ཀྱི་ཡོད། ཡུ་གུར་དང་ལྷོ་སོག་སློབ་ཕྲུག་ཚོར་བཙན་ཤེད་ཀྱིས་ཆོས་ལུགས་སློབ་གསོ་སྤྲོད་པའི་ལམ་ལུགས་དེ་དང་ཕྱོགས་མཚུངས་ཤིག་ལག་བསྟར་བྱེད་བཞིན་ཡོད།
གསར་འགོད་པ། སྐལ་བཟང་སྦྱིན་པ།
