ཨ་རིའི་གྲོས་ཚོགས་གོང་མས་རྒྱ་ནག་གི་མཉེན་ཆས་ཊིག་ཊོག་བཀག་སྡོམ་གྱི་ཁྲིམས་འཆར་ལ་རྒྱབ་སྐྱོར་བྱས་ཏེ། སྲིད་འཛིན་གྱིས་མཚན་རྟགས་བསྐྱོན་རྗེས་ཊིག་ཊོག་དངོས་སུ་བཀག་སྡོམ་བྱ་རྒྱུ་ཡིན་འདུག
Why does US want to ban TikTok? (Photo by OLIVIER DOULIERY / AFP)(AFP)
ཁ་སང་ཨ་རིའི་གྲོས་ཚོགས་འོག་མའི་ནང་བྷའེ་ཌན་སྲིད་གཞུང་གིས་ཡུ་ཁེ་རེན་དང་། ཨི་སི་རེལ། ཐེ་ཝན་བཅས་ལ་ཁྱོན་ཨ་སྒོར་ཐེར་འབུམ་ ༩༥ ཡི་རོགས་དངུལ་སྤྲོད་རྒྱུ་གཏན་འབེབས་བྱུང་ཡོད་པའི་ཁྲོད། ཨ་རིའི་ཕྱི་སྲིད་ལས་དོན་དང་བདེ་འཇགས་སོགས་ལ་དམིགས་ནས་ཊིག་ཊོག་གིས་ལོ་གཅིག་གི་ནང་ཚུད་དུ་བཟོ་ཚོང་ཁང་གི་བདག་དབང་རྗེས་བསྒྱུར་མ་ཐུབ་པའམ། རྒྱ་ནག་གཞུང་དང་ཚོང་གཉེར་ཁང་དེ་ལོགས་སུ་ཁེ་གཉེར་བྱེད་མ་ཐུབ་ཚེ། ཨ་རིས་ཊིག་ཊོག་བཀག་སྡོམ་བྱ་རྒྱུ་ཡིན་པའི་གྲོས་གཞིར་རྒྱབ་སྐྱོར་ཐོབ་ཡོད་ཀྱང་། ཊིག་ཊོག་ལས་ཁུངས་ཀྱིས་ཨ་རིའི་ཐག་གཅོད་དེར་ངོ་རྒོལ་བྱེད་ཀྱིན་ཡོད་འདུག
དེའི་ཐད་ཊིག་ཊོག་བརྡ་འཕྲིན་ཁང་གིས་ངོ་རྒོལ་བསྒྲགས་གཏམ་ཞིག་སྤེལ་བའི་ནང་། ཨ་རིའི་གྲོས་ཚོགས་འོག་མས་ཕྱི་སྲིད་ཀྱི་ལས་དོན་དང་འགྲོ་བ་མིའི་ཐོབ་ཐང་ལ་སེམས་ཁུར་གྱི་ཐོག་ནས་བསྐྱར་དུ་ཊིག་ཊོག་བཀག་སྡོམ་བྱ་རྒྱུར་རྒྱབ་སྐྱོར་བྱས་པ་དེས། ཨ་རིའི་མི་གྲངས་ས་ཡ་ ༡༧༠ ཙམ་གྱི་སྨྲ་བརྗོད་ཀྱི་རང་དབང་ལ་རྡོག་རོལ་བཏང་ཡོད་ལུགས་དང་། ཨ་སྒོར་ཐེར་འབུམ་ ༧༠ ལྷག་གི་ཁེ་བཟང་ཡོད་པའི་མཉེས་ཆས་ཤིག་སྒོ་རྒྱག་ཏུ་བཅུག་ཡོད་སྐོར་སོགས་བསྒྲགས་འདུག
སྤྱིར་འདས་པའི་ལོ་ཤས་རིང་རྒྱ་ནག་གཞུང་གིས་ཆེད་གཉེར་བྱས་པའི་ཊིག་ཊོག་བརྒྱུད་རྒྱལ་ཁབ་གཞན་གྱི་ཚན་རིག་ལག་རྩལ་རྐུ་ཁྱེར་དང་ཉུལ་ཞིབ་བྱེད་ཀྱི་ཡོད་པའི་གནས་ཚུལ་མང་དག་ཅིག་ཐོན་ཡོད་སྟབས། རྒྱ་གར་དང་དབྱིན་ཡུལ། ཡུ་རོབ་མཐུན་ཚོགས་ཀྱི་ཚོགས་མི་རྒྱལ་ཁབ་སོགས་ཀྱིས་རྒྱལ་ཁབ་སོ་སོའི་བདེ་འཇགས་དང་བརྟན་བརླིང་སོགས་ལ་དམིགས་ནས་ཊིག་ཊོག་གཙོས་རྒྱ་ནག་གི་མཉེན་ཆས་མང་པོ་ཞིག་བཀག་སྡོམ་བྱས་ཡོད་པ་མ་ཟད། རྒྱ་གར་གཞུང་གིས་རྒྱ་གར་རྒྱལ་ཡོངས་སུ་མི་གྲངས་ས་ཡ་མང་པོས་སྤྱོད་བཞིན་པའི་རྒྱ་ནག་གི་མཉེན་ཆས་ ༢༧༣ བཀག་སྡོམ་བྱས་ཡོད་ཅིང་། འདས་པའི་ལོ་ཤས་གོང་ནས་ཨ་རིའི་གྲོས་ཚོགས་ནང་ཊིག་ཊོག་གིས་ཨ་རིའི་གསང་བའི་ལས་དོན་སོགས་ལ་སོ་ཉུལ་བྱེད་ཀྱི་ཡོད་པའི་ཐད་དྲང་ལྡོག་གཉིས་ཀྱི་ཐད་ནས་གླེང་སློང་ཤུགས་ཆེན་བྱས་ཡོད་ཅིང་། ཊིག་ཊོག་དང་འབྲེལ་བའི་གྲོས་ཆོད་དེ་ཨ་རིའི་གྲོས་ཚོགས་གོང་མར་རྒྱབ་སྐྱོར་ཐོབ་ནས་ཨ་རིིའི་སྲིད་འཛིན་བྷའེེ་ཌན་གྱིས་མཚན་རྟགས་བརྒྱབ་རྗེས་ཨ་རིའི་ཁྲིམས་ཆགས་ཀྱི་ཡོད་འདུག
