བོད་པ་ཨ་མའི་ཐབ་ཚང་ལ་ལྡི་ལིའི་ཟ་ཁང་ཡག་ཤོས་ཀྱི་གཟེངས་རྟགས་ཐོབ།

རྒྱ་གར་རྒྱལ་ས་ལྡི་ལིར་ཡོད་པའི་བོད་པ་ཨ་མའི་ཐབ་ཚང་ལ་ལྡི་ལི་ཁུལ་གྱི་ཟ་ཁང་ཡག་ཤོས་ཀྱི་གཟེངས་རྟགས་དང་དབང་ལྡན་ཇ་ཁང་ལ་འདུག་ས་ཡག་ཤོས་ཀྱི་གཟེངས་རྟགས་ཐོབ་ཡོད་འདུག

རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་མེ་རི་ཊི་གཟེངས་རྟགས་དང་ཁྲོམ་ར་ཞིབ་འཇུག་ལྟེ་གནས་ཁང་ (Merit Awards and Market research) གིས། ལོ་ལྟར་རྒྱ་གར་རྒྱལ་ཡོངས་སུ་ཤེས་ཡོན་དང་འཕྲོད་བསྟེན། སྨན་སོགས་ཀྱི་ཐོག་གཟེངས་སུ་ཐོན་མཁན་རྣམས་ལ་གཟེངས་རྟགས་སྤྲོད་སྲོལ་ཡོད་པ་ལྟར། ཁ་སང་ཕྱི་ཚེས་ ༣༠ ཉིན་བོད་པ་ཨ་མའི་ཐབ་ཚང་(TM Kitchen ) ལ་ལྡི་ལི་ཁུལ་གྱི་ཟ་ཁང་ཡག་ཤོས་( Best Restaurant in Delhi) དང་། དབང་ལྡན་ཇ་ཁང་ལའང་བྱ་དགའ་ཞིག་ཐོབ་འདུག

དེའི་ཐད་བོད་པ་ཨ་མའི་ཐབ་ཚང་གི་སྦྱིན་བདག་བཀྲ་ཤིས་རྒྱ་མཚོ་ལགས་ཀྱིས་འདི་གའི་གསར་འགོད་པར། འདི་ལོར་ལྟེ་གནས་ཁང་དེས་ཟས་རིགས་ཐོག་ལ་གཟེངས་སུ་ཐོན་མཁན་གྱི་ཟ་ཁང་དང་ཇ་ཁང་སོགས་ལ་བྱ་དགའ་སྤྲད་ཡོད་པ་ལྟར། རྒྱ་གར་རྒྱལ་ཡོངས་ཀྱི་ཟ་ཁང་དང་ཇ་ཁང་མི་འདྲ་བ་བཞི་བཅུ་ལྷག་ལ་རྣམ་གྲངས་མི་འདྲ་བ་མང་པོ་ཞིག་གི་ཐོག་ལ་བྱ་དགའ་ཐོབ་ཡོད་པའི་ཁྲོད། ཨ་མའི་ཐབ་ཚང་ལ་རྒྱལ་ས་ལྡི་ལི་ཁུལ་གྱི་ཕྱོགས་ཡོངས་ནས་ཟ་ཁང་ཡག་ཤོས་ཀྱི་བྱ་དགའ་ཐོབ་ཡོད་སྐོར་དང་། ཨ་མའི་ཐབ་ཚང་གིས་རྒྱ་གར་གཞུང་ལ་ཁྲིམས་མཐུན་གྱི་ཐོག་ནས་དེབ་སྐྱེལ་བྱས་ཡོད་པས་ད་ལན་གཟེངས་རྟགས་ཐོབ་པ་དེས། ཟ་ཁང་གི་ཚོང་ལ་འཕེལ་རྒྱས་ངེས་ཅན་ཞིག་འགྲོ་སྲིད་པ་མ་ཟད། ཚོང་གི་སྡིངས་ཆའི་ཁྲོད་ཟ་ཁང་ལ་གདེང་འཇོག་མི་དམན་པ་ཞིག་ཐོབ་པའི་ཁེ་ཕན་ཡོད་སྐོར་སོགས་བརྗོད་བྱུང་།