ཕྱི་ལོ་ ༢༠༡༨ ལོའི་ཟླ་ ༧ ཚེས་ ༣ ཉིན་ཨིན་དྷུ་ནི་ཞི་ཡ་ (Indonesia) རྒྱལ་ཁབ་ཀྱིས་ཉིན་གྲངས་ ༨ རིང་མཉེན་ཆས་དེ་བཀག་སྡོམ་བྱས་པར་བརྟེན། མཉེན་ཆས་གཙོ་གཉེར་བས་ཁྲིམས་ཁང་གི་བཀའ་རྒྱ་ཇི་བཞིན་མཉེན་ཆས་ལ་བསྐྱར་བཅོས་བྱས་ཏེ་བསྐྱར་དུ་བཀོལ་སྤྱོད་ཆོག་པ་བཟོས་ཡོད་འདུག ཕྱི་ལོ་ ༢༠༡༩ ཟླ་ ༢ པའི་ཚེས་ ༢༧ ཉིན་ཨ་རིའི་ཚོང་དོན་ལྷན་ཁང་ (The Federal Trade Commission) གིས། བྷའེ་ཊི་ཌན་སི་(Bytedance)འཕྲུལ་རིག་བཟོ་ཚོང་ཁང་གིས་ཊིག་ཊོག་བརྒྱུད་མཉེན་ཆས་བཀོལ་སྤྱོད་པའི་གནས་ཚུལ་བསྡུ་ལེན་བྱེད་ཀྱི་ཡོད་པའི་ནག་ཉེས་བཙུགས་ཏེ། བཟོ་ཚོང་ཁང་དེར་ཨ་སྒོར་ས་ཡ་ ༥།༧ གྱི་ཉེས་ཆད་བཅད་ཡོད་པ་རེད།
ཕྱི་ལོ་ ༢༠༢༤ ནང་ཨ་རིར་ཊིག་ཊོག་བེད་སྤྱོད་གཏོང་མཁན་མི་གྲངས་ས་ཡ་ ༡༧༠ ལྷག་ཡོད་པའི་ཁྲོད། ལོ་ ༡༠ ནས་ ༡༩ བར་བེད་སྤྱོད་གཏོང་མཁན་གྱི་བརྒྱ་ཆ་ ༢༥ དང་། ལོ་ ༢༠ ནས་ ༢༩ བར་བརྒྱ་ཆ་ ༢༢།༤། ལོ་ ༣༠ ནས་ ༣༩ བར་བརྒྱ་ཆ་ ༢༡།༧། ལོ་ ༤༠ ནས་ ༤༩ བར་བརྒྱ་ཆ་ ༢༠། ༣ དང་ལོ་ལྔ་བཅུ་ཡན་གྱི་བེད་སྤྱོད་གཏོང་མཁན་བརྒྱ་ཆ་ ༡༡ བཅས་ཡིན་འདུག་ལ། དེའི་ཁྲོད་བུད་མེད་བརྒྱ་ཆ་ ༥༣།༧༩ དང་སྐྱེས་པ་ ༤༦།༢༡ བཅས་ཡོད་འདུག
ཊིག་ཊོག་ཅེས་པའི་དྲ་རྒྱའི་མཉེན་ཆས་དེ་ནི་རྒྱ་ནག་རྒྱལ་ས་པེ་ཅིན་དུ་རྟེན་གཞི་བྱས་པའི་བྷའེ་ཊི་ཌན་སི་དྲ་ལམ་འཕྲུལ་རིག་བཟོ་ཚོང་ཁང་གིས། ཕྱི་ལོ་ ༢༠༡༦ ལོར་འཁྱུད་ཡིང་(Douyin) ཞེས་པའི་མིང་ཐོག་ནས་རྒྱ་ནག་ནང་ཐོག་མར་འགྲེམས་སྤེལ་བྱས་ཡོད་པ་དང་། ལོ་གཅིག་གི་རྗེས་སུ་ཊིག་ཊོག་ཅེས་པའི་མིང་ཐོག་ནས་རྒྱལ་སྤྱིའི་ཁྲོམ་རའི་ནང་འགྲེམས་སྤེལ་བྱས་ཏེ། རྒྱ་གར་དང་ཨ་རི་གཙོས་པའི་རྒྱལ་ཁབ་མང་པོའི་ནང་དར་ཁྱབ་ཆེན་པོ་ཆགས་ནས་ད་ལྟའི་ཆར་དངོས་སུ་མཉེན་ཆས་བཀོལ་སྤྱོད་བྱེད་མཁན་ས་ཡ་ ༥༠༠ ལྷག་དང་། འཛམ་གླིང་གི་སྐད་ཡིག་ ༧༥ ཙམ་ནང་ཕབ་བསྒྱུར་བྱས་ཚར་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