ཡང་ཁོང་གིས། ད་ལན་བོད་པ་ཨ་མའི་ཐབ་ཚང་ལ་གཟེངས་རྟགས་ཐོབ་པ་དེས། ཟ་ཁང་གི་ཚོང་ལ་ཁེ་ཕན་ཆེན་པོ་ཡོད་པ་མ་ཟད། མ་འོངས་པར་མུ་མཐུད་རྒྱ་གར་རྒྱལ་ཡོངས་ནང་ཡན་ལག་ཟ་ཁང་གང་མང་འཛུགས་རྒྱུའི་ཐད་ལ་འཆར་གཞི་དང་ཤུགས་སྣོན་རྒྱག་མུས་ཡིན་སྐོར་དང་། སྤྱིར་འདས་པའི་ལོ་ཤས་གོང་ནས་ལྡི་ལི་ཁུལ་གྱི་བོད་པའི་ཟ་ཁང་སོགས་སུ་ཡོང་མཁན་ཇེ་མང་དུ་འགྲོ་མུས་ཡིན་པས། ད་ལན་ལྡི་ལི་ཁུལ་ནས་མཚན་མཐོང་འདི་འདྲ་ཞིག་ཐོབ་པ་དེས། ལྡི་ལི་ཁུལ་གྱི་བོད་པའི་ཟ་ཁང་དང་ཇ་ཁང་སོགས་ལ་ཚོང་གི་ཐོག་ནས་ཤུགས་རྐྱེན་ངེས་ཅན་ཞིག་ཐེབས་ཀྱི་ཡོད་སྐོར་སོགས་བརྗོད་བྱུང་།

དེ་བཞིན་འདི་གའི་གསར་འགོད་པས་ཁ་པར་བརྒྱུད་དབང་ལྡན་ཇ་ཁང་གི་སྦྱིན་བདག་ལ་ཁ་པར་བཏང་ཡང་མཐུད་ཐུབ་མ་སོང་ཡང་། རྒྱུས་ལོན་བྱུང་བ་ལྟར་ན། དབང་ལྡན་ཇ་ཁང་ལ་ལྡི་ལི་ཁུལ་གྱི་ཇ་ཁང་འདུག་ས་ཡག་ཤོས་ཀྱི་བྱ་དགའ་ཐོབ་པ་ཞིག་ཡིན་འདུག

བོད་པ་ཨ་མའི་ཐབ་ཚང་ནི་ཕྱི་ལོ ༢༠༢༡ ཟླ་ ༨ ཚེས་ ༡ ཉིན་བོད་ནས་ཡོང་མཁན་གྱི་ཕོ་སར་ཁག་ཅིག་གིས་མཉམ་འབྲེལ་ཐོག་ནས་བཙུགས་པ་ཞིག་ཡིན་འདུག་ལ། ད་ལྟའི་ཆར་རྒྱ་གར་གྱི་གྲོང་ཁྱེར་པུ་ནེ་(Pune) དང་མུམ་བྷེ་(Mumbai) གཉིས་སུ་ཡན་ལག་ཟ་ཁང་གཉིས་ཡོད་པ་དང་། མ་འོངས་པར་རྒྱ་གར་རྒྱལ་ཡོངས་སུ་ཡན་ལག་ཟ་ཁང་གང་མང་འཛུགས་ཐབས་བྱ་རྒྱུ་ཡིན་འདུག

ཕྱི་ལོ ༢༠༢༢ ཟླ་  ༧  ཚེས་ ༢༤ ཉིན་ལྡི་ལིའི་སྤྱི་ཁྱབ་བློན་ཆེན་ཨར་ཝེན་ཀེ་ཇེ་བལ་(Arvind Kejriwal )ལགས་ཀྱིས། མན་ཇུ་ནི་ཀ་ཊི་ལ ( Majnu Ka Tila) བོད་མིའི་གཞིས་སྒར་ཁུལ་དང་ཅན་ཏ་ནི་ཅོཀ་( Chandni Chowk ) གཉིས་ལྡི་ལི་གྲོང་ཁྱེར་གྱི་གཞི་རྒྱ་ཆེ་བའི་ཟས་རིགས་ཀྱི་ལྟེ་གནས་ཤིག་ཏུ་འཛུགས་སྐྲུན་བྱས་ཏེ་ལས་མེད་མི་མང་འབུམ་ ༢༠ ལྷག་ལ་ལས་ཀའི་གོ་སྐབས་བསྐྲུན་རྒྱུ་ཡིན་སྐོར་བསྒྲགས་ཡོད་པ་རེད། སྤྱིར་བཏང་ཟས་རིགས་ལྟེ་གནས་ཀྱི་འཛུགས་སྐྲུན་འདི་ནི་རྒྱ་གར་རྒྱལ་ཡོངས་ཀྱི་གཞི་རྒྱ་ཆེ་བའི་ལས་གཞི་ཞིག་ཡིན་པ་མ་ཟད། མ་འོངས་པར་རྒྱ་གར་གྱི་ཟས་རིགས་ཚོང་ལས་ཀྱི་རིམ་པ་དང་པོའི་ཁོངས་སུ་ཚུད་ཐབས་གནང་གི་ཡོད་པ་རེད།

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།